Murli du jour du dimanche 29 juin 2025

29-06-25 praatahmurli om shanti ''avyakt-baapdaada'' revise 31-12-05 madhuban

“naye varsha mein apne puraane sanskaaron ko yog agni mein bhasma kar brahma baap samaan tyaag, tapasya aur seva mein number one bano''

aaj baapdaada chaaron or ke chaahe sammukh hain, chaahe door baithe dil ke sameep hain, sarva ko teen mubaarak de rahe hain। ek nav jeevan ki mubaarak hai, doosri nav yug ki mubaarak hai aur teesri aaj ke din varsha ki mubaarak hai। aap sabhi bhi naye varsha ki mubaarak dene aur mubaarak lene aaye ho। vaastav mein sachchi dil ke khushi ki mubaarken aap brahman aatmaayen lete bhi ho, dete bhi ho। aaj ke din ka mahatva hai। vidaai bhi hai aur badhaai bhi hai। vidaai aur badhaai ka sangamayug hai। aaj ke din ko kahenge sangam ka din hai। sangam ki mahima bahut badi hai। aap sabhi jaante ho ki sangamayug ki mahima ke kaaran aajkal puraane aur naye varsha ke sangam ko kitna dhoomdhaam se manaate hain। sangamayug ki mahima ke kaaran hi is puraane naye varsha ke sangam ki mahima hai। jahaan do nadiyaan milti hain, sangam hota hai, unki bhi mahima hai। jahaan nadi saagar ka sangam hota hai uski bhi mahima hai। lekin sabse badi mahima is sangam-yug ki, purushottam yug ki hai, jahaan aap brahman bhaagyavaan aatmaayen baithe ho। yeh nasha hai na! agar aapse koi poochhe aap kis samay par ho? kya kaliyug mein rehte ho ya satayug mein rehte ho? to kya falak se kahenge? ham is samay purushottam sangamayug mein rehte hain। aap kaliyugi nahin ho, sangamayugi ho। aur is sangamayug ki vishesh mahima kyon hai? kyonki bhagwan aur bachchon ka milan hota hai। mela hota hai, milan hota hai, jo kisi bhi yug mein nahin hota। to mela manaane aaye ho na! aap milan mela manaane ke liye kahaan-kahaan se aaye ho। kabhi svapna mein bhi socha tha ki drama mein mujh aatma ka aisa bhi bhaagya noondha hua hai। aatma ka paramatma se milne ka bhaagya tha aur hai। baap bhi har ek bachche ke bhaagya ko dekh harshit hote hain। vaah! bhaagyavaan bachche vaah! apne bhaagya ko dekh dil mein apne prati vaah! main vaah! vaah! mera bhaagya vaah! vaah! mera baba vaah! vaah! mera brahman parivaar vaah! yeh vaah, vaah ke geet automatic dil mein gaate rehte ho na!

to aaj is sangam ke samay apne andar soch liya hai ki kis-kis baaton ko vidaai deni hai? sabhi ne socha hai? sadaakaal ke liye vidaai deni hai kyonki sadaakaal ke liye vidaai dene se sadaakaal ki badhaaeeyaan mana sakenge। aisi badhaai do jo aapke chehre ko dekh jo bhi aatma saamne aaye woh bhi badhaaeeyaan praapta kar khush ho jaae। jo dil se badhaai dete va lete hain woh sada hi kaise dikhaai dete hain? sangamayugi pharishta। sabhi ka yahi purushaartha hai na ö brahman so pharishta aur pharishta so devta! kyonki baap ko sab prakaar ke sankalp va jo bhi kuchh pravritti ka, karma ka bojh hai woh de diya hai na! bojh diya hai ya thoda sa rah gaya hai? kyonki thoda bhi bojh pharishta banne nahin dega aur jab baap bachchon ka bojh lene ke liye aaye hain to bojh dena mushkil hai kya! mushkil hai ya sahaj hai? jo samajhte hain bojh de diya hai woh haath uthaao। de diya hai? dekhna soch ke haath uthaana। bojh de diya hai? achha, de diya hai to bahut mubaarak ho। aur jinhonne nahin diya hai woh kislie rakha hai? bojh se preet hai kya? bojh achha lagta hai? dekho, baapdaada har bachche ko kya kehte hain? O mere bephikar baadshaah bachche। to bojh ka phikar hota hai na! to bojh lene ke liye baap aaye hain kyonki 63 janma se baap dekh rahe hain bojh uthaate-uthaate sabhi bachche bahut bhaari ho gaye hain isliye jab baap bachchon ko pyaar se kah rahe hain bojh de do। phir bhi kyon rakh liya hai? kya bojh achha lagta hai? sabse sookshm bojh hai - puraane sanskaar ka। baapdaada ne har bachche ke is varsha ka, kyonki varsha poora ho raha hai na, to is varsha ka chart dekha। aap sabne bhi apna-apna varsha ka chart check kiya hoga? to baapdaada ne dekha ki kai bachchon ko is puraane sansaar ki aakarshan kam hui hai, puraane sambandh ki bhi aakarshan kam hui hai lekin puraane sanskaar, uska bojh majority mein raha hua hai। kisi na kisi roop mein chaahe mansa ashuddha sankalp nahin lekin vyartha sankalp ka sanskaar abhi bhi percent mein dikhaai deta hai। vaacha mein bhi dikhaai deta hai। sambandh-samparka mein bhi koi na koi sanskaar abhi bhi dikhaai deta hai।

