Murli du jour du samedi 13 septembre 2025

13-09-2025 praatahmurli om shanti "baapdaada"' madhuban

“meethe bachche - sabse pahle-pahle yahi khyaal karo ki mujh aatma par jo kat chadhi hui hai, woh kaise utre, sui par jab tak kat (junk) hogi tab tak chumbak kheench nahin sakta''

prashn:- purushottam sangamayug par tumhein purushottam banne ke liye kaun-sa purushaartha karna hai?

uttar:- karmaateet banne ka। koi bhi karma sambandhon ki taraph buddhi na jaae arthaat karmabandhan apne taraph na kheenche। saara connection ek baap se rahe। koi se bhi dil lagi hui na ho। aisa purushaartha karo, jharmui jhagmui mein apna time vesta mat karo। yaad mein rahne ka abhyaas karo।

geet:- jaag sajniyaan jaag…

om shanti। roohaani bachchon (aatmaon) ne shareer dvaara geet suna? kyonki baap abhi bachchon ko aatma-abhimaani bana rahe hain। tumko aatma ka bhi gyaan milta hai। duniya mein ek bhi manushya nahin, jisko aatma ka sahi gyaan ho। to phir paramatma ka gyaan kaise ho sakta? yeh baap hi baith samjhaate hain। samjhaana shareer ke saath hi hai। shareer bigar to aatma kuchh kar nahin sakti। aatma jaanti hai ham kahaan ke nivaasi hain, kiske bachche hain। abhi tum yathaartha reeti jaante ho। sab actors paartadhaari hain। bhinna-bhinna dharma ki aatmaayen kab aati hain, yeh bhi tumhaari buddhi mein hai। baap detail nahin samjhaate hain, mutta (wholesale) samjhaate hain। whole-sel arthaat ek second mein aisi samjhaani dete hain jo satayug aadi se lekar ant tak maaloom pad jaata hai ki kaise hamaara part noondha hua hai। abhi tum jaante ho baap kaun hai, unka is drama ke andar kya part hai? yeh bhi jaante hain oonch te oonch baap hai, sarva ka sadgati daata, duhkh harta sukh karta hai। shiv jayanti gaai hui hai। zaroor kahenge shiv jayanti sabse oonch hai। khaas bhaarat mein hi jayanti manaate hain। jis-jis ki raajaai mein jis oonch purush ki past ki history achhi hoti hai to unki stamp bhi banaate hain। ab shiv ki jayanti bhi manaate hain। samjhaana chaahiye sabse oonch jayanti kiski hui? kiski stamp banaani chaahiye? koi saadhu-santa athva sikkhon ka, musalmaanon ka va angrejon ka, koi philosopher achha hoga to unki stamp banaate rehte hain। jaise raana prataap aadi ki bhi banaate hain। ab vaastav mein stamp honi chaahiye baap ki, jo sabka sadgati daata hai। is samay baap na aaye to sadgati kaise ho kyonki sab raurav narka mein gota kha rahe hain। sabse oonch te oonch hai shivbaaba, patit-paavan। mandir bhi shiv ke bahut oonche sthaan par banaate hain kyonki oonch te oonch hai na।

baap hi aakar bhaarat ko svarga ka maalik banaate hain। jab woh aate hain tab sadgati karte hain, to us baap ki hi yaad rahni chaahiye। stamp bhi shivbaaba ki kaise banaayen? bhakti maarga mein to shivling banaate hain। vahi oonch te oonch aatma thahre। oonch te oonch mandir bhi shiv ka hi maanenge। somnaath shiv ka mandir hai na। bhaaratvaasi tamopradhaan hone kaaran yeh bhi nahin jaante ki shiv kaun hai jiski pooja karte hain, uska occupation to jaante nahin। raana prataap ne bhi ladaai ki, woh to hinsa ho gai। is samay to sab hain double hinsak। vikaar mein jaana, kaam kataari chalaana yeh bhi hinsa hai na। double ahinsak to yeh lakshmi-naaraayan hain। manushyon ko jab poora gyaan ho tab arth sahit stamp nikle। satayug mein stamp nikalti hi in lakshmi-naaraayan ki hai। shivbaaba ka gyaan to vahaan rehta nahin to zaroor oonch te oonch lakshmi-naaraayan ki hi stamp lagti hogi। abhi bhi bhaarat ka woh stamp hona chaahiye। oonch te oonch hai trimoorti shiv। woh to avinaashi rehna chaahiye kyonki bhaarat ko avinaashi raaj-gaddi dete hain। parampita paramatma hi bhaarat ko svarga banaate hain। tumhaare mein bhi bahut hain jo yeh bhool jaate hain ki baba hamko svarga ka maalik banaate hain। yeh maaya bhula deti hai। baap ko na jaanne ke kaaran bhaaratvaasi kitni bhoolen karte aaye hain। shivbaaba kya karte hain, yeh kisko bhi pata nahin hai। shivjayanti ka bhi arth nahin samajhte। yeh knowledge sivaae baap ke aur koi ko nahin hai।

