Murli du jour du lundi 2 juin 2025

02-06-2025 praatahmurli om shanti "baapdaada"' madhuban

“meethe bachche - yaad mein raho to door hote bhi saath mein ho, yaad se saath ka bhi anubhav hota hai aur vikarma bhi vinaash hote hain''

prashn:- doordeshi baap bachchon ko dooraandeshi banaane ke liye kaun-sa gyaan dete hain?

uttar:- aatma kaise chakra mein bhinna-bhinna varnon mein aati hai, iska gyaan dooraandeshi baap hi dete hain। tum jaante ho abhi ham brahman varna ke hain iske pahle jab gyaan nahin tha to shoodra varna ke the, uske pahle vaishya… varna ke the। doordesh mein rahne vaala baap aakar yeh dooraandeshi banne ka saara gyaan bachchon ko dete hain।

geet:- jo piya ke saath hai.....

om shanti। jo gyaan saagar ke saath hai unke liye gyaan barsaat hai। tum baap ke saath ho na। bhal vilaayat mein ho va kahaan bhi ho, saath ho। yaad to rakhte ho na। jo bhi bachche yaad mein rehte hain, vo sadaiv saath mein hain। yaad mein rahne se saath rehte hain aur vikarma vinaash hote hain phir shuru hota hai vikarmaajeet sanvat। phir jab raavan raajya hota hai tab kehte hain raaja vikram ka sanvat। woh vikarmaajeet, woh vikrami। abhi tum vikarmaajeet ban rahe ho। phir tum vikrami ban jaayenge। is samay sabhi ati vikarmi hain। kisko bhi apne dharma ka pata nahin hai। aaj baba ek chhota-sa prashn poochhte hain - satayug mein devtaayen yeh jaante hain ki ham aadi sanaatan devi-devta dharma ke hain? jaise tum samajhte ho ham hindu dharma ke hain, koi kahenge ham Christian dharma ke hain। vaise vahaan devtaayen apne ko devi-devta dharma ka samajhte hain? vichaar ki baat hai na। vahaan doosra koi dharma to hai nahin jo samjhen ki ham phalaane dharma ke hain। yahaan bahut dharma hain, to pahchaan dene ke liye alag-alag naam rakhe hain। vahaan to hai hi ek dharma isliye kahne ki darkaar nahin rehti hai ki ham is dharma ke hain। unko pata bhi nahin hai ki koi dharma hote hain, unki hi raajaai hai। abhi tum jaante ho ham aadi sanaatan devi-devta dharma ke hain। devi-devta aur koi ko kaha nahin ja sakta। patit hone kaaran apne ko devta kah nahin sakte। pavitra ko hi devta kaha jaata hai। vahaan aisi koi baat hoti nahin। koi se bhent nahin ki ja sakti। abhi tum sangamayug par ho, jaante ho aadi sanaatan devi-devta dharma phir se sthaapan ho raha hai। vahaan to dharma ki baat hi nahin hai। hai hi ek dharma। yeh bhi bachchon ko samjhaaya hai, yeh jo kehte hain - mahaapralay hoti hai arthaat kuchh bhi nahin rehta, yeh bhi wrong ho jaata hai। baap baith samjhaate hain - right kya hai? shaastron mein to jalmai dikha di hai। baap samjhaate hain sivaae bhaarat ke baaki jalmai ho jaati hai। itni badi srishti kya karenge। ek bhaarat mein hi dekho kitne gaanv hain। pahle jangal hota hai phir unse vriddhi hoti jaati hai। vahaan to sirf tum aadi sanaatan devi-devta dharma ke hi rehte ho। yeh tum braahmanon ki buddhi mein baba dhaarna kara rahe hain। abhi tum jaante ho oonch te oonch shivbaaba kaun hai? unki pooja kyon ki jaati hai? ak aadi ke phool kyon chadhaate hain? woh to niraakaar hai na। kehte hain naam roop se nyaara hai, parantu naam roop se nyaari koi cheez to hoti nahin। tab kya hai - jisko phool aadi chadhaate hain? pahle-pahle pooja unki hoti hai। mandir bhi unke bante hain kyonki bhaarat ki aur saari duniya ke bachchon ki service karte hain। manushyon ki hi service ki jaati hai na। is samay tum apne ko devi-devta dharma ke nahin kahla sakte। tumko pata bhi nahin tha ki ham devi-devta the phir abhi ban rahe hain। abhi baap samjha rahe hain to samjhaana chaahiye - yeh knowledge sivaae baap ke koi de na sake। unko hi kehte hain gyaan ka saagar, knowledge-full। gaaya hua hai rachta aur rachna ko rishi-muni aadi koi bhi nahin jaante। neti-neti karte gaye hain। jaise chhote bachche ko knowledge hai kya? jaise bade hote jaayenge, buddhi khulti jaayegi। buddhi mein aata jaayega, vilaayat kahaan hai, yeh kahaan hai। tum bachche bhi pahle is behad ki knowledge ko kuchh bhi nahin jaante the। yeh bhi kehte hain bhal ham shaastra aadi padhte the parantu samajhte kuchh bhi nahin the। manushya hi is drama mein actor hain na।

