Murli du jour du mercredi 3 septembre 2025

03-09-2025 praatahmurli om shanti "baapdaada"' madhuban

“meethe bachche - satya panda aaya hai tumhein sachchi-sachchi yaatra sikhlaane, tumhaari yaatra mein mukhya hai pavitrata, yaad karo aur pavitra bano''

prashn:- tum messenger va paigambar ke bachchon ko kis ek baat ke sivaae aur kisi bhi baat mein argue nahin karni hai?

uttar:- tum messenger ke bachche sabko yahi message do ki apne ko aatma samjho aur baap ko yaad karo to is yog agni se tumhaare vikarma vinaash honge। yahi ona rakho, baaki aur baaton mein jaane se koi phaayda nahin। tumhein sirf sabhi ko baap ka parichay dena hai, jisse woh aastik banen। jab rachta baap ko samajh lenge to rachna ko samajhna sahaj ho jaayega।

geet:- hamaare teertha nyaare hain…

om shanti। meethe-meethe roohaani bachche jaante hain ki ham satya teerthavaasi hain। sachcha panda aur ham unke bachche jo hain woh bhi sachche teertha par ja rahe hain। yeh hai jhooth khanda athva patit khanda। abhi sachkhanda va paavan khanda mein ja rahe hain। manushya yaatra par jaate hain na। koi-koi khaas yaatraayen lagti hain, jahaan par koi kabhi bhi ja sakte hain। yeh bhi yaatra hai, ismen jaana tab hota hai jab satya panda khud aaye। woh aata hai kalpa-kalpa ke sangam par। ismen na thandi, na garmi ki baat hai। na dhakke khaane ki baat hai। yeh to hai yaad ki yaatra। un yaatraaon mein sannyaasi bhi jaate hain। sachchi-sachchi yaatra karne vaale jo hote hain woh pavitra rehte hain। tumhaare mein sabhi yaatra par hain। tum brahman ho। sachche-sachche brahmaakumaar-kumaariyaan kaun hain? jo kabhi bhi vikaar mein nahin jaate hain। purushaarthi to zaroor hain। mansa sankalp bhal aayen, mukhya hai hi vikaar ki baat। koi poochhe nirvikaari brahman kitne hain aapke paas? bolo, yeh poochhne ki jaroorat nahin hai। in baaton se aapka kya pet bharega। tum yaatri bano। yaatra karne vaale kitne hain, is poochhne se koi phaayda nahin hai। brahman to koi sachche bhi hain, to jhoothe bhi hain। aaj sachche hain, kal jhoothe ban jaate hain। vikaar mein gaya to brahman nahin thahra। phir shoodra ka shoodra ho gaya। aaj pratigya karte kal vikaar mein gir asur ban jaate hain। ab yeh baaten kahaan tak baith samjhaayen। inse pet to nahin bharega va mukh meetha nahin hoga। yahaan ham baap ko yaad karte hain aur baap ki rachna ke aadi-madhya-ant ko jaante hain। baaki aur baaton mein kuchh rakha nahin hai। bolo, yahaan baap ki yaad sikhaai jaati hai aur pavitrata hai mukhya। jo aaj pavitra ban phir apvitra ban jaate hain, to woh brahman hi nahin raha। woh hisaab kahaan tak baith tumko sunaayenge। aise to bahut girte honge maaya ke toofaanon mein, isliye braahmanon ki maala nahin ban sakti hai। ham to paigambar ke bachche paigaam sunaate hain, messenger ke bachche message dete hain। apne ko aatma samajh aur baap ko yaad karo to is yog agni se vikarma vinaash honge। yeh ona rakho। baaki prashn to dher ke dher manushya poochhenge। sivaae ek baat ke aur koi baaton me jaane se koi phaayda hi nahin। yahaan to yeh jaanne ka hai ki naastik se aastik, nidhanke se dhan ke kaise banen, jo dhani se varsa paayen - yeh poochho। baaki to sab purushaarthi hain। vikaar ki baat mein hi bahut fail hote hain। bahut dinon ke baad stri ko dekhte hain to baat mat poochho। koi ko sharaab ki aadat hoti hai, teerthon par jaayenge to sharaab athva beedi ki jinko aadat hogi woh uske bigar rah nahin sakenge। chhipaakar bhi peete hain। kar hi kya sakte। bahut hain jo sach nahin bolte hain। chhipaate rehte hain।

