Murli du jour du samedi 6 juin 2026

06-06-2026 praatahmurli om shanti "baapdaada"' madhuban

“meethe bachche - amritvele ka samay bahut-bahut achha hai, isliye savere-savere uthkar ekaanta mein baith baba se meethi-meethi baaten karo''

prashn:- kaun-si knowledge nirantar yogi banne mein bahut madad karti hai?

uttar:- drama ki। jo kuchh beeta, drama ki bhaavi। zara bhi sthiti halchal mein na aaye। bhal kaisi bhi paristhiti ho, earthquake aa jaae, dhandhe mein ghaata pad jaae lekin zara bhi sanshay paida na ho - isko kehte hain mahaaveer। agar drama ki yathaartha knowledge nahin to aansu bahaate rahenge। nirantar yogi banne mein drama ki knowledge bahut madad karti hai।

geet:- om namo shivaae…

om shanti। bachche ab achhi reeti samajhte hain patit duniya ka ab ant ho raha hai। paavan duniya ki aadi ho rahi hai। yeh sirf tum bachche hi jaante ho। aur bachchon ko hi yeh direction va shreemat milti hai। kaun dete hain? oonch te oonch bhagwan। samjhaate rehte hain ki patit se paavan banna hai। yeh knowledge tumhaare liye hai aur to sab patit hain। yeh patit duniya vinaash zaroor honi hai। patit kaha jaata hai vikaari ko। baap samjhaate hain ki tum janma-janmaantar ek-do ko duhkh dete aaye ho, isliye tum aadi-madhya-ant duhkh paate ho। ek-do ko patit banaate ho। pukaarte bhi hain ki ham patit hain, parantu buddhi mein poora baithta nahin hai। kehte bhi hain patit-paavan aao parantu phir bhi patitapna chhodte nahin hain। abhi tum samajhte ho saari baat hai paavan banne ki। yeh samjhaane vaala bhi to koi chaahiye। samjhaane vaala hai hi ek। baaki yeh jo guru log hain, ye kisko paavan bana nahin sakte। paavan bhi sirf ek janma ke liye nahin, janma-janmaantar ke liye banna hai। tumhaare mein bhi jo gyaanvaan hain ve teekhe hote hain। drama anusaar woh noondh hai। tumhaare mein bhi mahaaveerapna chaahiye। woh aayega baap ki yaad mein rahne se। baap bahut achhi reeti baith samjhaate hain। jaise baba kehte hain ki savere uthkar yaad karo। woh samay bahut sundar hai yaad karne ka, jisko prabhaat kaha jaata hai। bhakti maarga mein bhi kehte hain raam simar prabhaat more man। baap bhi kehte hain savere uth baap ko yaad karo to bada maza aayega। baap ki yaad mein baith yahi khyaal karna chaahiye ki kaise kisko samjhaayen? amritvele ka vaayumandal bada shuddh rehta hai। din mein to gorakhdhandha rehta hai। raat ko 12 baje tak to vikaari vaayumandal rehta hai। saadhu-santa, bhakta aadi sab bhakti bhi prabhaat ko karte hain। yoon to yaad din mein bhi kar sakte hain। dhandhe mein bhal rahe, buddhi ka yog, jis devta ka pujaari hoga unke paas hoga। parantu aisa kiska rehta nahin hai। bhakti maarga mein sirf darshan ke liye mehnat karte hain। milta kuchh bhi nahin। unko bhi bhakti karte-karte tamopradhaan banna hi hai। bhakti maarga mein bhi shiv par bali chadhte hain, jisko kaashi kalvat kehte hain। shiv ko yaad karte-karte kuen mein kood padte hain। shiv ke oopar bali chadhte hain, woh hai bhakti maarga ki bali। yeh hai gyaan maarga ki bali। woh bhi mushkil, yeh bhi mushkil। bhakti maarga mein isse kuchh phaayda nahin। yeh jaise aatma apne shareer ka ghaat karti hai। yeh koi gyaan nahin hai। woh bhi kah dete aatma so paramatma। aatma-abhimaani to ek baap hi hai, jo bachchon ko samjhaate hain ki paramatma to main ek hi hoon। ham aatma so paramatma kehna - yeh bade se badi jhooth hai। yeh to ho nahin sakta।

