Murli du jour du lundi 5 janvier 2026

05-01-2026 praatahmurli om shanti "baapdaada"' madhuban

“meethe bachche - baap ki shreemat se tum manushya se devta bante ho, geeta ka gyaan aur raajayog tumhein sampoorn paavan bana deta hai''

prashn:- satayug mein har cheez achhe se achhi satopradhaan hoti hai kyon?

uttar:- kyonki vahaan manushya satopradhaan hain, jab manushya achhe hain to saamagri bhi achhi hai aur manushya bure hain to saamagri bhi nuksaankaarak hai। satopradhaan srishti mein koi bhi vastu apraapta nahin hai, kuchh bhi kahin se mangaana nahin padta।

om shanti। baba is shareer dvaara samjhaate hain। inko jeev kaha jaata, inmen aatma bhi hai aur tum bachche jaante ho parampita paramatma bhi inmen hai। yeh to pahle-pahle pakka hona chaahiye isliye inko daada bhi kehte hain। yeh to bachchon ko nishchay hai। is nishchay mein hi raman karna hai। barobar baba ne jismen padhraamni ki hai va avtaar liya hai unke liye baap khud kehte hain main inke bahut janmon ke ant ke bhi ant mein aata hoon। bachchon ko samjhaaya gaya hai yeh hai sarva shaastra shiromni geeta ka gyaan। shreemat arthaat shreshtha mat। shreshtha te shreshtha mat hai oonch te oonch bhagwan ki। jiski shreemat se tum manushya se devta bante ho। tum bhrashta manushya se shreshtha devta bante ho। tum aate hi isliye ho। baap bhi khud kehte hain main aata hoon tumko shreshthaachaari, nirvikaari mat vaale devi-devta banaane। manushya se devta banne ka arth bhi samajhna hai। vikaari manushya se nirvikaari devta banaane aate hain। satayug mein manushya rehte hain parantu daiveegunon vaale। abhi kaliyug mein hain aasuri gunon vaale। hai saari manushya srishti, parantu woh hai eeshvareey buddhi, yeh hai aasuri buddhi। vahaan gyaan, yahaan bhakti। gyaan aur bhakti alag-alag hai na। bhakti ki pustak kitni aur gyaan ki pustak kitni hai। gyaan ka saagar baap hai। unka pustak bhi to ek hi hona chaahiye। jo bhi dharma sthaapan karte hain, unka pustak ek hona chaahiye। unko religious book kaha jaata hai। pahla religious book hai geeta। shreemad bhagvat geeta। yeh bhi bachche jaante hain - pahla aadi sanaatan devi-devta dharma hai, na ki hindu dharma। manushya samajhte hain geeta se hindu dharma sthaapan hua aur geeta gaai hai shreekrishna ne। koi se poochho to kahenge parampara se yeh shreekrishna ne gaai hai। koi shaastra mein shiv bhagvaanuvaach hai nahin। shreemad shreekrishna bhagvaanuvaach likh diya hai, jo geeta padhe honge unko sahaj samajh mein aayega। abhi tum samajhte ho isi geeta gyaan se manushya se devta bane hain, jo abhi baap tumko de rahe hain। raajayog sikha rahe hain। pavitrata bhi sikha rahe hain। kaam mahaashatru hai, is dvaara hi tumne haar khaai hai। ab phir un par jeet paane se tum jagatjeet arthaat vishwa ka maalik ban jaate ho। yeh to bahut sahaj hai। behad ka baap baith inke dvaara tumko padhaate hain। woh hai sabhi aatmaon ka baap। yeh phir hai behad ka baap manushyon ka। naam hi hai prajaapita brahma। tum koi se bhi poochhenge brahma ke baap ka naam bataao to moonjh padenge। brahma-vishnu-shankar hai creation। in teenon ka koi to baap hoga na। tum dikhaate ho in teenon ka baap hai niraakaar shiv। brahma-vishnu-shankar ko sookshm vatan ke devtaayen dikhlaate hain। unke oopar hai shiv। bachche jaante hain - shivbaaba ke bachche jo bhi aatmaayen hain unko apna shareer to hoga। woh to sadaiv niraakaar parampita paramatma hai। bachchon ko maaloom hua hai niraakaar parampita paramatma ke ham bachche hain। aatma shareer dvaara bolti hai - parampita paramatma। kitni sahaj baaten hain। isko kaha jaata hai alpha be। padhaate kaun hain? geeta ka gyaan kisne sunaaya? niraakaar baap ne। un par koi taaj aadi hai nahin। woh gyaan ka saagar, beejroop, chaitanya hai। tum bhi chaitanya aatmaayen ho na! sabhi jhaadon ke aadi-madhya-ant ko tum jaante ho। bhal maali nahin ho parantu samajh sakte ho kaise beej daalte hain, unse jhaad nikalte hain। woh to hai jad jhaad, yeh hai chaitanya। tumhaari