Murli du jour du mardi 2 septembre 2025

02-09-2025 praatahmurli om shanti "baapdaada"' madhuban

“meethe bachche - tum vishwa mein shanti sthaapan karne ke nimitta ho, isliye tumhein kabhi ashaanta nahin hona chaahiye''

prashn:- baap kin bachchon ko pharmaanbardaar bachche kehte hain?

uttar:- baap ka jo mukhya pharmaan hai ki bachche amritvele (savere) uthkar baap ko yaad karo, is mukhya pharmaan ko paalan karte hain, savere-savere snaan aadi kar fresh ho mukrar time par yaad ki yaatra mein rehte hain, baba unhein sapoot va pharmaanbardaar kehte hain, vahi jaakar raaja banenge। kapoot bachche to jhaadu lagaayenge।

om shanti। iska arth to bachchon ko samjhaaya hai। om arthaat main aatma hoon। aise sab kehte hain jeev aatma hain zaroor aur sab aatmaon ka ek baap hai। shareeron ke baap alag-alag hote hain। yeh bhi bachchon ki buddhi mein hai, had ke baap se had ka aur behad ke baap se behad ka varsa milta hai। ab is samay manushya chaahte hain vishwa mein shanti ho। agar chitron par samjhaaya jaae to shanti ke liye kaliyug ant satayug aadi ke sangam par le aana chaahiye। yeh hai satayug nai duniya, unmein ek dharma hota hai to pavitrata-shanti-sukh hai। unko kaha hi jaata hai heaven। yeh to sab maanenge। nai duniya mein sukh hai, duhkh ho nahin sakta। kisko bhi samjhaana bahut sahaj hai। shanti aur ashaanti ki baat yahaan vishwa par hi hoti hai। woh to hai hi nirvaandhaam, jahaan shanti-ashaanti ka prashn hi nahin uth sakta hai। bachche jab bhaashan karte hain to pahle-pahle vishwa mein shanti ki baat hi uthaani chaahiye। manushya shanti ke liye bahut prayaas karte hain, unko prize bhi milti rehti hai। vaastav mein ismen dauda-daudi karne ki baat hai nahin। baap kehte hain sirf apne svadharma mein tiko to vikarma vinaash ho jaayenge। svadharma mein tikenge to shanti ho jaayegi। tum ho hi ever shant baap ke bachche। yeh varsa unse milta hai। unko koi moksha nahin kahenge। moksha to bhagwan ko bhi nahin mil sakta। bhagwan ko bhi part mein zaroor aana hai। kehte hain kalpa-kalpa, kalpa ke sangamayuge main aata hoon। to bhagwan ko bhi moksha nahin to bachche phir moksha ko kaise pa sakte hain। yeh baaten saara din vichaar saagar manthan karne ki hain। baap to tum bachchon ko hi samjhaate hain। tum bachchon ko samjhaane ki practice jaasti hai। shivbaaba samjhaate hain to tum sab brahman hi samajhte ho। vichaar saagar manthan tumko karna hai। service par tum bachche ho। tumko to bahut samjhaana hota hai। din-raat service mein rehte hain। museum mein saara din aate hi rahenge। raatri ko 10-11 tak bhi kahaan aate hain। savere 4 baje se bhi kahaan-kahaan service karne lag padte hain। yahaan to ghar hai, jab chaahen tab baith sakte hain। centres mein to baahar se door-door se aate hain to time mukrar rakhna padta hai। yahaan to koi bhi time bachche uth sakte hain। parantu aise time to nahin padhna hai jo bachche uthen aur jhutka khaayen isliye savere ka time rakha jaata hai। jo snaan aadi kar fresh ho aayen phir bhi time par nahin aate to unko pharmaanbardaar nahin kah sakte hain। laukik baap ko bhi sapoot aur kapoot bachche hote hain na। behad ke baap ko bhi hote hain। sapoot jaakar raaja banenge, kapoot jaakar jhaadu lagaayenge। maaloom to sab pad jaata hai na।

