Murli du jour du samedi 9 mai 2026

09-05-2026 praatahmurli om shanti "baapdaada"' madhuban

“meethe bachche - tum yahaan aaye ho self realise karne, tum apne ko aatma samajh paramatma baap se suno, dehi-abhimaani rahne ka abhyaas karo''

prashn:- kai baar bachchon se koi-koi poochhte hain ki tumne aatma ka saakshaatkaar kiya hai, to tum unhein kaun sa uttar do?

uttar:- bolo haan, hamne aatma ka saakshaatkaar kiya hai। aatma jyotibindu hai। aatma mein hi achhe va bure sanskaar hain। aatma ki saari knowledge abhi humein mili hai। jab tak aatma ka saakshaatkaar nahin kiya tha tab tak deh-abhimaani the। abhi humein paramatma dvaara god realisation aur self realisation hua hai।

geet:- na woh hamse juda honge…

om shanti। meethe-meethe roohaani bachchon ne yeh geet suna। roohaani bachche kehte hain shareer dvaara। aise koi kabhi nahin kahenge ki ham mar mitenge saadhu-santon ke oopar। bachche jaante hain - hamko unke saath jaana hai, yeh shareer chhod dena hai isliye kehte hain, yeh shareer chhodkarke ham chale jaayenge baap ke saath। baap aaye hi hain saath le jaane। yeh bahut samajh ki baat hai। bachche bulaate hain, ham patiton ko aakar paavan banaao, phir kya karoon। yahaan to nahin chhod jaayenge। yeh saari duniya patit hai is patit duniya se paavan duniya mein le jaane ke liye baap aaye hain। ham aatmaon ko saath le jaayenge। yeh saari duniya vicious hai - yeh bhi tum jaante ho। tum kisko vikaari, patit kahenge to bhi bigad padenge। manushyon ko samjhaana bada yukti se hai। mahima karni hai ek baap ki। abhi tum bachchon ko knowledge mili hai, badi samajh se baat karni hai। kahaan dekhte ho, prashn-uttar karte hain to bolo ham abhi kachche hain, badi behen aakar respond dengi।

tum kehte ho, shivbaaba samjhaate hain, bhagvaanuvaach - manushya sab patit hain। patit to bhagwan ho nahin sakta। patit-paavan ko bulaate hain kyonki patit hain। dehdhaariyon ko bhagwan nahin kah sakte। bhagwan niraakaar shiv ko kaha jaata hai, shiv ke mandir bhi bahut hain। pahle-pahle jab ek baat ko samajh leven tab thahar sakenge। pahle-pahle bataao ki shiv bhagvaanuvaach - shiv baba kehte hain ki maamekam yaad karo। unko apna shareer hai nahin। brahma-vishnu-shankar ko bhi apna sookshm shareer hai। dekhne mein aata hai। yeh to dekhne mein nahin aata hai। unko kaha hi jaata hai - parampita paramatma। tum bhi kahenge ham aatma ek shareer chhod doosra leta hoon। tumne apni aatma ka saakshaatkaar kiya hai। bhakti maarga mein saakshaatkaar ke liye naudha bhakti karte hain। parantu bhakti karne vaalon ne kab saakshaatkaar nahin kiya hai। woh kya cheez hai, yeh bilkul nahin jaante hain। sirf kehte hain - woh niraakaar hai। baatcheet to aatma karti hai। sanskaar bhi aatma mein rehte hain। aatma nikal jaati hai to na aatma, na shareer baat kar sakte hain। aatma bigar shareer kuchh kar na sake। pahle to aatma ko pahchaanna hai aur baap dvaara hi baap ko pahchaan sakenge। aatma ko parampita paramatma ka saakshaatkaar kaise ho sakta hai - jabki apne ko hi nahin jaan, dekh sakti। bhal kehte hain “chamakta hai azab sitaara'' parantu yeh kisko pata nahi hai ki aatma mein 84 janmon ka part noondha hua hai। manushya bilkul deh-abhimaani rehte hain। ab baap kehte hain dehi-abhimaani bano। apne ko aatma samajh phir mere dvaara suno। sunne vaali aatma hai, aatma ko sunaane vaala paramatma chaahiye। manushya ko samjhaane vaala manushya hi hoga। yeh aatma ka gyaan kisko hai nahin isliye kaha jaata hai pahle aatma ko jaano। self realise karo। aatma khud hi kehti hai - aatma ko ham realise kaise karen। yeh thode hi kisko pata hai, hamaari aatma mein kaise saara part bhara hua hai। saadhu-sannyaasi aadi koi bata na saken। baap ko hi aakar bachchon ko self realise karaana padta hai। baap kehte hain - apne ko aatma samajh mujh niraakaar parampita paramatma se suno। aatma aur paramatma jab milen tab yeh baaten hon। duniya ko yeh pata hi nahin hai ki parampita paramatma kab aayenge। kaise aakar samjhaayenge? na jaanne ke kaaran matbhed mein aa jaate hain। un sabka madaar hai shaastron par। baap kehte hain - unse na tum mujhe realise kar sakenge, na apne ko realise kar sakenge। woh to kah dete aatma so paramatma। aise kahne se kya hota। hamko patit se paavan kaun banaayenge? trikaaldarshi kaun banaayenge? koi bhi aatma aur paramatma ka gyaan to de nahin sakte isliye tum kehte ho jo aatmaayen apne baap ko nahin jaanti hain, woh naastik hain। vo phir kah dete ki jo bhakti nahin karte, woh naastik hain। ab tum bachche bhakti to karte nahin ho। tumhaare paas chitra bahut achhe hain। chitron par hi samjhaaya jaata hai। koi ne world ke nakshe dekhe hi nahin honge to unko kya pata - London kahaan hai? America kahaan hai? jab tak teacher baith map par samjhaaye isliye tumne yeh chitra banaaye hain parantu detail mein koi samajh nahin sakte। sooryavanshiyon ne yeh raajdhaani kahaan se li? phir chandravanshiyon ne kaise li? kya sooryavanshi se ladaai ki? tum samajhte ho sabko varsa ek baap se milta hai। sooryavanshi, chandravanshi to vishwa ke maalik hain। doosra koi dharma hi nahin hota hai to ladaai ki baat hi nahin। abhi tum samajhte ho, ham vishwa ke maalik bante hain। aise nahin ki sooryavanshiyon se chandravanshiyon ne jeeta va yuddha chali। nahin, alag-alag gharaana hota hai।