baba bachchon ko yuktiyaan batlaate hain ki kaise yukti se javaab dena chaahiye। ek baap ka hi parichay dena hai, jisse manushya aastik banen। pahle jab tak baap ko nahin jaana hai tab tak koi prashn poochhna hi phaaltu hai। aise bahut aate hain, samajhte kuchh bhi nahin। sirf sunte rehte, phaayda kuchh bhi nahin। baba ko likhte hain hazaar do hazaar aaye, unse do-ek samajhne liye aate rehte hain। phalaana-phalaana bada aadmi aata rehta hai, ham samajh jaate hain, unko jo parichay milna chaahiye woh mila nahin hai। poora parichay mile to samjhen yeh to theek kehte hain, ham aatmaon ka baap parampita paramatma hai, woh padhaate hain। kehte hain apne ko aatma samajh mujhe yaad karo। yeh antim janma pavitra bano। jo pavitra nahin rehte woh brahman nahin, shoodra hain। ladaai ka maidaan hai। jhaad badhta rahega aur toofaan bhi lagenge। bahut patte girte rahenge। kaun baith ginti karenge ki sachche brahman kaun hain? sachche woh jo kabhi shoodra na banen। zara bhi drishti na jaae। ant mein karmaateet avastha hoti hai। badi oonchi manzil hai। mansa mein bhi na aaye, woh avastha ant mein honi hai। is samay ek ki bhi aisi avastha nahin hai। is samay sab purushaarthi hain। neeche-oopar hote rehte hain। mukhya aankhon ki hi baat hai। ham aatma hain, is shareer dvaara part bajaate hain - yeh pakka abhyaas chaahiye। jab tak raavan raajya hai, tab tak yuddha chalta rahega। pichhaadi mein karmaateet avastha hogi। aage chalkar tumko feeling aayegi, samajhte jaayenge। abhi to jhaad bahut chhota hai, toofaan lagta hai, patte gir padte hain। jo kachche hain woh gir padte hain। har ek apne se poochhe - meri avastha kahaan tak hai? baaki jo prashn poochhte hain un baaton mein jaasti jaao hi nahin। bolo, ham baap ki shreemat par chal rahe hain। woh behad ka baap aakar behad ka sukh dete hain athva nai duniya sthaapan karte hain। vahaan sukh hi hota hai। jahaan manushya rehte hain usko hi duniya kaha jaata hai। niraakaari world mein aatmaayen hain na। yeh kiski buddhi mein nahin hai ki aatma kaise bindi hai। yeh bhi pahle koi naye ko nahin samjhaana hai। pahle-pahle to samjhaana hai - behad ka baap behad ka varsa dete hain। bhaarat paavan tha, abhi patit hai। kaliyug ke baad phir satayug aana hai। doosra koi bhi samjha na sake, sivaae bi.ke. ke। yeh hai nai rachna। baap padha rahe hain - yeh samjhaani buddhi mein rahni chaahiye। koi difficult baat nahin hai, parantu maaya bhula deti hai, vikarma kara deti hai। aadhaakalpa se vikarma karne ki aadat padi hui hai। woh sab aasuri aadten mitaani hain। baba khud kehte hain - sab purushaarthi hain। karmaateet avastha ko paane mein bahut time lagta hai। brahman kabhi vikaar mein nahin jaate। yuddha ke maidaan mein chalte-chalte haar kha lete hain। in prashnon se koi phaayda nahin। pahle apne baap ko yaad karo। hamko shivbaaba ne kalpa pahle muaaphik pharmaan diya hai ki apne ko aatma samajh mujhe yaad karo। yeh vahi ladaai hai। baap ek hai, shreekrishna ko baap nahin kahenge। shreekrishna ka naam daal diya hai। wrong se right banaane vaala baap hai, tab to unko truth kaha jaata hai na। is samay tum bachche hi saare srishti ke raaz ko jaante ho। satayug mein hai deity dynasty। raavan raajya mein phir hai aasuri dynasty। sangamayug clear kar dikhaana hai, yeh hai purushottam sangamayug। us taraph devtaayen, is taraph asur। baaki unhon ki ladaai hui nahin hai। ladaai tum braahmanon ki hai vikaaron se, inko bhi ladaai nahin kahenge। sabse bada hai kaam vikaar, yeh mahaashatru hai। in par jeet paane se hi tum jagatjeet banenge। is vish par hi ablaayen maar khaati hain। anek prakaar ke vighna padte hain। mool baat hai pavitrata ki। purushaartha karte-karte, toofaan aate-aate tumhaari jeet ho jaayegi। maaya thak jaayegi। kushti mein pahalvaan jo hote hain, woh jhat saamna kar lete hain। unhon ka dhandha hi hai achhi reeti ladkar jeet paana। pahalvaan ka bada naamaachaar hota hai। inaam milta hai। tumhaari to yeh hai gupta baat।