saara khel do baaton par bana hua hai। bhaarat ki haar aur bhaarat ki jeet। bhaarat mein satayug aadi ke samay pavitra dharma tha, is samay hai apvitra dharma। apvitrata ke kaaran apne ko devta nahin kah sakte hain phir bhi shri shri naam rakha dete hain। lekin shri maana shreshtha। shreshtha kaha hi jaata hai pavitra devtaaon ko। shreemat bhagvaanuvaach kaha jaata hai na। ab shri kaun thahre? jo baap ke sammukh sunkar shri bante hain ya jinhonne apne ko shri shri kahlaaya hai? baap ke kartavya par jo naam pade hain, woh bhi apne oopar rakha diye hain। yeh sab hain rezgaari baaten। phir bhi baap kehte hain - bachchon, ek baap ko yaad karte raho। yahi vasheekran mantra hai। tum raavan par jeet pahan jagatjeet bante ho। ghadi-ghadi apne ko aatma samjho। yeh shareer to yahaan 5 tatvon ka bana hua hai। banta hai, chhootta hai phir banta hai। ab aatma to avinaashi hai। avinaashi aatmaon ko ab avinaashi baap padha rahe hain sangamayug par। bhal kitne bhi vighna aadi padte hain, maaya ke toofaan aate hain, tum baap ki yaad mein raho। tum samajhte ho ham hi satopradhaan the phir tamopradhaan bane hain। tumhaare mein bhi nambarvaar jaante hain। tum bachchon ki buddhi mein hai - hamne hi pahle-pahle bhakti ki hai। zaroor jisne pahle-pahle bhakti ki hai usne hi shiv ka mandir banaaya kyonki dhanvaan bhi woh hote hain na। bade raaja ko dekh aur bhi raajaayen aur praja bhi karenge। yeh sab hain detail ki baaten। ek second mein jeevanmukti kaha jaata hai। phir kitne varsha lag jaate hain samjhaane mein। gyaan to sahaj hai, usmein itna time nahin lagta hai, jitna yaad ki yaatra par lagta hai। pukaarte bhi hain baba aao, aakar hamko patit se paavan banaao, aise nahin kehte ki baba humein vishwa ka maalik banaao। sab kahenge patit se paavan banaao। paavan duniya kaha jaata hai satayug ko, inko patit duniya kahenge, patit duniya kehte hue bhi apne ko samajhte nahin। apne prati ghrina nahin rakhte। tum kiske haath ka nahin khaate ho, to kehte hain ham achhoot hain kya? are, tum khud hi kehte ho na। patit to sab hain na। tum kehte bhi ho ham patit hain, yeh devtaayen paavan hain। to patit ko kya kahenge। gaayan hai na - amrit chhod vish kaahe ko khaae। vish to kharaab hai na। baap kehte hain yeh vish tumko aadi-madhya-ant duhkh deta hai parantu inko poison samajhte thode hi hain। jaise amli amal bigar rah nahin sakta, sharaab ki aadat vaala sharaab bigar rah na sake। ladaai ka samay hota hai to unko sharaab pilaakar nasha chadhaae ladaai par bhej dete hain। nasha mila bas, samjhenge hamko aisa karna hai। un logon ko marne ka dar nahin rehta hai। kahaan bhi bombs le jaakar bomb sahit girte hain। gaayan bhi hai mooslon ki ladaai lagi, right baat abhi tum practical mein dekh rahe ho। aage to sirf padhte the, pet se moosal nikaale phir yeh kiya। abhi tum samajhte ho paandav kaun hain, kaurav kaun hain? svargavaasi banne ke liye paandavon ne jeete ji deh-abhimaan se galne ka purushaartha kiya। tum abhi yeh puraani jutti chhodne ka purushaartha karte ho। kehte ho na - puraani jutti chhod nai leni hai। baap bachchon ko hi samjhaate hain। baap kehte hain main kalpa-kalpa aata hoon। mera naam hai shiv। shiv jayanti bhi manaate hain। bhaktimaarga ke liye kitne mandir aadi banaate hain। naam bhi bahut rakh diye hain। deviyon ke bhi aise naam rakh dete hain। is samay tumhaari pooja ho rahi hai। yeh bhi tum bachche hi jaante ho jiski ham pooja karte the woh hamko padha rahe hain। jin lakshmi-naaraayan ke ham pujaari the woh abhi ham khud ban rahe hain। yeh gyaan buddhi mein hai। simran karte raho phir auron ko bhi sunaao। bahut hain jo dhaarna nahin kar sakte hain। baba kehte hain jaasti dhaarna nahin kar sakte ho to harja nahin। yaad ki to dhaarna hai na। baap ko hi yaad karte raho। jinki murli nahin chalti hai to yahaan baithe simran karen। yahaan koi bandhan jhanjhat aadi hai nahin। ghar mein baal bachchon aadi ka vaataavran dekh woh nasha gum ho jaata hai। yahaan chitra bhi rakhe hain। kisko bhi samjhaana bahut sahaj hai। vo log to geeta aadi poori kantha kar lete hain। sikkha logon ko bhi granth kantha rehta hai। tumko kya kantha karna hai? baap ko। tum kehte bhi ho baba, yeh hai bilkul nai cheez। yeh ek hi samay hai jabki tumko apne ko aatma samajh ek baap ko yaad karna hai। 5 hazaar varsha pahle bhi sikhaaya tha, aur koi ki taakat nahin jo aise samjha sake। gyaan saagar hai hi ek baap, doosra koi ho na sake। gyaan saagar baap hi tumko samjhaate hain, aajkal aise bhi bahut nikle hain jo kehte hain hamne avtaar liya hai isliye sach ki sthaapna mein kitne vighna padte hain parantu gaaya hua hai sach ki naanv hilegi, dulegi lekin doobegi nahin।

