Murli du jour du jeudi 2 juillet 2026

02-07-2026 praatahmurli om shanti "baapdaada"' madhuban

“meethe bachche - tum vikaaron ka daan de do to raahu ka grahan utar jaayega, de daan to chhoote grahan''

prashn:- vrikshapti baap apne bhaaratvaasi bachchon par brihaspati ki dasha bithaane ke liye kaun si smriti dilaate hain?

uttar:- he bhaaratvaasi bachchon, tumhaara aadi sanaatan devi-devta dharma ati shreshtha tha। tum sarvagun sampanna, 16 kala sampoorn the। tum mujh saagar ke bachche kaam chita par baith kaale ho gaye ho, grahan lag gaya hai। ab main tumhein phir se gora banaane aaya hoon, yeh smriti aane se brihspati ki dasha baith jaati hai।

geet:- om namo shivaae…

om shanti। yeh kiski mahima suni? behad ke baap ki। oonch te oonch baap parampita paramatma hi hai। laukik baap ke liye to sab nahin kahenge। bachche jaante hain sab aatmaon ka paarlaukik baap - woh hai oonch te oonch। unka naam hi hai shiv। bigar naam roop ke to koi cheez hoti nahin। is samay sabko raahu ka grahan laga hua hai, isliye inko iron aged world kaha jaata hai। dashaayen bhi hoti hain, brihaspati ki dasha, shukra ki dasha... ab tumhaare oopar hai brihaspati ki dasha। jiski mahima suni, oonch te oonch bhagwan shivbaaba। unka asul naam hai shiv। baaki kisam-kisam ke anek naam rakh diye hain। asul naam hai shivbaaba। baap samjhaate hain main beejroop, chaitanya hoon। sat chit kehte hain phir kehte hain woh sukh ka saagar hai, aanand, shanti ka saagar hai। mahima saari us ek ki hi hai। bhaaratvaasi mahima gaate hain parantu samajhte kuchh bhi nahin। ekdam pattharbuddhi ho gaye hain। pattharbuddhi kisne banaaya? raavan ne। satayug mein bhaaratvaasi paarasbuddhi the, aaj se 5 hajaar varsha pahle yeh bhaarat paaraspuri tha, jismen devi-devta rehte the। bhaarat hi avinaashi khanda gaaya hua hai। bhaarat mein hi paarasbuddhi devta the, is samay pattharbuddhi patit rehte hain। patit kaise bante hain, yeh bhi baap ne samjhaaya hai। dvaapar se jab kaam chita par baithe hain to kaale ban jaate hain। kaam agni mein sab bhasma ho gaye hain। usmein bhi khaas bhaarat ki baat hai। bhaarat mein paarasbuddhi devtaaon ka raajya tha, unko vishnupuri, raamraajya bhi kaha jaata tha। yeh baap aakar bataate hain। meethe-meethe laadle bachchon jab tum satayug mein the, sarvagun sampanna the। yeh tumhaari mahima hai। vahaan vikaar hote nahin। dvaapar se raavan, 5 vikaaron ka raajya shuru hua hai। to raamraajya badalkar raavan raajya hota hai। abhi grahan laga hua hai। bilkul hi bhaarat kaala ho gaya hai। brihaspati ki dasha sabse achhi hoti hai। bhaarat par brihaspati ki dasha satayug mein thi। phir treta mein shukra ki dasha to do kala kam ho gai। usko kaha hi jaata hai silver ej। phir dvaapar, kaliyug aaya। seedhi utarte aaye, shaneechar ki dasha hui। is samay sab par raahu ki dasha hai। soorya ko grahan lagta hai to kehte hain de daan to chhoote grahan।

