Murli du jour du dimanche 1 mars 2026

01-03-26 praatahmurli om shanti ''avyakt-baapdaada'' revise 09-03-09 madhuban

“parmaatma sang ke rang ki aur combined swaroop ki yathaartha holi manaao''

aaj holiest baap apne holi bachchon se holi manaane aaye hain। sabhi bachche holi bachche hain। aap sab bhi holi manaane aaye hain। socho, aap holi aatmaon ke oopar kaun sa rang laga jo holi ban gaye! rang to anek hain lekin aapke oopar kaun sa rang laga? sabse shreshtha rang kaun sa hai, jisse aap holi ban gaye? sabse bade te bada rang hai parmaatma sang ka rang। to parmaatma sang ka rang lagne se sahaj holi ban gaye kyonki parmaatma sang avinaashi sang ka rang hai aur rang to thode samay ke liye hota lekin parmaatma sang ka rang lagne se sahaj hi holi arthaat pavitra ban gaye। aatma ka rang apvitrata se pavitra ban gaya kyonki aap sabne paramatma ko apna companion bana liya, company bana liya isliye combined ho gaye। yeh combined swaroop pyaara lagta hai na! yeh combined roop kabhi bhi alag nahin ho sakta। anubhav hai na! sada combined rehte ho na! akele nahin। maaya akele karne ki koshish karti hai lekin jo sada combined rahne vaale hain woh kabhi bhi alag ho nahin sakte kyonki maaya alag karke phir puraane sanskaaron ko emerge karti hai aur puraane sanskaar emerge ho jaate hain to shuddh sanskaar merge ho jaate hain। puraane sanskaar hain - albelaapan aur aalasya, yeh bhinna-bhinna roop mein emerge hone se combined roop alag ho jaata hai। to har ek apne ko check karo ki sada combined rehte hain va kabhi akele bhi ho jaate hain? maaya ke anek svaroopon ko to jaan gaye ho na! woh chaturaai se apna rang laga deti hai। alag hona arthaat maaya ke rang mein rangana। yeh albelaapan, aalasya bahut bhinna-bhinna roop se aata hai aur bachche bhi usko pahchaan nahin paate hain kyonki maaya apne taraph aakarshit kar deti hai। yeh albelaapan aur aalasya jo raavan ka khajaana hai, yeh baap ka khajaana nahin hai, raavan ke khajaane ko bachche bhi bade nashe se kehte hain ki main chaahta nahin hoon, chaahti nahin hoon lekin mera sanskaar hai। sanskaar mera kahne lagte hain। kya yeh parmaatma khajaana hai ya raavan ka khajaana hai? usko mera sanskaar kehna socho, right hai? mera bana dena, yeh maaya ki chaturaai hai। baap ka khajaana pyaara hai ya yeh raavan ka khajaana pyaara hai? common reeti se bachche apne ko chhudaane ke liye kah dete hain mera sanskaar hai, chaahti nahin hoon। to socho kya yeh mera hai! baap kehte hain ki raavan ke khajaane ko apna banaane se dheere-dheere jo shubh sanskaar hain woh samaapta hote jaate hain। parmaatma sang ka rang dheela hota jaata hai aur maaya ka rang emerge ho jaata hai। to chalte-chalte apne ko hi check karna hai, kaun sa rang chadha hua hai? log bhi holi mein kya karte hain? pahle buraai ko jalaate hain phir rang lagaate hain, manaate hain। to aapke oopar baapdaada ne sang ka rang to lagaaya lekin saath mein gyaan ka rang, shaktiyon ka rang, gunon ka rang, woh lagaata rehta hai।

