Murli du jour du samedi 16 mai 2026

16-05-2026 praatahmurli om shanti "baapdaada"' madhuban

“meethe bachche - sadaiv yaad rakho - bahut gai thodi rahi, ab to ghar chalna hai, is chhi-chhi shareer aur duniya ko bhool jaana hai''

prashn:- kaun sa nasha nirantar rahe to sthiti badi first class hogi?

uttar:- nirantar nasha rahe ki mirooa maut malooka shikaar। ham malook (pharishta) ban apne maashook ke saath ghar jaayenge, baaki sab khalaas hona hai। ab ham is puraani khaal ko chhod nai lenge। yeh gyaan saara din buddhi mein tapakta rahe to apaar khushi rahegi। sthiti first class ban jaayegi।

geet:- yeh kaun aaj aaya…

om shanti। yeh kisne kaha? bachchon ne। ateendriy sukhmay jeevan mein aakar kehte hain - behad ka baap aaya hua hai। kislie? is patit duniya ko badal paavan duniya banaane, paavan duniya kitni badi hogi। patit duniya kitni badi hai, yeh tum bachchon ki buddhi mein aana chaahiye। yahaan kitne karodon manushya hain। inko patit bhrashtaachaari duniya kehte hain। meethe-meethe bachchon ko dil mein aana chaahiye - hamaari nai duniya kitni chhoti hogi। ham kaise raajya karenge। hamaare bhaarat jaisa koi desh ho nahin sakta। yeh koi nahin samajhte - bhaarat svarga tha, us jaisa koi desh ho nahin sakta। tumko yeh samajh mein aata hai, yeh bhaarat to ab koi kaam ka nahin hai। bhaarat svarga tha, ab nahin hai। yeh kisko yaad nahin aata hai, hamaara bhaarat sabse oonch hai, sabse praacheen hai। tum bachchon ki buddhi mein aata hai, so bhi nambarvaar purushaartha anusaar। itni khushi, itna regard rehta hai? behad ka baap aaya hua hai। kalpa-kalpa aate hain, maaya raavan ne jo hamaara raajya-bhaagya chheen liya hai, woh ham aatmaon ko phir se apna raajya-bhaagya baba aakar dete hain। aise nahin ki koi ladaai se chheena gaya hai। nahin। raavan raajya mein hamaari mat bhrashtaachaari ho jaati hai। shreshthaachaari se ham bhrashtaachaari ban jaate hain। duniya dekho kitni badh gai hai, hamaara bhaarat desh kitna chhota tha। svarga mein kitne sukhi rahenge। heere javaahraat ke mahal honge। vahaan raavan hota nahin। tum bachchon ki buddhi mein khushi honi chaahiye, ateendriy sukh rehna chaahiye।

baap kehte hain - dehi-abhimaani bano। deh ka bhaan todne ke liye baba ne kaha tha, 108 chattiyon vaala kapda pahno। bhal bade aadmiyon se, javaahriyon se connection tha, woh nasha toote kaise। dehi-abhimaani banna pade। ham aatma hain, yeh to puraana shareer hai। inko chhod naya first class shareer lena hai। sarpa to ek khaal chhod doosri le lete hain। tum bachchon ki buddhi mein gyaan hai, yeh puraani khaal chhod, ham doosri nai lenge phir doosra shareer milega। yeh to saara gyaan bachchon ki buddhi mein tapakna chaahiye। yeh to chhi-chhi duniya hai, inko dekhte hue bhi buddhi se bhoolna padta hai। ham yaatra par ja rahe hain, hamaari buddhi ka yog ghar taraph ja raha hai। abhyaas to karna pade na। yeh shareer bhi puraana hai, duniya bhi puraani hai। saakshaatkaar kar liya hai, ab yeh deh aur deh ke sab sambandh chhod ghar jaana hai। andar mein khushi hoti hai, abhi hamko vaapis jaana hai। buddhiyog vahaan lagaana hota hai। ek do ko yahi sunaana hai - manamnaabhav। yeh bada jabardasta mantra hai। bhal geeta to bahut padhte hain parantu arth nahin samajhte। jaise aur shaastra padhte hain, aise padh lete hain। yeh kiski buddhi mein nahin aayega। ham bhavishya ke liye raajayog seekh rahe hain। bahut gai, ab baaki thoda hi samay hai। aise-aise apne ko bahlaate, khushi mein aana hai। yeh to sab khalaas hona hai। mirooa maut malooka shikaar। ham malook ban apne maashook ke saath ghar jaayenge। yeh aatmaon ka baap baith shiksha dete hain। hai bhi saadhaaran parantu oonch te oonch hai। baap aaye hain - behad ka varsa dene, kalpa-kalpa aate hain। yeh to chhi-chhi duniya hai। aisi-aisi baaten karni hoti hai। isko kaha jaata hai vichaar saagar manthan। yeh shaastra aadi to janma-janmaantar padhe hain, ham bhaaratvaasiyon ne jitne jap-tap aadi kiye hain utna aur koi ne nahin kiya hai। jo pahle-pahle aaye honge unhonne hi bhakti ki hai aur vahi gyaan-yog mein bhi teekhe jaayenge kyonki unko phir pahle number mein aana hai। dekhte ho, koi-koi to bahut achha purushaartha karte hain।

