Murli du jour du jeudi 21 août 2025

21-08-2025 praatahmurli om shanti "baapdaada"' madhuban

“meethe bachche - tum aasuri mat par chalne se darabdar ho gaye, ab eeshvareey mat par chalo to sukhdhaam chale jaayenge''

prashn:- bachchon ko baap se kaun si ummeed rakhni hai, kaun si nahin?

uttar:- baap se yahi ummeed rakhni hai ki ham baap dvaara pavitra ban apne ghar aur ghaat (raajdhaani) mein jaayen। baba kehte hain - bachche, mere mein yeh ummeed nahin rakho ki phalaana beemaar hai, aasheervaad mile। yahaan kripa ya aasheervaad ki baat hi nahin hai। main to aaya hoon tum bachchon ko patit se paavan banaane। ab main tumko aise karma sikhlaata hoon jo vikarma na banen।

geet:- aaj nahin to kal bikhrenge yeh baadal…

om shanti। roohaani bachchon ne geet suna। bachche jaante hain ab ghar chalna hai। baap aaye hain lene ke liye। yeh yaad bhi tab rahegi jab aatma-abhimaani honge। deh-abhimaan mein honge to yaad bhi nahin rahegi। bachche jaante hain baba musaaphir hokar aaya hai। tum bhi musaaphir hokar aaye the। ab apne ghar ko bhool gaye ho। phir baap ne ghar yaad dilaaya hai aur roz-roz samjhaate hain। jab tak satopradhaan nahin bane ho to chal nahin sakenge। bachche samajhte hain baba to theek kehte hain। baap bhi bachchon ko jo shreemat dete hain to sapoot bachche us par chal padte hain। is samay aur to koi aisa baap nahin jo achhi mat deve isliye darabdar ho pade hain। shreemat dene vaala ek hi baap hai। us mat par bhi koi bachche nahin chalte। wonder hai। laukik baap ki mat par chal padte hain। woh hai aasuri mat। yeh bhi hai to drama। parantu bachchon ko samjhaate hain tumne aasuri mat par chal is gati ko pa liya hai। ab eeshvareey mat par chalne se tum sukhdhaam mein chale jaayenge। woh hai behad ka varsa। roz samjhaate hain। to bachchon ko kitna harshit rehna chaahiye। sabko yahaan to nahin bitha sakte। ghar mein rahkar bhi yaad karna hai। abhi part poora hone ka hai, ab vaapis ghar chalna hai। manushya kitna bhoole hue hain। kaha jaata hai na - yeh to apna ghar ghaat hi bhool gaye hain। ab baap kehte hain ghar ko bhi yaad karo। apni raajdhaani bhi yaad karo। abhi part poora hone ka hai, ab vaapis ghar chalna hai। kya tum bhool gaye ho?

tum bachche kah sakte ho - baba drama anusaar hamaara part hi aisa hai, jo ham gharbaar ko bhool ekdam bhatak rahe hain। bhaarat-vaasi hi apne shreshtha dharma, karma ko bhool kar daivi dharma bhrashta, daivi karma bhrashta ho pade hain। abhi baap ne saavdhaani di hai, tumhaara dharma karma to yeh tha। vahaan tum jo karma karte the woh akarma hota tha। karma, akarma, vikarma ki gati baap ne hi tumhein samjhaai hai। satayug mein karma, akarma ho jaate hain। raavan raajya mein karma vikarma hote hain। abhi baap aaya hua hai, dharma shreshtha karma shreshtha banaane। to ab shreemat par karma shreshtha karna chaahiye। koi bhrashta karma karke kisko duhkh nahin dena chaahiye। eeshvareey bachchon ka yeh kaam nahin hai। jo direction milte hain us par chalna hai, daiveegun dhaaran karne hain। bhojan bhi shuddh lena hai, agar laachaari nahin milta to raay poochho। baba samajhte hain naukri aadi mein kahaan thoda khaana bhi padta hai। jabki yogbal se tum raajaai sthaapan karte ho, patit duniya ko paavan banaate ho to bhojan ko shuddh banaana kya badi baat hai। naukri to karni hi hai। aise to nahin baap ka banen to sab kuchh chhod yahaan aakar baith jaana hai। kitne dher bachche hain, itne sab to rah nahin sakte। rehna sabko grihastha vyavhaar mein hai। yeh samajhna hai - main aatma hoon, baba aaya hua hai, hamko pavitra banaakar apne ghar le jaate hain phir raajdhaani mein aa jaayenge। yeh to paraaya raavan ka chhi-chhi ghaat hai। tum bilkul hi patit ban gaye ho, drama plan anusaar। baap kehte hain abhi main tumko sujaag karne aaya hoon to shreemat par chalo। jitna chalenge utna shreshtha banenge।

