Murli du jour du dimanche 1 juin 2025

01-06-25 praatahmurli om shanti ''avyakt-baapdaada'' revise 21-10-05 madhuban

sampoorn aur sampanna banne ki date fix kar samay pramaan ab ever ready bano

aaj baapdaada chaaron or ke bachchon ke teen roop dekh rahe hain। jaise baap ke vishesh teen sambandh yaad rehte hain vaise bachchon ke bhi teen roop dekh harshit ho rahe hain। apne teenon hi roop jaante ho na! is samay sabhi bachche brahman roop mein hain aur braahmanon ki last stage, brahman so pharishta hai phir pharishta so devta ho। sabse vishesh vartamaan brahman jeevan hai। brahman jeevan amoolya hai। brahman jeevan ki visheshta hai purity। purity hi brahman jeevan ki reality hai। purity hi brahman jeevan ki personality hai। purity hi sukh shanti ki janni hai। jitni purity hogi utni sukh aur shanti jeevan mein natural aur nature hogi। aur pure aatmaon ka lakshya hai brahman so devta nahin lekin pahle pharishta banne ka hai, pharishta so devta hai। to brahman so pharishta, pharishta so devta - yeh teen roop baapdaada sabhi bachchon ka dekh rahe hain। aap sabhi ko apne teen roop saamne aa gaye? aa gaye? brahman to ban gaye, abhi lakshya hai pharishta banne ka। yahi lakshya hai na! pharishta banna hi hai, check karo pharishte pan ki visheshtaayen jeevan mein kitni dikhaai deti hain? pharishta arthaat jiska puraane sansaar aur puraane sanskaar se koi naata nahin। pharishta arthaat sirf samasya ke samay double light nahin, lekin sada mansa-vaacha, sambandh-samparka mein double light, halka। halki cheez achhi lagti hai va bojh vaali cheez achhi lagti hai, kya achha lagta hai? halka pasanda hai na? pharishta arthaat jo sarva ka, thodon ka nahin, sarva ka pyaara aur nyaara ho। sirf pyaara nahin, jitna pyaara utna hi nyaara ho। pharishta ki nishaani hai - woh sarva ka priy hoga, jo bhi dekhenge jo bhi milenge jo bhi sambandh mein aayenge, samparka mein aayenge woh anubhav karenge ki yeh mera hai। jaise baap ke liye sabhi anubhav karte hain, mera hai। anubhav karte hain na? aise pharishta arthaat har ek anubhav kare - yeh mera hai। apne-pan ka anubhav ho kyonki halka hoga na to halkaapan sabka priy bana deta hai। saara brahman parivaar anubhav kare ki yeh mera hai। bhaareepan nahin ho kyonki pharishte ka arth hi hai double light। pharishta arthaat sankalp, bol, karma, sambandh, samparka mein behad ho। had nahin ho। sab apne hain aur main sabka hoon। jahaan jyaada apnaapan hota hai na vahaan halkaapan hota hai। sanskaar mein bhi halkaapan, to check karo kitna percent pharishta stage tak pahunche hain? check karna aata hai? checker bhi ban gaye ho, maker bhi ban gaye ho। mubaarak ho।

