Murli du jour du dimanche 25 mai 2025

25-05-25 praatahmurli om shanti ''avyakt-baapdaada'' revise 04-09-05 madhuban

shiksha ke saath kshama aur raham ko apna lo, duaayen do, duaayen lo to aapka ghar aashram ban jaayega

aaj baapdaada sarva bachchon ke mastak mein purity ki rekhaayen dekh rahe hain kyonki brahman jeevan ka foundation hi hai pavitrata। pavitrata ki rekhaayen kaun si hain, jaante ho? pavitrata sarva ko priy hai। pavitrata sukh, shanti, prem, aanand ki janni hai। pavitrata maanav ka sachcha shrringaar hai। pavitrata nahin to maanav jeevan ka moolya nahin। jaise dekhte ho devtaayen pavitra hain, isliye hi maanneey aur poojyaneey hain। pavitrata nahin to maanav jeevan ko aajkal dekh rahe ho। baapdaada ne aap sabhi bachchon ko brahman janma ka vardaan yahi diya - pavitra bhav, yogi bhav। jis aatma mein pavitrata hai, uski chaal, chalan, chehra chamakta hai isliye pavitrata hi jeevan ko shreshtha banaane vaali hai। vaastav mein aap sab bachchon ka aadi swaroop hi pavitrata hai। anaadi swaroop bhi pavitrata hai। aisi pavitra aatmaon ki visheshtaayen unki jeevan mein sada pavitrata ki personality dikhaai deti hai। pavitrata ki reality, pavitrata ki royalty chehre aur chaal mein dikhaai deti hai। yeh rekhaayen jeevan ka shrringaar hain। reality hai - main anaadi aadi swaroop is smriti se samartha ban jaata hai। royalty hai - svayan bhi svamaan mein aur har ek ko sammaan dekar chalne vaala। personality hai - sada santushtata aur prasannata। svayan bhi santushta aur anya ko bhi santushta karne vaale। pavitrata se praaptiyaan bhi bahut hain। baapdaada ne aap sabhi bachchon ko kya-kya praapti karaai hai, woh jaante ho na! kitne khajaanon se bharpoor kiya hai, agar praaptiyon ko smriti mein rakhen to bharpoor ho jaaen।

sabse pahla khajaana diya hai - gyaan ka khajaana। jisse jeevan mein rehte duhkh ashaanti se mukta ho jaate। vyartha sankalp, nige-tiv sankalp, vikalpa, vikarma se mukta ho jaate hain। agar koi bhi vyartha sankalp va vikalpa aata bhi hai, to gyaan ke bal se vijayi ban jaate hain।

doosra khajaana hai - yaad, yog। jisse shaktiyon ki praapti hoti hai aur shaktiyon ke aadhaar se sarva samasyaaon ko, sarva vighnon ko sahaj paar kar lete hain।

teesra khajaana hai - dhaarnaaon ka, jisse sarva gunon ki praapti hoti hai। aur chautha khajaana hai - seva ka, jisse seva karne se, jiski seva karte ho uski duaayen milti hain, khushi praapta hoti hai।

itne khajaane baap dvaara sabhi bachchon ko praapta hote hain। baap sabhi ko ek jaise hi khajaane dete hain, koi ko kam, koi ko jyaada nahin dete hain। lekin lene vaalon mein farka ho jaata hai। koi bachche to khajaane ko praapta kar khaate, peete, mauj karte aur phir mauj mein khatma kar dete hain। aur koi bachche khaate, peete, mauj karte jama bhi karte hain। aur koi bachche kaarya mein bhi lagaate lekin badhaate jaate hain। badhaane ki chaabi hai - khajaane ko sva ke prati aur doosron ke prati use karna। jo use karta hai woh badhaata hai। to apne aapse poochho ki yeh vishesh khajaane jama hain? jama hain, kya kahenge? haan ya thoda-thoda? jiske paas yeh khajaane jama hai woh sada bharpoor rehta hai। dekho koi bhi cheez bharpoor rehti hai na, to halchal nahin hoti hai। agar bharpoor nahin hoti to halchal hoti hai, hilti hai। koi bhi cheez ko agar poori reeti se bhar nahin do to woh hilti hai to yahaan bhi agar sarva khajaanon se bharpoor nahin hain, to halchal hoti hai। sada yeh nasha rahe ki baap ke khajaane mera janma siddha adhikaar hai। baap ne diya, aapne liya to sab khajaane kiske hue? aapke ho gaye na। to jiske paas khajaane hain, woh kitna nashe mein rehta hai? jaise chhota sa raaja ka ladka raaj-kumaar hota hai, pata bhi nahin hota hai ki baap ke paas kya-kya khajaana hai lekin nasha rehta hai ki baap ke khajaane mere khajaane hain aur khajaane ki khushi mein rehta hai। agar khushi kam rehti hai to uska kaaran kya hota hai? baap ne to khajaane diye hain, suna। lekin ek hain sunne vaale, doosre hain samaane vaale, jo samaane vaale hain woh nashe mein rehte hain।

