Murli du jour du samedi 13 juin 2026

13-06-2026 praatahmurli om shanti "baapdaada"' madhuban

“meethe bachche - baap aaye hain saari duniya se vikaaron ki tapat bujhaae sabko sheetal banaane, gyaan barsaat sheetal bana deti hai''

prashn:- kaun si tapat saari duniya ko jala rahi hai?

uttar:- kaam vikaar ki tapat saari duniya ko jala rahi hai। sab kaam agni mein jalkar kaale ho gaye hain। baap gyaan varsha se unhein sheetal banaate hain। jaise barsaat padne se dharti sheetal ho jaati hai to is gyaan varsha se 21 janmon ke liye tum sheetal ban jaate ho। kisi bhi prakaar ki tapat nahin rehti। tatva bhi satopradhaan ban jaate hain। koi bhi tapte nahin hain।

om shanti। roohaani bachche kiski yaad mein baithe hain? zaroor apne roohaani baap ki yaad mein baithe hain। rooh apne parampita paramatma ki yaad mein baithi hai ki hamko roohaani baap aakar refresh kar sheetal banaayen, kyonki kaam chita par baith bhaarat jal mara hai। gaate bhi hain tapat bujhaaye। tapat kaahe ki? kaam chita ki। bahut tapat hoti hai to manushya mar padte hain। is kaam chita ki tapat mein bhaarat ekdam jal mara hai isliye baap ko yaad karte hain ki aakar sheetal banaao। barsaat padne se sheetalta ho jaati hai। dharti sheetal ho jaati hai। yeh to barsaat hai gyaan ki। ek hi baar aakar itna sheetal banaate hain। itna sab kuchh de dete hain jo satayug mein koi bhi cheez ki utkantha nahin rehti hai। aadhaakalpa utkantha mein rehte aaye ho - baba aakar sheetal banaao। patit-paavan baap aakar hamko sheetal banaaye। is gyaan varsha se bhaarat athva saari duniya sheetal ho jaati hai। tum svarga ke maalik ban jaate ho। manushya marte hain to kehte hain svargavaasi hua। woh to sirf mukh meetha karte hain। tum jaante ho svarga ki ab sthaapna ho rahi hai। baba aaya hua hai, yeh gyaan varsha kar rahe hain। sheetalta ka asar 21 janma rehta hai। vahaan na barsaat, na kisi bhi cheez ki ichchha rehti hai। sadaiv bahaar hi bahaar rehti hai। vahaan koi bhi prakaar ka duhkh nahin rehta। soorya bhi satopradhaan ban jaata hai। kabhi tapat nahin dikhaate hain। tum saare vishwa ke maalik ban jaate ho। abhi to gulaam hain na। gaate hain main gulaam, main gulaam tera…, baap ko yaad karte hain। ab baap kehte hain - tumhaari seva mein main tumhaara gulaam aakar bana hoon। tum bachchon ki seva karta hoon। paraaye, patit desh, patit shareer mein main aata hoon। is patit duniya mein ek bhi paavan ho nahin sakta। satayug ko paavan, kaliyug ko patit kaha jaata hai kyonki sab vikaari hain। bhaaratvaasi hi is knowledge ko samjhenge। jinhonne 84 janma liye hain vahi yeh knowledge sunenge va jo satayug-treta mein aane vaale hain vahi aakar brahman banenge, nambarvaar purushaartha anusaar। baap ne samjhaaya hai abhi tum brahman varna mein ho phir vahi devta varna mein aayenge। brahman varna arthaat brahman dharma sthaapan karne baap aate hain। brahma, brahman dharma sthaapan karte hain। aise nahin kahenge ki parampita paramatma aakar shoodron ko brahman banaate hain। yeh tumhaari baajoli chalti hai। yeh to bahut sahaj hai। tum jaante ho yeh chakra kaise phirta hai? viraat roop mein braahmanon ki choti aur shivbaaba ko bhool gaye hain। kehte hain devta, kshatriy, vaishya, shoodra... phir shoodra se devta। ab brahman kahaan gaye? brahman log gaate bhi hain brahman devtaae namah। tab prajaapita brahma ki vanshaavli kahaan gaye? prajaapita brahma ka naam kitna baala hai। chitron mein bhi kitni bhool kar di hai। prajaapita brahma ki aulaad ka koi naam-nishaan nahin hai। school mein teacher padhaate hain। woh phir bhi source oph income hai। em object to zaroor chaahiye। tum bachche jaante ho us padhaai se hi martaba milta hai। patit duniya mein bhagwan aakar patiton ko padhaate hain। baap kehte hain - main tum bachchon ko padhaakar paavan banaata hoon। is padhaai se income dekho kitni bhaari hai। aadhaakalpa ke liye tum takdeer banaate ho। bhaarat mein gaaya hua hai 21 peedhi, ab tum behad ke baap se 21 peedhi behad ka varsa paate ho। laukik baap ka hai alpakaal kshan bhangur ka varsa। is baap se tum aisa varsa paate ho jo peedhi by peedhi tumko duhkh nahin rahega। bhaarat mein hi behad ka sukh tha। yeh gyaan aur kiski buddhi mein nahin hai। yeh gyaan dene vaala baap jaane aur jinko dete hain woh jaane, aur na jaane koi। granth mein bhi unki mahima gaai hui hai। ekoankaar... niraakaar, nir-ahankaar। iska arth bhi abhi tum samajhte ho। woh to sirf gaate hain nirhankaari। itni badi authority hote hue bhi unko koi ahankaar nahin hai। yahaan thodi bhi position vaale hote hain to kitna nasha unhon ko rehta hai। woh hai alpakaal vaale martabe ka nasha ki main phalaana hoon... ab tumko is roohaani padhaai ka nasha hai। tumhaari aatma abhi jaanti hai - aatma-abhimaani banna hai tab hi baap ko yaad kar sakenge। baap ke saath yog tootne se maaya ka gola lag jaata hai, murjha jaate hain। yaad karte rahen to khushi ka paara chadha rahe। koi bada imtahaan paas karte hain to khushi hoti hai। samajhte hain bas iske oopar koi aur padhaai nahin hai। tum bhi jaante ho hamaari is padhaai se oonch aur koi padhaai hai nahin। in lakshmi-naaraayan ne past mein zaroor aisi padhaai ki hai। raajayog seekhe hain tab mahaaraaja mahaaraani bane hain। raajayog to mashhoor hai। parampita paramatma aakar raajayog sikhaate hain - svarga ke liye। kehte bhi hain past mein aise karma kiye hain tab yeh bane hain।