abhi tum bachchon ko baap samjhaate hain tum auron par bhi raham karo, apne oopar bhi aapehi raham karo। teacher padhaate hain, yeh bhi raham karte hain na। yeh bhi kehte hain main teacher hoon। tumko padhaata hoon। vaastav mein iska naam paathshaala bhi nahin kahenge। yeh to bahut badi university hai। baaki to sab hain jhoothe naam। woh koi saare universe ke liye college to hain nahin। to university hai hi ek baap ki, jo saare vishwa ki sadgati karte hain। vaastav mein university yeh ek hi hai। in dvaara hi sab mukti-jeevanmukti mein jaate hain arthaat shanti aur sukh ko praapta karte hain। universe to yeh hua na, isliye baba kehte hain daro mat। yeh to samjhaane ki baat hai। aise bhi hota hai imarjensi ke time mein koi kiski sunte bhi nahin hain। praja ka praja par raajya chalta hai aur kisi dharma mein shuru se raajaai nahin chalti। woh to dharma sthaapan karne aate hain। phir jab laakhon ki andaaj mein hon tab raajaai kar saken। yahaan to baap raajaai sthaapan kar rahe hain - universe ke liye। yeh bhi samjhaane ki baat hai। daivi raajdhaani is purushottam sangamayug par sthaapan kar rahe hain। baba ne samjhaaya hai - shreekrishna, shreenaaraayan, shreeraam aadi ke kaale chitra bhi tum haath mein uthaao phir samjhaao shreekrishna ko shyaam-sundar kyon kehte hain? sundar tha phir shyaam kaise bante hain? bhaarat hi heaven tha, ab hell hai। hell arthaat kaala, heaven arthaat gora। raam raajya ko din, raavan raajya ko raat kaha jaata hai। to tum samjha sakte ho - devtaaon ko kaala kyon banaaya hai। baap baith samjhaate hain - tum ho abhi purushottam sangamayug par। woh nahin hai, tum to yahaan baithe ho na। yahaan tum ho hi sangamayug par, purushottam banne ka purushaartha kar rahe ho। vikaari patit manushyon se tumhaara koi connection hi nahin hai, haan, abhi karmaateet avastha nahin hui hai isliye karma sambandhon se bhi dil lag jaati hai। karmaateet banna uske liye chaahiye yaad ki yaatra। baap samjhaate hain tum aatma ho, tumhaara paramatma baap ke saath kitna lav hona chaahiye। oho! baba hamko padhaate hain। woh umang koi mein rehta nahin hai। maaya ghadi-ghadi deh-abhimaan mein la deti hai। jabki samajhte ho shivbaaba ham aatmaon se baat kar rahe hain, to woh kashish, woh khushi rahni chaahiye na। jis sui par zara bhi junk nahin hogi, woh chumbak ke aage tum rakhenge to phat se chatak jaayegi। thodi bhi kat hogi to chatkegi nahin। kashish nahin hogi। jahaan se nahin hogi phir us taraph se chumbak kheechenge। bachchon mein kashish tab hogi jab yaad ki yaatra par honge। kat hogi to kheench nahin sakenge। har ek samajh sakte hain hamaari sui bilkul pavitra ho jaayegi to kashish bhi hogi। kashish nahin hoti hai kyonki kat chadhi hui hai। tum bahut yaad mein rehte ho to vikarma bhasma hote hain। achha, phir agar koi paap karte to woh sauguna danda ho jaata hai। kat chadh jaati hai, yaad nahin kar sakte। apne ko aatma samajh baap ko yaad karo, yaad bhoolne se kat chadh jaati hai। to woh kashish, lav nahin rehta। kat utri hui hogi to lav hoga, khushi bhi rahegi। chehra khushnumah rahega। tumko bhavishya mein aisa banna hai। service nahin karte to puraani sadi hui baaten karte rehte। baap se buddhiyog hi tuda dete hain। jo kuchh chamak thi, woh bhi gum ho jaati hai। baap se zara bhi lav nahin rehta। lav unka rahega jo achhi reeti baap ko yaad karte honge। baap ko bhi unse kashish hogi। yeh bachcha service bhi achhi karta hai aur yog mein bhi rehta hai। to baap ka pyaar un par rehta hai। apne oopar dhyaan rakhte hain, hamse koi paap to nahin hua। agar yaad nahin karenge to kat kaise utregi। baap kehte hain chart rakho to kat utar jaayegi। tamopradhaan se satopradhaan banna hai to kat utarni chaahiye। utarti bhi hai phir chadhti bhi hai। sau guna danda pad jaata hai। baap ko yaad nahin karte hain to kuchh na kuchh paap kar lete hain। baap kehte hain kat utarne bigar tum mere paas aa nahin sakenge। nahin to phir saza khaani padegi। mochra bhi milta, pad bhi bhrashta ho jaata। baaki baap se varsa kya mila? aisa karma nahin karna chaahiye jo aur hi kat chadh jaae। pahle to apni kat utaarne ka khyaal rakho। khyaal nahin karte hain to phir baap samjhenge inki takdeer mein nahin hai। qualification chaahiye। achhe characters chaahiye। lakshmi-naaraayan ke character to gaaye hue hain। is samay ke manushya unhon ke aage apna character varnan karte hain। shivbaaba ko jaante hi nahin, sadgati karne vaala to vahi hai, sannyaasiyon ke paas jaate hain। parantu sarva ka sadgati daata hai hi ek। baap hi svarga ki sthaapna karte hain phir to neeche hi utarna hai। baap ke sivaae koi paavan bana na sake। manushya khadde ke andar jaakar baithte hain, isse to ganga mein jaakar baithen to saaph ho jaaen kyonki patit-paavni ganga kehte hain na। manushya shanti chaahte hain to woh jab ghar jaayenge tab part poora hoga। ham aatmaon ka ghar hai hi nirvaandhaam। yahaan shanti kahaan se aai? tapasya karte hain, woh bhi karma karte hain na, karke shant mein baith jaayenge। shivbaaba ko to jaante hi nahin। woh sab hai bhakti maarga, purushottam sangamayug ek hi hai, jabki baap aate hain। aatma svachchha ban mukti-jeevanmukti mein chali jaati hai। jo mehnat karenge woh raajya karenge, baaki jo mehnat nahin karenge woh sazaayen khaayenge। shuru mein saakshaatkaar karaaya tha, sazaaon ka। phir pichhaadi mein bhi saakshaatkaar hoga। dekhenge ham shreemat par na chale tab yeh haal hua hai। bachchon ko kalyaankaari banna hai। baap aur rachna ka parichay dena hai। jaise sui ko mitti ke tel mein daalne se kat utar jaati hai, vaise baap ki yaad mein rahne se bhi kat utarti hai। nahin to woh kashish, woh lav baap mein nahin rehta hai। lav saara chala jaata hai mitra-sambandhiyon aadi mein, mitra-sambandhiyon ke paas jaakar rehte hain। kahaan woh junk khaaya hua sang aur kahaan yeh sang। junk khaai hui cheez ke sang mein unko bhi kat chadh jaayegi। kat utaarne ke liye hi baap aate hain। yaad se hi paavan banenge। aadhaakalpa se badi zor se kat chadhi hui hai। ab baap chumbak kehte hain mujhe yaad karo। buddhi ka yog jitna mere saath hoga utni kat utregi। nai duniya to banni hi hai, satayug mein pahle bahut chhota-sa jhaad hota hai - devi-devtaaon ka, phir vriddhi ko paate hain। yahaan se hi tumhaare paas aakar purushaartha karte rehte hain। oopar se koi nahin aate hain, jaise aur dharma vaalon ke oopar se aate hain। yahaan tumhaari raajdhaani taiyaar ho rahi hai। saara madaar padhaai par hai। baap ki shreemat par chalne par hai, buddhiyog baahar jaata rehta hai, to bhi kat lag jaati hai। yahaan aate hain to sab hisaab-kitaab chuktu kar, jeete ji sab kuchh khatma karke aate hain। sannyaasi bhi sannyaas karte hain to bhi kitne samay tak sab yaad aata rehta hai।

