Murli du jour du mercredi 17 juin 2026

17-06-2026 praatahmurli om shanti "baapdaada"' madhuban

“meethe bachche - sooryavanshi raajya pad lene ke liye apna sab kuchh baap par svaaha karo, sooryavanshi raajya pad arthaat air-condition ticket''

prashn:- is duniya mein tum bachchon se adhik khushanseeb koi bhi nahin - kaise?

uttar:- tum bachchon ke sammukh behad ka baap hai। unse tumhein behad ka varsa mil raha hai। tum is samay behad baap teacher aur satguru ke bankar usse behad ki praapti karte ho। duniya vaale to use jaante bhi nahin to tumhaare jaisa khushanseeb ho kaise sakte।

geet:- bada khushanseeb hai…

om shanti। brahman kul bhooshan bachche jaante hain ki abhi ham brahman sampradaay ke hain phir daivi sampradaay banenge। bachchon ko baap baith samjhaate hain - jabki behad ka baap sammukh hai aur usse behad ka varsa mil raha hai। baaki aur kya chaahiye। bhakti maarga kab se chalta hai, yeh koi ko pata nahin hai। bhakti maarga vaale bhakta bhagwan ko athva brides bridegroom ko yaad karte hain। parantu wonder hai ki unko jaante nahin। aisa kabhi dekha ki sajni saajan ko na jaane। nahin to yaad kar hi kaise sakti। bhagwan to sabka baap thahra। bachche baap ko yaad karte hain। parantu pahchaan bigar yaad karna sab vyartha ho jaata hai isliye yaad karne se koi phaayda nahin nikalta। yaad karte koi bhi us em object ko paate nahin। bhagwan kaun hai, usse kya milega। kuchh bhi nahin jaante। itne sab dharma Christ, bauddha aadi preceptor athva dharma sthaapan karne vaalon ko unke followers yaad karte hain parantu unko yaad karne se hamko kya milna hai, kuchh bhi pata nahin hai। isse to jismaani padhaai achhi hai। em-object to buddhi mein rehti hai na। baap se kya milta hai? teacher se kya milta hai? aur guru se kya milta hai? yeh aur koi bhi nahin samajh sakte hain। tum yahaan baap ke phir teacher ke phir satguru ke bante ho। baap aur teacher se guru oonch hota hai। ab tum bachchon ko nishchay hua ki ham baap ke bane hain। baba hamko 5 hajaar varsha pahle muaaphik aakar ke svarga ka maalik banaate hain athva shantidham ka maalik banaate hain।

baap kehte hain - laadle bachche, tum mujhse apna varsa lenge na! sab kehte hain, haan baba kyon nahin lenge। achha - chandravanshi raam pad paane mein raazi honge? tumko kya chaahiye? baap saugaat le aaye hain। tum sooryavanshi lakshmi ko varenge ya chandravanshi seeta ko? tum apni shakla to dekho। shri naaraayan ko va shri lakshmi ko varne laayak ho? bigar laayak banne ke var kaise sakte? ab baap baith samjhaate hain - hoobhu jaise kalpa pahle samjhaaya tha phir se samjha rahe hain । tum phir se aakar varsa le rahe ho। tumhaari em object hi hai behad ke baap se behad ka varsa lene ki। woh hai sooryavanshi raajya pad, second grade hai chandravanshi। jaise eyar-condition, first class, second class hote hain na। to satayug ki poori raajdhaani, air-condition samjho। air-condition se oonch to kuchh hota nahin। phir hai first class। to ab baap kehte hain - tum air-condition ka sooryavanshi raajya lenge va chandravanshi first class ka? usse bhi kam to phir second class mein nambarvaar vaaris bano phir tum peechhe-peechhe aakar raajya paayenge। nahin to third class praja phir unmein bhi ticket reserve hoti hai। first class reserve, second class reserve, nambarvaar darje hote hain na। baaki sukh to vahaan hai hi। alag-alag compartment to hain na। saahookaar aadmi ticket lenge air-condition ki। tumhaare mein saahookaar kaun bante hain? jo sab kuchh baap ko de dete hain। baba yeh sab kuchh aapka hai। bhaarat mein hi mahima gaai hui hai - saudaagar, ratnaagar, jaadoogar yeh mahima hai baap ki, na ki shreekrishna ki। shreekrishna ne to varsa liya, satayug mein praalabdha paai। woh bhi baba ka bana। praalabdha kahaan se to paai hogi na। lakshmi-naaraayan satayug mein praalabdha bhogte hain। ab tum bachche achhi reeti jaante ho, zaroor inhonne past mein praalabdha banaai hogi na। nehru ki praalabdha kitni achhi thi। zaroor achhe karma kiye the। bigar taaj bhaarat ka baadshaah tha। bhaarat ki mahima to bahut hai। bhaarat jaisa oonch desh koi ho nahin sakta। bhaarat parampita paramatma ka birthplace hai। yeh raaz koi ki buddhi mein nahin baithta। paramatma hi sabko sukh-shanti dete hain, aadhaakalpa ke liye। bhaarat hi number one teertha sthaan hai। parantu drama anusaar ek baap ko bhoolne se srishti ki haalat kaisi ho gai hai isliye shivbaaba phir se aate hain। nimitta to koi bante hain na।