tum jaante ho - is janma mein ham aise karma seekhte hain jo bhavishya 21 janma ke liye raajya karenge va svarga mein viraajmaan honge। yatha raaja, raani tatha praja bhi hai na। raajdhaani hai na। baap aaya hai - raajdhaani sthaapan karne। phir tum jaakar 21 janma paalna karenge। 63 janma to duhkh bhoga hai। woh sab khatma ho jaayenge। bhaarat ko svarga kaha jaata hai, abhi to narka hai। srishti kitni badal gai hai। woh raajaai kahaan chali gai? raavan raajya shuru hone se phir tum patit ban jaate ho। baap kehte hain tum apne 84 ke chakra ko nahin jaante ho। abhi tum bachchon ko baar-baar samjhaaya jaata hai। tumne 84 janmon ka chakra poora kiya hai। abhi tumhaara yeh antim janma hai। ab phir se apna varsa lena hai। tumko muktidhaam mein baith nahin jaana hai। tumhaara all-round part hai। aise bahut hain jo satayug se lekar dvaapar kaliyug tak bhi muktidhaam mein rehte hain। aise nahin kahenge yahaan aane se muktidhaam achha hai। woh to machchharon sadrishya ho gaya। aaya aur yeh gaya। manushyon ki mahima gaai jaati hai। yeh mandir kiske hain? jo shuru se lekar part bajaate aaye hain, unhon ke hi yaadgaar bante aaye hain। pichhaadi mein jo aate hain unhon ka yaadgaar hai kya? kuchh bhi nahin। tumhaara kitna bhaari yaadgaar hai। sabse jaasti tum part bajaate ho। tum apni praalabdha ka time poora kar jab bhakti maarga mein aate ho tab phir tumhaara yaadgaar tatha shivbaaba ke mandir banne shuru hote hain, phir aur dharma aate hain। unhon ka dharma sthaapan hota hai। tum apni history-geography bhi jaante ho aur sab dharma vaalon ki bhi jaante ho। 84 janmon ki seedhi hai। pahle ham svarga mein aate hain phir utarte kaise hain - yeh tumhaari buddhi mein hai। har ek janma mein bhinna naam roop vaale mitra-sambandhi aadi mile hain। yeh sab drama mein tumhaara part pahle se hi noondha hua hai। yeh behad ka drama hai, jo hoobhu repeat hota hai। tum jaante ho ham so devi-devta the jo 84 janma le shoodra banen। phir ham so devi-devta bante hain। manushya to kah dete aatma so paramatma। vaastav mein ham so ka arth yeh hai। woh phir kah dete aatma so paramatma, paramatma so aatma। raat-din ka farka hai na। tum abhi in sab baaton ko jaante ho। tum abhi paandav bane ho। kaurav paandav bhaai-bhaai the na। abhi baap mila hai to tum kaurav se paandav bane ho। baap tumko duhkh se liberate kar guide ban le jaate hain। ghar ka to kisko pata nahin hai। woh kehte hain aatma brahm mein leen ho jaayegi। to ghar thode hi thahra। ghar mein to raha jaata hai। unko incorporeal world kaha jaata hai। abhi tum bachche jaante ho - ham niraakaari aatma niraakaar world mein bindi misal nivaas karte hain। vahaan bhi niraakaari jhaad hai। yeh drama bana hua hai। beej aur jhaad ko jaanna hai। iska naam hi hai variety dharmo ka jhaad, yeh manushya srishti hai। inka beejroop baap hai, kitni variety hai। har ek dharma vaale ke features nyaare phir yahaan bhi ek ki shakla na mile doosre se। yeh bhi drama bana hua hai। kalpa vriksha ki aayu 5 hajaar varsha hai - yeh baap hi samjhaate hain। manushya actors hain, yahaan part bajaane aate hain। yeh maandava hai, roshni ke liye soorya chaand aadi hain। yeh koi devta thode hi hain, yeh to battiyaan hain। parantu service karte hain, isliye devta kah dete hain। vaastav mein devtaayen koi service nahin karte hain, service to tum bachche karte ho। baap obedient servant hai। bachche duhkhi hote hain, to baap ko taras padta hai। baap aaye hain samjhaane। tum bachchon ko phir se so devi-devta pad praapta karaane aata hoon। chadhti kala, utarti kala har cheez ki hoti hai। puraani duniya ko tamopradhaan, nai duniya ko satopradhaan kaha jaata hai। har ek cheez nai so puraani hoti hai। aatma kehti hai - yeh shareer bhi tamopradhaan patit hai। yeh satayug mein aatma aur shareer satopradhaan the। maatha nahin khapaate the। aatma ko ab gyaan mila hai। smriti aai hai, ham 84 janma lete hain। yeh raaz behad ka baap samjhaate hain। duhkh mein baap ko hi pukaarte rehte hain। raham karo he duhkh harta sukh karta... bhaarat hi sabse sukhi tha na। bhaarat jaisa pavitra khanda aur koi ho nahin sakta। abhi baap tum bachchon ki jholi avinaashi gyaan ratnon se bharte hain। kabhi aisa baap dekha hai। kehte hain bachchon, main tumhaare liye baikuntha saugaat me laaya hoon। tum svargavaasi the, ab patit narkavaasi ban pade ho। paavan unko kaha jaata hai jo vikaar mein nahin jaate hain। satayug mein hain sampoorn nirvikaari। is samay hain - sampoorn vikaari। baap kehte hain tum bhi sampoorn nirvikaari the। ab sampoorn vikaari bane ho, phir sampoorn nirvikaari devta pad paana hai - baap ko yaad karne se। akshar dekho kitne achhe hain - manamnaabhav। mujh baap ko yaad karo to tum tamopradhaan se satopradhaan ban jaayenge। main sarvashaktimaan hoon na। mujhe yaad karo। yaad ko hi yog agni kaha jaata hai, jisse tumhaare paap dagdha honge। tum pavitra ban jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) roohaani padhaai ke nashe mein rehna hai। baap samaan nirhankaari banna hai। position aadi ka ahankaar nahin rakhna hai।