baap kehte hain - main aata hi hoon patiton ko paavan banaane, so paavan bana raha hoon। baaki to drama mein jo hona hai so hoga hi। samjho earthquake hoti hai, chhat gir jaati hai, kahenge bhaavi, kalpa pahle bhi aise hua tha। ismen zara bhi hilne ki darkaar nahin। drama par pakka khada rehna hai। isko hi mahaaveer kaha jaata hai। accident aadi to dher ke dher hote rehte hain। phir kiski raksha karte hain kya? yeh to drama mein noondh hai। aisa hi drama mein part hai। jo drama ko nahin jaante woh deh ko yaad kar aansu bahaate hain। woh kabhi shivbaaba ko yaad nahin kar sakte kyonki shivbaaba se pyaar nahin hai। sachchi preet nahin hai। baap ke saath to poori preet honi chaahiye। shivbaaba ke saath preet buddhi tum kalpa-kalpa bante ho। devtaaon ki baap ke saath preet buddhi thi, aise nahin kahenge। unhonne is preet se woh pad paaya hai। vahaan to maaloom bhi nahin rahega - saare kalpa mein tumko shivbaaba ka pata bhi nahin rehta hai jo preet rakh sako। abhi baap ne apna parichay diya hai। ab baap kehte hain ki aur sang tod mujh ek saath jodo। yeh vinaash kaal to zaroor hai। yeh bhi tum bachche jaante ho। manushya to bilkul hi ghor andhiyaare mein hain। tum abhi samajhte ho hamko to baap se poora varsa lena hai। yaad bigar satopradhaan nahin ban sakenge। surgeon ban apne rog ko dekhna hai। shreemat par dekhna hai ki hamaari baap ke saath kitni preet hai? amritvele hi baap ko yaad karna achha hai। prabhaat ka samay bahut achha hai। us samay maaya ke toofaan nahin aayenge। raat ko 12 baje tak tapasya karne ka koi phaayda nahin hai kyonki time hi ganda hota hai। vaayumandal kharaab rehta hai। to ek baje tak chhod dena chaahiye। ek ke baad vaayumandal achha rehta hai। baap kehte hain - apna to hai hi sahaj raajayog, bhal aaraam se baitho। baba apna anubhav bhi sunaate hain। kaise baba se baaten karta hoon। baba kaisa wonderful yeh drama hai! aap kaise aakar patit se paavan banaate ho! saari duniya ko kaise paltaate ho! bada wonder hai! jaise baap ko khyaal aate hain vaise bachchon ko bhi aane chaahiye। kaise manushyon ka beda paar karen athva kaise naeeya paar karen। baap kehte hain - tum pukaarte rehte ho he patit-paavan aao। ab main aaya hoon, ab tum patit na bano। patit hokar sabha mein aakar nahin baitho। nahin to vaayumandal ashuddha kar dete ho। baba ko maaloom to padta hai। dehli mein, baambe mein aise vikaar mein jaane vaale aakar baith jaate the। gaaya hua hai asur aakar vighna daalne baithte the। vikaar mein jaane vaalon ko asur kaha jaata hai। vaayumandal ko kharaab karte hain। unke liye saza bahut kadi hai। baba samjhaate to sabhi baaten hain phir bhi apna ghaata karne ke sivaae rehte nahin। jhooth bhi bolte hain। nahin to phauran likh dena chaahiye - baba, hamse yeh bhool hui, kshama karna। apna paap likh do। nahin to vriddhi ko paate rahenge aur rasaatal mein chale jaayenge। aate hain kuchh lene liye aur hi kaan kata lete। yeh bhi drama mein part hai। aise asur kalpa pahle bhi the, ab bhi hain। amrit chhod vish peete hain। apna bhi ghaat karte hain aur auron ko bhi nuksaan pahunchaate hain। vaayumandal kharaab kar dete hain। braahmaniyaan bhi sab ek samaan nahin hain। mahaarthi, ghodesvaar, pyaade sab hain।