abhi tum samajhte ho ham baap ko jo baap svarga ka maalik banaate hain, unko bhool gaye। ab baba sudhaarne aaye hain to achhi reeti sudharna chaahiye na। khushi mein aana chaahiye। behad ka baap mila hai, bachchon se baat aise karte hain jaise tum aatmaayen aapas mein karti ho। hai to woh bhi aatma। param aatma hai, unka bhi part hai। tum aatmaayen paartadhaari ho। oonch te oonch se lekar neech te neech ka part hai। bhakti maarga mein manushya gaate hain eeshvar hi sab kuchh karte hain। baap kehte hain mera aisa part thode hi hai jo beemaar ko achha kar doon। hamaara part hai raasta bataana ki tum pavitra kaise bano? pavitra banne se hi tum ghar mein bhi ja sakenge। raajdhaani mein bhi ja sakenge। aur koi ummeed mat rakho। phalaana beemaar hai, aasheervaad mile। nahin, aasheervaad, kripa aadi ki baat mere paas kuchh bhi nahin। uske liye saadhu-santon aadi ke paas jaao। tum hamko bulaate hi ho ki he patit-paavan aao, aakar hamko paavan banaao। paavan duniya mein le chalo। to baap poochhte hain main tumko vishay saagar se nikaal paar le jaata hoon, phir tum vishay saagar mein kyon phans jaate ho? bhakti maarga mein tumhaara yeh haal hua hai। gyaan, bhakti tumhaare liye hai। sanyaasi log bhi kehte hain gyaan, bhakti aur vairaagya। parantu unka arth woh nahin samajhte। ab tumhaari buddhi mein hai gyaan, bhakti baad mein vairaagya। to behad ka vairaagya sikhlaane vaala chaahiye। baap ne samjhaaya tha yeh kabristaan hai, inke baad paristaan banna hai। vahaan har karma, akarma hota hai। abhi baba tumko aise karma sikhlaate hain jo koi bhi vikarma na banen। kisi ko bhi duhkh na do। patit ka anna mat khaao। vikaar mein mat jaao। ablaaon par atyaachaar hi is par hote hain। dekhte rehte ho - maaya ke vighna kaise padte hain। yeh hai sab gupta। kehte hain devtaaon aur asuron ki yuddha lagi। phir kehte hain - paandav aur kaurvon ki yuddha lagi। ab ladaai to ek hi hai। baap samjhaate hain main tumko raajayog sikhla raha hoon bhavishya 21 janmon ke liye। yeh mrityulok hai। manushya satya naaraayan ki katha sunte aaye hain, phaayda kuchh nahin। abhi tum sachchi geeta sunaate ho। raamaayan bhi tum sachchi sunaate ho। ek raam-seeta ki baat nahin thi। is samay to saari duniya lanka hai। chaaron or paani hai na। yeh hai behad ki lanka, jismen raavan ka raajya hai। ek baap hai bridegroom। baaki sab hain brides। tumko ab raavan raajya se baap chhudaate hain। yeh hai shok vaatika। satayug ko kaha jaata hai ashok vaatika। vahaan koi shok hota nahin। is samay to shok hi shok hai। ashok ek bhi nahin rehta। naam to rakh dete hain ashoka hotel। baap kehte hain saari duniya is samay behad ki hotel hi samjho। shok ki hotel hai। khaan-paan manushyon ka jaanavron misal hai। tumko dekho baap kahaan le jaate hain। sachchi-sachchi ashok vaatika hai satayug mein। had aur behad ka contrast baap hi batlaate hain। tum bachchon ko bahut khushi rahni chaahiye। jaante ho baba hamko padhaate hain। hamaara bhi vahi dhandha hai - sabko raasta bataana, andhon ki laathi banna। chitra bhi tumhaare paas hain। jaise school mein chitron par samjhaate hain, yeh phalaana desh hai। tum to phir samjhaate ho tum aatma ho, shareer nahin ho। aatmaayen bhaai-bhaai hain। kitni sahaj baat sunaate ho। kehte bhi hain ham sab bhaai-bhaai hain। baap kehte hain tum sabhi aatmaayen bhaai-bhaai ho na। god father kehte ho na। to kabhi bhi aapas mein ladna-jhagadna nahin chaahiye। shareerdhaari bante hain to phir bhaai-behen ho jaate। ham shivbaaba ke bachche sab bhaai-bhaai hain। prajaapita brahma ke bachche bhaai-behen hain, hamko varsa daade se lena hai isliye daade ko hi yaad karte hain। is bachche (brahma) ko bhi hamne apna banaaya hai athva inmen pravesh kiya hai। in sab baaton ko tum abhi samajhte ho। baap kehte hain - bachche, ab naya daivi pravritti maarga sthaapan ho raha hai। tum sabhi bi.ke. shivbaaba ki mat par chalte ho। brahma bhi unki mat par chalte hain। baap kehte hain apne ko aatma samajh baap ko yaad karo aur sarva sambandhon ko halka karte jaao। 