Murli du jour du vendredi 5 juin 2026

05-06-2026 praatahmurli om shanti "baapdaada"' madhuban

“ meethe bachche - baap ke saath - saath tabhi chal sakenge jab is puraani duniya se behad ka vairaagya hoga ''

prashn:- bhagwan samartha hote hue bhi uske rache hue yagya mein vighna kyon padte hain?

uttar:- kyonki raavan bhagwan se bhi teekha hai। zaroor jab uska raajya chheena jaayega to woh vighna daalega hi। shuru se lekar drama anusaar is yagya mein vighna padte hi aaye hain, padne hi hain। ham patit duniya se paavan duniya mein transfer ho rahe hain to zaroor patit manushya vighna daalenge।

geet:- O door ke musaaphir…

om shanti। meethe-meethe roohaani bachchon ne geet ki line suni। jaise ved shaastra aadi bhakti maarga ka raasta bataate hain vaise geet bhi thoda raasta bataate hain। woh to kuchh samajhte nahin। shaastron ki kathaayen aadi sunna, woh jaise hai kanras। ab bachche jaante hain - doordesh ka musaaphir kisko kaha jaata hai। aatma jaanti hai - ham bhi door ke musaaphir hain, hamaara ghar shantidham hai। manushya in baaton ko nahin samjhe to goya kuchh nahin samjhe। baap ko na jaanne se srishti chakra ko koi nahin jaante hain। yeh aatma samajhti hai ki shivbaaba kehte hain - main tempory jeev aatma banta hoon। tum sthaai jeev aatma ho। main sirf sangam par hi tempory jeev aatma hoon। so bhi tumhaare muaaphik nahin banta। main is jeev mein pravesh karta hoon, apna parichay dene। nahin to tumko parichay kaise mile? baap ne samjhaaya hai - roohaani baap ek hi hai, jisko shivbaaba athva bhagwan kehte hain। doosra koi nahin jaante। ismen pavitrata ka bhi bandhan hai। bade te bada bandhan hai apne ko aatma samajhna, jis door ke musaaphir patit-paavan ko bhakti maarga mein yaad karte hain। woh roohaani baap samjhaate hain ki main sabko le chaloonga। kisko bhi chhod nahin jaaoonga, vaapis to sabko jaana hai। pralay bhi nahin honi hai। bhaarat khanda to rehta hi hai। bhaarat khanda ka kabhi vinaash nahin hota hai। satayug aadi mein sirf bhaarat khanda hi rehta hai। kalpa ke sangam par jab baap aate hain to aadi sanaatan devi-devta dharma sthaapan karna hota hai। baaki sab dharma vinaash hone hain। tum bhi aadi sanaatan devi-devta dharma sthaapan karne mein madad kar rahe ho। to geet suna - kehte hain baba hamko bhi saath le chalo। baap kehte hain - aise saath mein koi chal na sake, jab tak puraani duniya se vairaagya na aaye। naya makaan banta hai to puraane se dil toot jaati hai। tum bhi jaante ho yeh puraani duniya khatma honi hai। ab nai duniya mein chalna hai। jab tak satopradhaan nahin banenge tab tak satopradhaan devi-devta ban nahin sakenge isliye baba baar-baar samjhaate hain - apne ko aatma samajh baap ko yaad karte raho। sadgati karne vaala door ka musaaphir ek hi aaya hua hai, unko duniya nahin jaanti। sarvavyaapi kah diya hai। abhi tum bachche nambarvaar purushaartha anusaar jaante ho ki ham shivbaaba ki santaan hain। aate bhi hain to samajhte hain ham baapdaada ke paas jaate hain, to yeh family ho gai। yeh hai eeshvareey family। kisko bahut bachche hote hain to badi paltan ho jaati hai। shivbaaba ke bachche jo itne bi.ke. bhaai-behen hain, yeh bhi badi paltan ho jaati hai। brahmaakumaar-kumaariyaan sab jaante hain - ham behad ke baap se varsa lete hain। shaastron mein dikhaate hain paandavon aur kaurvon ne khel khela। raajaai daanv mein rakhi। ab raajaai na kaurvon ki hai, na paandavon ki hain। taaj aadi kuchh bhi nahin hai। dikhaate hain unko shahar nikaala mila। hathiyaar aadi chhipaakar jaae rakha। yeh sab hain danta kathaayen। na paandav raajya hai, na kaurav raajya hai। na unhon ki aapas mein ladaai chali hai। ladaai raajaaon ki lagti hai। yeh to bhaai-bhaai hain। ladaai hui hai kaurvon aur yauvnon ki। baaki bhaai ek do ko kaise khatma karenge। dikhaate hain paandav, kaurav lade। baaki 5 paandav bache aur ek kutta raha। woh bhi sab pahaad par gal mare। khel hi khalaas। raajayog ka arth hi nahin nikla।

