Murli du jour du mardi 5 août 2025

05-08-2025 praatahmurli om shanti "baapdaada"' madhuban

“meethe bachche - baap aaye hain is veshyaalay ko shivaalay banaane। tumhaara kartavya hai - veshyaaon ko bhi eeshvareey sandesh de unka bhi kalyaan karna''

prashn:- kaun-se bachche apna bahut bada nuksaan karte hain?

uttar:- jo kisi bhi kaaran se murli (padhaai) miss karte hain, woh apna bahut bada nuksaan karte hain। kai bachche to aapas mein rooth jaane ke kaaran class mein hi nahin aate। koi na koi bahaana banaakar ghar mein hi so jaate hain, isse ve apna hi nuksaan karte hain kyonki baba to roz koi na koi nai yuktiyaan bataate rehte hain, sunenge hi nahin to amal mein kaise laayenge।

om shanti। meethe-meethe roohaani bachche yeh to jaante hain ki abhi ham vishwa ke maalik banne ke liye purushaartha kar rahe hain। bhal maaya bhi bhula deti hai। koi-koi ko to saara din bhula deti hai। kabhi yaad hi nahin karte jo khushi bhi ho। hamko bhagwan padhaate hain yeh bhi bhool jaate hain। bhool jaane ke kaaran phir koi service nahin kar sakte। raat ko baba ne samjhaaya - adham te adham jo veshyaayen hain unki service karni chaahiye। veshyaaon ke liye tum elaan karo ki tum baap ke is gyaan ko dhaaran karne se svarga ke vishwa ki mahaaraani ban sakti ho, saahookaar log nahin ban sakte। jo jaante hain, padhe likhe hain woh prabandha karenge, unhon ko gyaan dene ka, to bichaari bahut khush hongi kyonki woh bhi ablaayen hain, unko tum samjha sakte ho। yuktiyaan to bahut hi baap samjhaate rehte hain। bolo, tum hi oonch te oonch, neech te neech bani ho। tumhaare naam se hi bhaarat veshyaalay bana hai। phir tum shivaalay mein ja sakti ho - yeh purushaartha karne se। tum abhi paise ke liye kitna ganda kaam karti ho। ab yeh chhodo। aisa samjhaane se woh bahut khush hongi। tumko koi rok nahin sakte। yeh to achhi baat hai na। gareebon ka hai hi bhagwan। paise ke kaaran bahut ganda kaam karti hain। unhon ka jaise dhandha chalta hai। abhi bachche kehte hain ham yuktiyaan nikaalenge, service vriddhi ko kaise paaye। koi bachche koi na koi baat mein rooth bhi padte hain। padhaai bhi chhod dete hain। yeh nahin samajhte ki ham nahin padhenge to apna hi nuksaan karenge। roothkar baith jaate hain। phalaani ne yeh kaha, aise kaha isliye aate nahin। haphte mein ek baar mushkil aate hain। baba to murliyon mein kabhi kya raay, kabhi kya raay dete rehte hain। murli sunna to chaahiye na। class mein jab aayenge to sunenge। aise bahut hain, kaaran-akaarne bahaana banaae so jaayenge। achha, aaj nahin jaate hain। are, baba aisi achhi-achhi points sunaate hain। service karenge to oonch pad bhi paayenge। yeh to hai padhaai। banaaras hindu university aadi mein shaastra bahut padhte hain। doosra koi dhandha nahin hoga to bas shaastra kantha kar satsang shuru kar dete hain। unmein uddeshya aadi to kuchh hai nahin। is padhaai se to sabka beda paar hota hai। to tum bachchon ko aise-aise adham ki service karni hai। saahookaar log jab dekhenge yahaan aise-aise aate hain to unke aane ki dil nahin hogi। deh-abhimaan hai na। unko lajja aayegi। achha, to unka ek alag school khol lo। woh padhaai to hai paai paise ki, shareer nirvaah arth। yeh to hai 21 janmon ke liye। kitnon ka kalyaan ho jaayega। aksar karke maataayen bhi poochhti hain ki baba ghar mein geeta paathshaala kholen? unhon ko eeshvareey seva ka shauk rehta hai। purush log to idhar-udhar club aadi mein ghoomte rehte hain। saahookaaron ke liye to yahaan hi svarga hai। kitne fashion aadi karte rehte hain। lekin devtaaon ki to natural beauty dekho kaisi hai। kitna farka hai। vaise yahaan tumko sach sunaaya jaata hai to kitne thode aate hain। so bhi gareeb। us taraph jhat chale jaate hain। vahaan bhi shrringaar aadi karke jaate hain। guru log sagaai bhi karaate hain। yahaan kiski sagaai karaai jaati hai to bhi bachaane ke liye। kaam chita par chadhne se bach jaae। gyaan chita par baith padma bhaagyashaali ban jaaen। maa-baap ko kehte hain yeh barbaadi ka dhandha chhod chalo svarga mein। to kehte hain kya karen, yeh duniya vaale hamaare oopar bigdenge ki kul ka naam badnaam karte hain। shaadi na karaana kaayde ke barkhilaaph hai। lok laaj, kul ki maryaada chhodte nahin hain। bhakti maarga mein gaate hain - mera to ek, doosra na koi। meera ke bhi geet hain। females mein number one bhaktin meera, males mein naarad gaaya hua hai। naarad ki bhi kahaani hai na। tumko koi naya aadmi kahe - main lakshmi ko var sakta hoon। to bolo, apne ko dekho laayak ho? pavitra sarvagun sampanna… ho? yeh to vikaari patit duniya hai। baap aaye hain unse nikaal paavan banaane। paavan bano tab to lakshmi ko varne ke laayak ban sakenge। yahaan baba ke paas aate hain, pratigya karte phir ghar mein jaakar vikaar mein girte hain। aise-aise samaachaar aate hain। baba kehte hain aise-aise ko jo braahmani le aati hai unke oopar bhi asar pad jaata hai। indra sabha ki kahaani bhi hai na। to le aane vaale par bhi danda pad jaata hai। baba braahmaniyon ko hamesha kehte hain kachche-kachche ko mat le aao। tumhaari avastha bhi gir padegi kyonki bekaayde le aaye। vaastav mein braahmani banna hai bahut sahaj। 10-15 din mein ban sakti hai। baba kisko bhi samjhaane ki bahut sahaj yukti bataate hain। tum bhaaratvaasi aadi sanaatan devi-devta dharma ke the, svargavaasi the। ab narkavaasi ho phir svargavaasi banna hai to yeh vikaar chhodo। sirf baap ko yaad karo to vikarma vinaash ho jaaen। kitna sahaj hai। parantu koi bilkul samajhte nahin hain। khud hi nahin samajhte to auron ko kya samjhaayenge। vaanaprastha avastha mein bhi moh ki rag jaati rehti hai। aajkal vaanaprastha avastha mein itne nahin jaate hain। tamo-pradhaan hain na। yahaan hi phanse rehte hain। aage vaanaprasthiyon ke bade-bade aashram the। aajkal itne nahin hain। 80-90 varsha ke ho jaate to bhi ghar ko nahin chhodte। samajhte hi nahin ki vaani se pare jaana hai। ab eeshvar ko yaad karna hai। bhagwan kaun hai, yeh sab nahin jaante। sarvavyaapi kah dete to yaad kisko karen। yeh bhi nahin samajhte ki ham pujaari hain। baap to tumko pujaari se poojya banaate hain so bhi 21 janmon ke liye। iske liye purushaartha to karna padega।