to sabhi ke oopar yeh roohaani rang chadha hua hai na! chadha hai? haath uthaao। roohaani rang chadh gaya, utarne vaala to nahin hai na! jiske oopar roohaani rang chadh gaya, avinaashi rang chadh gaya, uske oopar aur koi rang lag nahin sakta। is rang se kitne holi ban gaye ho? jo saare kalpa mein aap jaisa holi, pavitra aur koi ban nahin sakta। aapki pavitrata prabhu ke sang ka rang, parmaatma combined rahne ka anubhav sabse nyaara aur pyaara hai। aur jo bhi holi, pavitra bante hain to unhon ka shareer pavitra nahin banta, aatma pavitra banti hai lekin aap aise holi, pavitra bante ho jo aapka shareer aur aatma donon pavitra rehte hain aur pavitrata ko sukh, shanti, prem, aanand ki janni kaha jaata hai। jahaan pavitrata hai vahaan sukh shanti saath mein hai hi hai kyonki jahaan janni hoti vahaan bachche hote hain kyonki baap aa karke aapko aisa holi banaata hai jo aapke jad chitra kitne vidhi poorvak pooje jaate hain। kaliyug ke last janma mein bhi aap apne chitra dekhte ho ki kaise vidhi poorvak unhon ki pooja hoti hai, yeh pavitrata ki visheshta hai aur kitne bhi mahaan aatmaayen, dharma aatmaayen pavitra bane hain lekin mandir kisi ka bhi nahin banta hai। aise vidhi poorvak pooja kisi ki bhi nahin hoti hai aur last janma tak aapke chitra bhi duaayen dete rehte hain। thode samay ka sukh shanti anubhav karaate hain। to aapki holi aur duniya vaalon ki holi kitna pharka hai! bhale manoranjan ke liye aap bhi thoda bahut manaate ho lekin sachchi holi parmaatma sang ke rang ki aur combined swaroop ki yathaartha holi aap manaate ho। holi ko log bhi bhinna-bhinna roop se manaate hain, vaise aap jaante ho ki holi shabd ka bhi rahasya hai, jo aap hi jaante ho, aap hi manaate ho। holi ka arth hai, ho li, beet chuka so beet chuka। to aap sabne puraani jeevan, puraani baaten, puraane sanskaar, puraane vyartha sankalp ko ho li kar di na। beeti so beeti karna arthaat ho li। to aise kiya hai? ki abhi bhi kabhi galti se puraane sanskaar aa jaate hain? jab hamaara janma hi naya hai, aap sabhi marjeeva bane ho na! bane ho? marjeeva bane ho? haath uthaao। achha। naya janma ho gaya to puraana janma kaise yaad aata? puraana, puraana ho gaya। agar beeti baaten ya sankalp, sanskaar emerge hota hai to kya kahenge? holi manaai? ho li kiya nahin। parmaatma sang ka rang achhi tarah se laga nahin। parmaatma sang ka rang lagna arthaat puraana janma bhool jaana। puraani baaten bhool jaana kyonki marjeeva ho gaye na। jaise shareer se ek janma chhodkar doosra lete ho to kya puraana janma yaad rehta hai? to aap sabhi abhi brahman janma dhaaran karne vaale ho। to pichhle janma ke sanskaar jisko galti se kehte ho mere sanskaar hain, kya aapke hain? brahman jeevan ke yeh sanskaar hain? kabhi albelaapan, kabhi royal aalasya, aalasya ke bahut bhinna-bhinna roop hain। kabhi is par class karna। aalasya kitne prakaar ke hain aur kitne royal roop se aate hain!

to brahman jeevan arthaat naya jeevan, ismen puraana kuchh ho nahin sakta। to aaj holi manaane aaye ho na! to holi arthaat ho li, to aaj holi manaana arthaat puraane sanskaar ki holi jalaana। jalaane ke baad hi manaana hota hai। to abhi aapke manaane ka swaroop hai। jala diya, abhi manaana hai। prabhu ke sang ke rang ka maja lene vaale ho। combined rahne ka anubhav karne vaale ho, kyon? holiest baap ne aapke oopar holi banne ka, pavitra banne ka rang lagaaya hai।

to aaj kaun si holi mana rahe ho? aaj se vishesh koi bhi puraane sanskaar ko aane nahin dena, yeh holi manaani hai। mana sakte ho ya kabhi-kabhi aa jaayenge? yeh royal shabd ki main karne nahin chaahti thi, chaahta tha lekin mere sanskaar hain। yeh shabd aaj dridh sankalp ki vidhi se samaapta kar lo। aisi holi aaj sada ke liye manaane ki himmat rakhte ho? ki kabhi-kabhi manaayenge? jo samajhte hain ki aaj se puraane sanskaar ki holi, ho li, beeti so beeti, janma naya hai, woh puraana janma khatma। aisi himmat rakhne vaale aap baap ke meethe-meethe laadle sikeeldhe bachche ho na! to yeh sankalp nahin, dridh sankalp karne ki himmat hai? haath uthaao। dekho, sabhi ne himmat rakhi hai। chalo thode rah bhi gaye, lekin aap sab to saathi ho na। pakke saathi, do haath uthaao। yeh photo nikaalo sabka। achha। double videshi bhi utha rahe hain।