abhi tum bachche jaante ho baap kalpa-kalpa aakar ek dharma ki sthaapna karte hain। bulaate bhi hain he patit-paavan baba aao, aakar patit se paavan banaao। satayug mein sooryavanshi raajdhaani hi hoti hai। brahma dvaara vishnupuri ki sthaapna ho rahi hai। ab baap aaye hain to unke direction par chalna hai। kamal pushpa samaan pavitra rehna hai। kanyaaon ko to nahin kahenge ki grihastha vyavhaar mein rehte kamal phool samaan raho। woh to hain hi pavitra। yeh grihasthiyon ke liye kaha jaata hai। kumaar aur kumaariyon ko to shaadi karni hi nahin chaahiye। nahin to woh bhi grihasthi ho padenge। kuchh gandharvi vivaah ka naam bhi hai। kanya par maar padti hai to laachaari haalat mein gandharvi vivaah karaaya jaata hai। vaastav mein maar bhi sahan karni chaahiye, parantu adharkumaari nahin banna chaahiye। baal brahmachaari ka naam bahut hota hai। shaadi ki to half partner ho gaye। kumaaron ko kaha jaata hai - tum to pavitra raho। grihastha vyavhaar vaalon ko kaha jaata hai - grihastha vyavhaar mein rehte kamal phool ke samaan bano। unhon ko hi mehnat hoti hai। shaadi na karne se bandhan nahin rahega। kanya ko to padhna hai aur gyaan mein bahut majboot rehna hai। chhoti kumaariyaan jo sageer hain, unko to ham le nahin sakte। woh apne ghar mein rahkar padh sakti hain। maata-pita gyaan mein aaye to sageer ko le sakte hain। yeh to school ka school hai, ghar ka ghar hai aur satsang ka satsang। sat maana ek baap, jiske liye hi kehte hain O door ke musaaphir। aatma gori banti hai। baap kehte hain - main musaaphir sada gora rehta hoon। purity mein rahne vaala hoon। main aakar sabhi aatmaon ko pavitra gora banaata hoon aur to koi aise musaaphir hain nahin। baap samjhaate hain - main aaya hoon raavan raajya mein। yeh shareer bhi paraaya hai। tumhaari aatma kahegi - yeh hamaara shareer hai। baba kahenge yeh hamaara shareer nahin hai। yeh inka shareer hai। yeh patit shareer hamaara nahin hai। aate hi hain inke bahut janmon ke ant ke janma mein। jo number one paavan tha, vahi number last arthaat ant mein vikaari bante hain। pahla number 16 kala sampoorn tha। ab koi kala nahin rahi hai। patit to sab hain hi। to baap doordesh ka musaaphir hua na। tum aatmaayen bhi musaaphir ho। yahaan aakar part bajaati ho। is srishti chakra ko koi nahin jaante hain। bhal koi kitna bhi shaastra aadi padha ho parantu yeh gyaan koi nahin de sakte। baap samjhaate hain - main is tan mein pravesh kar in aatmaon ko gyaan deta hoon। woh to manushya, manushya ko shaastron ka gyaan dete hain। woh ho gaye bhagat। sadgati daata to ek hi hai। vahi gyaan ka saagar hai, unko na jaanne kaaran deh-abhimaan aa jaata hai। woh koi yeh to samjhaate nahin hain ki apne ko aatma nishchay karo। aatma padhti hai। yeh koi samjhaate nahin hain kyonki deh-abhimaan hai। abhi door ka musaaphir to shiv-baba ko hi kahenge। tum jaante ho ham 84 janma ka chakra laga chuke hain।