tum jaante ho ham aatmaayen pavitra thi। abhi apvitra bani hain phir pavitra banna hai। yahi message sabko dena hai aur koi bhi prashn poochhe, tumko in baaton mein jaana hi nahin hai। tumhaara hai hi roohaani dhandha। ham aatmaon mein baba ne gyaan bhara tha, baad mein praalabdha paai, gyaan khatma ho gaya। ab phir baba gyaan bhar rahe hain। baaki nashe mein raho, bolo baap ka message dete hain ki baap ko yaad karo to kalyaan hoga। tumhaara dhandha hi yeh roohaani hai। pahli-pahli baat ki baap ko jaanon। baap hi gyaan ka saagar hai। woh koi pustak thode hi sunaate hain। vo log jo doctor oph philosophy aadi bante hain, woh kitaab padhte hain। bhagwan to knowledgeful hai। unko srishti ke aadi-madhya-ant ki knowledge hai। woh kuchh padha hai kya? woh to sab vedon-shaastron aadi ko jaante hain। baap kehte hain mera part hai tumko knowledge samjhaane ka। gyaan aur bhakti ka contrast aur koi bata na sake। yeh hai gyaan ki padhaai। bhakti ko gyaan nahin kaha jaata hai। sarva ka sadgati daata ek hi baap hai। world ki history zaroor repeat hogi। puraani duniya ke baad phir nai duniya zaroor aani hai। tum bachche jaante ho baba hamko phir se padhaate hain। baap kehte hain mujhe yaad karo, zor saara is par hai। baba jaante hain bahut achhe-achhe naameegraami bachche is yaad ki yaatra mein bahut kamzor hain aur jo naameegraami nahin, baandheliyaan hain, gareeb hain, woh yaad ki yaatra mein bahut rehte hain। har ek apni dil se poochhe - main baap ko kitna samay yaad karta hoon? baba kehte hain - bachche, jitna ho sake tum mujhe yaad karo। andar mein bahut harshit raho। bhagwan padhaate hain to kitni khushi honi chaahiye। baap kehte hain tum pavitra aatma the phir shareer dhaaran kar part bajaate-bajaate patit bane ho। ab phir pavitra banna hai। phir vahi daivi part bajaana hai। tum daivi dharma ke ho na। tumne hi 84 ka chakra lagaaya hai। sab sooryavanshi bhi 84 janma thode hi lete hain। peechhe aate rehte hain na। nahin to phat se sabhi aa jaaen। savere uthkar buddhi se koi kaam le to samajh sakte hain। bachchon ko hi vichaar saagar manthan karna hai। shivbaaba to nahin karte hain। woh to kehte hain drama anusaar jo kuchh sunaata hoon, aise hi samjho kalpa pahle muaaphik jo samjhaaya tha, vahi samjhaaya। manthan tum karte ho। tumko hi samjhaana hai, gyaan dena hai। yeh brahma bhi manthan karte hain। bi.ke. ko manthan karna hai, shivbaaba ko nahin। mool baat koi se bhi jaasti talk nahin karni hai। argue shaastravaadi aapas mein bahut karte hain, tumko argue (vaad-vivaad) nahin karna hai। tumko sirf paigaam dena hai। pahle sirf mukhya ek baat par samjhaao aur likhaao। pahle-pahle yeh sabak (paath) rakho ki yeh kaun padhaate hain, so likho। yeh baat tum pichhaadi mein le jaate ho isliye sanshay padta rehta hai। nishchaybuddhi na hone kaaran samajhte nahin hain। sirf kah dete baat theek hai। pahle-pahle mukhya baat hi yeh hai। rachta baap ko samjho phir rachna ka raaz samajhna। mukhya baat geeta ka bhagwan kaun? tumhaari vijay bhi inmen honi hai। pahle-pahle kaun sa dharma sthaapan hua? puraani duniya ko nai duniya kaun banaate hain। baap hi aatmaon ko naya gyaan sunaate hain, jisse nai duniya sthaapan hoti hai। tumko baap aur rachna ki pahchaan milti hai। pahle-pahle to alpha par pakka karaao to be baadshaahi hai hi। baap se hi varsa milta hai। baap ko jaana aur varse ka hakdaar bana। bachcha janma leta hai, maa-baap ko dekha aur bas pakka ho jaayega। maa-baap ke sivaae koi ke paas jaayega bhi nahin kyonki maa se doodh milta hai। yeh bhi gyaan ka doodh milta hai। maat-pita hai na। yeh badi maheen baaten hain, jaldi koi samajh na saken। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sachcha-sachcha pavitra brahman banna hai, kabhi shoodra (patit) banne ka mansa mein bhi khyaal na aaye, jara bhi drishti na jaae, aisi avastha banaani hai।

