Murli du jour du mercredi 18 juin 2025

18-06-2025 praatahmurli om shanti "baapdaada"' madhuban

“meethe bachche - yeh roodra gyaan yagya svayan roodra bhagwan ne racha hai, ismen tum apna sab kuchh svaaha karo kyonki ab ghar chalna hai''

prashn:- sangamayug par kaun-sa wonderful khel chalta hai?

uttar:- bhagwan ke rache hue yagya mein hi asuron ke vighna padte hain। yeh bhi sangam par hi wonderful khel chalta hai। aisa yagya phir saare kalpa mein nahin racha jaata। yeh hai raajasva ashvamedh yagya, svaraajya paane ke liye। ismen hi vighna padte hain।

om shanti। tum kahaan baithe ho? inko school athva university bhi kah sakte ho। vishwa vidyaalay hai, jiski eeshvareey branches hain। baap ne bade te badi university kholi hai। shaastron mein roodra yagya naam likh diya hai, is samay tum bachche jaante ho shivbaaba ne yeh paathshaala athva university kholi hai। oonch te oonch baap padhaate hain। yeh to bachchon ki buddhi mein yaad rehna chaahiye - bhagwan hamko padhaate hain। unka yeh yagya racha hua hai, iska naam bhi baala hai। raajasva ashvamedh roodra gyaan yagya, raajasva arthaat svaraajya ke liye। ashvamedh, yeh jo kuchh bhi dekhne mein aata hai, un sabko svaaha kar rahe hain, shareer bhi svaaha ho jaata hai। aatma to svaaha ho nahin sakti। sab shareer svaaha ho jaayenge। baaki aatmaayen vaapis bhaagengi। yeh hai sangamayug। bahut aatmaayen bhaagengi, baaki shareer khatma ho jaayenge। yeh hai sab drama, tum drama ke vash chal rahe ho। baap kehte hain hamne raajasva yagya racha hai। yeh bhi drama plan anusaar racha gaya hai। aise nahin kahenge ki mainne yagya racha hai। drama plan anusaar tum bachchon ko padhaane ke liye kalpa pahle muaaphik gyaan yagya racha gaya hai। mainne racha hai, yeh bhi arth nahin nikalta। drama plan anusaar racha gaya hai। kalpa-kalpa racha jaata hai। yeh drama bana hua hai na। drama plan anusaar ek hi baar yagya racha jaata hai, yeh koi nai baat nahin hai। abhi buddhi mein baitha hai - barobar 5 hazaar varsha pahle bhi satayug tha, ab chakra phir repeat ho raha hai। phir se nai duniya sthaapan ho rahi hai। tum nai duniya mein svaraajya paane ke liye padh rahe ho। pavitra bhi zaroor banna hai। bante bhi vahi hain jo drama anusaar kalpa pahle bane the। abhi bhi banenge। saakshi ho drama ko dekhna hota hai aur phir purushaartha bhi karna hota hai। bachchon ko maarga bhi bataana hai, mukhya baat hai pavitrata ki। baap ko bulaate hi hain ki aao pavitra banaakar hamko is chhi-chhi duniya se le jaao। baap aaye hi hain ghar le jaane ke liye। bachchon ko points to bahut di jaati hain। mukhya baat phir bhi baap kehte hain manamnaabhav। paavan banne ke liye baap ko yaad karte hain, yeh bhoolna nahin chaahiye। jitna yaad karenge utna phaayda hoga, chart rakhna chaahiye। nahin to phir pichhaadi mein fail ho jaayenge। bachche samajhte hain, ham hi satopradhaan the, nambarvaar purushaartha anusaar jo oonch bante hain, unko mehnat bhi jaasti karni padegi। yaad mein rehna padega। yeh to samajhte ho baaki thoda samay hai, phir sukh ke din aane hain। barobar hamaare athaah sukh ke din aane hain। baap ek hi baar aate hain, duhkhadhaam khalaas kar apne sukhdhaam le chalte hain। tum bachche jaante ho abhi ham eeshvareey parivaar mein hain, phir daivi parivaar mein jaayenge। is samay ka hi gaayan hai - yeh sangam hi purushottam oonch banne ka yug hai। tum bachche jaante ho hamko behad ka baap padha rahe hain। phir aage chal sannyaasi log bhi maanenge। woh bhi samay aayega na। abhi tumhaara prabhaav itna nahin nikal sakta। abhi raajdhaani sthaapan ho rahi hai, time pada hai। pichhaadi mein yeh sannyaasi aadi bhi aakar samjhenge। srishti ka chakra kaise phirta hai, yeh knowledge koi mein hai nahin। yeh bhi bachche jaante hain pavitrata par kitne vighna padte hain। ablaaon par atyaachaar hote hain। dropdi ne pukaara hai na। vaastav mein tum sab dropdiyaan, seetaayen, paarvatiyaan ho। yaad mein rahne se ablaayen, kubjaayen bhi baap se varsa pa leti hain। yaad mein to rah sakti hain na। bhagwan ne aakar yagya racha hai, ismen kitne vighna padte hain। abhi bhi vighna padte rehte hain, kanyaaon ko jabardasti shaadi karaate hain, nahin to maarkar nikaal dete hain isliye pukaarti hain he patit-paavan aao to zaroor unko rath chaahiye, jismen aakar paavan banaaye। ganga ke paani se paavan nahin banenge। baap hi aakar paavan banaae paavan duniya ka maalik banaate hain।