to aaj baapdaada sabhi bachchon ko mubaarak ke saath-saath yahi ishaara dete hain ki yeh raha hua sanskaar samay par dhokha deta bhi hai aur ant mein bhi dhokha dene ke nimitta ban jaayega iseelie aaj sanskaar ka sanskaar karo। har ek apne sanskaar ko jaanta bhi hai, chhodne chaahta bhi hai, tang bhi hai, lekin sada ke liye parivartan karne mein teevra purushaarthi nahin hain। purushaartha karte hain lekin teevra purushaarthi nahin hain। kaaran? teevra purushaartha kyon nahin hota? kaaran yahi hai, jaise raavan ko maara bhi lekin sirf maara nahin, jalaaya bhi। aise maarne ke liye purushaartha karte hain, thoda behosh bhi hota hai sanskaar, lekin jalaaya nahin to behoshi se beech-beech mein uth jaata hai। iske liye puraane sanskaar ka sanskaar karne ke liye is naye varsha mein yog agni se jalaane ka, dridh sankalp ka attention rakho। poochhte hain na is naye varsha mein kya karna hai? seva ki to baat alag hai lekin pahle svayan ki baat hai - yog lagaate ho, baapdaada bachchon ko yog mein abhyaas karte hue dekhte hain। amritvele bhi bahut purushaartha karte hain lekin yog tapasya, tap ke roop mein nahin karte hain। pyaar se yaad zaroor karte hain, roohrihaan bhi bahut karte hain, shakti bhi lene ka abhyaas karte hain lekin yaad ko itna powerful nahin banaaya hai, jo jo sankalp karo vidaai, to vidaai ho jaae। yog ko yog agni ke roop mein kaarya mein nahin lagaate isliye yog ko powerful banaao। ekaagrata ki shakti vishesh sanskaar bhasma karne mein aavashyak hai। jis swaroop mein ekaagra hone chaaho, jitna samay ekaagra hone chaaho, aisi ekaagrata sankalp kiya aur bhasma। isko kaha jaata hai yog agni। naamnishaan samaapta। maarne mein phir bhi laash to rehta hai na! bhasma hone ke baad naamnishaan khatma। to is varsha yog ko powerful stage mein laao। jis swaroop mein rahne chaaho master sarvashaktivaan, order karo, samaapta karne ki shakti aapke order se nahin maane, yeh ho nahin sakta। maalik ho। master kahlaate ho na! to master order kare aur shakti haajir nahin ho to kya woh master hai? to baapdaada ne dekha ki puraane sanskaar ka kuchh na kuchh ansh abhi bhi raha hua hai aur woh ansh beech-beech mein vansh bhi paida kar deta hai, jo karma tak bhi kaam ho jaata hai। yuddha karni padti hai। to baapdaada ko bachchon ka samay pramaan yuddha ka swaroop bhaata nahin hai। baapdaada har bachche ko maalik ke roop mein dekhne chaahta hai। order karo ji hajoor।