tum bachchon ko athaah khushi honi chaahiye - baba mila aur baaki kya। haan, apne bachchon aadi ko zaroor sambhaalna hai। aise nahin ki baba yeh sab aapke hain, ab aap sambhaalo। ham to aapke ban gaye। baap samjhaate hain ki grihastha vyavhaar mein rehte kamal phool samaan pavitra bano। koi bhi patit kaam nahin karo। bas pahli baat hai kaam ki। dropdi ne bhi is par pukaara ki hamko yeh nangan karte hain। pukaara bhi tab tha jab baap sunne vaala aaya tha। baap ke aane ke pahle koi bhi pukaarte nahin hain। kisko pukaarenge? baba aaya hai tab hi pukaarte hain। patit se paavan bankar phir kahaan jaayenge? vaapis jaana hai, woh to yahi samay hai। sabka sadgati daata, liberator ek hi hai। yahaan to duhkh hai। saadhu-santa aadi koi bhi sukhi ho na saken। sabko koi na koi duhkh, rog aadi hota hi hai। koi guru andha loola bhi hota hai। zaroor koi aisa kaam kiya hai tab to andha loola aadi bante hain। satayug mein koi andha loola aadi thode hi hoga। manushya thode hi samajhte hain। baap hi aakar samjhaate hain। baap hi gyaan ka saagar patit-paavan hai। baaki to sab hai bhakti। woh bhakti maarga hi alag hai। woh hai seedhi utarne ka maarga। utarne mein, jeevanbandha mein aane mein 84 janma lagte hain aur phir ek second lagta hai jeevanmukta banne mein। agar unki mat par chal baap ko yaad kare to। nambarvaar to hain na। kehte hain hamko phalaani teacher mile to achha hai। to zaroor khud kamjor hai tab to kehte hain phalaani ko 2-4 maas ke liye bhej do। baba kehte hain yeh bhi bhool hai। tum braahmani ko kyon yaad karte ho jabki baap sahaj baat bataate hain - sirf baap ko yaad karo aur svadarshan chakra phiraao, auron ko bhi samjhaao। bas। ismen braahmani aakar kya karegi? yeh to second ki baat hai। tum dhandhe-dhori mein yeh bhool jaate ho phir bhi braahmani yahi kahegi manamnaabhav। kai buddhu log samajhte nahin hain sirf kehte hain braahmani achhi chaahiye। gyaan to tumko mila hai na। baap aur varse ko yaad karo। deh-abhimaan ko chhodo। yeh hamaara centre hai, yeh inka centre hai। yeh jigyaasu yahaan kyon jaate hain... yeh sab deh-abhimaan hai। sab shivbaaba ke centres hain, hamaara thode hi centre hai। tumko yeh kyon hota hai ki phalaana hamaare centre par kyon nahin aata। kahaan bhi jaaye। baba hamesha kehte hain koi se bhi maangon nahin। yeh samajh sakte hain ki beej nahin boyenge to milega kya? bhakti maarga mein bhi daan-punya kiya jaata hai। tum sab bhakti maarga mein eeshvar arth indirect karte the। phir sannyaasiyon ko bhi bahut dete hain। nahin to daan gareebon ko diya jaata hai, na ki saahookaaron ko। ismen anaaj ka daan sabse achha hota hai। so bhi baap samjhaate hain daan karne se doosre janma mein uska phal mil jaata hai। eeshvar hi sabko phal dete hain। saadhu-santa aadi koi return nahin de sakte hain। dene vaala ek hi baap hai। kiske bhi through deve। baap samjhaate hain ki tum eeshvar arth dete the to bhi doosre janma mein tumko evja dilaate the। abhi to main direct aaya hoon। abhi tumko 21 janma ke liye return milega। phir to maut saamne khada hai। bhakti maarga mein tumko aise nahin kehte the ki maut saamne khada hai isliye apna saphal karo। nahin। to ab baap samjhaate hain - jisko bhi chaahiye yeh roohaani hospital khol do। koi kehte hain makaan banaayen, usmein yeh hospital kholen। baap kehte hain - aaj makaan banaao aur kal mar jaao to yeh sab khatma ho jaayega। shareer par bharosa nahin hai। jo hai usmein hi tab tak ek kamra rakh do, jismen roohaani hospital, roohaani college banaao। bahuton ka kalyaan karenge to bahut oonch pad paayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreemat par apne aapko dekhna hai ki is vinaash kaal mein meri ek baap se sachchi preet hai? aur sab sang tod ek sang jodi hai? kabhi koi vikarma karke asur to nahin bante? aisi checking kar svayan ko parivartan karna hai।

2) is shareer par koi bharosa nahin isliye apna sab kuchh saphal karna hai। apni sthiti ekras, achal banaane ke liye drama ke raaz ko buddhi mein rakhkar chalna hai।

vardaan:- baar-baar haar khaane ke bajaae balihaar jaane vaale master sarvashaktimaan vijayi bhav

svayan ko sada vijayi ratna samajhkar har sankalp aur karma karo to kabhi bhi haar ho nahin sakti। master sarva-shaktimaan kabhi haar nahin kha sakte। yadi baar-baar haar hoti hai to dharmaraaj ki maar khaani padegi aur haar khaane vaalon ko bhavishya mein haar banaane padenge, dvaapar se anek moortiyon ko haar pahnaane padenge isliye haar khaane ke bajaae balihaar ho jaao, apne sampoorn swaroop ko dhaaran karne ki pratigya karo to vijayi ban jaayenge।

slogan:- “kab'' shabd kamjori siddha karta hai isliye “kab'' karenge nahin, ab karna hai।

ye avyakt ishaare - sada harshit rahne ke liye apni nature ko saral banaao, sahansheel bano।

is behad ki stage par main khilaadi hoon। yeh khilaadi ki stage sada harshitmukh rahne ka anubhav karaati hai। kisi bhi prakaar ki koi bhi baat, jisko duniya vaale aapda samajhte hain lekin khilaadi ban khel karne vaale aur saakshi ho khel dekhne vaale, aisi aapda ke roop ko khel samajh, sahansheelta ki shakti se manoranjan ka anubhav karte hain।