baba ne samjhaaya hai yeh puraani duniya to khatma honi hai। abhi hamko jaana hai ghar - bas yahi taat rahe। vahaan criminal baat hoti hi nahin। baap aakar us pavitra duniya ke liye taiyaari karaate hain। serviceable laadle bachchon ko to naynon par bithaakar le jaate hain। to adhmon ka uddhaar karne ke liye bahaaduri chaahiye, us government mein to bade-bade jhunda hote hain। tiptop ho jaate hain padhe-likhe। yahaan to kai gareeb saadhaaran hain। unko baap baith itna oonch uthaate hain। chalan bhi badi royal chaahiye। bhagwan padhaate hain। us padhaai mein koi bada imtahaan paas karte hain to kitna tiptop ho jaate hain। yahaan to baap gareeb nivaaz hain। gareeb hi kuchh-na-kuchh bhej dete hain। ek-do roopaye ka bhi maneeordar bhej dete hain। baap kehte hain tum to mahaan bhaagyashaali ho। return mein bahut mil jaata hai। yeh bhi koi nai baat nahin। saakshi ho drama dekhte hain। baap kehte hain bachche achhi reeti padho। yeh eeshvareey yagya hai jo chaahe so lo। lekin yahaan lenge to vahaan kam ho jaayega। svarga mein to sab kuchh milna hai। baba ko to service mein bade phurta bachche chaahiye। sudesh jaisi, mohini jaisi, jinko service ka umang ho। tumhaara naam bahut baala ho jaayega। phir tumko bahut maan denge। baba sab direction dete rehte hain। baba to kehte hain yahaan bachchon ko jitna samay mile, yaad mein raho। imtahaan ke din nazdeek hote hain to ekaanta mein jaakar padhte hain। private teacher bhi rakhte hain। hamaare paas teacher to bahut hain, sirf padhne ka shauk chaahiye। baap to bahut sahaj samjhaate hain। sirf apne ko aatma nishchay karo। yeh shareer to vinaashi hai। tum aatma avinaashi ho। yeh gyaan ek hi baar milta hai phir satayug se lekar kaliyug ant tak kisko milta hi nahin। tumko hi milta hai। ham aatma hain yeh to pakka nishchay kar lo। baap se hamko varsa milta hai। baap ki yaad se hi vikarma vinaash honge। bas। yeh andar ratte rahen to bhi bahut kalyaan ho sakta hai। parantu chart rakhte hi nahin। likhte-likhte phir thak jaate hain। baba bahut sahaj kar batlaate hain। ham aatma satopradhaan thi, ab tamopradhaan bani hoon। ab baap kehte hain mujhe yaad karo to satopradhaan ban jaayenge। kitna sahaj hai phir bhi bhool jaate hain। jitna samay baitho apne ko aatma samjho। main aatma baba ka bachcha hoon। baap ko yaad karne se svarga ki baadshaahi milegi। baap ko yaad karne se aadhaakalpa ke paap bhasma ho jaayenge। kitna sahaj yukti batlaate hain। sab bachche sun rahe hain। yeh baba khud bhi practice karte hain tab to sikhaate hain na। main baba ka rath hoon, baba mujhe khilaate hain। tum bachche bhi aise samjho। shivbaaba ko yaad karte raho to kitna phaayda ho jaae। parantu bhool jaate hain। bahut sahaj hai। dhandhe mein koi graahak nahin hai to yaad mein baith jaao। main aatma hoon, baba ko yaad karna hai। beemaari mein bhi yaad kar sakte ho। baandheli ho to vahaan baith tum yaad karti raho to 10-20 varsha vaalon se bhi oonch pad pa sakti ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) service mein bahut-bahut phurta banna hai। jitna samay mile ekaanta mein baith baap ko yaad karna hai। padhaai ka shauk rakhna hai। padhaai se roothna nahin hai।