aaj naye-naye bachche bhi aaye hain। baapdaada aap lucky bachchon ko aap sabke bhaagya ki mubaarak de rahe hain। apne bhaagya ko pahchaana! pahchaana hai? parmaatma pyaar, avinaashi pyaar jo sirf ek janma nahin chalta, anek janma sada hi pyaar kaayam rehta hai kyonki yeh jo samay chal raha hai, yeh samay bhi sangamayug bhaagyavaan yug hai। satayug ko bhi bhaagyavaan kehte hain lekin vartamaan sangamayug ka samay usse bhi bhaagyavaan hai। kyon? is sangamayug mein hi baap dvaara akhanda bhaagya ka vardaan, varsa praapta hota hai। to aise sangamayug mein, bhaagyavaan samay mein aap sabhi apna bhaagya lene ke liye pahunch gaye ho। baapdaada bachchon ko bahut ek sahaj purushaartha ki vidhi sunaate hain - sahaj chaahte ho na! mushkil to nahin chaahte ho na! in bachchon ko (puraanon ko) to bhaagya ki sahaj vidhi mil gai hai। mili hai na? sabse sahaj, aur kuchh bhi nahin karna, sirf ek baat karna, ek baat to kar sakte ho na! haan karo ya na karo! kaho haan ji। to sabse sahaj vidhi hai - amritvele se leke sabko jo bhi mile, usse duaayen lo aur duaayen do। chaahe krodhi bhi aave, lekin aap usko bhi duaayen do aur duaayen lo kyonki duaayen teevra purushaartha ka bahut sahaj yantra hain। jaise science mein rocket hai na - to kitna jaldi kaarya kar leta hai। aise duaayen dena aur duaayen lena, yeh bhi ek bahut sahaj saadhan hai aage badhne ka। amritvele baap se sahaj yaad se duaayen lo aur saara din duaayen do aur duaayen lo, yeh kar sakte ho? kar sakte ho to haath uthaao। koi baddua de to kya karenge? aapko baar-baar tang kare to? dekho, aap paramatma ke bachche daata ke bachche daata ho na! master daata to ho। to daata ka kaam kya hota hai? dena। to sabse achhi cheez hai duaayen dena। kaisa bhi vyakti ho, lekin hai to aapka bhaai, behen। paramatma ke bachche to bhaai-behen ho na! to paramatma ka bachcha hai, mera eeshvareey bhaai hai, eeshvareey behen hai, usko kya denge! baddua denge kya? baap kabhi baddua deta hai! dega? deta hai? haan ya na? haan-na karo। bahut khush rahenge। kyon? agar baddua vaale ko bhi aap dua denge, woh de na de, lekin aap dua lenge, to duhkh kyon hoga। baapdaada aap aaye hue bachchon ko ek vardaan deta hai - vardaan yaad rakhenge to sada khush rahenge। vardaan sunaayen? sunenge!