ab roohaani baap bachchon ko samjhaate hain - yeh hai roohaani gyaan। yeh koi shaastron ka gyaan nahin hai। shaastron ke gyaan ko bhakti maarga kaha jaata hai। satayug-treta mein bhakti hoti nahin। gyaan aur bhakti, phir hai vairaagya arthaat is puraani duniya ko chhodna hota hai। yeh hai shoodra varna। viraat roop dikhaate hain brahman, devta, kshatriy, vaishya... yeh bhaarat ki hi kahaani hai। viraat roop banaate bhi hain, parantu pattharbuddhi samajhte nahin। pattharbuddhi kyon hain? kyonki patit hain। bhaaratvaasi hi paarasbuddhi the, sampoorn nirvikaari the। aaj se 5 hajaar varsha pahle bhaarat svarga tha aur koi khanda nahin tha, yeh baap samjhaate hain। yeh raajayog kaun sikhaate hain? shivaachaarya। yeh hai gyaan ka saagar। koi manushya ko gyaan ka saagar, sarva ka patit-paavan nahin kah sakte hain। sarva ka liberator ek hi baap hai। baap khud hi aate hain - duhkh mein raavan se liberate karne, phir guide ban le jaate hain। unko roohaani panda kaha jaata hai। baap kehte hain - main tum sarva aatmaon ka panda hoon, sabko vaapis le jaaoonga। mere jaisa guide koi hota nahin। kehte bhi hain god father is liberator, guide, blissful... sabke oopar raham karte hain kyonki sab saagar ke bachche kaam chita par baith jal mare hain। usmein bhi khaas bhaarat ki baat hai। baap kehte hain - tum 16 kala sampoorn, sampoorn nirvikaari the। ab kaam chita par baith tum kya ban gaye ho! ab phir baap aaye hain। vrikshapti baap aakar manushya maatra par brihaspati ki dasha bithaate hain। khaas bhaarat, aam vishwa par is samay raahu ka grahan laga hua hai। baap kehte hain - main hi aakar bhaarat ki khaas, duniya ki aam gati-sadgati karta hoon। tum yahaan aaye hi ho paarasbuddhi banne। most beloved baap hua - sab aashikon ka maashook ek hi hai। sab nation mein ling zaroor banaate hain kyonki sabka baap hai na। shiv ke mandir bhaarat mein bahut hain, jisko shivaalay kehte hain, rahne ka sthaan। satayug mein hain devi-devta dharma ke manushya, parantu woh dharma kab tha, unhon ka raajya kab tha... yeh pata nahin hai। satayug ki aayu lambi likh di hai। baap baith samjhaate hain tumhaare oopar ab brihaspati ki dasha baith rahi hai - 21 janmon ke liye। vrikshapti hai gyaan ka saagar patit-paavan, jisko sab pukaarte hain। tum maat-pita ham baalak tere, sab unki mahima karte hain। barobar satayug treta mein sukh ghanere the। jabki baap heavenly god father hai, svarga ka rachayita hai to zaroor ham bhi svarga mein hone chaahiye। baap samjhaate hain tum sab svargavaasi the, ab narkavaasi bane ho। bhaarat ka hi aadi sanaatan devi-devta dharma hai। jaise Christian dharma ke hain, woh Christian dharma ke hi chale aate hain। baap kehte hain - tum devi-devta dharma vaale apne dharma ko kyon bhool gaye ho! jabki tum devi-devta dharma ke the।

