Murli du jour du dimanche 16 novembre 2025

16-11-25 praatahmurli om shanti' 'avyakt-baapdaada'' revise 15-12-07 madhuban

samay ke mahatva ko jaan , karmon ki guhya gati ka attention rakho , nashtomoha , ever ready bano

aaj sarva khajaanon ke daata, gyaan ka khajaana, shaktiyon ka khajaana, sarva gunon ka khajaana, shreshtha sankalpon ka khajaana dene vaala baapdaada apne chaaron or ke khajaane ke baalak so maalik adhikaari bachchon ko dekh rahe hain। akhanda khajaanon ke maalik baap sabhi bachchon ko sarva khajaanon se sampanna kar rahe hain। har ek ko sarva khajaane dete hain, kisko kam, kisko jyaada nahin dete kyonki akhanda khajaana hai। chaaron or ke bachche baapdaada ke naynon mein samaaye hue hain। sabhi khajaanon se bharpoor harshit ho rahe hain।

aajkal ke samay pramaan sabse amoolya shreshtha khajaana hai - purushottam sangam ka samay kyonki is sangam par hi saare kalpa ki praalabdha bana sakte ho। is chhote se yug ki praaptiyon aur praalabdha ke pramaan ek second ki value ek varsha ke samaan hai। itna yeh amoolya samay hai। is samay ke liye hi gaayan hai - “ab nahin to kab nahin'' kyonki is samay hi parmaatma part noondha hua hai isliye is samay ko heere tulya kaha jaata hai। satayug ko golden ej kaha jaata hai। lekin is samay, samay bhi heere tulya hai aur aap sab bachche bhi heere tulya jeevan ke anubhvi aatmaayen ho। is samay hi bahutkaal ki bichhudi hui aatmaayen parmaatma milan, parmaatma pyaar, parmaatma knowledge, parmaatma khajaanon ke praapti ke adhikaari bante hain। saare kalpa mein dev aatmaayen, mahaan aatmaayen hain lekin is samay parmaatma eeshvareey parivaar hai isliye jitna is vartamaan samay ka mahatva hai, is mahatva ko jaan, jitna apne ko shreshtha banaane chaahe utna bana sakte hain। aap sab bhi is mahaan yug ke parmaatma bhaagya ko praapta karne vaale padmaapdam bhaagyavaan ho na! aise apne shreshtha bhaagya ke roohaani nashe aur bhaagya ko jaante, anubhav kar rahe ho na! khushi hoti hai na! dil mein kya geet gaate ho? vaah mera bhaagya vaah! kyonki is samay ke shreshtha bhaagya ke aage aur koi bhi yug mein aisa shreshtha bhaagya praapta ho nahin sakta।

to bolo, sada apne bhaagya ko smriti mein rakhte harshit hote ho na! hote ho? jo samajhte hain ki sada harshit hote hain, kabhi-kabhi vaale nahin, jo sada harshit rehte hain woh haath uthaao। sada, sada…। underline karna sada। abhi T.vi. mein aapka photo aa raha hai। “sada'' vaalon ka photo aa raha hai। mubaarak ho। maataayen haath uthaayen, shaktiyaan uthaayen, double foreigners...। kya shabd yaad rakhenge? sada। kabhi-kabhi vaale to peechhe aane vaale hain।