8 ghanta yaad rakhni hai baaki 16 ghante mein aaraam va dhandha aadi jo karna hai so karo। main baap ka bachcha hoon, yeh nahin bhoolo। aise bhi nahin yahaan aakar hostel mein rehna hai। nahin, grihastha vyavhaar mein baal bachchon ke saath rehna hai। baba paas aate hi hain refresh hone। mathura, vrindaavan mein jaate hain madhuban ka deedaar karne। chhota model roop mein bana rakha hai। ab to yeh behad ki baat samajhne ki hai। shivbaaba brahma dvaara nai srishti rach rahe hain। ham prajaapita brahma ki santaan bi.ke. hain। vikaar ki baat ho na sake। sanyaasiyon ke shishya bante hain, agar woh sanyaasi kapda pahan leve to naam badli ho jaata hai। yahaan bhi tum baba ke ban gaye to naam rakhe na baba ne। kitne bhatthi mein rahe the। is bhatthi ka kisko pata nahin। shaastron mein to kya-kya baaten likhi hain, phir bhi aisa hi hoga। ab tumhaari buddhi mein srishti ka chakra phirta hai। baap bhi svadarshan chakradhaari hai na। srishti ke aadi-madhya-ant ko jaanta hai। baba ko to shareer bhi nahin। tumko to sthool shareer hai। woh hai hi param aatma। aatma hi svadarshan chakradhaari hai na। ab aatma ko alankaar kaise diye jaayen? samajh ki baat hai na। yeh kitni maheen baaten hain। baap kehte hain vaastav mein main hoon svadarshan chakradhaari। tum jaante ho - aatma mein saare srishti chakra ka gyaan aa jaata। baba bhi paramdham mein rahne vaala hai, ham bhi vahaan ke rahne vaale hain। baap aakar apna parichay dete hain - bachche main bhi svadarshan chakradhaari hoon। main patit-paavan aaya hoon tumhaare paas। mujhe bulaaya hi hai ki aakar patit se paavan banaao, liberate karo। unko shareer to hai nahin। woh ajanma hai। bhal janma lete bhi hain parantu divya। shiv jayanti athva shivraatri manaate hain। baap kehte hain main aata hi hoon tab jab raat poori hoti hai, to din banaane aata hoon। din mein 21 janma phir raat mein 63 janma, aatma hi bhinna-bhinna janma leti hai। ab din se raat mein aai hai phir din mein jaana hai। svadarshan chakradhaari bhi tumko banaaya hai। is samay mera part hai। tumko bhi svadarshan chakradhaari banaata hoon। tum phir auron ko banaao। 84 janma kaise liye hain, woh 84 janmon ka chakra to samajh liya hai। aage tumko yeh gyaan tha kya? bilkul nahin। agyaani the। baba mool baat samjhaate hain ki baba hai svadarshan chakradhaari, unko gyaan ka saagar kaha jaata hai। woh satya hai, chaitanya hai। tum bachchon ko varsa de rahe hain। baba bachchon ko samjhaate hain, aapas mein lado-jhagdo mat। loonpaani mat bano। sadaiv harshit rehna hai aur sabko baap ka parichay dena hai। baap ko hi sab bhoole hue hain। ab baap kehte hain maamekam yaad karo। niraakaar bhagvaanuvaach - niraakaari aatmaon prati। asul tum niraakaar ho phir saakaari bante ho। saakaar bigar to aatma kuchh kar hi nahin sakti। aatma shareer se nikal jaati to churpur kuchh bhi ho nahin sakti। aatma phauran jaakar doosre shareer mein apna part bajaati hai। in baaton ko achhi reeti samjho, andar ghotte raho। ham aatma baba se varsa lete hain। varsa milta hai satayug ka। zaroor baap ne hi bhaarat ko varsa diya hoga। kab varsa diya phir kya hua? yeh manushyon ko kuchh bhi pata nahin hai। abhi baap sab bataate hain। tum bachchon ko hi svadarshan chakradhaari banaaya hai, phir tumne 84 janma bhoge। ab phir main aaya hoon, kitna sahaj samjhaate rehte hain। baap ko yaad karo aur meethe bano। em object saamne khadi hai। baap vakeelon ka vakeel hai, sab jhagdon se chhuda dete hain। tum bachchon ko aantarik khushi bahut honi chaahiye। ham baba ke bachche bane hain। baap ne hamko adopt kiya hai varsa dene। yahaan tum aate hi ho varsa lene। baap kehte hain baal-bachche aadi dekhte hue buddhi baap aur raajdhaani ki taraph rahe। padhaai kitni sahaj hai। baap jo tumko vishwa ka maalik banaate hain, unko tum bhool jaate ho। pahle apne ko aatma zaroor samjho। yeh gyaan baap sangam par hi dete hain kyonki sangam par hi tumko patit se paavan hona hai।