shreekrishna janmaashtami par bhi samjhaaya hai। shreekrishna ka janma jab hota hai tab to svarga hai। ek hi raajya hota hai। vishwa mein shanti hai। svarga mein bahut thode manushya honge। woh hai hi nai duniya। vahaan ashaanti ho nahin sakti। shanti tab hai jab ek dharma hai। jo dharma baap sthaapan karte hain। baad mein jab aur-aur dharma aate hain to ashaanti hoti hai। vahaan hai hi shanti, 16 kala sampoorn hain na। chandrama bhi jab sampoorn hota hai to kitna shobhta hai, unko full moon kaha jaata hai। treta mein 3/4 kahenge, khandit ho gaya na। do kala kam ho gai। sampoorn shanti satayug mein hoti hai। 25 percent puraani srishti hogi to kuchh na kuchh khit-khit hogi। do kala kam hone se shobha kam ho gai। svarga mein bilkul shanti, narka mein hai bilkul ashaanti। yeh samay hai jab manushya vishwa mein shanti chaahte hain, inse aage yeh aavaaz nahin tha ki vishwa mein shanti ho। abhi aavaaz nikla hai kyonki ab vishwa mein shanti ho rahi hai। aatma chaahti hai ki vishwa mein shanti honi chaahiye। manushya to deh-abhimaan mein hone kaaran sirf kehte rehte hain - vishwa mein shanti ho। 84 janma ab poore hue hain। yeh baap hi aakar samjhaate hain। baap ko hi yaad karte hain। woh kabhi kis roop mein aakar svarga ki sthaapna karenge, unka naam hi hai heavenly god father। yeh kisko bhi pata nahin hai - heaven kaise rachte hain। shreekrishna to rach na saken। unko kaha jaata hai devta। manushya devtaaon ko naman karte hain। unmein daivi gun hain isliye devta kaha jaata hai। achhe gun vaale ko kehte hain na - yeh to jaise devta hai। ladne-jhagadne vaale ko kahenge yeh to jaise asur hai। bachche jaante hain ham behad ke baap ke saamne baithe hain। to bachchon ki chalan kitni achhi honi chaahiye। agyaan kaal mein bhi baap ka dekha hua hai 6-7 kutumba ikatthe rehte hain, ekdam ksheerkhanda ho chalte hain। kahaan to ghar mein sirf do honge to bhi ladte-jhagadte rahenge। to tum ho eeshvareey santaan। bahut-bahut ksheerkhanda ho rehna chaahiye। satayug mein ksheerkhanda hote hain, yahaan ksheerkhanda hona tum seekhte ho to bahut pyaar se rehna chaahiye। baap kehte hain andar mein jaanch karo hamne koi vikarma to nahin kiya? kisko duhkh to nahin diya? aise koi baithkar apne ko jaanchate nahin। yeh badi samajh ki baat hai। tum bachche ho vishwa mein shanti sthaapan karne vaale। agar ghar mein hi ashaanti karne vaale honge to shanti phir kaise karenge। laukik baap ka bachcha tang karta hai to kahenge yeh to mua bhala। koi aadat pad jaati hai to pakki ho jaati hai। yeh samajh nahin rehti ki ham to behad ke baap ke bachche hain, hamko to vishwa mein shanti sthaapan karni hai। shivbaaba ke bachche ho agar ashaanta hote ho to shivbaaba ke paas aao। woh to heera hai, vo jhat tumko yukti bataayenge - aise shanti ho sakti hai। shanti ka prabandha denge। aise bahut hain chalan daivi gharaane jaisi nahin hai। tum ab taiyaar hote ho gul-gul duniya mein jaane। yeh hai hi gandi duniya veshyaalay, inse to naphrat aati hai। vishwa mein shanti hogi to nai duniya mein। sangam par ho nahin sakti। yahaan shant banne ka purushaartha karte hain। poora purushaartha nahin karte to phir saza khaani padegi। mere saath to dharmaraaj hai na। jab hisaab-kitaab chuktu hone ka samay aayega to khoob maar khaayenge। karma ka bhog zaroor hai। beemaar hote hain, woh bhi karmabhog hai na। baap ke oopar to koi nahin hai। samjhaate hain - bachche gul-gul bano to oonch pad paayenge। nahin to koi phaayda nahin। bhagwan baap jisko aadhaakalpa yaad kiya unse varsa nahin liya to bachche kis kaam ke। parantu drama anusaar yeh bhi hona hai zaroor। to samjhaane ki yuktiyaan bahut hain। vishwa mein shanti to satayug mein thi, jahaan in lakshmi-naaraayan ka raajya tha। ladaai bhi zaroor lagegi kyonki ashaanti hai na। shreekrishna phir aayega satayug mein। kehte hain kaliyug mein devtaaon ka parchhaaya nahin pad sakta hai। yeh baaten tum bachche hi ab sun rahe ho। tum jaante ho shivbaaba hamko padhaate hain। dhaarna karni hai, saari aayu hi lag jaati hai। kehte hain na - saari aayu samjhaaya hai phir bhi samajhte nahin hain।

