Murli du jour du vendredi 8 mai 2026

08-05-2026 praatahmurli om shanti "baapdaada"' madhuban

“meethe bachche - abhi tum shoodra gharaane se nikal brahman gharaane mein aaye ho, baap ne brahma mukh se tumhein adopt kiya hai - to isi khushi mein raho''

prashn:- kaun sa guhya raaz, brahman kul vaale bachche hi samajh sakte hain?

uttar:- niraakaar shivbaaba hamaara pita hai aur yeh brahma hamaari maata hai। niraakaar bhagwan kaise maat-pita, bandhu-sakha bante hain, yeh guhya gupta raaz brahman kul ke bachche hi samajh sakte hain। usmein bhi jo daivi kul mein oonch pad paane vaale hain vahi yeh raaz yathaartha reeti samjhenge।

om shanti। bachche baithe hain - samajh rahe hain ki hamaara baapdaada aaya hua hai। baap to ikattha ho jaata hai daada ke saath, to kahenge baapdaada aaye hain। woh teacher bhi hai। baap, daada ke bigar to kuchh bata na sake। buddhi chalni chaahiye kyonki yeh nai baat hai na। agyaan kaal mein yaad karte hain single ko। kahenge hamaara guru phalaani jagah hai। unke shareer ka naam jaante hain। hamaara baba, hamaari maa phalaani jagah hai। unka naam roop sab kuchh hai। manushyon ne phir short mein likh diya hai। manushyon ne jo banaaya hai, unmein kuchh na kuchh wrong hai। bhal gaayan hai tvamev maataashcha pita… yeh ek ke liye hi gaaya jaata hai। brahma ke liye bhi nahin gaaya jaata hai। unka naam roop buddhi mein nahin aata। na vishnu ka, na shankar ka। gaate to hain tum maat-pita ham baalak tere। to bhi buddhi oopar mein jaayegi। shreekrishna ko yaad koi kar na sake। yaad phir bhi niraakaar ko hi karenge, unki mahima hai। to baap samjhaate hain - yahaan jab baithte ho to laukik sambandh se buddhiyog nikaal, paarlaukik baap ko yaad karo। is samay yeh sammukh hai। bhakti maarga mein jo gaate hain to aankhen oopar karke kehte hain - tum maat-pita.... he bhagwan kah yaad karte hain। bhagwan jab kehte hain to shivling ko bhi yaad nahin karte। tote misal aise hi gaate hain। lakshmi-naaraayan ke liye bhi aise nahin kah sakte, yeh to mahaaraaja-mahaaraani hain। unka bachcha hi maat-pita kahenge, bandhu nahin kahenge। bhakta log gaate hain patit-paavan, parantu yeh buddhi mein nahin aata ki shivling hoga, aise hi sirf kah dete hain - he bhagwan! he bhagwan kisne kaha, kisko kaha? kuchh bhi pata nahin। agar yeh gyaan hota main aatma hoon, unko bulaata hoon to yeh samjhen ki woh niraakaar paramatma hai। unka roop hi ling hai। yathaartha reeti koi baap ko yaad nahin karte। unse praapti kya hogi, kab hogi - yeh kuchh bhi nahin jaante। tum bhi nahin jaante the। abhi to baap ke bane ho। tum jaante ho hamko shivbaaba ne brahma dvaara apna bachcha banaaya hai। yeh brahma maa hai। is brahma maata dvaara shivbaaba ne adopt kiya hai। is samay tum achhi reeti jaante ho। ham shivbaaba ke bachche hain। saakaar mein phir prajaapita brahma ke bachche hain। prajaapita brahma dvaara manushya srishti rachte hain। aise nahin ki koi nai srishti rachte hain? nahin, is samay aakar god mein lete hain, adopt karte hain। ab maat-pita kehte hain to shiv pita thahra aur maata brahma thahri। unko kaha jaata hai maat-pita। baap brahma dvaara kehte hain tum aatmaayen mere bachche ho। phir aatma ko baith pahchaan dete hain ki aatma kya hai? kehte bhi hain bhrakuti ke beech mein rehti hai, star misal hai aur kuchh bhi nahin jaante। yeh kah na saken ki aatma 84 janma bhogti hai। aatma shareer dvaara part bajaati hai। bhinna-bhinna naam, roop, desh, kaal se aatma ek shareer chhodti hai to saara parivaar hi badal jaata hai। koi adopt karte hain to parivaar hi badal jaata hai। maat-pita jisse janma liya, unko bhi jaante hain। phir jo adopt karte hain unke ghar ka ban jaate hain। yahaan tum shoodra gharaane se nikal ab brahman gharaane mein aaye ho। brahma tan se tumko adopt kiya। tum to brahman kul mein aa gaye। yeh baaten shaastron mein nahin likhi ja sakti, yeh samjhaaya jaata hai। likhne se koi samajhte nahin।