baapdaada ne pahle bhi sunaaya hai ki samay ki raphtaar bahut teevra gati se aage badh rahi hai। samay ki gati ko jaanne vaale apne ko check karo ki master sarvashaktivaan hamaari gati teevra hai? purushaartha to sab kar rahe hain lekin baapdaada kya dekhne chaahte? har bachcha teevra purushaarthi, har subject mein paas with honour hai va sirf paas hai? teevra purushaarthi ke lakshan vishesh do hain - ek - nashtomoha, doosra - ever ready। sabse pahle nashtomoha, is dehbhaan, deh-abhimaan se hai to aur baaton mein nashtomoha hona koi mushkil nahin hai। deh-bhaan ki nishaani hai vesta, vyartha sankalp, vyartha samay, yeh checking svayan hi achhi tarah se kar sakte ho। saadhaaran samay woh bhi nashtomoha hone nahin deta। to check karo har second, har sankalp, har karma, saphal hua? kyonki sangamayug par vishesh baap ka vardaan hai, saphalta aapka janma siddha adhikaar hai। to adhikaar sahaj anubhooti karaata hai। aur ever ready, ever ready ka arth hai - man-vachan-karma, sambandh-samparka mein samay ka order ho achaanak to ever ready, aur achaanak hi hona hai। jaise apni daadi ko dekha achaanak ever ready। har svabhaav mein, har kaarya mein easy rahi, samparka mein easy, svabhaav mein easy, seva mein easy, santushta karne mein easy, santushta rahne mein easy iseelie baapdaada samay ki sameepta ka baar-baar ishaara de raha hai। sva-purushaartha ka samay bahut thoda hai, isliye apne jama ke khaate ko check karo। teen vidhiyaan khajaanon ko jama karne ki pahle bhi bataai hain, phir se suna rahe hain। un teenon vidhiyon ko svayan check karo। ek hai - svayan ke purushaartha se praalabdha ka khajaana jama karna। praaptiyon ka khajaana jama karna। doosra hai - santushta rehna, ismen bhi sada shabd add karo aur sarva ko santushta karna, isse punya ka khaata jama hota hai। aur yeh punya ka khaata anek janmon ki praalabdha ka aadhaar rehta hai। teesra hai - sada seva mein athak, nihsvaartha aur badi dil se seva karna, isse jiski seva karte hain unse svatah hi duaayen milti hain। yeh teen vidhiyaan hain, svayan ka purushaartha, punya aur dua। yeh teenon khaate jama hain? to check karo ki achaanak agar koi bhi paper aa jaae to paas with honour ho sakenge? kyonki aajkal ke samay anusaar prakriti ke halchal ki chhoti-chhoti baaten kabhi bhi aa sakti hain isliye karmon ke gati ka knowledge vishesh attention mein rahe। karmon ki gati badi guhya hai। jaise drama ka attention rehta, aatmik swaroop ka attention rehta, dhaarnaaon ka attention rehta, aise hi karmon ki guhya gati ka bhi attention aavashyak hai। saadhaaran karma, saadhaaran samay, saadhaaran sankalp isse praalabdha mein farka pad jaata hai। is samay aap sabhi jo purushaarthi hain woh shreshtha vishesh aatmaayen hain, saadhaaran aatmaayen nahin ho। vishwa kalyaan ke nimitta, vishwa parivartan ke nimitta bani hui aatmaayen ho। sirf apne ko parivartan karne vaale nahin ho, vishwa ke parivartan ke jimmevaar ho isliye apne shreshtha svamaan ke smriti swaroop banna hi hai।

