Murli du jour du jeudi 3 juillet 2025

03-07-2025 praatahmurli om shanti "baapdaada"' madhuban

“meethe bachche - is behad naatak mein tum wonderful actor ho, yeh anaadi naatak hai, ismen kuchh bhi badli nahin ho sakta''

prashn:- buddhivaan, dooraadeshi bachche hi kis guhya raaz ko samajh sakte hain?

uttar:- mool vatan se lekar saare drama ke aadi-madhya-ant ka jo guhya raaz hai, woh dooraadeshi bachche hi samajh sakte hain, beej aur jhaad ka saara gyaan unki buddhi mein rehta hai। woh jaante hain - is behad ke naatak mein aatma roopi actor jo yeh chola pahankar part baja rahi hai, ise satayug se lekar kaliyug tak part bajaana hai। koi bhi actor beech mein vaapis ja nahin sakta।

geet:- toone raat ganvaai…

om shanti। yeh geet bachchon ne suna। ab ismen koi akshar right bhi hain, to wrong bhi hain। sukh mein to simran kiya nahin jaata। duhkh ko bhi aana hai zaroor। duhkh ho tab to sukh dene ke liye baap ko aana pade। meethe-meethe bachchon ko maaloom hai, abhi ham sukhdhaam ke liye padh rahe hain। shantidham aur sukhdhaam। pahle mukti phir hoti hai jeevanmukti। shantidham ghar hai, vahaan koi part nahin bajaaya jaata। actors ghar mein chale jaate hain, vahaan koi part nahin bajaate। part stage par bajaaya jaata hai। yeh bhi stage hai। jaise had ka naatak hota hai vaise yeh behad ka naatak hai। inke aadi-madhya-ant ka raaz sivaae baap ke koi aur samjha na sake। vaastav mein yeh yaatra athva yuddha akshar sirf samjhaane mein kaam mein laate hain। baaki ismen yuddha aadi kuchh hai nahin। yaatra bhi akshar hai। baaki hai to yaad। yaad karte-karte paavan ban jaayenge। yeh yaatra poori bhi yahaan hi hogi। kahaan jaana nahin hai। bachchon ko samjhaaya jaata hai paavan bankar apne ghar jaana hai। apvitra to ja na saken। apne ko aatma samajhna hai। mujh aatma mein saare chakra ka part hai। abhi woh part poora hua hai। baap raay dete hain bahut sahaj, mujhe yaad karo। baaki baithe to yahaan hi ho। kahaan jaate nahin ho। baap aakar kehte hain mujhe yaad karo to tum paavan ban jaayenge। yuddha koi hai nahin। apne ko tamopradhaan se satopradhaan banaana hai। maaya par jeet paani hai। bachche jaante hain 84 ka chakra poora hona hai, bhaarat satopradhaan tha। usmein zaroor manushya hi honge। jameen thode hi badlegi। abhi tum jaante ho ham satopradhaan the phir tamopradhaan bane ab phir satopradhaan banna hai। manushya pukaarte bhi hain ki aakar hamko patit se paavan banaao। parantu woh kaun hai, kaise aate hain, kuchh nahin jaante। abhi baba ne tumhein samajhdaar banaaya hai। kitna oonch martaba tum paate ho। vahaan ke gareeb bhi bahut oonch hain, yahaan ke saahookaaron se। bhal kitne bhi bade-bade raajaayen the, dhan bahut tha parantu hain to vikaari na। inse vahaan ki saadhaaran praja bhi bahut oonch banti hai। baba pharka batlaate hain। raavan ka parchhaaya aane se patit ban jaate hain। nirvikaari devtaaon ke aage apne ko patit kah maatha jaakar tekte hain। baap yahaan aate hain to phat se oonch chadha dete hain। second ki baat hai। abhi baap ne teesra netra diya hai gyaan ka। tum bachche dooraadeshi ban jaate ho। oopar mool vatan se lekar saare drama ka chakra tumhaari buddhi mein yaad hai। jaise had ka drama dekhkar phir aae sunaate hain na - kya-kya dekha। buddhi mein bhara hua hai, jo varnan karte hain। aatma mein bharkar aate hain phir aakar delivery karte hain। yeh phir hain behad ki baaten। tum bachchon ki buddhi mein is behad drama ke aadi-madhya-ant ka raaz rehna chaahiye। jo repeat hota rehta hai। us had ke naatak mein to ek actor nikal jaata hai to phir badle mein doosra aa sakta hai। koi beemaar hua to unke badle phir doosra add kar denge। yeh to chaitanya drama hai, ismen zara bhi adli-badli nahin ho sakti। tum bachche jaante ho ham aatma hain। yeh shareer roopi chola hai, jo pahankar ham bahuroopi part bajaate hain। naam, roop, desh, features badalte jaate hain। actors ko apni act ka to maaloom hota hai na। baap bachchon ko yeh chakra ka raaz to samjhaate rehte hain। satayug se lekar kaliyug tak aate hain phir jaate hain phir naye sir aakar part bajaate hain। inki detail samjhaane mein time lagta hai। beej mein bhal knowledge hai phir bhi samjhaane mein time to lagta hai na। tumhaari buddhi mein saara beej aur jhaad ka raaz hai, so bhi jo achhe buddhivaan hain, vahi samajhte hain ki iska beej oopar mein hain। inki utpatti, paalna aur sanhaar kaise hota hai, isliye trimoorti bhi dikhaaya hai। yeh samjhaani jo baap dete hain, aur koi bhi manushya de na sake। jab yahaan aaye tab pata pade isliye tum sabko kehte ho yahaan aakar samjho। koi-koi bahut kattar hote hain to kehte hain hamko kuchh sunna nahin hai। koi to phir sunte bhi hain, koi literature lete hain, koi nahin lete hain। tumhaari buddhi abhi kitni vishaal, dooraadeshi ho gai hai। teenon lokon ko tum jaante ho, mool vatan jisko niraakaari duniya kaha jaata hai। baaki sookshm vatan ka kuchh bhi hai nahin। connection saara hai mool vatan aur sthoolavtan se। baaki sookshm vatan to thoda time ke liye hai। baaki aatmaayen sab oopar se yahaan aati hain part bajaane। yeh jhaad sab dharmon ka nambarvaar hai। yeh hai manushyon ka jhaad aur bilkul accurate hai। kuchh bhi aage-peechhe ho na sake। na aatmaayen aur koi jagah baith sakti hain। aatmaayen brahm mahtatva mein khadi hoti hain, jaise stars aakaash mein khade hain। yeh stars to door se chhote-chhote dekhne mein aate hain। hain to bade। lekin aatma to na chhoti-badi hoti hai, na vinaash ko paati hai। tum golden ej mein jaate ho phir iron ej mein aate ho। bachche jaante hain ham golden ej mein the, ab iron ej mein aa gaye hain। koi value nahin rahi hai। bhal maaya ki chamak kitni bhi hai parantu yeh hai raavan ki golden ej, woh hai eeshvareey golden ej।