abhi tum bachche hi jaante ho - ham parampita paramatma ki santaan bane hain। yeh ho gai maa। brahma ko prajaapita hi kehte hain। is dvaara tum bachchon ko adopt karta hoon - yeh kitni gupta baaten hain। sivaae sammukh ke koi samajh na saken। samjhenge bhi woh jo is brahman kul ke honge। daivi kul mein oonch pad paane vaale honge। naye kiski buddhi mein yeh baaten baithengi nahin। na buddhi mein baithega, na kisko samjha sakenge। tumhaare mein bhi nambarvaar purushaartha anusaar hain, jinki buddhi mein baithta hai। gaaya jaata hai tvamev maataashcha pita... yaad kiya jaata hai shivbaaba ko। phir kehte hain tum maat-pita। ek baap phir maat-pita kaise? yeh baaten aur koi samjha na sake। jaise shaastron mein vyaas ne jo likha hai woh manushyon ne kantha kar liya hai vaise tumko bhi kahenge, tumko koi ne bataaya hai, tumne kantha kar diya hai। naye manushya ke liye samajhna bada mushkil hai। yahaan rahne vaale bhi koi kisko itna bhi samjha nahin sakte। tum aatma ho - tumhaara baap parampita paramatma hai। woh behad ka baap hi behad ka varsa dete hain। varsa diya tha phir punarjanma lete-lete 84 janma poore hue, ab baap phir varsa dene aaye hain। yeh kisko samjhaana kitna sahaj hai। tum maat-pita kisko kaha jaata hai - vichaar ki baat hai na। brahma dvaara adopt karte hain phir maa bhi zaroor chaahiye। to jo ananya bachchi hoti hai, drama plan anusaar unko jagat-amba ka title diya jaata hai। mel ko jagat-amba nahin kah sakte, inko jagatpita kahenge। inka prajaapita naam mashhoor hai। achha praja maata kahaan? to adopt kiya jaata hai maata ko। aadi dev to hai phir aadi devi ko mukrar kiya jaata hai। jagat-amba to ek hi hai - unki hi mahima hai। jagat-amba par kitna mela lagta hai। parantu unke occupation ko koi nahin jaante। kalkatte mein kaali ka mandir hai। baambe mein bhi jagat amba ka mandir hai। shakla alag-alag hai। jagat-amba hai kaun? yeh koi nahin jaante। unko bhi bhagavti kehte hain। ab jagat-amba ko bhagavti nahin kah sakte। woh to braahmani hai, gyaan-gyaaneshvari hai, unko baap se gyaan mila hai। tum sab jagat-amba ke bachche ho। gyaan sunkar phir sunaate ho। tumhaara dhandha hi yeh hua। tumko eeshvar padhaate hain, koi manushya nahin padhaate hain। yeh brahma bhi to manushya hai। manushya koi ko bhi paavan bana nahin sakte। manushyon ki buddhi itni dull ho gai hai jo kuchh bhi samajhte nahin hain। patit-paavan to ek hi baap hai। woh aate hi hain, patiton ko paavan banaane। yeh saari duniya tamopradhaan hai, sab patit hain। nai duniya paavan, puraani duniya patit। puraani duniya mein hain narkavaasi। nai duniya mein hain svargavaasi। buddhi bhi kehti hai satayug mein sirf bhaaratvaasi devi-devtaayen honge aur koi nahin the। abhi tum bachchon ko yeh gyaan mila hai। nai duniya mein pahle sooryavanshi devta the phir chandravanshi hue, to sooryavanshi past ho gaye। chandravanshi ke baad phir vaishya vanshi... aate hain barobar lakshmi-naaraayan ka raajya tha। achha unke aage kya tha। yeh koi samajh na saken। tum bachchon ko baap ne chakra ka raaz samjhaaya hai। dvaapar mein hain vaishya vanshi। kaliyug mein hote hain shoodra vanshi।