tum bachche jaante ho abhi hamko sat ka sang milta hai। ham apne baap ki hi yaad mein rehte hain। mitra-sambandhiyon aadi ko jaante to hain na। grihastha vyavhaar mein rehte, karma karte baap ko yaad karte hain, pavitra banna hai, auron ko bhi sikhaana hai। phir takdeer mein hoga to chal padenge। brahman kul ka hi nahin hoga to devta kul mein kaise aayega? bahut sahaj points di jaati hain, jo jhat kiski buddhi mein baith jaaen। vinaash kaale vipreet buddhi vaala chitra bhi clear hai। ab woh sovereignty to hai nahin। daivi sovereignty thi, jisko svarga kaha jaata tha। abhi to panchaayti raajya hai, samjhaane mein koi harja nahin hai। parantu kat nikli hui ho to koi ko teer lage। pahle kat nikaalne ki koshish karni chaahiye। apna character dekhna hai। raat-din ham kya karte hain? kitchen mein bhi bhojan banaate, roti pakaate jitna ho sake yaad mein raho, ghoomne jaate ho to bhi yaad mein। baap sabki avastha ko to jaante hain na। jharmui-jhagmui karte hain to phir kat aur hi chadh jaati hai। parchintan ki koi baat nahin suno। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise baap teacher roop mein padhaakar sab par raham karte hain, aise apne aap par aur auron par bhi raham karna hai। padhaai aur shreemat par poora dhyaan dena hai, apne character sudhaarne hain।

