Murli du jour du jeudi 26 mars 2026

26-03-2026 praatahmurli om shanti "baapdaada"' madhuban

“meethe bachche - sangadosh se bachkar padhaai par poora-poora dhyaan do to koi bhi toofaan aa nahin sakte, baaki maaya ko doshi mat banaao''

prashn:- kaun si ek baat sada dhyaan par rakho to beda paar ho jaayega?

uttar:- “baba aapka jo hukm'', aise sada baap ke hukm par chalte raho to tumhaara beda paar ho jaayega। hukm par chalne vaale maaya ke vaar se bach jaate hain, buddhi ka taala khul jaata hai। apaar khushi rehti hai। koi bhi ulta karma nahin hota hai।

geet:- tumhein paake hamne…

om shanti। meethe-meethe sabhi centres ke bachchon ne geet suna। sab jaante hain ki behad ke baap se phir se 5 hajaar varsha pahle muaaphik ham vishwa ki baadshaahi le rahe hain। kalpa-kalpa ham lete aaye hain। baadshaahi lete hain phir ganvaate hain। bachche jaante hain abhi hamne behad ke baap ki god li hai va unke bachche bane hain। hai bhi barobar। ghar baithe hue purushaartha karte hain। behad ke baap se oonch pad paane ke liye padhaai chal rahi hai। tum jaante ho gyaan saagar, patit-paavan sarva ka sadgati daata shivbaaba hi hamaara baap bhi hai, teacher bhi hai aur satguru bhi hai। unse ham varsa lete hain to usmein kitna purushaartha karna chaahiye - oonch pad paane liye। agyaan kaal mein bhi school mein padhte hain to nambarvaar marks se paas hote hain, apni padhaai anusaar। vahaan aise to koi nahin kahenge ki maaya hamko vighna daalti hai va toofaan aate hain। theek reeti padhte nahin hain va bure sang mein jaakar phans padte hain। khel-kood mein lag jaate hain isliye padhte nahin hain। naapaas ho jaate hain। baaki isko maaya ke toofaan nahin kahenge। chalan theek nahin rehti to teacher bhi certificate dete hain ki inki badachlan hai। kusang mein kharaab hua hai, ismen maaya raavan ko doshi banaane ki baat nahin hai। bade-bade achhe aadmiyon ke bachche koi to achha chadh jaate hain, koi sharaab aadi peene lag jaate hain। gande taraph chale jaate hain to baap bhi kehte hain ki kapoot ho gaya hai। us padhaai mein to bahut subject hoti hain। yeh to ek hi prakaar ki padhaai hai। vahaan manushya padhaate hain। yahaan bachche jaante hain hamko bhagwan padhaate hain। ham achhi reeti padhen to vishwa ka maalik ban sakte hain। bachche to bahut hain phir koi padh nahin sakte, sangadosh mein aakar ke। isko maaya ka toofaan kyon kahen? sangadosh mein koi padhta nahin hai to ismen maaya va teacher va baap kya karenge! nahin padh sakte hain to chale gaye apne ghar। yeh to drama anusaar pahle bhatthi mein padna hi tha। sharan aakar li। koi ko pati ne maara, tang kiya to koi ko vairaagya aa gaya। ghar mein chal nahin saki phir koi yahaan aakar bhi chali gai, nahin padh saki to jaakar naukri aadi mein lagi va shaadi ki। yeh to ek bahaana hai maaya ke toofaan se padh nahin sakte। yeh nahin samajhte ki sangadosh ke kaaran yeh haal hua aur hamaare mein vikaar jabardasta hain। yeh kyon kehte ho ki maaya ka toofaan laga tab gir pade। yeh to apne oopar madaar hai।