aatma mein gyaan hai, aur koi ki aatma mein gyaan hota nahin। baap chaitanya manushya srishti ka beejroop hai। to jhaad bhi manushyon ka hoga। yeh hai chaitanya creation। beej aur creation mein farka to hai na! aam ka beej daalne se aam nikalta hai, phir jhaad kitna bada hota hai। vaise manushya ke beej se manushya kitne fertile hote hain। jad beej mein koi gyaan nahin hai। yeh to chaitanya beejroop hai। unmein saare srishti roopi jhaad ka gyaan hai ki kaise utpatti, paalna phir vinaash hota hai। yeh bahut bada jhaad khalaas ho phir doosra naya jhaad kaise khada hota hai! yeh hai gupta। tumko gyaan bhi gupta milta hai। baap bhi gupta aaye hain। tum jaante ho yeh kalam lag raha hai। abhi to sab patit ban gaye hain। achha beej se pahle-pahle number mein jo patta nikla woh kaun tha? satayug ka pahla patta to shreekrishna ko hi kahenge, lakshmi-naaraayan ko nahin। naya patta chhota hota hai। peechhe bada hota hai। to is beej ki kitni mahima hai। yeh to chaitanya hai na। phir patte bhi nikalte hain। unhon ki mahima to hoti hai। abhi tum devi-devta ban rahe ho। daivi gun dhaaran kar rahe ho। mool baat hi yeh hai ki hamko daiveegun dhaaran karne hain, in jaisa banna hai। chitra bhi hain। yeh chitra na hote to buddhi mein gyaan hi nahin aata। yeh chitra bahut kaam mein aate hain। bhaktimaarga mein in chitron ki bhi pooja hoti hai aur gyaan maarga mein in chitron se tumko gyaan milta hai ki aisa banna hai। bhaktimaarga mein aise nahin samajhte ki hamko aisa banna hai। bhaktimaarga mein mandir kitne bante hain। sabse jaasti mandir kiske honge? zaroor shivbaaba ke honge jo beejroop hai। phir uske baad pahli creation ke mandir honge। pahli creation yeh lakshmi-naaraayan hain। shiv ke baad inki pooja sabse jaasti hoti hai। maataayen to gyaan deti hain, unki pooja nahin hoti। woh to padhaati hain na। baap tumko padhaate hain। tum kiski pooja nahin karte ho। padhaane vaale ki abhi pooja nahin kar sakte। tum jab padhkar phir anpadh banenge tab phir pooja hogi। tum so devi-devta bante ho। tum hi jaante ho jo hamko aisa banaate hain unki pooja hogi phir hamaari pooja hogi nambarvaar। phir girte-girte paanch tatvon ki bhi pooja karne lag padte hain। shareer 5 tatvon ka hai na। 5 tatvon ki pooja karo ya shareer ki karo, ek ho jaati। yeh to gyaan buddhi mein hai। yeh lakshmi-naaraayan saare vishwa ke maalik the। in devi-devtaaon ka raajya nai srishti par tha। parantu woh kab tha? yeh nahin jaante, laakhon varsha kah dete hain। ab laakhon varsha ki baat to kabhi kiski buddhi mein rah na sake। abhi tumko smriti hai ham aaj se 5000 varsha pahle aadi sanaatan devi-devta dharma ke the। devi-devta dharma vaale phir aur dharmon mein convert hue hain। hindu dharma kah nahin sakte। parantu patit hone kaaran apne ko devi-devta kehna shobhta hi nahin। apvitra ko devi-devta kah na saken। manushya pavitra deviyon ki pooja karte hain to zaroor khud apvitra hain isliye pavitra ke aage maatha jhukaana padta hai। bhaarat mein khaas kanyaaon ko naman karte hain। kumaaron ko naman nahin karte। female ko naman karte hain। mel ko naman kyon nahin karte? kyonki is samay gyaan bhi pahle maataaon ko milta hai। baap inmen pravesh karte hain। yeh bhi samajhte ho barobar yeh gyaan ki badi nadi hai। gyaan nadi bhi hai phir purush bhi hai। yeh hai sabse badi nadi। brahmaputra nadi hai sabse badi, jo kalkatta taraph saagar mein jaakar milti hai। mela bhi vahaan lagta hai। parantu unko yeh pata nahin ki yeh aatmaon aur paramatma ka mela hai। woh to paani ki nadi hai, jis par naam brahmaputra rakha hai। unhonne to brahm eeshvar ko kaha hua hai isliye brahmaputra ko bahut paavan samajhte hain। badi nadi hai to pavitra bhi woh hogi। patit-paavan vaastav mein ganga ko nahin, brahmaputra ko kaha jaae। mela bhi inka lagta hai। yeh bhi saagar aur brahma nadi ka mela hai। brahma dvaara adoption kaise hoti hai - yeh guhya baaten samajhne ki hain, jo praayah lop ho jaati hain। yeh to bilkul sahaj baat hai na।