tum bachche jo is roohaani service mein lage ho, unke liye to bahut achha hai। sachmuch bhatthi mein baithe hain। woh sambandh atoot hua hai aur jo grihastha vyavhaar mein rehte, yeh sunte sunaate hain to puraanon se bhi teekhe ja rahe hain। dekha jaata hai naye aane vaale bahut teekhe jaate hain। tum list nikaalenge to maaloom pad jaayega। pahle-pahle tumhaari maala banaate the phir dekha ki kitne achhe-achhe bachche 3-4 number vaale bhi nikal gaye। ekdam jaae praja mein pade। ab tumhaari yeh student life hai, grihastha vyavhaar mein rehte saath-saath yeh course padhte ho। bahut bachche double course uthaate hain, lift milti hai। tumhaara course hai - grihastha vyavhaar mein rehte yeh padhna। ismen bhi kanyaayen badi teekhi jaani chaahiye। kanyaaon ke kaaran kanhaiya va gopaal naam bhi gaaya hua hai। hain to gop bhi kyonki pravritti maarga hai na। tum satayug mein devi-devta dharma ke the। yeh lakshmi-naaraayan pravritti maarga mein raajya karte the। yeh tumhaari buddhi mein tapakna chaahiye ki ham kya bante hain! devtaayen kitne first class hain! unhon ke aage jaakar mahima gaate hain - aap sarvagun sampanna, 16 kala sampoorn... ham paapi, kapti hain। ham nirgun haare mein koi gun naaheen... ab ismen bhagwan ko taras nahin khaana hai va kripa nahin karni hai। vaastav mein taras va kripa apne oopar hi karni hoti hai। tum hi devta the, ab kya ban gaye ho apne ko dekho, phir purushaartha kar devta bano। shyaam se sundar banne ke liye purushaartha karna padta hai। yeh to bhakti maarga mein kehte hain - marte the phalaane ki kripa hui bach gaye, unki aasheervaad se। mahaatma aadi ke haath pakadkar kahenge, aapki aasheervaad chaahiye। yahaan to padhaai hai। kripa aadi ki baat nahin। manamnaabhav ka arth hai na। mantra to bahut dete hain। anek prakaar ke hathayog sikhaate hain। har ek ki alag-alag shiksha hoti hai। hathayog ke sample dekhne hon to jaypur ke museum mein jaakar dekho। yahaan to kitne aaraam se baithe ho। buddhi mein hai hamko phir se baba raajya de rahe hain। vahaan hi advait devi-devta dharma tha aur koi dharma nahin tha। do haath se hi taali bajti hai। ek dharma hai to maaraamaari nahin hoti। abhi hai kaliyug। kaliyug poora hoga to bhakti bhi poori hogi। abhi to manushyon ki vriddhi kitni hoti rehti hai। bhaarat ki dharti nahin badhti hai। dharti to vahi hai। baaki manushya kam jaasti hote hain। vahaan manushya bahut kam honge, duniya to yahi hogi। duniya koi chhoti nahin ho jaayegi। to tum bachchon ko badi khushi rahni chaahiye। ham yogbal se apna raajya sthaapan kar rahe hain, baap ki shreemat par। baap kehte hain - maamekam yaad karo to tumhaare paap bhasma honge। aatma mein hi khaad padi hui hai na। sirf kehte hain - sato, rajo, tamo....yeh nahin dikhaate ki aatma mein hi khaad padti hai। pahle golden aged the, pure sona the phir chaandi padti hai, unko silver ez kaha jaata hai, chandravanshi। angreji akshar kitne achhe hain। golden, silver, copper phir iron। baap samjhaate hain - aatma mein khaad padi hai, woh nikle kaise। sato se tamo bani hai phir tamo se sato kaise bane। samajhte hain ganga mein snaan karne se satopradhaan ban jaayenge। parantu yeh to ho na sake। ganga-snaan aadi to roz karte rehte hain। koi to nemi ho jaate hain। nahar par bhi jaakar snaan karte hain। tumko baap kehte hain - yeh niyam rakho, baap ko yaad karne ka। yaad ka snaan va yaatra karo। gyaan-snaan bhi karaate hain, yog ki yaatra sikhlaate hain। baap gyaan dete hain। inmen yog ka bhi gyaan, srishti-chakra ka bhi gyaan hai। baaki shaastron ka gyaan to bahut dete hain, yog ko jaante hi nahin। hathayog samajh liya hai। yog aashram to dher hain। manamnaabhav ka mantra denge lekin sivaae baap ke koi bhi manushya ke paas yeh gyaan nahin hai। ab 84 janma ka chakra poora hua hai। phir nai duniya hogi।

