Murli du jour du lundi 16 février 2026

16-02-2026 praatahmurli om shanti "baapdaada"' madhuban

“meethe bachche - praaneshvar baap aaya hai tum bachchon ko praandaan dene, praandaan milna arthaat tamopradhaan se satopradhaan banna''

prashn:- drama ke har raaz ko jaanne ke kaaran kaun-si scene tumhaare liye nai nahin hai?

uttar:- is samay jo saari duniya mein hangaamen hain, vinaash kaale vipreet buddhi ban apne hi kul ka khoon karne liye anek saadhan banaate jaate hain। yeh koi nai baat nahin kyonki tum jaante ho yeh duniya to badalni hi hai। mahaabhaarat ladaai ke baad hi hamaari nai duniya aayegi।

geet:- yeh kaun aaj aaya…

om shanti। savere-savere yeh kaun aakar murli bajaate hain? duniya to bilkul hi ghor andhiyaare mein hai। tum abhi murli sun rahe ho। gyaan saagar, patit-paavan praaneshvar baap se। woh hai praan bachaane vaala eeshvar। kehte hain na - he eeshvar is duhkh se bachaao। woh had ki madad maangate hain। abhi tum bachchon ko milti hai behad ki madad kyonki behad ka baap hai na। tum jaante ho - aatma bhi gupta hai। bachchon ka shareer pratyaksha hai। to baap ki shreemat hai bachchon prati। sarva shaastramai shiromni geeta mashhoor hai। sirf unmein naam daal diya hai shreekrishna ka। ab tum jaante ho shreemat bhagvaanuvaach hai। yeh bhi samajh gaye ki bhrashtaachaari ko shreshthaachaari banaane vaala ek hi baap hai। vahi nar se naaraayan banaate hain। katha bhi hai satya naaraayan ki। gaaya jaata hai amraktha। amarpuri ka maalik banaane athva nar se naaraayan banaane ki baat ek hi hai। yeh hai mrityulok। bhaarat hi amarpuri tha। yeh kisko bhi pata nahin hai। yahaan hi amar baba ne paarvatiyon ko sunaaya hai। ek paarvati va ek dropdi nahin thi। yeh to bahut bachche sun rahe hain। shivbaaba sunaate hain brahma dvaara। baap kehte hain main brahma dvaara meethe-meethe bachchon ko samjhaata hoon।

baap ne samjhaaya hai bachchon ko aatma-abhimaani zaroor banna hai। baap hi bana sakte hain। duniya mein ek bhi manushya maatra nahin jisko aatma ka gyaan ho। aatma ka hi gyaan nahin hai to paramatma ka gyaan kaise ho sakta hai। kah dete hain ham aatma so paramatma। kitni bhaari bhool mein saari duniya phansi hui hai। bilkul hi patthar buddhi hain। vilaayat vaale bhi pattharbuddhi kam nahin hain, yeh buddhi mein nahin aata hai ki ham yeh jo bombs aadi bana rahe hain, yeh to apna bhi khoon, saari duniya ka bhi khoon karne ke liye bana rahe hain। to is samay buddhi koi kaam ki nahin rahi hai। apne hi vinaash ke liye saari taiyaari kar rahe hain। tum bachchon ke liye yeh koi nai baat nahin hai। jaante ho drama anusaar unhon ka bhi part hai। drama ke bandhan mein baandhe hue hain। pattharbuddhi na hon to aise kaam kar sakte hain kya? saare kul ka vinaash kar rahe hain। wonder hai na - kya kar rahe hain। baithe-baithe aaj theek chal raha hai, kal military bigdi to president ko bhi maar dete। aise-aise itphaak hote rehte hain। kisko bhi sahan nahin karte hain। powerful hain na। aajkal ki duniya mein hangaama bahut hai, pattharbuddhi bhi athaah hain। abhi tum bachche jaante ho vinaash kaale jo baap se vipreet buddhi hain, unke liye vinshanti gaaya hua hai। abhi is duniya ko badalna hai। yeh bhi jaante ho barobar mahaabhaarat ladaai lagi thi। baap ne raajayog sikhaaya tha। shaastron mein to total vinaash dikha diya hai। parantu total vinaash to hota nahin hai phir to pralay ho jaae। manushya koi bhi na rahen, sirf 5 tatva rah jaaen। aise to ho nahin sakta। pralay ho jaae to phir manushya kahaan se aaye। dikhaate hain shreekrishna angootha choosta hua peepal ke patte par saagar mein aaya। baalak aise aa kaise sakta? shaastron mein aisi-aisi baaten likh di hain jo baat mat poochho। abhi tum kumaariyon dvaara in vidvaanon, bheeshma pitaamah aadi ko bhi gyaan baan lagte hain। woh bhi aage chalkar aayenge। jitna-jitna tum service mein jor bharenge, baap ka parichay sabko dete rahenge utna tumhaara prabhaav badhega। haan vighna bhi padenge। yeh bhi gaaya hua hai aasuri sampradaay ke is gyaan yagya mein bahut vighna padte hain। bichaare pattharbuddhi manushya kuchh nahin jaante ki yeh kya hai? kehte hain inhon ka to gyaan hi nyaara hai। yeh bhi tum samajhte ho nai duniya ke liye nai baaten hain।