ab tumhaari buddhi mein yeh chitron ki saari knowledge hai। school mein bhi student padhte hain to buddhi mein saari knowledge aa jaati hai। chhote bachchon ko kitaab mein dikhaaya jaata hai - yeh haathi hai, yeh phalaana hai। ab tum is drama ko jaan gaye ho। yeh saara chakra buddhi mein hai। yeh hain saari nai baaten aur in baaton ko brahman kul hi samjhenge। doosre to baith phaaltu debate karenge। aise bhi nahin sabko ikattha samjhaaya ja sakta hai। nahin, alag-alag samjhaana hota hai। kaayda bhi hai pahle baap ko, aatma ko samjhen phir class mein baithen to samjhenge, nahin to samajh hi nahin sakenge। sanshay uthaate hi rahenge। tumko samjhaana hai bhagwan ek hi hai - woh oonch te oonch hai। devtaaon ko bhi bhagwan nahin kah sakte। aatma ka bhi gyaan ab tumko mila hai। karma ka phal aatma hi bhogti hai। sanskaar aatma mein hi rehte hain। aatma sunti hai in organs dvaara। bhagwan baap ek hai, varsa unse milta hai। baba ne samjhaaya hai - tum apne ko aatma nishchay karo aur baap se buddhiyog lagaao। janma-janmaantar bhakti karte aaye ho। hanoomaan ke bhi pujaari honge to hanoomaan ko yaad karenge va shreekrishna ke pujaari honge to shreekrishna ko yaad karenge। abhi tumko samjhaaya jaata hai - tum aatma ho। tumhaara parampita paramatma hai। unko yaad karne se hi baap ka varsa milega, jo baap hai svarga ka rachayita, to zaroor ham svarga mein hone chaahiye। bhaarat svarga tha। abhi to svarga hai nahin, jo raajaai ho। narka mein to raavan ki raajaai hai। hamaari raajdhaani kaise chali phir neeche utre, kuchh bhi nahin jaante। abhi tum jaante ho punarjanma lete-lete hamko neeche utarna hi hai। ab phir baap kehte hain, mujhe yaad karo to tum paavan banenge। svarga ka varsa milega। ham baap ke bante hain to baap ka varsa milta hai। parantu jab tak tamopradhaan se satopradhaan na banen, yog se paavan na banen tab tak varsa mil na sake। baap kehte hain, mujhe yaad karne se tumhaare vikarma vinaash honge, vikarmaajeet banenge, yeh guarantee hai। samjhaani deni padti hai। koi samjhenge, koi tej buddhi vaale hote to shor machaane lagte hain। koi na koi vighna daalne vaale nikal padte hain। koi hangaama kare to bolna chaahiye - ekaanta mein aakar samjho। yahaan ka kaayda hai - 7 roz bhatthi mein rahkar samajhna kyonki yeh gyaan naya hone ke kaaran manushya moonjhate hain। koi bhi pahle naya centre khulta hai to usmein hoshiyaar hone chaahiye jo sabko samjha saken। bhagwan to sabka ek hai, sab aatmaayen bhaai-bhaai hain। paramatma sabka baap hai। pukaarte hain patit-paavan aao to zaroor woh paavan hai, woh kabhi patit hote nahin। baap hi aakar patiton ko paavan banaayenge। satayug mein sab hain paavan। kaliyug mein sab hain - patit। patit bahut hote hain, paavan thode hote hain। satayug mein sab to nahin jaayenge। jo patit se paavan bante hain, vahi paavan duniya mein jaate hain। baaki sab nirvaan duniya mein chale jaayenge। yeh bhi jaante hain, saari duniya aakar mat nahin legi। yeh mushkil hai jo tum saari duniya ko mat do। abhi sabki kayaamat ka samay hai। vinaash sabka hona hai। samjhaane ki badi yukti chaahiye। jo shanti se baith sunen, disturbance na karen। pahle-pahle to baap ka parichay dena hai। shivbaaba hi patit-paavan thahra, vahi samjhaate hain। geeta mein bhi akshar mashhoor hain। patit-paavan baap hi kehte hain ki mujhe yaad karo to tumhaare vikarma vinaash honge। geeta se hi yeh akshar tailuk rakhte hain। shivbaaba ne kaha hai - mujhe yaad karo। main sarvashaktimaan, patit-paavan hoon। geeta gyaan daata, gyaan ka saagar hoon। geeta ke akshar to hain na। sirf woh kehte hain shreekrishna bhagvaanuvaach, tum kehte ho shiv bhagvaanuvaach। bhagwan niraakaar hai, woh kabhi punarjanma mein nahin aate hain, alaukik divya janma lete hain। khud hi samjhaate hain - main saadhaaran boodhe tan mein aata hoon, jisko hi bhaageerath kehte hain। brahma dvaara hi rachna rachte hain। to manushya ka naam brahma rakha jaata hai। vyakta brahma se phir paavan avyakt pharishta ban jaate hain। baap aate hi hain - patiton ko paavan banaane। to zaroor phir patit duniya patit shareer mein aayenge। yeh hai detail ki samjhaani। pahle to samjhaana chaahiye - bhagwan kehte hain ki kalpa pahle muaaphik mujhe yaad karo to tumhaare vikarma vinaash honge, patit se paavan bano। gaate bhi hain, he patit-paavan aao। ganga to hai hi। tum pukaarte ho to zaroor kahaan se aayenge। patit-paavan aate hain patit se paavan banaane ka part bajaane। baap kehte hain, tum paavan the phir tumhaare mein khaad padi hai, woh yogbal se hi niklegi। tum pavitra ban jaayenge phir paavan duniya mein hi aayenge। patit duniya ka vinaash ho jaayega। jo samjhaaya jaata hai use achhi reeti se dhaaran karna hai। ham to sirf oonch te oonch baap ki mahima karte hain। behad ka baap samjhaate hain tum 84 janmon ka part bajaate-bajaate kitne patit bane ho। pahle paavan the, ab patit bane ho phir yaad ki yaatra par rahne se tum paavan ban jaayenge। bhakti maarga se tum seedhi neeche utarte hi aaye ho। yeh to bilkul hi sahaj baat hai। yeh to bachchon ki buddhi mein baithna chaahiye। savere uthkar vichaar saagar manthan karna chaahiye phir jo bhi aaye unko samjhaana hai। murli ki mukhya points note kar deni chaahiye phir repeat karni chaahiye। to dil par pakka ho jaae।