tumhaari buddhi mein hai, jhaad ki vriddhi kaise hoti hai। yeh raajaai sthaapan ho rahi hai, sab iktthe thode hi jaayenge। braahmanon ka jhaad bahut bada hoga। phir thode-thode karke jaayenge। praja banti rahegi। thoda bhi koi ne sun liya to praja mein aa jaayenge। centres bahut vriddhi ko paayenge। pradarshaniyaan dher jahaan-tahaan hoti rahengi। jaise mandir tikaane nikalte jaate hain, vaise tumhaari pradarshani bhi gaanv-gaanv mein hogi। ghar-ghar mein pradarshani rakhni hogi। vriddhi ko paate jaayenge isliye aakhreen in chitron ki bhi chhapaai karaani padegi। sabke paas baap ka paigaam jaana hai। tum bachchon ko badi bhaari service karni hai। abhi yeh projector, pradarshani ka fashion nikla hai to gaanv-gaanv mein dikhaana padega। woh achhi reeti uthaayenge। shiv jayanti gaai jaati hai parantu woh kaise aate hain, yeh kisko pata nahin hai। shiv puraan aadi mein yeh baaten hain nahin। yeh baaten tum sunte ho। sunne ke samay achha lagta hai phir bhool jaate hain। achhi reeti points dhaaran hongi to service bhi achhi reeti kar sakenge। parantu sab points kisko dhaaran nahin hoti hain। bhaashan karke aayenge phir khyaal mein aayega - ajun yeh points bhi samjhaate the to achha tha, jinko deh-abhimaan nahin hoga woh jhat bataayenge। bhaashan kar phir vichaar karenge - hamne sab points theek samjhaai? ajun yeh points bhool gaye hain, points koi saath nahin chalni hain। yeh hai sirf abhi ke liye। phir yeh khatma ho jaayega। in aankhon se jo kuchh abhi dekhte ho phir satayug mein yeh nahin hoga। tumko gyaan ka teesra netra ab milta hai, abhi tum trinetri bante ho। baba aakar tumko gyaan de rahe hain jo aatma dhaaran karti hai। aatma ko teesra netra milta hai। yeh gyaan koi mein nahin hai ki main aatma hoon। is shareer dvaara yeh karta hoon। baba hamko padhaate hain। yeh buddhi mein rakhna - ismen mehnat hai। bachchon ko mehnat karni chaahiye aur khushi mein rehna chaahiye। bas abhi hamaara raajya aaya ki aaya। tum jaante ho hamaare raajya mein kya-kya hoga। tum bachchon ko to bahut khushi honi chaahiye ki ham is padhaai se raajya lete hain। padhne vaale ko martaba yaad rehta hai। ham padhte hain bhavishya ke liye। achha padhenge to raajgaddi par baithenge। ve to naameegraami ho jaate hain। abhi list nikaalen, maala banaayen to sab kahenge phalaani bachchi ko hamaare paas bhejo, refresh karne। bhaashan karne vaalon ko bulaate hain, to unka regard bhi rakhna chaahiye। hamko in jaisa hoshiyaar banna hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ateendriy sukh ka anubhav karne ke liye deh ke bhaan ko todne ka purushaartha karna hai। ab vaapis ghar jaana hai isliye buddhiyog ghar se laga rahe।

2) grihastha vyavhaar mein rehte padhaai bhi padhni hai, double course uthaana hai। gyaan ka snaan aur yaad ki yaatra karni aur karaani hai।

vardaan:- komalta ko kamaal mein parivartan kar maaya jeet banne vaale shakti swaroop bhav

shakti swaroop banne ke liye komalta ko kamaal mein parivartan karo। sirf svayan ke sanskaaron ko parivartan karne mein komal bano, karma mein kabhi komal nahin banna, ismen shakti roop banna hai। jo shakti roop ka kavach dhaaran kar lete hain unhein maaya ka koi bhi teer lag nahin sakta। isliye aapke chehre, nayan-chain se komalta ke bajaae shakti roop dikhaai de tab maayaajeet ban paas with honour ka certificate le sakenge।

slogan:- trikaaldarshi ki seat par set hokar har karma karo to maaya door se hi bhaag jaayegi।

ye avyakt ishaare - sada achal, adol, ekras sthiti ka anubhav karo

jaise saakaar baap ne athak aur ekras sthiti ka example bankar dikhaaya, vaise aap bachchon ko bhi auron ke prati example banna hai, yahi service hai। service sirf vaani se hi nahin hoti, sthiti se bhi service hoti hai। to samay pramaan ab apni sthiti ekras banaao।