baap kehte hain yeh raajayog tumko aur koi sikhla nahin sakenge। gyaan aur yog baap hi sikhla rahe hain। sadgati daata ek hi baap hai, vahi patit-paavan hai to zaroor patiton ko hi gyaan denge na। tum bachche samajhte ho - ham paarasbuddhi ban paarasnaath bante hain। manushyon ne mandir kitne dher banaaye hain। parantu woh kaun hain, kya karke gaye hain, arth kuchh bhi nahin samajhte। paarasnaath ka bhi mandir hai, parantu kisko bhi pata nahin hai। bhaarat paaraspuri tha, sone heere-javaahraaton ke mahal the। kal ki baat hai। woh to laakhon varsha kah dete hain sirf ek satayug ko। aur baap kehte hain saara drama hi 5 hazaar varsha ka hai isliye kaha jaata hai - aaj ka bhaarat kya hai! kal ka bhaarat kya tha! laakhon varsha ki to kisko smriti rah na sake। tum bachchon ko ab smriti mili hai। jaante ho baba har 5 hazaar varsha baad aakar hamko smriti dilaate hain। tum bachche svarga ke maalik the। 5 hazaar varsha ki baat hai। koi se bhi poochha jaae, in lakshmi-naaraayan ka raajya kab tha? kitne varsha hue? to laakhon varsha kah denge। tum samjha sakte ho yeh to 5 hazaar varsha ki baat hai। kehte bhi hain Christ se itna samay pahle paradise tha। baap aate hi hain bhaarat mein। yeh bhi bachchon ko samjhaaya hai - baba ki jayanti manaate hain to zaroor kuchh karne aaya hoga। patit-paavan hai to zaroor aakar paavan banaata hoga। gyaan saagar hai to zaroor gyaan denge na। yog mein baitho, apne ko aatma samajh baap ko yaad karo, yeh gyaan hua na। woh to hain hathayogi। taang, taang par chadhaakar baithte hain। kya-kya karte hain। tum maataayen to aise kar na sako। baith bhi na sako। baap kehte hain meethe bachche, yeh kuchh karne ki tumko darkaar nahin hai। school mein student kaaydesir to baithte hain na। baap to woh bhi nahin kehte hain। jaise chaahe vaise baitho। baithkar thak jaao to achha so jaao। baba koi baat mein mana nahin karte hain। yeh to bilkul sahaj samajhne ki baat hai, ismen koi takleeph ki baat nahin। bhal kitna bhi beemaar ho। pata nahin sunte-sunte shivbaaba ki yaad mein rehte-rehte aur praan tan se nikal jaaen। gaaya jaata hai na - ganga ka tat ho, ganga jal mukh mein ho tab praan tan se niklen। woh to sab hain bhakti maarga ki baaten। vaastav mein hai yeh gyaan amrit ki baat। tum jaante ho - sachmuch aise hi praan nikalne hain।

tum bachche aate ho paramdham se। hamko chhodkar jaate ho। baap kehte hain main to tum bachchon ko saath le jaaoonga। main aaya hoon tum bachchon ko ghar le jaane ke liye। tumko na apne ghar ka pata hai, na aatma ka pata hai। maaya ne bilkul hi pankh kaat daale hain, isliye aatma ud nahin sakti kyonki tamopradhaan hai। jab tak satopradhaan bane tab tak shantidham mein ja kaise sakti। yeh bhi jaante hain - drama plan anusaar sabko tamopradhaan banna hi hai। is samay saara jhaad bilkul tamopradhaan jad-jadeebhoot ho gaya hai। bachche jaante hain sab aatmaayen tamopradhaan hain। nai duniya mein hoti hain satopradhaan। yahaan kiski sato-pradhaan avastha ho na sake। yahaan aatma pavitra ban jaae to phir yahaan thahre nahin, ekdam bhaag jaae। sab bhakti karte hi hain mukti ke liye athva shantidham mein jaane ke liye। parantu koi bhi vaapis ja nahin sakte। law nahin kehta। baap yeh sab raaz baith samjhaate hain dhaaran karne liye, phir bhi mukhya baat hai baap ko yaad karna, svadarshan chakradhaari banna। beej ko yaad karne se saara jhaad buddhi mein aa jaayega। jhaad pahle chhota hota hai phir bada hota jaata hai। anek dharma hain na। tum ek second mein jaan lete ho। duniya mein kisko bhi pata nahin hai। manushya srishti ka beejroop sabka ek baap hai। baap kabhi sarvavyaapi thode hi ho sakta। bade te badi bhool hai yeh। tum samjhaate bhi ho manushya ko kabhi bhagwan nahin kaha jaata hai। baap bachchon ko sab baaten sahaj karke samjhaate hain phir jinki takdeer mein hai, nishchay hai to woh zaroor baap se varsa lenge। nishchay nahin hoga to kabhi bhi nahin samjhenge। takdeer hi nahin to phir tadbeer bhi kya karenge। takdeer mein nahin hai to woh baithte hi aise hain jo kuchh bhi samajhte nahin। itna bhi nishchay nahin ki baap aaye hain behad ka varsa dene। jaise koi naya aadmi medical college mein jaakar baithe to kya samjhenge? kuchh bhi nahin। yahaan bhi aise aakar baithte hain। is avinaashi gyaan ka vinaash nahin hota hai।