bhagvaanuvaach, main tumko raajayog sikhlaata hoon, phir yeh duniya hi khalaas ho jaayegi। shaastra aadi kuchh bhi nahin rahenge। phir bhaktimaarga mein yeh shaastra hote hain। gyaan maarga mein shaastra hote nahin। manushya samajhte hain yeh shaastra parampara se chale aate hain। gyaan to kuchh hai nahin। kalpa ki aayu hi laakhon varsha kah di hai isliye parampara kah dete hain। inko kaha jaata hai agyaan andhiyaara। abhi tum bachchon ko yeh behad ki padhaai milti hai, jisse tum aadi-madhya-ant ka raaz samjha sakte ho। tumko in devi-devtaaon ki history-geography ka poora pata hai। yeh pavitra pravritti maarga vaale poojya the। abhi pujaari patit bane hain। satayug mein hai pavitra pravritti maarga, yahaan kaliyug mein apvitra pravritti maarga hai। phir baad mein nivritti maarga hota hai। woh bhi drama mein hai। usko sannyaas dharma kaha jaata hai। gharbaar ka sannyaas kar jangal mein chale jaate hain। woh hai had ka sannyaas। rehte to isi puraani duniya mein hi hai na। abhi tum samajhte ho ham sangamayug par hain phir nai duniya mein jaayenge। tumko tithi, taareekh, second sahit sab maaloom hai। woh log to kalpa ki aayu hi laakhon varsha kah dete hain, inka poora hisaab nikaal sakte hain। laakhon varsha ki to baat koi yaad bhi na kar sake। abhi tum samajhte ho baap kya hai, kaise aate hain, kya kartavya karte hain? tum sabke occupation ko, janmapatri ko jaante ho। baaki jhaad ke patte to dher hote hain। woh ginti thode hi kar sakte hain। is behad srishti roopi jhaad ke kitne patte hain? 5000 varsha mein itne karod hain। to laakhon varsha mein kitne anginat manushya ho jaaen। bhaktimaarga mein dikhaate hain - likha hua hai satayug itne varsha ka hai, treta itne varsha ka hai, dvaapar itne varsha ka hai। to baap baith tum bachchon ko yeh sab raaz samjhaate hain। aam ka beej dekhne se aam ka jhaad saamne aayega na! abhi manushya srishti ka beejroop tumhaare saamne hai। tumko baith jhaad ka raaz samjhaate hain kyonki chaitanya hai। bataate hain hamaara yeh ulta jhaad hai। tum samjha sakte ho jo bhi is duniya mein hain, jad va chaitanya, hoobhu repeat karenge। abhi kitna vriddhi ko paate rehte hain। satayug mein itna ho nahin sakta। kehte hain phalaani cheez Australia se, jaapaan se aai। satayug mein Australia, jaapaan aadi thode hi the। drama anusaar vahaan ki cheez yahaan aati hai। pahle America se gehoon aadi aate the। satayug mein kahaan se aayenge thode hi। vahaan to hai hi ek dharma, sab cheezen bharpoor rehti hain। yahaan dharma vriddhi ko paate rehte hain, to unke saath sab cheejen kam hoti jaati hain। satayug mein kahaan se mangaate nahin hain। abhi to dekho kahaan-kahaan se mangaate hain! manushya peechhe vriddhi ko paate gaye hain, satayug mein to apraapta koi vastu hoti nahin। vahaan ki har cheez satopradhaan bahut achhi hoti hai। manushya hi satopradhaan hain। manushya achhe hain to saamagri bhi achhi hai। manushya bure hain to saamagri bhi nuksaankaarak hai।