baap, teacher, satguru ki jo shiksha milti hai, us par chalna chaahiye। nahin chalte hain to koi kharaab sang hai va kaam ka nasha va deh-abhimaan ka nasha hai। sab centres vaale jaante hain ki ham behad ke baap se vishwa ki baadaashaahi lene ke liye padh rahe hai। nishchay nahin hai to baithe hi kyon hain aur bhi bahut aashram hain। parantu vahaan to kuchh praapti nahin। em object nahin hai। woh sab chhote-chhote math panth, taal taaliyaan hain। jhaad vriddhi ko paana hi hai। yahaan to yeh saara connection hai। meethe daivi jhaad ka jo hoga woh nikal aayega। sabse meethe kaun honge? jo satayug ke mahaaraaja mahaaraani bante hain। abhi tum samajhte ho jo pahle number mein aate hain, unhonne zaroor achhi padhaai padhi hogi। vahi sooryavanshi gharaane mein gaye। aise bhi hain grihastha vyavhaar mein rehte arpanmay jeevan hai। bahut service kar rahe hain। pharka hai na। bhal yahaan bhi rehte hain parantu padha nahin sakte to aur service mein lag jaate hain। pichhaadi mein thoda raajaai pad pa lenge। dekha jaata hai baahar grihastha vyavhaar mein rahne vaale bahut teekhe ho jaate hain, padhne aur padhaane mein। sabhi to grihasthi nahin hain। kanya va kumaar ko grihasthi nahin kahenge aur jo vaanaprasthi hain woh 60 varsha ke baad phir sab kuchh bachchon ko de khud koi saadhu aadi ke sang mein jaakar rehte hain। aajkal to tamopradhaan hain to marne tak bhi dhandhe aadi ko chhodte nahin hain। aage 60 varsha mein vaanaprastha avastha mein chale jaate the। banaaras mein jaakar rehte the। yeh to bachchon ne samjha hai vaapis koi ja na sake। sadgati ko pa nahin sakte।