ab tum bachche baap ke paas aate ho to tumhaari dil mein kitni khushi rahni chaahiye। aage yaatra par jaate the, to dil mein kya aata tha? abhi gharbaar chhod yahaan aate ho to kya khyaalaat aate hain? ham baapdaada ke paas jaate hain। baap ne yeh bhi samjhaaya hai - mujhe sirf shivbaaba kehte hain jismen pravesh kiya hai, woh hai brahma। biraadriyaan hoti hain na। pahli-pahli biraadri braahmanon ki hai phir devtaaon ki biraadri ho jaati hai। abhi doordeshi baap bachchon ko dooraandeshi banaate hain। tum jaante ho aatma kaise saare chakra mein bhinna-bhinna varno me aai hai, iska gyaan dooraandeshi baap hi dete hain। tum vichaar karenge abhi ham brahman varna ke hain, iske pahle jab gyaan nahin tha to shoodra varna ke the। hamaara hai great-great grand father। great shoodra, great vaishya, great kshatriy...... unke pahle great brahman the। ab yeh baaten sivaae baap ke aur koi samjha na sake। inko kaha jaata hai dooraandesh ka gyaan। doordesh mein rahne vaala baap aakar doordesh ka saara gyaan dete hain bachchon ko। tum jaante ho hamaara baba doordesh se ismen aate hain। yeh paraaya desh, paraaya raajya hai। shivbaaba ko apna shareer nahin hai aur woh hai gyaan ka saagar, svarga ka raajya bhi unko dena hai। shreekrishna thode hi denge। shivbaaba hi dega। shreekrishna ko baba nahin kahenge। baap raajya dete hain, baap se hi varsa milta hai। abhi had ke varse sab poore hote hain। satayug mein tumko yeh maaloom nahin rahega ki hamne yeh sangam par 21 janmon ka varsa liya hua hai। yeh abhi jaante ho ham 21 janmon ka varsa aadhaakalpa ke liye le rahe hain। 21 peedhi yaani poori aayu। jab shareer boodha hoga tab samay par shareer chhodenge। jaise sarpa puraani khal chhod nai le lete hain। hamaara bhi part bajaate-bajaate yeh chola puraana ho gaya hai।