manushya kehte rehte hain - 6-7 varshon mein itna anaaj hoga, jo baat mat poochho। dekho, unhon ka plan kya hai aur tum bachchon ka plan kya hai? baap kehte hain mera plan hai puraani ko naya banaana। tumhaara ek hi plan hai। jaante ho baap ki shreemat se ham apna varsa le rahe hain। baba raasta bataate hain, shreemat dete hain, yaad mein rahne ki mat dete hain। mat akshar to hai na। sanskrit akshar to baap nahin bolte hain। baap to hindi mein hi samjhaate rehte hain। bhaashaayen to dher hain na। interpreter bhi hote hain, jo sunkar phir sunaate hain। hindi aur english to bahut jaante hain। padhte hain। baaki maataayen ghar mein rahne vaali itna nahin padhti hain। aajkal vilaayat mein angreji seekhte hain to phir yahaan aane se bhi english bolte rehte hain। hindi bol hi nahin sakte। ghar mein aate hain to maa se english mein baat karne lag padte hain। woh bichaari moonjh padti hain ham kya jaanen english se। phir unko tooti-phooti hindi seekhni pade। satayug mein to ek raajya ek bhaasha thi, jo ab phir se sthaapan kar rahe hain। har 5 hazaar varsha baad yeh srishti ka chakra kaise phirta hai so buddhi mein rehna chaahiye। ab ek baap ki hi yaad mein rehna hai। yahaan tumko phursat achhi rehti hai। savere mein snaan aadi kar baahar ghoomne phirne mein bada maza aata hai, andar mein yahi yaad rahe ham sab actors hain। yeh bhi abhi smriti aai hai। baba ne hamko 84 ke chakra ka raaz bataaya hai। ham satopradhaan the, yeh badi khushi ki baat hai। manushya ghoomte-phirte hain, unki kuchh bhi kamaai nahin। tum to bahut kamaai karte ho। buddhi mein chakra bhi yaad rahe phir baap ko bhi yaad karte raho। kamaai karne ki yuktiyaan baba bahut achhi-achhi bataate hain। jo bachche gyaan ka vichaar saagar manthan nahin karte hain unki buddhi mein maaya khit-khit karti hai। unhein hi maaya tang karti hai। andar mein yeh vichaar karo hamne yeh chakra kaise lagaaya hai। satayug mein itne janma liye phir neeche utarte aaye। ab phir satopradhaan banna hai। baba ne kaha hai - mujhe yaad karo to satopradhaan ban jaayenge। chalte-phirte buddhi mein yaad rahe to maaya ki khit-khit samaapta ho jaayegi। tumhaara bahut-bahut faayda hoga। bhal stri-purush saath jaate ho। har ek ko apnesir mehnat karni hai, apna oonch pad paane। akele mein jaane se to bahut hi maza hai। apni hi dhun mein rahenge। doosra saath mein hoga to bhi buddhi idhar-udhar jaayegi। hai bahut sahaj, bageeche aadi to sab jagah hain, engineer hoga to unka yahi chintan chalta rahega ki yahaan pul banaani hai, yeh karna hai। buddhi mein plan aa jaata hai। tum bhi ghar mein baitho phir bhi buddhi us taraph lagi rahe। yeh aadat rakho to tumhaare andar yahi chintan chalta rahe। padhna bhi hai, dhandha aadi bhi karna hai। boodhe, javaan, bachchon aadi sabko paavan banna hai। aatma ko hak hai, baap se varsa lene ka। bachchon ko bhi chhotepan mein hi yeh beej pad jaae to bahut achha। aadhyaatmik vidya aur koi sikha na sake।