baap hi mukti-jeevanmukti daata hai। woh bhi sab jeevanmukti ko nahin paate। koi to mukti mein chale jaate hain। ab aadi sanaatan devi-devta dharma ki sthaapna ho rahi hai, phir jo jitna purushaartha kare। unmein bhi kumaariyon ko achha chance hai। paarlaukik baap ki vaaris ban jaati hain। yahaan to sab bachche baap se varsa lene ke hakdaar hain। vahaan to bachchiyon ko varsa nahin milta। bachchon ko laalach rehti hai। bhal aise bhi hain jo samajhte hain ki ye bhi varsa milega, vo bhi leven, unko kyon chhoden। donon taraph padhte hain। aise kisam-kisam ke hain। ab yeh to samajhte hain achha jo padhte hain woh oonch pad pa lete hain। praja mein bahut saahookaar ban jaate hain। yahaan rahne vaalon ko andar hi rehna padta hai। daas daasiyaan ban jaate hain। phir treta ke ant mein 3-4-5 janma karke raajaai pad milega, unse to woh saahookaar achhe hain jo satayug se lekar unhon ki saahookaari kaayam rehti hai। grihastha vyavhaar mein rahkar saahookaari pad kyon nahin lena chaahiye। koshish karte hain ham raajaai pad paayen। parantu agar khisak padte hain to praja mein achha pad paane ka purushaartha karna chaahiye। woh bhi to oonch pad hua na। yahaan rahne vaalon se baahar rahne vaale bahut ooncha pad pa sakte hain। saara madaar purushaartha par hai। purushaartha kabhi chhip nahin sakta। praja mein jo bade te bada saahookaar banega, woh bhi chhipa nahin rahega। aise nahin ki baahar vaalon ko koi kam pad milta hai। pichhaadi mein raajaai pad paana achha va praja mein shuru se lekar oonch pad paana achha? grihastha vyavhaar mein rahne vaalon ko itne maaya ke toofaan nahin aate hain। yahaan vaalon ko toofaan bahut aate hain। himmat karte hain ham shivbaaba ki sharan mein baithe hain parantu sangadosh mein padhte nahin hain। pichhaadi mein sab maaloom pad jaata hai। saakshaatkaar hoga, kaun kya pad paayenge। nambarvaar padhte hain na। koi to centres ko aapehi chalaate hain। kahaan to centre chalaane vaale se bhi padhne vaale teekhe ho jaate hain। saara purushaartha par hai। aise nahin ki maaya ke toofaan aate hain। nahin। apni chalan theek nahin hai। shreemat par nahin chalte hain। laukik mein bhi aisa hota hai। teacher va maa baap ki mat par nahin chalte। tum to aise baap ke bachche bane ho jinko koi baap hi nahin। vahaan to baahar mein bahut jaana padta hai। kai bachche sangadosh mein phans padte hain to naapaas ho jaate hain। aise kyon kahenge maaya ke toofaan aate hain। yeh apni moorkhata hai। direction par nahin chalte hain। aisi chalan se naapaas ho jaate hain। bahuton ko laalach rehti hai, koi mein krodh, koi mein chori ki aadat, aakhreen mein maaloom to pad jaata hai। phalaane-phalaane aisi-aisi chalan ke kaaran chale gaye। samjha jaata hai shoodra kul ke ban gaye। unko phir brahman nahin kahenge। phir jaakar shudra ban gaye। padhaai chhod di। thoda bhi gyaan suna to praja mein aa jaayenge। bada jhaad hai। kahaan-kahaan se nikal aayenge। devi devta dharma ke aur dharma mein convert ho gaye honge woh nikal aayenge। bahut aayenge to sab wonder khaayenge। aur dharma vaale bhi mukti ka varsa to le sakte hain na। yahaan koi bhi aa sakte hain। apne gharaane mein oonch pad paana hoga to woh bhi aakar lakshya lekar jaayenge। baba ne tumko saakshaatkaar karaaya tha ki woh bhi aakar lakshya lekar jaate hain। aise nahin ki yahaan rahkar hi lakshya mein rah sakenge। koi bhi dharma vaala lakshya le sakta hai। lakshya milta hai - baap ko yaad karo। shantidham ko yaad karo to apne dharma mein oonch pad pa lenge। unko jeevanmukti to milni nahin hai, na vahaan aayenge। dil lagegi nahin। sachchi dil unhon ki lagti hai jo yahaan ke hain। pichhaadi mein aatmaayen apne baap ko to jaan jaayen। bahut centres par aise bhi hain jinka padhaai par attention nahin hai। to samjha jaata hai oonch pad nahin pa sakenge। nishchay ho to yeh nahin kah sakte ki phursat nahin hain। parantu takdeer mein nahin hai to kehte hain phursat nahin hai, yeh kaam hai। takdeer mein hoga to din raat purushaartha karne lag padenge। chalte-chalte sang mein bhi kharaab ho padte hain। usko grahchaari bhi kah sakte hain। brahaspati ki dasha badal kar mangal ki dasha ho padti hai। shaayad aage chalkar utar jaaye। koi ke liye baba kehte hain raahu ki dasha baithi hai। bhagwan ka bhi nahin maante hain। samajhte hain yeh brahma kehte hain। bachchon ko yeh nahin pata padta hai ki kaun hai jo direction dete hain। deh-abhimaan hone ke kaaran saakaar ke liye samajh lete hain। dehi-abhimaani ho to samjhen ki shivbaaba jo bhi kehte hain woh humein karna hai। responsibility shivbaaba par hai। shivbaaba ki mat par to chalna chaahiye na। deh-abhimaan mein aane se shivbaaba ko bhool jaate hain phir shivbaaba responsible nahin rah sakta। unka order to sir par dhaaran karna chaahiye। parantu samajhte nahin ki kaun samjhaate hain। so bhi aur to koi order nahin karte sirf baap kehte hain main tumko shreemat deta hoon। ek to mujhe yaad karo aur jo gyaan main sunaata hoon woh dhaaran karo aur karaao। bas yahi dhandha karo। achha baba jo hukm। raajaaon ke aage jo rehte hain woh aise kehte hain - “jo hukm''। woh raajaayen hukm karte the। yeh shivbaaba ka hukm hai। ghadi-ghadi kehna chaahiye - “jo hukm shivbaaba''। to tumko khushi bhi rahegi। samjhenge shivbaaba hukm dete hain। yaad rahegi shivbaaba ki to buddhi ka taala khul jaayega। shivbaaba kehte hain yeh practice pad jaani chaahiye to beda paar ho jaae। parantu yahi difficulty hai। ghadi-ghadi bhool jaate hain। aise kyon kehna chaahiye ki maaya bhulaati hai। ham bhool jaate hain isliye ulte kaam hote rehte hain।