abhi tum jaante ho - ham brahman bane hain। tumko baap ne apna banaaya hai arthaat shoodra dharma se devta dharma mein transfer kiya hai। ab sooryavanshi, chandravanshi to hain nahin। na lakshmi-naaraayan ka raajya hai, na raamraajya hai। ab hai kaliyug ka ant। kaliyug ke baad zaroor satayug aayega। kaliyug mein yeh puraani, patit duniya hai, mahaan duhkhi hain isliye devtaaon ki jaakar mahima gaate hain, maatha tekte hain। achha lakshmi-naaraayan ko yeh raajya kisne diya? koi hai jo bata sake। koi ke bhi khyaal mein nahin hoga kyonki buddhi mein hai kaliyug abhi bachcha hai। 40 hajaar varsha pade hain isliye yeh khyaal aate hi nahin। abhi tumko yeh khyaal aata hai। kai bachche kehte hain humein yaad nahin rehti। kyon nahin rehti? kyonki savere-savere uthkar yaad mein baithkar dhaarna nahin karte। samajhte bhi hain phir kisko samjha nahin sakte। yeh to zaroor hoga। sab ekras to samajhdaar ban na saken। samajhdaar bhi chaahiye, besmajh bhi chaahiye। bahut samajhdaar to jaakar raaja-raani banenge। jitna-jitna jo jaasti samajhte aur samjhaate hain unka naam baala hota hai। pradarshaniyaan hoti hain to likhte hain baba phalaani ko bhej do। to kya tum nahin samjha sakte ho? baba unki practice jaasti hai। ham thode kachche hain। baba khud bhi kehte hain - kahaan se bhi nimantran milta hai to likhkar bhejo, kaun-kaun hain, to ham dekhenge kis-kisko bhejna chaahiye। sannyaasi bhi us nimantran par hain kya? phir bahut achhi brahmaakumaari ko bhejna hoga। achha kumaarka hai, manohar hai, gange hai - ismen se kisi ko bhej do। bachche to dher hain। jagdeesh ko bhej do, ramesh ko bhej do। tum bhi samajhte ho, ek do se hoshiyaar hain। jaise judge magistrate hote hain। ek do se hoshiyaar hote hain। government jaanti hai, ek do se hoshiyaar hain। tab to case ek do se oopar jaate hain phir haaeekorta mein jaao phir unse oopar। usne bhi judgement theek na di to phir usse oopar jaayenge। inke oopar tum raham karo। ab yeh sab baaten yahaan hoti hain। satayug, treta mein hoti nahin। phir dvaapar mein raaja-raani ka raajya hota hai। vahaan to mahaaraaja-mahaaraani hi case sambhaalte hain। case honge bhi thode। abhi to tamopradhaan patit hain na। to baadshaah ke paas case jaayega to thodi saza de dete hain। kadi bhool hogi to kadi saza denge। yahaan to kitne judge vakeel dher hain। itna kaarobaar mein farka hai, satayug mein kya hota hai, yeh kisko pata nahin। ab baap ne samjhaaya hai - koi se bhi poochho, in lakshmi-naaraayan ko jaante ho? jaise birla hai, bahut mandir banaate rehte hain to koi achha bachcha ho, unko chitthi likhe। tum lakshmi-naaraayan ke mandir to bahut banvaate ho। inhon ko yeh raajdhaani kaise mili, jabki satayug se pahle kaliyug tha? kaliyug mein to kuchh hai nahin। devtaaon ne to koi se ladaai ki nahin hogi। ladaai se koi vishwa ke maalik ban nahin sakte। vishwa ke maalik jo the unhon ke yeh lakshmi-naaraayan ke chitra rakhe hue hain। abhi to hai kaliyug। yahaan ladaai chalti hai hathiyaaron ki। baap ne samjhaaya hai Christian dharma vaale hi aapas mein mil jaaen, aapas mein preet rakhen to vishwa ke maalik ban sakte hain। parantu vishwa ke maalik to lakshmi-naaraayan hi bante hain। buddhi kehti hai yeh aapas mein mil jaaen - to maalik ban sakte hain parantu satayug mein king-queen to koi ban na saken। drama hi aisa bana hua hai। abhi ham phir se yogbal se svarga ka varsa le rahe hain। tum bata sakte ho - kalpa pahle bhi sangam par baap se pad paaya hai। 84 janma poore hue phir se varsa le rahe hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svayan mein dhaarna karne aur doosron ko karaane ke liye - savere-savere uthkar baap ki yaad mein baithna hai। jo samjha hai use doosron ko samjhaane ki practice karni hai।

2) laukik sambandhon se buddhi yog nikaal ek paarlaukik baap ko yaad karna hai। baap se jo gyaan mila hai, woh sunkar sabko sunaana hai। yahi tumhaara dhandha hai।

vardaan:- samaane ki shakti dvaara ekmat ka vaataavran banaane vaale drishtaanta roop bhav

jo ek jaise manke hain, ek ki hi lagan aur ekras sthiti mein sthit, ek ki mat par chalne vaale hain, aapas mein sankalpon mein bhi ekmat hain, vahi maala mein piroye jaate hain। lekin ekmat ka vaataavran tab banega jab samaane ki shakti hogi। yadi koi baat mein bhinnata ho jaati hai to us bhinnata ko samaao tab aapas mein ekta se sameep aayenge aur sabke aage drishtaanta roop banenge।

slogan:- har sankalp, vaani aur karma mein roohaaniyat dhaaran karo tab service mein raunak aayegi।

ye avyakt ishaare - sada achal, adol, ekras sthiti ka anubhav karo

koi bhi dardanaak scene dekhte hue nothing new, jinhen yeh nothing new ka paath pakka hai woh ghabra nahin sakte। kya hua, kaise hua, yeh hua... samaachaar sunte, dekhte bhi drama ki bani hui bhaavi ko shaktishaali ban dekhte aur auron ko bhi shakti dete chalo। duniya vaale ghabraate aur aap ekras sthiti mein rah un aatmaon mein shakti bharte। jo bhi samparka mein aaye, use shaktiyon ka, shanti ka daan dete chalo।