vardaan hai - agar aapko koi duhkh de to bhi aap duhkh lena nahin, woh de lekin aap nahin lena। kyonki dene vaale ne de diya, lekin lene vaale to aap ho na! dene vaala, lene vaala nahin hai। agar woh buri cheez deta hai, duhkh deta hai, ashaanti deta hai, to buri cheez hai na। aapko duhkh pasanda hai? nahin pasanda hai na! to buri cheez ho gai na। to buri cheez li jaati hai kya? koi aapko buri cheez deve to aap le lenge? lenge? nahin lenge। to lete kyon ho? le to lete ho na! agar duhkh le lete ho to duhkhi kaun hota hai? aap hote ho ya woh hota hai? lene vaala jyaada duhkhi hota hai। agar abhi se duhkh lenge nahin to aadha duhkh to aapka door ho gaya, lenge hi nahin na! aur aap duhkh ke bajaae usko sukh denge to duaayen milegi na। to sukhi bhi rahenge aur duaaon ka khajaana bhi bharpoor hota jaayega। har aatma se, kaisi bhi ho aap duaayen lo। shubh bhaavna, shubh kaamna rakho। kabhi-kabhi kya hota hai? koi aisa kaam karta hai na, to koshish karte hain shiksha dene ki। isko theek kar doon, shiksha dete ho। shiksha do lekin shiksha dene ki sarvottam vidhi hai ki kshama ka roop banke shiksha do। sirf shiksha nahin do, raham kshama bhi karo aur shiksha bhi do। do shabd yaad rakho - shiksha aur kshama, raham। agar merciful banke usko shiksha denge to aapki shiksha kaam karegi। agar merciful banke nahin denge, to shiksha ek kaan se sunenge doosre kaan se nikal jaayegi। shiksha dhaaran nahin hogi। aise hai na? anubhav hai? aap bhi kiska shikshak to nahin ban jaate? shikshak banna jaldi aata hai lekin kshama karna, donon saath-saath chaahiye। abhi se raham, raham karne ki vidhi hai shubh bhaavna, shubh kaamna। jaise kehte hain na sachcha pyaar, patthar ko bhi paani kar deta hai… aise hi kshama swaroop se shiksha dene se aapka kaarya jo chaahte ho yeh nahin kare, yeh nahin ho, woh pratyaksha dikhaai dega। aapke merciful ban shiksha dene ka prabhaav uski kathor dil bhi parivartan ho jaayegi। to kya vardaan mila? na duhkh dena, na duhkh lena। pasanda hai? pasanda hai to abhi lena nahin। galti nahin karna। jab baap duhkh nahin deta to follow father to karna hai na? kar rahe hain! kabhi-kabhi thoda daant dete ho। daantana nahin। raham karo। raham ke saath shiksha do। baar-baar kisko daantane se aur hi aatma jo hai na, woh dushman ban jaati hai। ghrina aa jaati hai। parmaatma bachche ho na! to jaise baap patit ko bhi paavan banaane vaala hai, to aap duhkhi ko sukh nahin de sakte ho? abhi jaakar trial karna, trial karenge na! to pahle charity begins at hom, parivaar mein agar koi duhkh deve, to bhi duhkh lena nahin। duaayen dena, merciful banna, pahle ghar vaalon ko karo। aapke ghar ka prabhaav mohalle mein padega, mohalle ka prabhaav desh mein padega, desh ka prabhaav vishwa mein padega। sahaj hai na! apne parivaar mein shuru karo kyonki dekho ek bhi agar krodh karta hai to ghar ka vaataavran kya ho jaata hai? ghar lagta hai ya yuddha ka maidaan lagta hai? us samay achha lagta hai? nahin lagta hai na!