yeh bhi baap ne samjhaaya hai - raajdhaani sthaapan hoti hai na। to naukar chaakar praja, praja ke bhi naukar chaakar sab chaahiye na। to aise bhi aate hain। koi ko to bahut achhi reeti samajh mein aa jaayega। opinion bhi likhte hain na। aage chal kuchh chadhne ki koshish karenge। parantu us samay hai mushkil kyonki us samay to bahut hangaama hoga। din-pratidin toofaan badhte jaate hain। itne centres hain। achhi reeti samjhenge bhi। yeh bhi likha hua hai - brahma dvaara sthaapna। vinaash bhi saamne dekhte hain। vinaash to hona hi hai। government kehti hai janma kam hon, parantu ismen kar hi kya sakenge? jhaad ki vriddhi to honi hai। jab tak baap hai tab tak sab dharmon ki aatmaon ko yahaan rehna hi hai। jab jaane ka samay hoga tab aatmaon ka aana banda hoga। abhi to sabko aana hi hai। parantu yeh baaten koi samajhte nahin hain। baapu ji bhi kehte the raavan raajya hai, hamko raamraajya chaahiye। kehte hain phalaana svargavaasi hua to iska matlab yeh narka hai na। manushya itna bhi samajhte nahin। svarga-vaasi hua to achha hai na। zaroor narkavaasi tha। baba samjhaate hain manushyon ki soorat manushya ki, seerat bandar ki hai। sab gaate rehte hain patit-paavan seetaaraam। ham patit hain, paavan banaane vaala hai baap। woh sab hain bhakti maarga ki seetaayen, baap hai raam। kisko seedha kaho to maante nahin। raam ko bulaate hain। abhi tum bachchon ko baap ne teesra netra diya hai। tum jaise alag duniya ke ho gaye ho। puraani duniya mein kya-kya karte rehte hain। abhi tum samajhte ho। tum bachche besmajh se samajhdaar bane ho। raavan ne tumko kitna besmajh bana diya hai। baap samjhaate hain is samay sabhi manushya tamopradhaan ban gaye hain, tab to baap aakar satopradhaan banaate hain।

baap kehte hain bhal tum bachche apni service bhi karte raho sirf ek baat yaad rakho - baap ko yaad karo। tamopradhaan se satopradhaan banne ka raasta aur koi bata nahin sakta। sarva ka roohaani surgeon ek hi hai। vahi aakar aatmaon ko injection lagaate hain kyonki aatma hi tamopradhaan bani hai। baap ko avinaashi surgeon kaha jaata hai। abhi aatma satopradhaan se tamopradhaan bani hai, inko injection chaahiye। baap kehte hain - bachche, apne ko aatma nishchay karo aur apne baap ko yaad karo। buddhiyog oopar sweet hom mein lagaao। hamko sweet silence hom mein jaana hai। nirvaandhaam ko sweet hom kaha jaata hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yeh puraani duniya vinaash hui padi hai isliye isse apne aapko alag samajhna hai। jhaad ki vriddhi ke saath-saath jo vighnon roopi toofaan aate hain, unse darna nahin hai, paar hona hai।

2) aatma ko satopradhaan banaane ke liye apne ko gyaan-yog ka injection dena hai। apna buddhiyog sweet hom mein lagaana hai।

vardaan:- “pahle aap'' ke paath dvaara taajdhaari banne vaale chatursujaan bhav

jaise baapdaada apne ko obedient servant kehte hain, servant kahne se taajdhaani svatah ban jaate hain, aise aap bachche bhi svayan namrachit ban doosre ko shreshtha seat de do, unko seat par bithaayenge to woh utarkar aapko svatah hi bitha dega। agar aap baithne ki koshish karenge to woh baithne nahin dega isliye bithaana hi baithna hai। to “pahle aap'' ka paath pakka karo phir sanskaar bhi sahaj hi mil jaayenge, taajdhaari bhi ban jaayenge, yahi chatursujaan banne ka tareeka hai, ismen mehnat bhi nahin praapti bhi jyaada hai।

slogan:- avyakt sthiti ka anubhav karne ke liye antarmukhi, ekaantavaasi bano।

ye avyakt ishaare - ekta aur vishvaas ki visheshta dvaara saphalta sampanna bano

abhi tak alag-alag phool apni-apni rangat dikha rahe hain lekin jab guldaste ke roop mein apni khushbu phailaayenge, shakti dal pratyaksha hoga tab yeh sangathan ki shakti parmaatma pratyakshata ke nimitta banengi। abhi ek-ek alag hone ke kaaran mehnat jyaada karni padti hai lekin jab sangathan ekmat hoga to mehnat kam saphalta jaasti hogi।