2) apni chalan bahut-bahut royal rakhni hai, bas ab ghar jaana hai, puraani duniya khatma honi hai isliye moh ki ragen tod deni hain। vaanaprastha (vaani se pare) avastha mein rahne ka abhyaas karna hai। adhmon ka bhi uddhaar karne ki seva karni hai।

vardaan:- shreshtha vritti dvaara vrittiyon ka parivartan karne vaale sada siddhi swaroop bhav

siddhi swaroop banne ke liye vritti dvaara vrittiyon ko, sankalp dvaara sankalpon ko parivartan karne ka kaarya karo, iski research karo। jab is seva mein busy ho jaayenge to yeh sookshm seva svatahkai kamjoriyon se paar kar degi। abhi iska plan banaao to jigyaasu bhi jyaada badhenge, madogri bhi bahut badhegi, makaan bhi mil jaayenge - sab siddhiyaan sahaj ho jaayengi। yeh viddhi-siddhi swaroop bana degi।

slogan:- samay ko saphal karte raho to samay ke dhokhe se bach jaayenge।

avyakt ishaare - sahajyogi banna hai to parmaatma pyaar ke anubhvi bano

baap ka bachchon se itna pyaar hai jo roz pyaar ka respond dene ke liye itna bada patra likhte hain। yaadapyaar dete hain aur saathi ban sada saath nibhaate hain, to is pyaar mein apni sab kamjoriyaan kurbaan kar do। parmaatma pyaar mein aise samaaye raho jo kabhi had ka prabhaav apni or aakarshit na kar sake। sada behad ki praaptiyon mein magan raho jisse roohaaniyat ki khushbu vaataavran mein phail jaae।