aap logon ke liye bhi hai (aaj vi.aai.peez ke saath madhuban vaale samarpit bhaai bahinen bhi saamne baithe hain) apne-apne saathiyon se, apne apne kaarya kartaaon se na duhkh lena, na duhkh dena। duaayen dena aur duaayen lena। agar aap adhikaar se aise samay par bhi dil se mera baba kahenge, paramatma baba, mera baba... to kahaavat hai ki bhagwan sada haazir hai। agar aapne dil se, adhikaar roop mein aise samay par mera baba kaha, to baap hazoor haazir ho jaayega, kyonki baap kislie hai? bachchon ke liye to hai। aur adhikaari bachche ko baap sahayog nahin de, yeh ho hi nahin sakta hai। asambhav। to parivartan karke jaana। jaise aaye, vaise nahin jaana। parivartan karke hi jaana kyonki dekho, itna kharcha karke aaye ho, ticket to lagi na। kharcha bhi kiya, samay bhi diya to uski value to rakhenge na! to value hai - sva parivartan se pahle ghar ka parivartan, phir vishwa ka, desh ka parivartan। aapka ghar aashram ban jaaye। ghar nahin, aashram। vaise shaastra bhi kehte hain grihastha aashram, lekin aaj aashram nahin hain। aashram alag hain, ghar alag hain। to ghar ko aashram banaana। duaayen dena aur lena yeh aashram ka kaarya hai। aapka ghar mandir ban jaayega। mandir mein moorti kya karti hai? duaayen deti hai na! moorti ke aage jaakar kya kehte hain? dua do। mercy, mercy kahke chillaate hain। to aapko bhi kya dena hai? dua। eeshvareey pyaar do, aatmik pyaar। shareer ka pyaar nahin aatmik pyaar। aaj pyaar hai to svaartha ka pyaar hai। sachchi dil ka pyaar nahin hai। svaartha hoga to pyaar denge, svaartha nahin hoga to don't care। to aap kya karenge? aatmik pyaar dena, dua dena, duhkh na lena, na duhkh dena। dekho aapko chance mila hai, baapdaada ko bhi khushi hai। itne jo bhi sab aaye hain, (bhaarat ke kareeb 250 vi.aai.peej retreat mein aaye hue hain) itne ghar to aashram banenge na। banaayenge na? pakka? ki thoda-thoda kachcha? jo samajhte hain kuchh bhi ho jaae, thoda sahan to karna padega, samaane ki shakti kaarya mein lagaani padegi, lekin sahanshakti ka phal bada meetha hota hai। sahan karna padta hai lekin phal bada meetha hota hai। to jo pakka vaayda karte hain, ghar-ghar ko svarga banaayenge, mandir banaayenge, aashram banaayenge, woh haath uthaao। dekha-dekhi mein nahin uthaana kyonki baapdaada hisaab lega na phir। dekhkar nahin uthaana। sachcha-sachcha man ka haath, man se haath uthaao। achha। daadiyaan, inko iski kya prize denge? haan bolo, daadi itne mandir ban jaayenge to aap usko kya prize dengi? (apne ghar vaalon ko le aaven) yeh to prize nahin di, yeh to kaam suna diya। (baba jo aagya karenge) dekho prize to aapko mil jaayegi, koi badi baat nahin hai, lekin... lekin hai? lekin bolen। aap jaane ke baad apni dhaarna se parivartan karna aur 15 din ke baad, maas ke baad apni result likhna, jo ek maas bhi duhkh nahin lega, na dega, usko bahut achhi prize denge। agar aap aayenge to mubaarak hai, agar nahin aa sakenge to bhi centre par bhejenge। achha।

chaaron or ke desh videsh ke bachchon ki yaad baapdaada ko mili hai। chaahe phone dvaara yaad bheji hai, chaahe patra dvaara, chaahe dil mein yaad kiya hai, to baapdaada sabhi bachchon ko chaahe bhaarat ke, chaahe videsh ke return mein duaayen aur yaadapyaar padamguna de rahe hain।

chaaron or ke parmaatma pyaar ke adhikaari bachchon ko, chaaron or sarva khajaanon se bharpoor, nirvighna, nirvikalp, niravyartha sankalp rahne vaali shreshtha aatmaon ko, saath-saath sarva parivartan karne aur karaane ke umang-utsaah mein udne vaale bachchon ko, saath-saath baapdaada ko sachchi dil ka samaachaar dene vaale sachche dil vaale bachchon ko vishesh dilaaraam ke roop mein, baap ke roop mein, shikshak ke roop mein, satguru ke roop mein padamguna yaadapyaar aur namaste।

vardaan:- bhatakti hui aatmaon ko yathaartha manzil dikhaane vaale chaitanya light-might house bhav

kisi bhi bhatakti hui aatma ko yathaartha manzil dikhaane ke liye chaitanya light-might house bano। iske liye do baaten dhyaan par rahen -1-har aatma ki chaahna ko parakhna, jaise yogya doctor use kaha jaata hai jo nabja ko jaanta hai, aise parakhne ki shakti ko sada use karna। 2-sada apne paas sarva khajaanon ka anubhav kaayam rakhna। sada yeh lakshya rakhna ki sunaana nahin hai lekin sarva sambandhon ka, sarva shaktiyon ka anubhav karaana hai।

slogan:- doosron ki correction karne ke bajaae ek baap se theek connection rakho।

avyakt ishaare - roohaani royalty aur purity ki personality dhaaran karo

apna niji-swaroop va vardaani swaroop sada smriti mein rahe to apvitrata aur vismriti ka naam-nishaan samaapta ho jaayega। vismriti va apvitrata kya hoti hai, ab iski avidya honi chaahiye kyonki yeh sanskaar va swaroop aapka nahin hai balki aapke poorva janma ka tha। abhi aap brahman ho, ye to shoodron ke sanskaar va swaroop hai, aise apne se bhinna arthaat doosre ke sanskaar anubhav hona, isko kaha jaata hai - nyaara aur pyaara।