science ki mukhya cheez hai atomic bombs, jisse itna saara vinaash hota hai। kaise banaate honge! banaane vaali aatma mein pahle se hi drama anusaar gyaan hoga। jab samay aata hai tab unmein woh gyaan aata hai, jismen sense hogi vahi kaam karenge aur doosre ko sikhaayenge। kalpa-kalpa jo part bajaaya hai vahi bajta rehta hai। abhi tum kitne knowledgeful bante ho, inse jaasti knowledge hoti nahin। tum is knowledge se devta ban jaate ho। isse oonch koi knowledge hai nahin। woh hai maaya ki knowledge, jisse vinaash hota hai। woh log (saaintista) moon mein jaate hain, khojte hain। tumhaare liye koi nai baat nahin। yeh sab maaya ka pomp hai। bahut show karte hain, ati deepness mein jaate hain। bahut buddhi ko ladaate hain। kuchh kamaal kar dikhaaven। bahut kamaal karne se phir nuksaan ho jaata hai। kya-kya banaate rehte hain। banaane vaale jaante hain inse yeh vinaash hoga। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gupta gyaan ka simran kar harshit rehna hai। devtaaon ke chitron ko saamne dekhte, unhein naman vandan karne ke bajaae un jaisa banne ke liye daiveegun dhaaran karne hain।

2) srishti ke beejroop baap aur unki chaitanya creation ko samajh knowledgeful banna hai, is knowledge se badhkar aur koi knowledge nahin ho sakti, isi nashe mein rehna hai।

vardaan:- “ek baap doosra na koi'' is paath ki smriti se ekras sthiti banaane vaali shreshtha aatma bhav

“ek baap doosra na koi'' yeh paath nirantar yaad ho to sthiti ekras ban jaayegi kyonki knowledge to sab mil gai hai, anek points hain, lekin points hote hue point roop mein rahen - yeh hai us samay ki kamaal jis samay koi neeche kheench raha ho। kabhi baat neeche kheechengi, kabhi koi vyakti, kabhi koi cheej, kabhi vaayumandal…yeh to hoga hi। lekin second mein yeh sab vistaar samaapta ho ekras sthiti rahe - tab kahenge shreshtha aatma bhav ke vardaani।

slogan:- knowledge ki shakti dhaaran kar lo to vighna vaar karne ke bajaae haar kha lenge।

avyakt ishaare - is avyakti maas mein bandhanmukta rah jeevanmukta sthiti ka anubhav karo

abhi aap sab aise mukta ban master muktidaata bano jo sarva aatmaayen, prakriti, bhagat mukta ho jaaen। abhi brahma baap isi ek baat mein date conscious hain, ki mera ek-ek bachcha kab jeevan mukta banega? aise nahin samajhna ki ant mein jeevanmukta banenge, nahin। bahutkaal se jeevanmukta sthiti ka abhyaas, bahutkaal jeevanmukta raajya bhaagya ka adhikaari banaayega।