pahli-pahli mukhya baat hai baap ko yaad karna। baap hi kehte hain manamnaabhav, mujhe yaad karo to vikarma vinaash honge। ab karo na karo tumhaari marji। baap ka pharmaan to mila hua hai। paavan duniya mein chalna hai to phir patit duniya mein buddhi ka yog nahin jaana chaahiye। vikaar mein nahin jaana hai। samjhaani to bahut milti rehti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) savere-savere uthkar vichaar saagar manthan karna hai। baap jo sunaate hain use note kar repeat karna hai, doosron ko sunaana hai। sabko pahle-pahle baap ka hi parichay dena hai।

2) paavan duniya mein chalne ke liye is patit duniya se buddhiyog nikaal dena hai।

vardaan:- number one businessman ban ek ek second va sankalp mein kamaai jama karne vaale padmapti bhav

number one businessman woh hai jo svayan ko busy rakhne ka tareeka jaanta hai। businessman arthaat jiska ek sankalp bhi vyartha na jaaye, har sankalp mein kamaai ho। jaise woh businessman ek ek paise ko kaarya mein lagaakar padamguna bana dete hain, aise aap bhi ek ek second va sankalp kamaai karke dikhaao tab padmapti banenge। isse buddhi ka bhatakna band ho jaayega aur vyartha sankalpon ki complain bhi samaapta ho jaayegi।

slogan:- jo mangata hai vo khushi ke khajaane se sampanna nahin ho sakta।

ye avyakt ishaare - sada achal, adol, ekras sthiti ka anubhav karo

sada master sarvashaktivaan ki seat par set rahne vaale hi achal adol rehte hain। baapdaada kehte hain bachche shareer bhi chala jaaye lekin aapki khushi nahin jaaye। paisa to uske aage kuchh bhi nahin hai, jiske paas khushi ka khajaana hai uske aage koi badi baat nahin aur sada sahayogi sevaadhaari bachchon ke saath baapdaada rehte hain isliye ghabraane ki koi baat nahin hai।