2) baap jo padha rahe hain, woh samjhaani buddhi mein rakhni hai। jo vikarma karne ki aasuri aadten padi hui hain, unhein mitaana hai। purushaartha karte-karte sampoorn pavitrata ki oonchi manzil ko praapta karna hai।

vardaan:- kaaran ka nivaaran kar chinta aur bhay se mukta rahne vaale ma. sarvashaktimaan bhav

vartamaan samay alpakaal ke sukh ke saath chinta aur bhay yeh do cheejen to hain hi। jahaan chinta hai vahaan chain nahin ho sakta। jahaan bhay hai vahaan shanti nahin ho sakti। to sukh ke saath yeh dukh ashaanti ke kaaran bhi hain hi। lekin aap sarva shaktiyon ke khajaane se sampanna master sarvashaktimaan bachche dukhon ke kaaran ka nivaaran karne vaale, har samasya ka samaadhaan karne vaale samaadhaan swaroop ho isliye chinta aur bhay se mukta ho। koi bhi samasya aapke saamne khel karne aati hai na ki daraane।

slogan:- apni vritti ko shreshtha banaao to aapki pravritti svatah shreshtha ho jaayegi।

avyakt ishaare - ab lagan ki agni ko prajvalit kar yog ko jvaala roop banaao

samay pramaan ab sarva brahman aatmaon ko sameep laate hue jvaala swaroop ka vaayumandal banaane ki seva karo, uske liye chaahe bhatthiyaan karo ya aapas mein sangathit hokar roohrihaan karo lekin jvaala swaroop ka anubhav karo aur karaao, is seva mein lag jaao to chhoti-chhoti baaten sahaj parivartan ho jaayengi।