achha, meethe-meethe roohaani brahma mukh vanshaavli brahman kul bhooshan, yeh devtaaon se bhi oonch kul hai। tum bhaarat ki bahut oonch seva karte ho। abhi phir tum poojya ban jaayenge। ab pujaari ko poojya, kaudi se heere jaisa bana rahe hain। aise roohaani bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreemat par ab har karma shreshtha karna hai, kisi ko bhi duhkh nahin dena hai, daiveegun dhaaran karne hain। baap ke direction par hi chalna hai।

2) sadaiv harshit rahne ke liye svadarshan chakradhaari banna hai, kabhi loonpaani nahin hona hai। sabko baap ka parichay dena hai। bahut-bahut meetha banna hai।

vardaan:- maan maangane ke bajaae sabko maan dene vaale, sada nishkaam yogi bhav

aapko koi maan de, maane va na maane lekin aap usko meetha bhaai, meethi behen maante hue sada svamaan mein rah, snehi drishti se, sneh ki vritti se aatmik maan dete chalo। yeh maan deve to main maan doon-yeh bhi royal bhikhaareepan hai, ismen nishkaam yogi bano। roohaani sneh ki varsha se dushman ko bhi dosta bana do। aapke saamne koi patthar bhi pheken to bhi aap use ratna do kyonki aap ratnaagar baap ke bachche ho।

slogan:- vishwa ka nav-nirmaan karne ke liye do shabd yaad rakho - nimitta aur nirmaan।

avyakt ishaare - sahajyogi banna hai to parmaatma pyaar ke anubhvi bano

seva mein saphalta ka mukhya saadhan hai - tyaag aur tapasya। aise tyaagi aur tapasvi arthaat sada baap ki lagna mein lavleen, prem ke saagar mein samaae hue, gyaan, aananda, sukh, shanti ke saagar mein samaaye hue ko hi kahenge - tapasvi। aise tyaag tapasya vaale hi sachche sevaadhaari hain।