baapdaada ne dekha, sabhi ka baapdaada aur seva se achha pyaar hai। seva ka vaataavran chaaron or koi na koi plan pramaan chal raha hai। saath-saath abhi samay ke pramaan vishwa ki aatmaayen jo duhkhi, ashaanta ho rahi hain un aatmaon ko duhkh ashaanti se chhudaane ke liye apni shaktiyon dvaara sakaash do। jaise prakriti ka soorya sakaash se andhakaar ko door kar roshni mein laata। apni kirnon ke bal se kai cheezon ko parivartan karta। aise hi master gyaan soorya apne praapta hue sukh shanti ki kirnon se, sakaash se duhkh ashaanti se mukta karo। mansa seva se, shaktishaali vritti se vaayumandal ko parivartan karo। to abhi mansa seva karo। jaise vaacha seva ka vistaar kiya hai, vaise mansa sakaash dvaara aatmaon mein happy aur hope ki lahar phailaao। is varsha jo happy aur hope ki topic rakhi hai usi pramaan himmat dilaao, umang-utsaah dilaao, baap ka varsa duhkh ashaanti se mukti dilaao। abhi aavashyakta sakaash dene ki jyaada hai। is seva mein man ko busy rakho to maaya-jeet vijayi aatma svatah hi ban jaayenge। baaki chhoti-chhoti baaten to sidescene hain, sidescene mein kuchh achha bhi aata hai, kuchh buri cheezen bhi aati hain। to sidescene ko cross kar manzil par pahunchna hota hai। sidescene dekhne ke liye saaksheedrishta ki seat par set raho, bas। to sidescene manoranjan ho jaayegi। to ever ready ho na? kal bhi kuchh ho jaae, ever ready hain? pahli line ever ready hai? kal bhi ho jaae to? teachers taiyaar hain to achha। yeh varga vaale taiyaar hain। jitne bhi varga aaye ho, ever-ready। sochna। dekhna daadiyaan, dekh rahi ho sab haath hila rahe hain। achha hai, mubaarak ho। agar nahin bhi hain na to aaj ki raat tak ho jaana kyonki samay aapka intajaar kar raha hai। baapdaada mukti ka get kholne ka intazaar kar raha hai। advance party aapka aahvaan kar rahi hai। kya nahin kar sakte ho... master sarvashaktivaan to ho hi। dridh sankalp karo yeh karna hai, yeh nahin karna hai, bas। nahin karna hai, to dridh sankalp se ‘nahin' ko ‘nahin' karke dikhaao। master to ho hi na! achha।

abhi pahli baar kaun aaye hain? jo pahli baar aaye hain, woh haath uthaao। ooncha haath uthaao, hilaao। itne aaye hain। achha hai। jo bhi pahle baari aaye hain unko padamguna mubaarak hai, mubaarak hai। baapdaada khush hote hain, ki kalpa pahle vaale bachche phir se apne parivaar mein pahunch gaye isliye abhi peechhe aane vaale kamaal karke dikhaana। peechhe rehna nahin, peechhe aaye ho lekin peechhe nahin rehna। aage se aage rehna। iske liye teevra purushaartha karna padega। himmat hai na! himmat hai? achha hai। himmate bachche madde baapdaada aur parivaar hai। achha hai kyonki bachche ghar ka shrringaar ho। to jo bhi aaye hain woh madhuban ke shrringaar hain। achha।

seva ka tarna bhopaal zone ka hai :- achha, bahut aaye hain। (jhandiyaan hila rahe hain) achha hai golden chance to mila hai na। achha jo bhi seva ke nimitta aaye hue hain inmen se sabhi ne seva ka jo bal hai, phal hai - ateendriy sukh ki anubhooti ka, woh anubhav kiya? kiya? abhi bhale haan ke liye jhandi hilaao, jisne kiya ho। achha abhi to ateendriy sukh ka anubhav kiya, yeh sada rahega? ya thoda samay rahega? jo dil se promise karta hai, dekha dekhi haath nahin uthaana, jo dil se samajhta hai ki main is praapti ko sada kaayam rakhoonga, vighna-vinaashak banoonga, woh jhandi hilaao bhale। achha। dekho, aap T.vi. mein aa rahe ho phir yeh T.vi. ka photo bhejenge। achha। yeh chance jo rakha hai woh bahut achha hai। chance lete bhi khushi se hain aur tarna by tarna sabhi ko khuli dil se chhutti bhi mil jaati hai aane ki। achha, abhi kamaal kya karenge? (2008 mein aapko pratyaksha karke dikhaayenge) achha hai, ek do ko sahayog dekar is vaayde ko poora karna। zaroor karenge। master sarvashaktivaan ke liye koi bhi vaayda nibhaana, koi badi baat nahin hai। sirf dridhta ko saathi banaake rakhna। dridhta ko nahin chhodna kyonki dridhta saphalta ki chaabi hai। to jahaan dridhta hogi vahaan saphalta hai hi hai। aise hai na! karke dikhaayenge। baap-daada ko bhi khushi hai, achha hai। dekho kitnon ko chance milta hai। aadha class to seva karne vaalon ki taraph ka hota hai। achha hai। dekho, saakaar baba ke hote hue bahut achha part bajaaya hai, pahla-pahla museum isne (mahendra bhaai ne) taiyaar kiya tha। to dekho, saakaar baap ki duaayen saare zone ko hain। abhi koi naveenta karke dikhaayenge। abhi bahut samay ho gaya hai, koi nai invention nahin nikaali hai। vargeekran bhi abhi puraana ho gaya hai। pradarshaniyaan, mela, conference, sneh milan yeh sab ho gaye hain। abhi koi nai baat nikaalo। short aur sweet, kharcha kam aur seva jyaada। raayabhaadur ho na! to raay-bahaadur nai raay nikaalo। jaise pradarshani nikli, phir mela nikla, phir vargeekran nikla, aise koi nai invention nikaalo। dekhenge kaun nimitta banta hai। achha hai, himmat vaale hain iseelie baapdaada himmat rakhne vaalon ko sada advance mein madad ki mubaarak de rahe hain। achha।