2) aapas mein koi puraani sadi hui parchintan ki baaten karke baap se buddhiyog nahin tudaana hai। koi bhi paap karma nahin karna hai, yaad mein rahkar junk utaarni hai।

vardaan:- dridhta dvaara kalraathi jameen mein bhi phal paida karne vaale saphalta swaroop bhav

koi bhi baat mein saphalta swaroop banne ke liye dridhta aur sneh ka sangathan chaahiye। yeh dridhta kalraathi jameen mein bhi phal paida kar deti hai। jaise aajkal science vaale ret mein bhi phal paida karne ka prayatna kar rahe hain aise aap silence ki shakti dvaara sneh ka paani dete hue phaleebhoot bano। dridhta dvaara naaummeend mein bhi ummeedon ka deepak jaga sakte ho kyonki himmat se baap ki madad mil jaati hai।

slogan:- apne ko sada prabhu ki amaanat samajhkar chalo to karma mein roohaaniyat aayegi।

avyakt ishaare - ab lagan ki agni ko prajvalit kar yog ko jvaala roop banaao

saarthi arthaat aatma-abhimaani kyonki aatma hi saarthi hai। brahma baap ne is vidhi se number one ki siddhi praapta ki, to follow father karo। jaise baap deh ko adheen kar pravesh hote arthaat saarthi bante hain deh ke adheen nahin hote, isliye nyaare aur pyaare hain। aise hi aap sabhi brahman aatmaaen bhi baap samaan saarthi ki sthiti mein raho। saarthi svatah hi saakshi ho kuchh bhi karenge, dekhenge, sunenge aur sab-kuchh karte bhi maaya ki lep-chhep se nirlep rahenge।