tumhaari yeh jo aadhyaatmik vidya hai, yeh tumko baap hi aakar padhaate hain। un school mein milti hai jismaani vidya। aur woh hai shaastron ki vidya। yeh phir hai roohaani vidya, jo tumko bhagwan sikhlaate hain। inka kisko bhi pata nahin। inko kaha hi jaata hai spiritual knowledge। jo rooh aakar padhaate hain, unka aur koi naam nahin rakha ja sakta। yeh to svayan baap aakar padhaate hain। bhagvaanuvaach hai na। bhagwan ek hi baar is samay aakar samjhaate hain, isko roohaani knowledge kaha jaata hai। woh shaastron ki vidya alag hai। tumko pata hai ki knowledge ek hai jismaani college aadi ki, doosri hai aadhyaatmik shaastron ki vidya, teesri hai yeh roohaani knowledge। woh bhal kitne bhi bade-bade doctor oph philosophy hain, parantu unhon ke paas bhi shaastron ki baaten hain। tumhaari yeh knowledge bilkul alag hai। yeh spiritual knowledge jo spiritual father sabhi aatmaon ka baap hai, vahi padhaate hain। unki mahima hai shanti, sukh ka saagar......। krishna ki mahima bilkul alag hai, gun-avgun manushya mein hote hain, jo bolte rehte hain। baap ki mahima ko bhi yathaartha reeti tum jaante ho। woh to sirf tote muaaphik gaate hain, arth kuchh nahin jaante। to bachchon ko baba raay dete hain apni unnati kaise karo। purushaartha karte rahenge to phir pakka hota jaayega phir office mein kaam karne samay bhi yeh smriti aayegi, eeshvar ki smriti rahegi। maaya ki smriti to aadhaakalpa chali hai, abhi baap yathaartha reeti baith samjhaate hain। apne ko dekho - ham kya the, ab kya ban gaye hain! phir hamko baba aisa devta banaate hain। yeh bhi tum bachche hi nambarvaar purushaartha anusaar jaante ho। pahle-pahle bhaarat hi tha। bhaarat mein hi baap bhi aate hain part bajaane। tum bhi aadi sanaatan devi-devta dharma ke ho na। tumko pavitra banna hai, nahin to pichhaadi mein aayenge, phir kya sukh paayenge। bhakti jaasti nahin ki hogi to aayenge nahin। samajh jaayenge yeh itna uthaane vaala nahin hai। samajh to sakte hain na। bahut mehnat karte hain phir bhi koi virle nikalte hain lekin thakna nahin hai। mehnat to karni hai। mehnat bigar kuchh milta thode hi hai। praja to banti rehti hai।