baapdaada ki yahi shubh aasha hai ki ab samay ko dekhte hue jo apne ko mahaarthi samajhte hain unhon ki stage to 95 percent honi chaahiye। honi chaahiye na! (kisi ne kaha 98 percent ho jaayenge) mubaarak hai, mukh mein gulaabjaamun kha lo, kyonki dekh to rahe ho, jaante bhi ho, ki ho jaana hi hai। ho jaayenge nahin, hona hi hai। ge, ge nahin karo, ho jaayenge, dekh lenge… koshish karenge... ab yeh bhaasha parivartan karo। jo bhi sankalp karo, check karo kitni percent nishchay aur saphaltaapoorvak hai? abhi check karne ki speed teevra karo। pahle check karo phir karma mein aao। aise nahin jo bhi sankalp aaya, jo bhi bol mein aaya, jo bhi sambandh samparka mein hua, nahin। jo vi.vi.aai.pi. hote hain unki checking kitni hoti hai, pata hai na। har cheez pahle check hoti hai phir kadam rakhte hain। to abhi do ghante chaar ghante ke baad checking nahin chalegi। pahle checking phir kadam kyonki aajkal ke vi.vi.aai.pi. jo hain, woh to ek janma ke hain। woh bhi thode samay ke liye hain aur aap to srishti drama ke brahman so pharishte kitne bhi vi.vi. laga do, itne ho। dekho, aap apne aage vi.vi.vi. lagaate jaao। aapne apne chitra to dekhe hain na jo pooje ja rahe hain, woh dekhe hain na। chalo mandir nahin dekhe photo to dekhe hain, abhi bhi unhon ki kitni value hai। kitne bade-bade mandir banaate hain aur aapka chitra jo hai woh to teen foot mein aa jaata hai, to kitna aapki value hai। jad chitra ki bhi value hai। value hai na! aapke chitra ka darshan karne ke liye kitni queue lagti hai। aur chaitanya mein kitne vi.vi.aai.pi. ho। to kadam uthaane ke pahle check karo, karne ke baad check kiya, woh kadam to gaya। woh kadam phir aapke haath mein nahin aayega। agyaankaal mein bhi kehte hain, soch samajhkar kaam karo। kaam karke socho nahin। pahle socho phir karo। to apne svamaan ki seat par raho। jitna position mein rehte to opposition nahin ho sakti। maaya ki opposition tab hoti hai jab position mein nahin rehte ho। to abhi baapdaada ka question hai, sabka lakshya to hai sampoorn banne ka, sampanna banne ka। lakshya hai ya thoda-thoda banne ka hai? lakshya hai? sabka lakshya hai to haath uthaao। sampoorn banna hai? achha। kab tak? aap logon se question karte ho na, student se bhi teachers question karti hain na - aapka kya lakshya hai? to aaj baapdaada vishesh teachers se poochhte hain। 30 varsha vaale baithe hain na। to 30 varsha vaalon ko kal hi aapas mein baithkar programme banaana chaahiye। meeting to bahut karte ho। baapdaada dekhte hain meeting seating, meeting seating। lekin ab aisi meeting karo, ki kab tak sampanna banenge? aur sab function manaate ho, date fix karte ho, phalaana programme phalaani date, iski date nahin hai? jitne saal chaahiye utne bataao। kyon? baapdaada kyon kehte hain? kyonki baap se prakriti poochhti hai ki kab tak vinaash karen? to baapdaada kya javaab den। baapdaada bachchon se hi poochhenge na। kab tak? aaj ki vishesh topic hai kab tak? double foreigners baithe hain na, to double purushaartha hoga na। kamaal karo। foreigners example bano - bas brahman parivaar ke aage, vishwa ke aage sampanna aur sampoorn। sarva shaktiyaan, sarva gun se sampanna arthaat sampoorn, sarva ho। mansa, vaacha, sambandh-samparka chaar hi mein, chaar mein se agar ek mein bhi kamjor rah gaye, to sampanna nahin kahenge। chaar baaten yaad hai na - mansa, vaacha, sambandh-samparka mein karma aa gaya, chaar hi baaton mein। aise nahin mansa vaacha mein to ham theek hain, sambandh-samparka mein thoda hai। sunaaya na - jiske saamne bhi jaayen, chaahe jiske bhi samparka mein jaayen woh anubhav kare ki yeh mera hai। mere ke oopar hujjat hoti hai na। doosre ke oopar itna halkaapan nahin hota hai, thoda bhaari hota hai lekin apne ke oopar halkaapan hota hai। to sabse halke, aise nahin sirf apne zone mein halke, apne centre mein halke, nahin। agar zone mein halke ya centre mein halke, to vishvaraajan kaise banenge? na vishwa kalyaankaari ban sakte hain, na vishwa raajan ban sakte hain। raajan ka arth yeh nahin hai ki takhta par baithe, raajdhaani mein royal family mein bhi raajya adhikaar hai, raajya ka। to kya karenge? kab tak ke prashn ka uttar denge na! meeting karenge! meeting karke final karna। theek hai? achha।