ab baap kehte hain - ashareeri bhav, apne ko aatma nishchay karo। main aatma kiski santaan hoon, yeh koi jaante nahin। wonder hai na। kehte bhi hain, O god father raham karo। shiv jayanti bhi manaate hain, parantu woh kab aaye the, koi ko pata nahin। aur yeh hai 5 hajaar varsha ki baat। baap hi aakar nai duniya satayug sthaapan karte hain। satayug ki aayu laakhon varsha to hai nahin। to ghor andhiyaara hai na। geeta ka updesh kitne aakar sunte hain। parantu na padhaane vaale, na padhne vaale kuchh samajhte hain। baap kitna sahaj kar samjhaate hain, sirf baap ko yaad karo। grihastha vyavhaar mein rehte kamal phool samaan bano। vishnu ko hi sab alankaar diye hain। shankh bhi diya hai, phool bhi diya hai। vaastav mein devtaaon ko thode hi diya jaata hai। yeh kitni guhya gambheer baaten hain। hain braahmanon ke alankaar। parantu braahmanon ko kaise deven, aaj brahman hain, kal shoodra ban padte hain। brahmaakumaar hi shoodra kumaar ban padte। maaya deri nahin karti। agar koi gaphlat ki, baap ki shreemat par na chala, buddhi kharaab hui, maaya achhi tarah chamaat maar munh pher deti hai। manushya gusse mein kehte hain na - thappad maar munh pher doonga। to maaya bhi aisi hai। baap ko bhoole aur maaya ek second mein thappad maar munh pher deti hai। ek second mein jeevanmukti paate hain। maaya second mein jeevanmukti khatma kar deti hai। kitne achhe-achhe bachchon ko maaya pakad leti hai। dekhti hai kahaan gaphlat mein hai to jhat thappad laga deti hai। baap to aakar puraani duniya se munh phiraate hain। laukik baap koi gareeb hota hai, puraani jhopdi mein rehte hain phir naya banaate hain, to bachchon ki buddhi mein baith jaata hai bas ab naya makaan taiyaar hoga, ham jaakar baithenge। yeh puraana tod denge। ab baap ne tumhaare liye hatheli par bahishta athva vaikuntha laaya hai। kehte hain laadle bachche, aatmaon se baat karte hain। in aankhon dvaara tum bachchon ko dekh rahe hain। baap samjhaate hain - main bhi drama ke vash hoon। aise nahin drama ke bigar kuchh kar sakta hoon। nahin, bachche beemaar padte hain, aise nahin main theek kar doonga। operation karne se chhuda doonga। nahin, karmabhog to sabko bhogna hi hai। tumhaare oopar to bojha bahut hai kyonki tum sabse puraane ho। satopradhaan se ekdam tamopradhaan bane ho। ab tum bachchon ko baap mila hai to baap se varsa lena chaahiye। tum jaante ho kalpa-kalpa drama anusaar ham baap se varsa lete hain। jo sooryavanshi, chandravanshi gharaane ke honge woh avashya aayenge। jo devta the phir shoodra ban gaye hain phir vahi brahman ban daivi sampradaay banenge। yeh baaten baap bigar koi samjha na sake।