to baapdaada aapko padam padamguna mubaarak de rahe hain, holi ki, ho li manaane ki। abhi galti se bhi apne mukh se yeh shabd nahin nikaalna। mera sanskaar, raavan ke sanskaar ko mera kehte ho, kamaal hai! raavan ko dushman kaha jaata hai, dushman ka khajaana apna banaana yeh to aashcharya ki baat hai! aapko bhi aashcharya lag raha hai na ki kya kehte hain! galti se kah dete ho। kah dete hain phir andar mein dil khaati bhi hai, mahsoos bhi karte hain, baap se baaten bhi karte, maaphi bhi lete hain। baba kal se nahin karoongi, karoonga। phir bhi kar dete hain। abhi baapdaada kya kare? dekhta rahe? abhi is shabd ki holi jala lo। dekho jalaane mein bhi ek bahut achhi baat bataate hain, koki ko dhaaga baandhakar pakaate hain, to jab koki pak jaati hai aur nikaalte hain to koki pak jaati lekin dhaaga nahin jalta hai। yeh nishaani bhi aapne jo pahla paath padha hai ki aatma avinaashi hai aur shareer vinaashi hai, uski bana di hai। to baapdaada dekhte hain ki yeh tyohaar ya shaastra banaane vaale bachchon ki bhi kamaal kam nahin hai। hain to woh bhi baap ke bachche hi lekin aap ho sikeeldhe। to bhal usmein aate mein namak hai lekin banaaya bada ramneek hai। aap dekho har tyohaar ka yaadgaar banaaya hai, lekin kai baaten jo sookshm hain usko sthool roop de diya hai। lekin yaadgaar to banaaya hai na! bhakti mein bhi kam to nahin kiya, bhakti ne dvaapar kaliyug mein phir bhi kuchh na kuchh smriti ki baaten rakhi, ati vikaari banne se bachaaya। to baapdaada yeh saamagri, tyohaar ya shaastra banaane vaalon ko bhi unka phal deta hai। phir bhi bhakti mein kuchh to yaad karte hain, vikaaron se thode time ke liye bach jaate hain।

to aapne aaj kaun si holi manaai? kaun si holi manaai? ho li, sab kaho ho li। aise karo (haath ka ishaara) ho li। pakka hai na! manaaya? manaaya? achha। phir kal maaya aayegi, kyonki maaya bhi sun rahi hai lekin aap aise nahin karna। (apni or nahin bulaana) maja hai na, ismen maja hai na। to maje mein rehna।

baap ko yaad rakhna to baap humein kitna roohaani rang daal raha hai, jisse aap holeehans ban gaye। holeehans arthaat nirnay shakti vaale holi hans। koi bhi kaam karo na, to ek seat fix kar lo, pahle us seat par set ho phir nirnay karo, woh seat jaante ho, woh seat hai trikaaldarshi ki seat। pahle trikaaldarshi ki seat par set ho teenon kaalon ko dekho, sirf vartamaan nahin, aadi madhya ant, teenon kaalon ko dekho, teenon kaal mein phaayda hai ya nuksaan? kai bachche bade chatur hain। chaturaai sunaaoon? kya kehte hain, is kaam ko chalaana tha na, iseelie kaam chala liya। baaki main samajhti hoon, samajhta hoon karna nahin chaahiye lekin kar liya। lekin kar liya to karma ka phal to milega na! to chaturaai nahin karna, baap ko bhi bahut rijhaate hain। galti karte hain na phir baapdaada ko aisi aisi baaten sunaate hain - baba aap to merciful ho na! aap to kshama ke saagar ho na! baap ko bhi yaad karaate hain to aap kaun ho! aapne kaha hai na, mere ko sunaake khatma kar do। lekin mahsoosta se sunaake khatma kar lo। ek akshar pakka karte ho, suna to dete ho lekin pahle dridh sankalp se sva ko parivartan karke phir sunaao। rijhaate bahut hain, aapne kaha hai na! baap ko bhi yaad dilaate hain - aapne yeh kaha hai na, aapne yeh kaha hai na। badi chaturaai karte hain। abhi chaturaai nahin karna, himmat rakhna। karna hi hai, ge ge nahin karna।