baap kehte hain - 5 hajaar varsha pahle bhi samjhaaya tha ki bachche tum apne janmon ko nahin jaante ho। main jaanta hoon - geeta mein aate mein loon misal kuchh hai। vahi geeta ka episode, vahi mahaabhaarat ki ladaai, vahi manamnaabhav-madhyaaji bhav ka gyaan hai। maamekam yaad karo। ladaai bhi barobar lagi hai। paandavon ki vijay hui। vijay maala vishnu ki gaai jaati hai। shaastron mein to dikhaaya hai paandav gal mare। phir maala kahaan se bani। ab tum samajhte ho ki ham vishnu ki maala banne yahaan aaye hain। oopar mein hai patit-paavan baap। unka yaadgaar chaahiye na। bhakti maarga mein yaadgaar gaaya jaata hai। koi 8 ki maala, koi 108 ki maala, koi 16108 ki banaai hai। gaate hain - chadhti kala tere bhaane sarva ka bhala। abhi tum jaante ho - hamaari chadhti kala hai। ham chale jaayenge apne sukhdhaam phir ham vahaan se neeche kaise utarte hain। 84 janma kaise lete hain, yeh saara gyaan tumhaari buddhi mein hai। yeh gyaan bhoolna nahin chaahiye। hamaare sab duhkh door karne, shraap mitaae sukh ka varsa dene baap aaya hai। raavan ke shraap se sabko duhkh hota hai। to ab baap ko aur varse ko yaad karna hai। tum jaante ho ham sooryavanshiyon ne bhaarat mein raajya kiya। bhaarat mein hi shivbaaba aate hain। bhaarat hi svarga tha, yeh ghadi-ghadi buddhi mein yaad karna pade। jisne 84 ka chakra nahin khaaya hoga, woh na dhaarna karenge, na karaayenge uske liye samjha jaayega ki isne 84 janma nahin liye hain। yeh deri se aate hain। svarga mein nahin aate hain। pahle-pahle jaana to achha hai na। naye makaan mein pahle khud rehte hain phir kiraaye par chadhaate hain। to woh phir second hand hua na। satayug hai nai duniya। treta second hand kahenge। to ab buddhi mein aata hai ham svarga nai duniya mein jaayen। purushaartha karna hai, praja bhi banti jaayegi। tumko maaloom padta jaayega ki maala mein kaun-kaun piro sakte hain। agar kisko seedha kaha jaae ki tum nahin aayenge to heartfail ho jaae isliye kaha jaata hai ki purushaartha karo, apni jaanch karo ki hamaara buddhiyog bhatakta to nahin hai! tumhaara shivbaaba se kitna lav hota jaata hai! kehte bhi hain ham baapdaada ke paas jaate hain। shivbaaba se daada dvaara varsa lene jaate hain। aise baap ke paas to kai baar jaayen। parantu grihastha vyavhaar bhi sambhaalna hai। bhal bahut dhanvaan hain parantu itni phursat nahi। poora nishchay nahin। nahin to maas do maas baad aakar refresh ho sakte hain। unko ghadi-ghadi kashish hogi। sui par junk chadhi hui hoti hai to chumbak itna kheenchata nahin hai। jinka poora yog hoga unko jhat kashish hogi, bhaag aayenge। jitni kat utarti jaayegi, utni kashish hogi। ham chumbak se milen। geet hai chaahe maaro, chaahe kuchh bhi karo... ham dar se kabhi nahin niklenge। parantu woh avastha to pichhaadi mein hogi। kat nikli hui hogi to woh avastha hogi। baap kehte hain - he aatmaayen manamnaabhav, raho bhal apne grihastha vyavhaar mein। aise nahin ki yahaan bhaagkar aae baith jaana hai। saagar paas baadlon ko aana hai - refresh hone। phir service par jaana hai। bandhan jab khalaas ho to service par ja saken। maa-baap ko apne bachchon ko sambhaalna hai। baap ki yaad mein rehna hai। pavitra banna hai।