2) apni jholi gyaan ratnon se bharni hai। sampoorn nirvikaari ban devta pad paana hai। kabhi bhi murjhaana nahin hai।

vardaan:- sthool aur sookshm donon reeti se svayan ko busy rakhne vaale maayaajeet, vijayi bhav

svayan ko sevaadhaari samajh apni ruchi, umang se seva mein busy raho to maaya ko chance nahin milega। jab sankalp se, buddhi se, chaahe sthool karmana se free rehte ho to maaya chance le leti hai। lekin sthool aur sookshm donon hi reeti se khushi-khushi se seva mein busy raho to khushi ke kaaran maaya saamna karne ka saahas nahin rakh sakti isliye svayan hi teacher ban buddhi ko busy rakhne ka daily programme banaao to maayaajeet, vijayi ban jaayenge।

slogan:- nishchay aur phalak se kaho baba mere saath hai to maaya sameep aa nahin sakti।

ye avyakt ishaare - sada harshit rahne ke liye apni nature ko saral banaao, sahansheel bano।

baapdaada sabhi bachchon ke chalan aur chehre mein, bol va karma mein saralta aur madhurta dekhne chaahte hain। agar aaveshta ya thakaavat ke kaaran thoda bhi bol madhur nahin hai, chehra madhur nahin hai, serious hai to gun sampanna nahin kahenge। kaise bhi circumstance ho lekin mera jo gun hai, woh mera gun emerge hona chaahiye। jaise baapdaada vaise hoobhu vahi gun, vahi kartavya, vahi bol, vahi sankalp anubhav ho, sabhi ke mukh se nikle yeh to vahi lagte hain।