tum dekhte ho is patit duniya ka vinaash saamne khada hai। kyon na baba ka ban jaayen, svaaha ho jaayen। poochhte hain svaaha kaise hon? transfer kaise karen? baba kehte - bachche, tum is (saakaar) baba ko dekhte ho na। yeh khud karke sikha rahe hain। jaisa karma ham karenge hamko dekh aur karenge। baap ne inse karma karaaya na। saara yagya mein svaaha kar diya। svaaha hone mein koi takleeph thode hi hai। yeh na bahut saahookaar, na gareeb tha। saadhaaran tha। yagya racha jaata hai to usmein khaanpaan ki sab saamagri chaahiye na। yeh hai eeshvareey yagya। eeshvar ne aakar is gyaan yagya ki sthaapna ki hai। tumko padhaate hain, is yagya ki mahima bahut bhaari hai। eeshvareey yagya se hi tumhaara shareer nirvaah hota hai। jo apne ko arpanmay samajhte hain, ham trustee hain। yeh sab kuchh eeshvar ka hai, ham shivbaaba ke yagya se bhojan khaate hain - yeh samajh ki baat hai na। yahaan to nahin sabko aakar baithna hai। inka sample to dekha - kaise sab kuchh svaaha kiya। baba kehte hain jaise karma yeh karta hai, inko dekh auron ko bhi aaya। bahut hi svaaha hue। jo-jo hue woh apna varsa lete hain। buddhi se bhi samjha jaata hai - aatma to chali jaayegi, baaki shareer sab khatma ho jaayenge। yeh behad ka yagya hai, inmen sab svaaha honge। tum bachchon ko samjhaaya jaata hai kaise buddhi se svaaha ho nashtomoha ban jaao। yeh bhi jaante ho yeh saari saamagri khaak ho jaani hai। kitna bada yagya hai, vahaan phir koi yagya nahin racha jaata hai। na koi upadrav hote hain। yeh sab jo bhakti maarga ke anek yagya hain woh sab khatma ho jaate hain। gyaan saagar ek hi bhagwan hai। vahi manushya srishti ka beejroop, sat chaitanya hai। shareer to jad hai, aatma hi chaitanya hai। woh gyaan saagar hai, tum bachchon ko gyaan saagar baith padhaate hain। woh sirf gaate rehte hain aur tumko baba saara gyaan suna rahe hain। gyaan koi bahut to hai nahin। world ka chakra kaise phirta hai, yeh sirf samjhaana hai।

yahaan baap tumko khud padha rahe hain। kehte bhi hain saadhaaran tan mein pravesh karta hoon। bhaageerath bhi mashhoor hai, zaroor manushya hi hoga jismen baap aayega। unka ek hi naam chala aata hai shiv aur sabke naam badalte hain, inka naam nahin badalta। baaki bhakti mein anek naam rakh diye hain। yahaan to hai hi shivbaaba। shiv kalyaankaari kaha jaata hai। bhagwan hi aakar nai duniya svarga sthaapan karte hain। to kalyaankaari thahra na। tum jaante ho bhaarat mein svarga tha। abhi narka hai phir svarga zaroor hoga। inko kaha jaata hai purushottam sangamayug jabki baap khivaiya ban tumko is paar se us paar le jaate hain। yeh hai puraani duhkh ki duniya phir zaroor nai duniya hogi, drama anusaar, jiske liye tum abhi purushaartha karte ho। baap ki yaad hi ghadi-ghadi bhool jaati hai, ismen hai mehnat baaki tumse jo vikarma hue hain, unki saza karmabhog ke roop mein bhogni hi padti hai, karmabhog ant tak bhogna hi hai, usmein maaphi nahin mil sakti hai। aise nahin, baba kshama karo। kuchh bhi nahin। drama anusaar sab hota hai। kshama aadi hoti hi nahin। hisaab-kitaab chuktu karna hi hai। tamopradhaan se satopradhaan banna hai, iske liye shreemat bhi milti hai, shri shri shiv-baba ki shreemat se tum shri bante ho। oonch te oonch baap tumko oonch banaate hain। tum abhi ban rahe ho, abhi tumko smriti aai hai - baba kalpa-kalpa aakar hamko padhaate hain। aadhaakalpa unki praalabdha milti hai। srishti chakra kaise phirta hai, us knowledge ki darkaar nahin rehti। kalpa-kalpa ek hi baar aakar batlaate hain ki yeh srishti ka chakra kaise phirta hai।