baap ko tum bachche kitne meethe lagte ho। kehte hain, tum vahi kalpa pahle vaale mere bachche ho। main kalpa-kalpa tumko aakar padhaata hoon। kitni wonderful baaten hain। niraakaar bhagvaanuvaach। shareer se vaach karenge na। shareer alag ho jaata to aatma vaach nahin kar sakti। aatma detach ho jaati hai। ab baap kehte hain - ashareeri bhav। aise nahin ki praanaayaam aadi chadhaana hai। nahin, samajhna hai main aatma avinaashi hoon। meri aatma mein 84 janmon ka part bhara hua hai। baap khud kehte hain - meri aatma bhi jo act karti hai, woh sab part bhara hua hai। bhakti maarga mein vahaan part chalta hai phir gyaan maarga mein yahaan aakar gyaan deta hoon। bhakti maarga vaalon ko gyaan ka pata hi nahin hai। koi ne sharaab piya nahin to taste ka kaise pata ho। gyaan bhi jab leve tab pata pade। gyaan se sadgati hoti hai to zaroor gyaan saagar hi sadgati kar sakte hain। baap kehte hain main sarva ka sadgati daata hoon। sarvodaya leader hai na। kitne kisam-kisam ke hain। vaastav mein to sarva par daya karne vaala baap hai। baap se kehte hain - he bhagwan raham karo। to sab par raham vo karte hain, baaki sab hain had ke raham karne vaale। baap to saari duniya ko satopradhaan banaate hain। usmein tatva bhi satopradhaan ban jaate hain। yeh kaam hai hi paramatma ka। to sarvodaya ka arth kitna bada hai। ekdam sab par daya kar lete hain। svarga ki sthaapna mein koi bhi duhkhi nahin hota hai। vahaan number one furniture, vaibhav aadi milte hain। duhkh dene vaale jaanvar, makkhi aadi koi nahin hote। vahaan bhi bade aadmi ke ghar mein kitni saphaai rehti hai। kabhi tum makkhi nahin dekhenge। koi machchhar aadi ghus na sake। svarga mein koi ki taakat nahin jo aa sake। gand karne vaali koi cheez hoti nahin। natural phoolon aadi ki khushbu rehti hai। tumko sookshm vatan mein baba shoobeeras pilaate hain। ab sookshm vatan mein to kuchh bhi hai nahin। yeh sab saakshaatkaar hain। vaikuntha mein kitne achhe-achhe phool, bageeche aadi hote hain। sookshm vatan mein thode hi bageecha rakha hai। yeh sab hain saakshaatkaar। yahaan baithe hue tum saakshaatkaar karte ho।

geet bhi bada first class hai। tum jaante ho - hamko baap mila hai aur kya chaahiye? behad ke baap se behad ka varsa lete hain to baap ko yaad karna chaahiye। baap ki mat mashhoor hai। shreemat se ham shreshtha te shreshtha banenge। baaki hai sabki aasuri mat, isliye woh jaante nahin ki satayug mein sadaiv sukh tha। lakshmi-naaraayan ka raajya tha। chhotepan mein vahi raadhe-krishna hain, unke charitra aadi kuchh hain nahin। svarga mein to sab bachche bade first class hote hain। chanchalta ki koi baat hi nahin hoti hai। achha! meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jab is puraani duniya se munh pher liya to phir aisi koi gaphlat nahin karni hai jo maaya apni taraph munh kar le। shreemat ki avagya nahin karni hai। baap se poora varsa lena hai।

2) baap par apna sab kuchh svaaha kar pakka vaaris ban satayugi air-condition ki ticket leni hai। em object ko buddhi mein rakh purushaartha karna hai।

vardaan:- sva-sthiti dvaara sarva paristhitiyon ka saamna karne vaale avyakt sthiti ke abhyaasi bhav

jab avyakt sthiti ke abhyaas ki aadat ban jaayegi tab sva sthiti dvaara har paristhiti ka saamna kar sakenge। aur yeh aadat adaalat mein jaane se bacha degi isliye is abhyaas ko jab natural aur nature banaao tab natural calamities ho kyonki jab saamna karne vaale sva sthiti se har paristhiti ko paar karne ki shakti dhaaran kar lenge tab parda khulega। iske liye puraani aadton se, puraane sanskaaron se, puraani baaton se...poora vairaagya chaahiye।