abhi ek second mein sabhi bahut meethi-meethi sweet silence ki stage ke anubhav mein kho jaao। (baapdaada ne drill karaai) achha।

chaaron or ke sarva teevra purushaarthi, sada dridh sankalp dvaara saphalta ko praapta karne vaale, sada vijay ke tilakdhaari, baapdaada ke dil takhtadhaari, double taajdhaari, vishwa kalyaankaari, sada lakshya aur lakshan ko samaan karne vaale parmaatma pyaar mein palne vaale aise sarva shreshtha bachchon ko baapdaada ka yaadapyaar, dil ki duaayen aur namaste।

daadiyon se :- bachche haazir hain, to baap to haazir hai hi। na baap bachchon se door ho sakta, na bachche baap se door ho sakte। vaayda hai - saath hain, saath chalenge, aadhaakalpa brahma baap ke saath rahenge। (daadi jaanki ji ne kaha, woh bhi (shivbaaba bhi) to samaaya hua saath mein hai) aapki yeh anubhooti theek hai। abhi to guarantee hai lekin jab raajya karenge to nahin aayenge। koi dekhne vaala bhi chaahiye na। (oopar man kaise lagega?) drama mein part hai। brahma baap to saath hai na। dekho, drama kya karta hai?

vardaan:- vardaan :- reality dvaara har karma va bol mein royalty dikhlaane vaale first division ke adhikaari bhav

reality arthaat apne asli swaroop ki sada smriti, jisse sthool soorat mein bhi royalty nazar aayegi। reality arthaat ek baap doosra na koi। is smriti se har karma va bol mein royalty dikhaai degi। jo bhi samparka mein aayega unhein har karma mein baap samaan charitra anubhav honge, har bol mein baap ke samaan authority aur praapti ki anubhooti hogi। unka sang real hone ke kaaran paaras ka kaam karega। aisi reality vaali royal aatmaayen hi first division ke adhikaari banti hain।

slogan:- shreshtha karmo ka khaata badhaao to vikarmo ka khaata samaapta ho jaayega।

avyakt ishaare - ashareeri va videhi sthiti ka abhyaas badhaao

chaaron or halchal hai, vyaktiyon ki, prakriti ki halchal badhni hi hai, aise samay par safety ka saadhan hai second mein apne ko videhi, ashareeri va aatma-abhimaani bana lena। to beech-beech mein trial karo ek second mein man-buddhi ko jahaan chaahe vahaan sthit kar sakte hain! isko hi saadhna kaha jaata hai।

soochna:- aaj maas ka teesra ravivaar hai, sabhi raajayogi tapasvi bhaai-bahnen saayan 6.30 se 7.30 baje tak, vishesh yog abhyaas ke samay apni shubh bhaavnaaon ki shreshtha vritti dvaara mansa mahaadaani ban sabko nirbhayta ka vardaan dene ki seva karen।