to suna is varsha sva ke prati kya karna hai? shaktishaali, bephikar baadshaah kyonki sabhi ka lakshya hai, kisi se bhi poochho to kya kehte hain? ham vishwa ka raajya praapta karenge, raajya adhikaari banenge। apne ko raajayogi kahlaate hain। prajaayogi hain kya? koi hai saari sabha mein jo prajaayogi ho? hai? jo praja yogi ho raajayogi nahin ho। teachers koi hai? aapke centre par koi prajaayogi hai? kahlaate to sab raajayogi hain। prajaayogi mein haath koi nahin uthaata। achha nahin lagta hai na! aur baap ko bhi fakhur hai। baapdaada fakhur se kehte hain ki sangam par bhi har bachcha raaja bachcha hai। koi baap aise falak se nahin kah sakta ki mera ek-ek bachcha raaja hai। lekin baapdaada kehte hain ki har ek bachcha svaraajya adhikaari raaja hai। prajaayogi mein to haath nahin uthaaya na, to raaja ho na! lekin aisa dheelaadhaala raaja nahin banna jo order karo aur aave nahin। kamjor raaja nahin banna। peechhe vaale kaun ho? jo samajhte hain raajayogi hain woh haath uthaao। oopar bhi baithe hain, (gallery mein baithe hue haath hila rahe hain, aaj hall mein 18 hajaar bhaai-bahnen baithe hain) baapdaada dekh rahe hain, haath uthaao oopar vaale।

to abhi yeh last tarna mein shuru ho jaayega। to teen maas baapdaada dete hain, theek hai deven? homework denge kyonki yeh beech-beech ka homework bhi last paper mein jama hoga। to teen maas mein har ek apna chart check karna ki main master sarvashaktivaan hokar kisi bhi karmendriy ko, kisi bhi shakti ko jab order karen, jo order karen woh practical mein order maana ya nahin maana? kar sakte ho? pahli line vaale kar sakte ho? haath uthaao। achha। teen maas koi bhi puraana sanskaar vaar nahin kare। albele nahin banna, royal albelaapan nahin laana, ho jaayega…। baapdaada se bahut meethi meethi baaten karte hain, kehte hain baba aap phikar nahin karo, ho jaaoonga। baapdaada kya karega? sun-kar muskura deta hai। lekin baapdaada in teen maas mein agar aisi baat ki to maanega nahin। manjoor hai to haath uthaao। dil se haath uthaana, sabha ke kaaran haath nahin uthaana। karna hi hai, chaahe kuchh bhi sahan karna pade, kuchh chhodna pade, koi harja nahin। karna hi hai। pakka? pakka? pakka? teachers karna hai?

achha, yeh taaj vaale bachche kya karenge? (chhote bachche taaj pahankar saamne baithe hain) taaj to achha pahan liya hai? karna padega। achha। dekhna bachche haath utha rahe hain। agar nahin karenge to kya karen? woh bhi bata do। phir baapdaada ki season mein ek baar aane nahin denge kyonki baapdaada dekh rahe hain ki samay aapka intajaar kar raha hai। aap samay ka intajaar karne vaale nahin ho, aap intajaam karne vaale ho, samay aapka intajaar kar raha hai। prakriti bhi, satopradhaan prakriti aapka aahvaan kar rahi hai। to teen maas mein apni shaktishaali stage mein rahe hue sanskaar ko parivartan karna। agar teen maas attention rakha na to uska aage bhi abhyaas ho jaayega। ek baari parivartan ki vidhi aa gai na to bahut kaam mein aayega। samay ka aap intajaar nahin karo, kab vinaash hoga, kab vinaash hoga, sab roohrihaan mein poochhte hain, baahar se nahin bolte lekin andar baat karte hain pata nahin kab vinaash hoga, do saal mein hoga 10 saal mein hoga, kitna saal mein hoga? aap kyon samay ka intajaar karo, samay aapka intajaar kar raha hai। baap se poochhte hain taareekh bata do, thoda sa varsha bata do, 10 varsha lagenge, 20 varsha lagenge, kitna varsha lagenge?