slogan:- svayan ko nimitta karanhaar samjho to kisi bhi karma mein thakaavat nahin ho sakti।

maateshvari ji ke anmol mahaavaakya - “manushya-lok, dev-lok, bhoot-preton ki duniya ka vistaar''

bahut manushya prashn karte hain - yeh jo ashuddha jeevaatmaayen jinko ghost kaha jaata hai, yeh sach hai ya kalpana hai? athva vaham hai? us par aaj spashta samjhaaya jaata hai ki manushya aatma jab vikarma karti hai to unko anek prakaar se sazaayen bhogni avashya padti hain aur bhogni bhi manushya janma mein hain, na ki jaanvar panchhi aur pashu yoni mein। duhkh-sukh bhogne ki mahsoosta manushya mein jaasti hai, na ki jaanavron mein। is srishti khel mein mukhya part manushya ka hai। yeh jaanvar panchhi aadi to jaise srishti drama ki shobha hai, saare kalpa ke andar satayug aadi se kaliyug ke ant tak manushya aatmaon ke 84 janma hain, baaki yeh 84 laakh to jaanvar panchhi aadi ki variety ho sakti hai। ab yeh sab raaz paramatma bigar koi nahin samjha sakta। aatmaon ka nivaas sthaan hai brahm tatva arthaat niraakaari duniya, baaki in jaanavron ki aatmaayen brahm tatva mein nahin ja sakti, woh is aakaash tatva ke andar hi part bajaati hai, unhon ka bhi merge emerge ka aur sato, rajo, tamo mein aane ka part hota hai isliye prakriti ke bahut vistaar mein na jaakar pahle ham apni aatma ka kalyaan karen arthaat manamnaabhav। ab aate hain manushya aatma par, to jo aatmaayen ashuddha karma karne se vikarma banaati hain vo apne ashuddha sanskaar anusaar janma-maran ke chakkar mein aae aadi-madhya-ant arthaat marne ke samay apne kiye hue vikarmon ka saakshaatkaar paae sookshm mein saza bhogti hain। is thode samay mein anek janmon ka duhkh mahsoos hota hai phir shareer chhod jaakar garbha jel mein duhkh bhogti hain aur phir sanskaar anusaar aise maata-pita ke paas janma le vahaan bhi apne jeevan mein sukh duhkh bhogti hain, isko kaha jaata hai aadi-madhya-ant। parantu koi-koi aatma ko jaldi shareer nahin milta hai woh aakaari roop mein is aakaash tatva ke andar ghost ban bhatakti rehti hai, yeh bhi ek saza hai arthaat bhogna hai। us ashuddha jeevaatma ke saath kisi ka hisaab-kitaab hota hai to vo unmein pravesh kar unko duhkh deti hai arthaat hisaab-kitaab chuktu kar phir jaakar apna shareer dhaaran karti hai। koi jeevaatma to jismen pravesh karti hai unko bahut maarti bhi hai, bahut kashta deti hai parantu yeh sab hisaab-kitaab ke andar bhogna ka prakaar hai, jo sabhi manushya tan mein hi sukh duhkh mahsoos hota hai। yeh to aapko samjhaaya gaya hai ki jo aatma muktidhaam se is saakaari khel mein aati hai vo beech mein vaapas muktidhaam mein ja nahin sakti, parantu apne kiye hue ashuddha, shuddh karmon anusaar sanskaar le duhkh sukh ke chakkar mein aati hai। sabhi aatmaon ka punarjanma hota hai sirf ek paramatma ka nahin hota hai। achha।

ye avyakt ishaare - sada harshit rahne ke liye apni nature ko saral banaao, sahansheel bano।

baapdaada ko sabse pyaare saaph dil vaale bachche hain। saaph dil sada baapdaada ke dil takhtansheen hain। ve vritti mein, drishti mein, bol mein, sambandh-samparka mein saral aur spashta ek samaan dikhaai dete hain। saralta ki nishaani hai - dil, dimaag, bol ek samaan। dil mein ek, bol mein doosra - yeh saralta ki nishaani nahin hai। saral svabhaav vaale sada nirmaanchit, nirhankaari, nirasvaarthi hote hain। ve saral-chit, saral vaani, saral vritti, saral drishti vaale hote hain।