baap ne samjhaaya hai - anek prakaar ke vighna gyaan yagya mein padte hain। kehte hain eeshvar to samartha hai phir vighna kyon? manushyon ko pata hi nahin hai, raavan bhagwan se bhi teekha hai। unki raajaai chheeni jaati hai to anek prakaar ke vighna padte rehte hain। drama plan anusaar phir bhi vighna padenge। shurooaat se lekar patiton ke vighna padte hain। shaastron mein bhi likh diya hai - shreekrishna ko 16108 patraaniyaan thi। sarpa ne dasa। raam ki seeta churaai gai। ab raavan svarga mein kahaan se aaye। jhooth to bahut hai। kehte hain vikaar bigar bachche kaise honge। unko pata hi nahin - jo varsa lene vaale honge vahi aakar samjhenge। to is gyaan yagya mein asuron ke vighna padte hain। patit ko asur kaha jaata hai। hai hi raavan sampradaay। abhi tum sangam par ho। raavan raajya se kinaara kar liya hai phir bhi kuchh lais aati hai। yeh buddhi mein gyaan hai ki ham ja rahe hain। baithe to yahaan hi hain। buddhi mein gyaan hai। baithe yahaan ho parantu unse jaise tumko vairaagya hai। yeh chhi-chhi duniya kabristaan banni hai। bhinna-bhinna points se samjhaaya jaata hai। vaastav mein to ek hi point hai manamnaabhav। kitnon ki chitthiyaan aati hain - baba ham baandheli hain। ek dropdi to nahin hain, hajaaron ho jaayengi। abhi tum patit duniya se paavan duniya mein transfer ho rahe ho। jo kalpa pahle phool bane honge vahi niklenge। garden oph allaah ki yahaan sthaapna hogi। koi-koi to aise achhe-achhe phool hote hain jo dekhne se hi aaraam aa jaata hai। naam hi hai king oph flowers। 5 roz se rakha ho to bhi khila rahega। khushbu phailti rahegi। yahaan bhi jo baap ko yaad karte aur yaad dilaate hain unki khushbu phailti hai। sadaiv khush rehte hain। aise meethe-meethe bachchon ko dekh baap harshit hote hain। unhon ke aage baba ki gyaan dance achhi hoti hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan aur yog mein majboot banna hai। agar koi bandhan nahin hai to bandhanon mein jaanboojhkar phasna nahin hai। baal brahmachaari hokar rehna hai।

2) abhi hamaari chadhti kala hai, baba hamaare sab duhkh door karne, shraap mitaae varsa dene aaye hain। baap aur varse ko yaad kar apaar khushi mein rehna hai। jaanch karni hai ki hamaara buddhiyog kahaan bhatakta to nahin hai।

vardaan:- samaane aur saamna karne ki shakti dvaara seva mein saphalta praapta karne vaale roohaani sevaadhaari bhav

roohaani sevaadhaariyon ko seva ke sivaae kuchh bhi soojhta nahin, ve mansa-vaacha-karmana service se ek second bhi rest nahin lete isliye best ban jaate hain। ve sevaaon mein saphalta praapta karne ke liye sada yahi yaad rakhte ki samaana aur saamna karna - yahi hamaara nishaana hai। ve apne puraane sanskaaron ko samaate hain aur saamna maaya se karte na ki daivi parivaar se। aise bachche jo knowledgeful ke saath-saath powerful bhi hain unhein hi kaha jaata hai roohaani sevaadhaari।

slogan:- chhoti baat ko bada nahin karo, vaataavran ko shaktishaali banaao।

ye avyakt ishaare - sada harshit rahne ke liye apni nature ko saral banaao , sahansheel bano।

duniya mein log jinda hote bhi naaummeendi ki chita par baithe hue hain, aisi aatmaon ko marjeeva banaao, naye jeevan ka daan do। apne khushanseeb, harshit mukh chehre dvaara unhein maanav jeevan mein jeena sikhaao। aapko dekhkar unmein himmat, umang-utsaah aa jaaye, iske liye apni nature ko saral banaao aur sada kamal samaan sthiti ke aasan par double light sthiti mein sthit raho।