tum sachche-sachche brahman ho। tumhein hi bhramri kaha jaata hai। tum keedon ko aapasmaan brahman banaati ho। tumhein kaha jaata hai ki keede ko le aakar baith bhoon-bhoon karo। bhramri bhi bhoon bhoon karti hai phir koi ko to pankh aa jaate hain, koi mar jaate hain। misaal sab abhi ke hain। tum laadle bachche ho, bachchon ko noore ratna kaha jaata hai। baap kehte hain noore ratna। tumko apna banaaya hai to tum bhi hamaare hue na। aise baap ko jitna yaad karenge paap kat jaayenge। aur koi ko bhi yaad karne se paap nahin katenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jeete ji deh-abhimaan se galne ka purushaartha karna hai। is puraani jutti mein zara bhi mamatva na rahe।

2) sachcha brahman ban keedon par gyaan ki bhoon-bhoon kar unhein aap samaan brahman banaana hai।

vardaan:- amritvele ka mahatva jaankar khule bhandaar se apni jholi bharpoor karne vaale takdeervaan bhav

amritvele vardaata, bhaagya vidhaata se jo takdeer ki rekha khinchavaane chaaho khinchava lo kyonki us samay bhole bhagwan ke roop mein loveful hain isliye maalik bano aur adhikaar lo। khajaane par koi bhi taala-chaabi nahin hai। us samay sirf maaya ke bahaane baazi ko chhod ek sankalp karo ki jo bhi hoon, jaisi bhi hoon, aapki hoon। man buddhi baap ke havaale kar takhtansheen ban jaao to baap ke sarva khajaane apne khajaane anubhav honge।

slogan:- seva mein yadi svaartha mix hai to saphalta bhi mix ho jaayegi isliye nihsvaartha sevaadhaari bano।

avyakt ishaare-aatmik sthiti mein rahne ka abhyaas karo, antarmukhi bano

aisa koi bhi brahman nahin hoga jo aatma-abhimaani banne ka purushaarthi na ho। lekin nirantar aatma-abhimaani, jisse karmendriyon ke oopar sampoorn vijay ho jaae, harek karmendriy satopradhaan svachchha ho jaae, deh ke puraane sanskaar aur sambandh se sampoorn marjeeva ho jaae, iske liye antarmukhi bano, isi purushaartha se hi number banenge।