baapdaada saare din mein ge ge ke geet bahut sunte hain। karenge, dikhaayenge, banenge, lekin speed kya? ge ge vaale baap ke saath chalenge? baap to ever ready hai aur ge ge vaale ever ready to nahin hue। to baap ke saath kaise chalenge? dekhte rahenge, baap ke saath ja rahe hain। baap ko ek-ek bachche se padamguna pyaar hai। baap nahin chaahte ki mere bachche aur saath nahin chalen। jab ghar lautne ka samay aa gaya hai to kya ghar nahin chalenge? kyonki ghar jaake phir raajya mein aana hai। ghar nahin chalenge saath mein to brahma baap ke saath raajya mein bhi nahin aayenge, peechhe aayenge। to aapka vaayda kya hai? saath chalenge ya aa jaayenge… ismen bhi ge ge lagaayenge। pahunch jaayenge, dekhna baba zaroor pahunch jaayenge। to yeh bhaasha abhi samaapta karo। achha।

sabhi chaaron or ke bachchon ko bhi baapdaada dekh rahe hain ki door baithe bhi science ke saadhan dvaara majority sthaanon mein centres par woh bhi baapdaada ko dekhte rehte hain, aap toli khaate ho na to woh bhi toli baantate hain। to sabhi ko baapdaada bhi dekh rahe hain ki kaise door baithe najdeek ka anubhav kar rahe hain। to chaaron or ke bachchon ko jo sada baap samaan sampanna aur sampoorn banna hai, is sankalp ko dhaaran kiye hue hain aur dridhta ka bal samay prati samay is sankalp ko dete rehte hain, aise chaaron or ke shubh sankalp dhaaran karne vaale, saath-saath baap ki aashaaon ko poorn karne vaale aashaaon ke sitaare, saath-saath daadi ke bol, karmaateet hona hi hai, hona hi hai, hona hi hai... aur mama ke yeh bol ki sada jo karna hai so aaj karo, kal par nahin chhodo, aur deedi ke yeh bol ab ghar chalna hai, yeh kaanon mein goonjana chaahiye। baar-baar ab ghar chalna hai। to dhun laga do - karmaateet hona hai, ab ghar chalna hai। yeh bol baar-baar smriti mein laane vaale samartha aatmaon ko baapdaada ka holi bachchon ko holi ki mubaarak ho, aur saath mein sabhi ko baapdaada pahle hi madhuban ke gevar ke pahle sabhi mukh kholo aur gevar khaao, khaaya, to sabhi ko bahut-bahut padamguna baapdaada aur advance party ke sarva bachchon ka yaadapyaar aur baap ki namaste।

vardaan:- sarva aatmaon ke prati sneh aur shubhchintak ki bhaavna rakhne vaale dehi-abhimaani bhav

jaise mahima karne vaali aatma ke prati sneh ki bhaavna rehti hai, aise hi jab koi shiksha ka ishaara deta hai to usmein bhi us aatma ke prati aise hi sneh ki, shubhchintan ki bhaavna rahe - ki yeh mere liye bade se bade shubhchintak hain - aisi sthiti ko kaha jaata hai dehi-abhimaani। agar dehi-abhimaani nahin hain to zaroor abhimaan hai। abhimaan vaala kabhi apna apmaan sahan nahin kar sakta।

slogan:- sada parmaatma pyaar mein khoye raho to duhkhon ki duniya bhool jaayegi।

ye avyakt ishaare - “nishchay ke foundation ko majboot kar sada nirbhay aur nishchint raho"

jab koi bade ke haath mein haath hota hai to chhote ki sthiti bephikra, nishchint rehti hai। aapko nishchay hai ki har karma mein baapdaada mere saath bhi hai aur hamaare is alaukik jeevan ka haath unke haath mein hai arthaat jeevan unke havaale hai to zimmevaari unki ho jaati hai। sabhi bojh baap ke oopar rakh apne ko halka kar do to sada nishchint rahenge aur har kaarya accurate hoga।