sabhi theek hain, umang aata hai ki karna hi hai, hona hi hai? baapdaada umang-ulhaas dilaata hai। maaya dekhti hai umang-ulhaas mein hain to kuchh na kuchh kar leti hai kyonki uska bhi abhi antim kaal najdeek hai na। to woh apne astra shastra jo bhi hain woh use karti hain aur aisi paalna karti hai jo samajh nahin sakte hain ki yeh maaya ki paalna hai, maaya ki mat hai ya baap ki mat hai, usmein mix kar dete hain। yeh pharishte pan mein ya purushaartha mein vishesh jo rookaavat hoti hai, uske do shabd hi hain - jo common shabd hain, mushkil bhi nahin hain aur sabhi anek baar use bhi karte hain। woh kya hai? main aur mera। baapdaada ne bahut sahaj vidhi pahle bhi bataai hai, is main aur mere ko parivartan karne ki, yaad hai? dekho, jis samay aap main shabd bolte ho na, us samay saamne aaye ki main hoon hi aatma, main shabd bolo aur saamne aatma roop ko laao। main shabd aise nahin bolo, main, aatma। yeh natural smriti mein laao। main shabd ke peechhe aatma laga do। main aatma। jab mera shabd bolte ho to pahle kaho mera baba, mera roomaal, meri saadi... mera yeh। lekin pahle mera baba। mera shabd bola, baba saamne aaya। main shabd bola aatma saamne aai, yeh nature aur natural banaao, sahaj hai na ya mushkil hai? jaante hi ho main aatma hoon। sirf us samay maante nahin ho। jaanna 100 percent hai, maanna percentage mein hai। jab body conscious natural ho gaya, yaad karna padta hai kya ki main body (shareer) hoon, natural yaad hai na। to main shabd mukh ke pahle to sankalp mein aata hai na। to sankalp mein bhi main shabd aave to phauran aatma swaroop saamne aaye। yeh abhyaas karna sahaj nahin hai? sirf main shabd nahin bolna, aatma saath mein bolna, pakka ho jaayega। jaise shareer ka naam pakka hai na। doosre ko bhi koi bulaayega to aap aise-aise karenge। to main aatma hoon। aatma ka sansaar baapdaada, aatma ka sanskaar brahman so pharishta, pharishta so devta। to kya karenge? yeh man ki drill karna। aajkal doctors bhi kehte hain drill karo, drill karo। exercise karo। to yeh exercise karo। main aatma, mera baba kyonki samay ki gati ko draamaanusaar slow karna padta hai। hona chaahiye creator ko teevra, creation ko nahin lekin abhi ke pramaan samay tej ja raha hai। prakriti ever ready hai sirf order ke liye rooki hui hai। drama ka samay hi order karega na। sthaapna vaale agar ever ready nahin honge to vinaash ke baad kya pralay hogi? honi hai pralay? ki vinaash ke baad sthaapna honi hi hai? to sthaapna ke nimitta bane hue abhi samay pramaan ever ready hone chaahiye। baapdaada yahi dekhne chaahte hain, jaise brahma baap arjun bana na, example bana na! aise brahma baap ko follow karne vaale kaun bante hain? svayan ko bhi dekho, samay ko bhi dekho।