bahut bachchiyaan hain, gyaan to bahut achha deti hain parantu yog nahin, jisse vikarma vinaash hon। aise bahut achhe-achhe bachche hain, yog bilkul nahin hai। chalan se samjha jaata hai - yog mein nahin rehte hain phir paap rah jaate hain jo bhogne padte hain। ismen toofaan ki to baat hi nahin। samjho yeh meri bhool hai, main shreemat par chalta nahin hoon। yahaan tum aaye ho raajayog seekhne। praja yog nahin sikhaaya jaata hai। maat-pita to hai hi। unko follow karo to tum bhi gaddi nasheen banenge। inka to certain hai na। yeh shri lakshmi-naaraayan bante hain to follow mother father। aur dharma vaale mother father ko follow nahin karte hain। woh to father ko hi maante hain। yahaan to donon hain। god to hai creator। mother ka phir gupta raaz hai। maa baap padhaate rehte hain। samjhaate hain aise nahin karo, yeh karo। teacher koi bhi saja denge to school ke beech mein denge na। aise thode hi bachcha kahega ki meri ijjat lete ho। baap 5-6 bachchon ke aage thappad maarega। to aise bachcha thode hi kahega ki 5-6 ke aage kyon lagaaya। nahin। yahaan to bachchon ko shiksha di jaati hai phir bhi nahin chal sakte hain to achha grihastha vyavhaar mein rehte phir purushaartha karo। agar yahaan baithe disservice ki to jo kuchh bhi thoda hoga woh bhi khatma ho jaayega। nahin padhna hai to chhod do। bas ham chal nahin sakte। glaani kyon karni chaahiye। dher bachche hain। koi padhenge koi chhod denge। har ek ko apni padhaai mein masta rehna chaahiye।

baap kehte hain ek do se seva mat lo। koi ahankaar nahin aana chaahiye। doosre se seva lena yeh bhi deh ahankaar hai। baba ko samjhaana to pade na। nahin to jab tribunal baithegi tab kahenge - hamko pata thode hi tha kaayde kaanoon ka isliye baap samjha dete hain phir saakshaatkaar karaae saza denge। bigar proof saja thode hi mil sakti hai। achha samjhaate to bahut hain kalpa pahle muaaphik। har ek ki takdeer dekhi jaati hai। kai service kar apni jeevan heere jaisi banaate hain, kai hain jo takdeer ko lakeer laga dete hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap teacher satguru dvaara jo shikshaayen milti hain un par chalna hai। maaya ko dosh na dekar apni kamiyon ki jaanch kar unhein nikaalna hai।

2) ahankaar ka tyaag kar apni padhaai mein masta rehna hai। kabhi doosron se seva nahin leni hai। sangadosh se bahut-bahut sambhaal karni hai।

vardaan:- sankalp ke ishaaron se saari kaarobaar chalaane vaale sada light ke taajdhaari bhav

jo bachche sada light rehte hain unka sankalp va samay kabhi vyartha nahin jaata। vahi sankalp uthta hai jo hone vaala hai। jaise bolne se baat ko spashta karte hain vaise hi sankalp se saari kaarobaar chalti hai। jab aisi vidhi apnaao tab yeh saakaar vatan sookshm vatan banen। iske liye silence ki shakti jama karo aur light ke taajdhaari raho।

slogan:- is duhkhadhaam se kinaara kar lo to kabhi duhkh ki lahar aa nahin sakti।

ye avyakt ishaare- “nishchay ke foundation ko majboot kar sada nirbhay aur nishchint raho"

jaise kaar mein battery jab thoda dheeli ho jaati hai, kaar apne aap nahin chalti hai to doosron se thoda dhakka lagvaate hain, aise jis bhi aatma mein aapka faith ho aur samjho inse hamko madad mil sakti hai to unse thoda-sa sahayog lekar aage badh jaana chaahiye। kamjori ki baat ko jyaada nahin sochna tab khushi mein aage badhte jaayenge।