baba bachchon ko unnati ke liye yukti bataate hain - bachche, apni unnati karni hai to savere-savere snaan aadi kar ekaanta mein jaakar chakra lagaao va baith jaao। tanduroosti ke liye paidal karna bhi achha hai। baba bhi yaad padega aur drama ka raaz bhi buddhi mein rahega, kitni kamaai hai। yeh hai sachchi kamaai, woh kamaai poori hui phir is kamaai ka chintan karo। difficult kuchh bhi nahin hai। baba ka dekha hua hai saari jeevan kahaani likhte hain - aaj itne baje utha, phir yeh kiya...... samajhte hain pichhaadi vaale padhkar seekhenge। bade-bade manushyon ki biography padhte hain na। bachchon ke liye likhte hain phir bachche bhi ghar mein aise achhe svabhaav ke hote hain। abhi tum bachchon ko purushaartha kar satopradhaan banna hai। satopradhaan duniya ka phir se raajya lena hai। tum jaante ho kalpa-kalpa ham raajya lete hain aur phir ganvaate hain। tumhaari buddhi mein yeh sab hai। yeh hai nai duniya, naye dharma ke liye nai knowledge, isliye meethe-meethe bachchon ko phir bhi samjhaate hain - jaldi-jaldi purushaartha karo। shareer par bharosa thode hi hai। aajkal maut bahut easy ho gaya hai। vahaan amarlok mein aisi mrityu kab hoti nahin, yahaan to baithe-baithe kaise mar jaate hain isliye apna purushaartha karte raho। jama karte raho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) buddhi ko gyaan chintan mein busy rakhne ki aadat daalni hai। jab bhi samay mile ekaanta mein jaakar vichaar saagar manthan karna hai। baap ko yaad kar sachchi kamaai jama karni hai।

2) dooraadeshi bankar is behad ke naatak ko yathaartha reeti samajhna hai। sabhi paartadhaariyon ke part ko saakshi hokar dekhna hai।

vardaan:- madhurta ke vardaan dvaara sada aage badhne vaali shreshtha aatma bhav

madhurta aisi vishesh dhaarna hai jo kadvi dharni ko bhi madhur bana deti hai। kisi ko bhi do ghadi meethi drishti de do, meethe bol, bol do to kisi bhi aatma ko sada ke liye bharpoor kar denge। do ghadi ki meethi drishti va bol us aatma ki srishti badal denge। aapke do madhur bol bhi sada ke liye unhein badalne ke nimitta ban jaayenge isliye madhurta ka vardaan sada saath rakhna। sada meetha rehna aur sarva ko meetha banaana।

slogan:- har paristhiti mein raazi raho to raazayukta ban jaayenge।

avyakt ishaare - sankalpon ki shakti jama kar shreshtha seva ke nimitta bano

jab aur sab sankalp shant ho jaate hain, bas ek baap aur aap - is milan ki anubhooti ka sankalp rehta hai tab sankalp shakti jama hoti hai aur yog powerful ho jaata hai, iske liye samaane va sametne ki shakti dhaaran karo। sankalpon par full brake lage, dheeli nahin। agar ek second ke bajaae jyaada samay lag jaata hai to samaane ki shakti kamjor hai।