baapdaada ne pahle bhi kaha ki vartamaan samay aap sabhi brahman so pharishte aatmaon ko nimitta bhaav aur nirmaan bhaav, in donon shabdon ko underline karna hai। ismen body-conscious ka main-pan khatma ho jaayega। mera-pan bhi khatma ho jaayega। nimitta hoon aur nirmaan svabhaav। jitna nirmaan hote hai na utna maan milta hai kyonki jo nirmaan hota hai woh sabka pyaara ban jaata hai। aur jab pyaara ban jaata hai to maan to automatically milega। to nimitta aur nirmaan bhaav aur bhaavna, shubh bhaavna। bhaav aur bhaavna do cheezen hoti hain। to nimitta aur nirmaan bhaav aur bhaavna har ek ke prati shubh bhaavna, shubh kaamna। kaisa bhi ho, aapka nimitta nirmaan bhaav aur shubh bhaavna vaayumandal aisa banaayegi, jo saamne vaala bhi vibration se badal jaayega। kai bachche roohrihaan karte hain na - to kehte hain hamne ek maas se shubh bhaavna rakhi, woh badalta hi nahin hai। phir thak jaate hain, dilshikasta ho jaate hain। abhi us bichaare ki jo vritti hai ya drishti hai woh hai hi patthar jaisi, usmein thoda to time lagega na। achha maano woh nahin badalta hai to aap apne ko to theek rakho na। aap to apni position mein raho na। aap kyon dilshikasta ho jaate ho। dilshikasta nahin ho। achha woh nahin badla to main to uske saath badal na jaaoon। agar aap dilshikasta ho gaye to woh powerful hua jo usne aapko badal liya। aap apne svamaan ki seat kyon chhodte ho? vesta thoughts bhi nahin uthna chaahiye, kyon? kyon kaha aur vesta thoughts ka darvaaja khula। woh darvaaja banda bahut mushkil hota hai iseelie kyon nahin socho, merciful hokar vibration dete raho। aap apni seat chhodkar kyon dilshikasta ho jaate ho? yaad rakha na - position se neeche nahin aao, phir bahut opposition ho jaati hai। vyakti-vyakti mein opposition ho jaati hai, svabhaav sanskaar mein opposition ho jaati hai, vichaaron mein opposition ho jaati hai isliye position mein raho। to kal kya karenge? yaad hai? baapdaada ka pyaar hai na, to baapdaada samajhte hain sab brahma baap samaan ban jaayen। kya baap ke aage opposition nahin aai, brahma baap ke aage opposition nahin hui, maaya ki bhi hui, aatmaon ki bhi hui, prakriti ki bhi hui, lekin brahma baap ne position chhodi? nahin chhodi na। tabhi pharishta bana na। to abhi apne ko to pharishta samajhkar chalo, main pharishta hoon... lekin ek do ko bhi pharishta roop mein dekho, sab pharishte hain। na mera puraane sansaar se naata, na puraane sanskaaron se naata, na in koi braahmanon se। bas khatma। yeh bhi pharishta, yeh bhi pharishta usi nazar se dekho। vaayumandal phailaao। achha।

abhi ek minute aisa powerful sarva shaktiyon sampanna vishwa ki aatmaon ko kirnen do jo chaaron or aapke shaktiyon ka vibration vishwa mein phail jaaye। (dead silence) achha।

chaaron or ke brahman so pharishte bachchon ko, sada svadarshan dvaara sva ko check aur change karne vaale, brahma baap ko follow karne vaale pharmaanbardaar bachchon ko, sada double light ban seva aur purushaartha karne vaale pharishte aatmaon ko, sada apni position ki seat par set ho opposition ko samaapta karne vaale master sarvashaktivaan bachchon ko, sangamayug ka pratyaksha phal anubhav karne vaale baap ke sameep bachchon ko baapdaada ka yaadapyaar aur namaste।

vardaan:- pratyakshata ke samay ko sameep laane vaale sada shubh chintak aur sva chintak bhav

seva mein saphalta ka aadhaar hai shubh chintak vritti kyonki aapki yeh vritti aatmaon ki grahan shakti va jigyaasa ko badhaati hai, isse vaani ki seva sahaj saphal ho jaati hai aur sva ke prati sva chintan karne vaali svachintak aatma sada maaya proof, kisi ki bhi kamjoriyon ko grahan karne se, vyakti va vaibhav ki aakarshan se proof ho jaati hai। to jab yeh donon vardaan practical jeevan mein laao tab pratyakshata ka samay sameep aaye।

slogan:- apne sankalpon ko bhi arpan kar do to sarva kamjoriyaan svatahdoor ho jaayengi।

avyakt ishaare - aatmik sthiti mein rahne ka abhyaas karo, antarmukhi bano

parmaatma pyaar ka anubhav karne ke liye antarmukhi ban is deh se nyaare dehi (aatmik) roop mein sthit rahne ka abhyaas badhaao। sada antarmukhta ki gupha mein raho to puraani duniya ke vaataavran se pare hote jaayenge। vaataavran ke prabhaav mein nahin aayenge।