baapdaada bachchon se prashn poochhte hain ki aap sab baap samaan ban gaye ho? parda kholen ki parda kholenge to koi kanghi kar raha hai, koi face ko cream laga raha hai, agar ever ready ho, sanskaar samaapta ho gaye to baapdaada ko parda kholne mein kya deri lagegi। ever ready to ho jaao na! ho jaayenge, ho jaayenge kahke baap ko bahut samay khush kiya hai। abhi aisa nahin karna। hona hi hai, karna hi hai। baap samaan banna hai ismen to sabhi haath utha dete hain, uthaane ki jaroorat nahin। brahma baap ko dekho, saakaar mein to brahma baap ko follow karna hai na! brahma baap ne tyaag, tapasya aur seva last ghadi tak saakaar roop mein practical dikhaaya। apni duty, shiv baap dvaara mahaavaakya uchchaaran ki duty last din tak nibhaai। last murli yaad hai na? teen shabd ka vardaan, yaad hai? (niraakaari, nirvikaari aur nirhankaari bano) jisko yaad hai woh haath uthaao। achha sabhi ko yaad hai, mubaarak ho। tyaag bhi last din tak kiya, apna puraana kamra nahin chhoda। bachchon ne kitna pyaar se brahma baap ko kaha lekin bachchon ke liye banaaya, svayan nahin use kiya। aur sada adhaai teen baje uthkar svayan prati tapasya ki, sanskaar bhasma kiye tab karmaateet avyakt bane, pharishta bane। jo socha woh karke dikhaaya। kehna, sochna aur karna teenon samaan। follow father। last tak apne kartavya mein poorn rahe, patra bhi likhe, kitne patra likhe? seva bhi nahin chhodi। follow father। akhanda mahaadaani, mahaadaani nahin, akhanda mahaadaani ka practical roop dikhaaya, ant tak। last tak bina aadhaar ke tapasvi roop mein baithe। abhi bachche to aadhaar lete hain na, baithne ka। lekin brahma baap ne aadi se ant tak tapasvi roop rakha। aankhon mein chashma nahin daala। yeh sookshm shakti hai। niraadhaar। shareer puraana hai, dinapratidin prakriti hava paani dooshit ho raha hai isliye baapdaada aapko kehte nahin hain, kyon aadhaar lete ho, kyon chashma pahante ho, pahno bhale pahno, lekin shaktishaali sthiti zaroor banaao। saari vishwa ka kaarya samaapta kiya hai? baapdaada aapse prashn poochhta hai, aap sabhi santushta ho ki vishwa kalyaan ka kaarya poora ho gaya hai? jo samajhte hain ki vishwa kalyaan ka kaarya samaapta ho gaya hai, woh haath uthaao। ek bhi nahin? to kaise kehte ho vinaash hoga? kaam to poora kiya nahin। achha।

chaaron or ke sada umang-utsaah mein aage badhne vaale, sada himmat se baapdaada ki padamguna madad ke paatra bachchon ko, sada vijayi ratna hain, har kalpa mein vijayi bane the, ab bhi hain aur har kalpa mein vijayi hain hi hain। aise vijayi bachchon ko sada ek baap doosra na koi, na sansaar ki aakarshan, na sanskaar ki aakarshan, donon aakarshan se mukta rahne vaale, sada baap samaan bachchon ko baapdaada ka yaadapyaar aur namaste।

vardaan:- sadaakaal ke attention dvaara vijay maala mein pirone vaale bahut samay ke vijayi bhav

bahut samay ke vijayi, vijay maala ke manke bante hain। vijayi banne ke liye sada baap ko saamne rakho - jo baap ne kiya vahi humein karna hai। har kadam par jo baap ka sankalp vahi bachchon ka sankalp, jo baap ke bol vahi bachchon ke bol - tab vijayi banenge। yeh attention sadaakaal ka chaahiye tab sada-kaal ka raajya-bhaagya praapta hoga kyonki jaisa purushaartha vaisi praalabdha hai। sada ka purushaartha hai to sada ka raajya-bhaagya hai।

slogan:- seva mein sada ji haazir karna - yahi pyaar ka sachcha saboot hai।

avyakt ishaare-aatmik sthiti mein rahne ka abhyaas karo, antarmukhi bano

jaise koi bhi vyakti darpan ke saamne khada hote hi svayan ka saakshaatkaar kar leta hai, vaise aapki aatmik sthiti, shakti roopi darpan ke aage koi bhi aatma aave to woh ek second mein sva swaroop ka darshan va saakshaatkaar kar le। aapke har karma mein, har chalan mein roohaaniyat ki attraction ho। jo svachchha, aatmik bal vaali aatmaayen hain, woh sabko apni or aakarshit zaroor karti hain।