behad ka baap kehte hain - pahle-pahle mukhya cheez to samjhaao - gyaan alag aur bhakti alag cheez hai। aadhaakalpa hai din, aadhaakalpa hai raat। shaastron mein kalpa ki aayu hi ulti likh di hai। to aadha-aadha bhi ho nahin sakte। tumhaare mein koi shaastra aadi padhe hue nahin hain to achhe hain। padhe hue honge to sanshay uthaayenge, prashn poochhte rahenge। vaastav mein jab vaanaprastha avastha hoti hai tab bhagwan ko yaad karte hain। koi na koi ki mat se। phir jaise guru sikhlaayenge। bhakti bhi sikhlaate hain। aise koi nahin jo bhakti na sikhlaayen। unmein bhakti ki taakat hai tab to itne followers bante hain। followers ko bhakta pujaari kahenge। yahaan sab hain pujaari। vahaan pujaari koi hota nahin। bhagwan kabhi pujaari nahin banta। anek points samjhaai jaati hai, dheere-dheere tum bachchon mein bhi samjhaane ki taakat aati jaayegi।

abhi tum batlaate ho shreekrishna aa raha hai। satayug mein zaroor shreekrishna hoga। nahin to world ki history-geography kaise repeat hogi। sirf ek shreekrishna to nahin hoga, yatha raaja-raani tatha praja hogi na। inmen bhi samajh ki baat hai। tum bachche samajhte ho ham to baap ke bachche hain। baap varsa dene aaye hain। svarga mein to sabhi nahin aayenge। na treta mein sab aa sakte hain। jhaad aahiste-aahiste vriddhi ko paata rehta hai। manushya srishti roopi jhaad hai। vahaan hai aatmaon ka jhaad। yahaan brahma dvaara sthaapna, phir shankar dvaara vinaash phir paalna… akshar bhi yeh kaaydesir bolne chaahiye। bachchon ki buddhi mein yeh nasha hai, yeh srishti ka chakra kaise chalta hai। rachna kaise hoti hai। ab nai chhoti rachna hai na। yeh jaise baajoli hai। pahle shoodra hain anek, phir baap aakar rachna rachte hain - brahma dvaara braahmanon ki। brahman ho jaate hain choti। choti aur pair aapas mein milte hain। pahle brahman chaahiye। braahmanon ka yug bahut chhota hota hai। peechhe hain devtaayen। yeh varnon vaala chitra bhi kaam ka hai। yeh chitra samjhaane mein bahut easy hai। variety manushyon ka variety roop hai। samjhaane mein kitna maza aata hai। brahman jab hain to sab dharma hain। shoodron se braahmanon ka sapling lagta hai। manushya to jhaad ke sapling lagaate hain। baap bhi sapling lagaate hain jahaan vishwa mein shanti ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada smriti rakhni hai ki ham hain eeshvareey santaan। humein ksheerkhanda hokar rehna hai। kisi ko bhi duhkh nahin dena hai।

2) andar mein apni jaanch karni hai ki hamse koi vikarma to nahin hota hai! ashaanta hone tatha ashaanti phailaane ki aadat to nahin hai?

vardaan:- pavitrata ki shakti dvaara sada sukh ke sansaar mein rahne vaale begampur ke baadshaah bhav

sukh-shanti ka foundation pavitrata hai। jo bachche man-vachan-karma teenon se pavitra bante hain vahi highness aur holiness hain। jahaan pavitrata ki shakti hai vahaan sukh shanti svatah hai। pavitrata sukh-shanti ki maata hai। pavitra aatmaayen kabhi bhi udaas nahin ho sakti। ve begampur ke baadshaah hain unka taaj bhi nyaara aur takhta bhi nyaara hai। light ka taaj pavitrata ki hi nishaani hai।

slogan:- main aatma hoon, shareer nahin - yeh chintan karna hi svachintan hai।

avyakt ishaare - ab lagan ki agni ko prajvalit kar yog ko jvaala roop banaao

powerful yog arthaat lagan ki agni, jvaala roop ki yaad hi bhrashtaachaar, atyaachaar ki agni ko samaapta karegi aur sarva aatmaon ko sahayog degi, isse hi behad ki vairaagya vritti prajvalit hogi। yaad ki agni ek taraph us agni ko samaapta karegi, doosri taraph aatmaon ko parmaatma sandesh ki, sheetal swaroop ki anubhooti karoygi, isse hi aatmaayen paapon ki aag se mukta ho sakengi।