tumhaara kaam hai padhna aur pavitra banna। yog mein rehna hai। baap ke bankar aur pavitra nahin banenge to sau guna danda pad jaayega। naam bhi badnaam ho jaata hai। gaate bhi hain satguru ka nindak thaur na paaye। manushyon ko pata nahin ki yeh kaun hai! sat baap hi satguru, sat teacher hoga na। tumko padhaate woh hain, sachcha satguru bhi hai। jaise baap gyaan ka saagar hai, tum bhi gyaan ke saagar ho na। baap ne to saara gyaan de diya hai, jisne jitna kalpa pahle dhaaran kiya hai, utna hi karenge। purushaartha karna hai, karma bigar to koi rah na sake। kitne bhi hathayog aadi karte hain, woh bhi karma hai na। yeh bhi ek dhandha hai, aajeevika ke liye। naam hota hai, bahut paisa milta hai, paani par, aag par chale jaate hain। sirf ud nahin sakte hain। usmein to petrol aadi chaahiye na। lekin inse phaayda to kuchh nahin। paavan to bante nahin। science vaalon ki bhi race hai। unki hai science ki race aur tumhaari hai silence ki। sab shanti hi maangate hain। baap kehte hain shanti to tumhaara svadharma hai, apne ko aatma samjho, apne ghar chalna hai shantidham। yeh hai duhkhadhaam। ham shantidham se phir sukhdhaam mein aayenge। yeh duhkhadhaam khalaas hona hai। yeh achhi reeti dhaaran kar phir auron ko dhaaran karaana hai। baaki thode roz hain, woh padhaai padhkar phir shareer nirvaah arth maatha maarna padta hai। takdeervaan bachche phauran nirnay le lete hain ki humein kaun-si padhaai padhni hai। us padhaai se kya milta hai aur is padhaai se kya milta hai। is padhaai se to 21 janmon ki praalabdha banti hai। to khyaal karna chaahiye ki hamko kaun-si padhaai padhni hai! jisko behad ke baap se varsa paana hai, woh behad ki padhaai mein lag jaate hain। parantu drama plan anusaar koi ki takdeer mein nahin hai to phir us padhaai mein chatak padte hain। yeh padhaai nahin padhte। kehte phursat nahin milti। baba poochhte hain, kaun-si knowledge achhi? unse kya milega aur inse kya milega? kehte hain baba jismaani padhaai se kya milega, thoda karke kamaayenge। yahaan to bhagwan padhaate hain। hamko to padhkar raajaai pad paana hai to jyaada dhyaan kis baat par dena chaahiye। koi to phir kehte baba woh course poora kar phir aayenge। baba samajh jaate hain inki takdeer mein nahin hai। kya hona hai so aage chal dekhna hai। samajhte hain shareer par bharosa nahin hai, to phir sachchi kamaai mein lag jaana chaahiye। jiski takdeer mein hai vahi apni takdeer jagaayenge। poora jor lagaana hai, ham to baap se varsa lekar hi chhodenge। behad ka baba hamko raajaai dete hain to kyon na yeh ek antim janma ham pavitra banenge। itne dher bachche pavitra rehte hain। jhooth thode hi bolte hain। sab purushaartha kar rahe hain। padh rahe hain, phir bhi vishvaas nahin karte। behad ka baap aate hi tab hain jab puraani duniya ko naya banaana hota hai। puraani duniya ka vinaash to saamne khada hai। yeh bahut clear hai। samay bhi barobar vahi hai, anek dharma bhi hain, satayug mein hota hi ek dharma hai। yeh bhi tumhaari buddhi mein hai। tumhaare mein bhi koi hain jo nishchay ajun kar rahe hain। are nishchay karne mein time lagta hai kya। shareer par bhi bharosa thode hi hai, zara bhi chance ganvaana nahin chaahiye। kiski takdeer mein nahin hai to zara bhi buddhi mein aata nahin hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sachchi kamaai kar 21 janmon ke liye apni takdeer banaani hai। shareer par koi bharosa nahin hai isliye zara bhi chance nahin ganvaana hai।

2) nashtomoha bankar apna sab kuchh roodra yagya mein svaaha karna hai। apne ko arpan kar trustee ho sambhaalna hai। saakaar baap ko follow karna hai।

vardaan:- eeshvareey nashe dvaara puraani duniya ko bhoolne vaale sarva praapti sampanna bhav

jaise woh nasha sab kuchh bhula deta hai, aise yeh eeshvareey nasha dukhon ki duniya ko sahaj hi bhula deta hai। us nashe mein to bahut nuksaan hota hai, adhik peene se khatma ho jaate hain lekin yeh nasha avinaashi bana deta hai। jo sada eeshvareey nashe mein masta rehte hain woh sarva praapti sampanna ban jaate hain। ek baap doosra na koi - yeh smriti hi nasha chadhaati hai। isi smriti se samarthi aa jaati hai।

slogan:- ek do ko copy karne ke bajaae baap ko copy karo।

avyakt ishaare-aatmik sthiti mein rahne ka abhyaas karo, antarmukhi bano

antarmukhi rahne vaale hi har gyaan-ratna ki guhyata mein ja sakte hain। gyaan ki har point ka raaz kya hai aur kis samay, kis vidhi se use kaarya mein va seva mein lagaana hai, is tarah se us par manan karte us raaz ke ras mein chale jaao, to nashe ki anubhooti kar sakenge।