baap smriti dilaate hain - tumhaara sabse shreshtha dharma, karma tha। abhi tum neech, paapi, kangaal ban gaye ho, tum ho hi devtaaon ke pujaari, phir apne ko hindu kyon kahlaate ho? bhaarat ka yeh kya haal ho gaya hai। jo devta dharma ke hain woh vikaari banne ke kaaran apne ko devta kahlaate nahin। baap kehte hain - abhi is patit duniya ka ant hai, mahaabhaarat ladaai bhi khadi hai। bhagvaanuvaach - ham tumko satayug ke liye raajayog sikhaata hoon। bhagwan to ek hi hai, ham unke bachche saaligraam hain। baap kehte hain - tum jo poojya the vahi pujaari bhagat ban gaye ho। ab phir gyaan lete ho poojya devta banne ke liye। phir dvaapar se poojya so pujaari ban jaayenge। tum poore 84 janma lete ho। jinhonne 84 janma liye hain vahi aakar brahmaakumaar kumaari banenge। brahma dvaara aadi sanaatan dharma ki sthaapna - yeh bhi gaaya hua hai। prajaapita hai to bahut bachche bhi honge। woh to zaroor yahaan hi chaahiye। kitni dher praja hai। in braahmanon ko hi phir devta banna hai। baap aakar shoodra se badal brahman dharma ki sthaapna karte hain। is sangamayug par hi aadi sanaatan devi-devta dharma ki sthaapna hoti hai। yeh hai kalyaankaari sangamayug। is ladaai ko hi kalyaankaari kaha jaata hai। is vinaash ke baad hi phir svarga ke get khulte hain। tum yahaan aaye ho svargavaasi banne va vishnupuri mein chalne। tum bachchon par ab avinaashi brihaspati ki dasha hai। 16 kala sampoorn kaha jaata hai। phir do kala kam hoti hain to shukra ki dasha kaha jaata hai। satayug mein brihaspati ki dasha hai phir treta mein shukra ki dasha। phir neeche girte aaye ho, mangal ki, shaneechar ki, raahu ki dasha bhi hoti hai। janma-janmaantar ulti dashaayen phirti aai hain। ab baap dvaara brihaspati ki dasha baithi hai। yeh hai behad ka baap gyaan ka saagar, patit-paavan। vahi tumhaara baap bhi hai, shikshak bhi hai, satguru bhi hai। baaki sab hain jhoothe, kiski sadgati kar nahin sakte। isko kaha jaata hai vicious world। woh hai viceless world। ab vicious world mein sabhi bahut duhkhi hain। ladaai maaraamaari kya-kya ho raha hai, isko kaha jaata hai - khoone naahek... bigar koi kasoor ke kya-kya karte rehte hain। ek hi bomb aisa giraayenge jo jhat saare khalaas ho jaayen। yeh vahi sangamayug ka samay hai। tum devtaaon ke liye phir nai duniya chaahiye। to ab baap kehte hain - meethe-meethe bachche manamnaabhav। yeh kaunse baap ne kaha? shivbaaba ne। woh to hai niraakaar। yoon niraakaar to tum bhi ho। parantu tum punarjanma mein aate ho, main nahin aata hoon। is samay sab patit hain, ek bhi paavan nahin। patit banna hi hai। sato-rajo-tamo mein utarna pade। is samay saara jhaad jadajdeebhoot avastha ko paaya hua hai। duniya bilkul puraani ho gai hai। ab phir se unko naya banaana pade। patit duniya mein dekho manushya kitne hain। paavan duniya mein bahut thode raajya karte hain। ek hi dharma tha aur koi dharma nahin tha। bhaarat ko hi heaven kaha jaata hai। gaaya jaata hai - ghat hi mein soorya, ghat hi mein chandrama...। satayug mein 9 laakh honge, peechhe phir vriddhi hoti hai। pahle bahut chhota phoolon ka jhaad hota hai, kaanton ka kitna bada forest hai। dehli mein mugal garden dekho kitna achha hai। usse bada koi garden nahin। forest dekho kitna bada hota hai। satayugi garden bhi bahut chhota hai। phir vriddhi ko paate-paate bada hota jaata hai। abhi to kaanton ka jangal ho gaya hai। raavan ke aane se kaante ban jaate hain। yeh hai kaanton ka jangal। aapas mein ladte hain to ek do ko maarte hain। kitna krodh hai, bandar se bhi badtar kaha jaata hai। to baap kehte hain - mere laadle bachche tumhaare oopar abhi vrikshapti ki dasha hai। ab de daan to chhoote grahan। sampoorn nirvikaari ab yahaan banna hai। phir yeh shareer chhod jaakar shivaalay mein aa jaayenge। shivaalay mein bahut sukh hota hai। devi-devtaaon ka raajya hai। satayug ko kaha jaata hai shivaalay, kaliyug ko kaha jaata hai veshyaalay। yeh veshyaalay raavan ne sthaapan kiya hai। ab baap kehte hain - patit se paavan banna hai, kaise banenge? kya triveni mein, ganga mein snaan karne se paavan ban jaayenge? yeh to janma-janmaantar karte aaye ho। karodon manushya jaakar snaan karte hain। bahut nadiyaan, naale talaab aadi hain, jahaan paani dekhte hain jaakar snaan karte hain kyonki apne ko patit samajhte hain। ab paarasnaath tumhaari paaras buddhi bana rahe hain। to aise paarasnaath baap ko kitna pyaar se yaad karna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is kaanton ki duniya se phoolon ke bageeche mein jaane ke liye jo bhi kaante (vikaar) hain, unhein nikaal dena hai। paaras banaane vaale baap ko bade pyaar se yaad karna hai।

2) is kalyaankaari sangamayug par shoodra se brahman so devta banne ka purushaartha karna hai। raahu ke grahan ko utaarne ke liye vikaaron ka daan dena hai।

vardaan:- sangamayug par har karma kala ke roop mein karne vaale 16 kala sampanna bhav

sangamayug vishesh karma roopi kala dikhaane ka yug hai। jinka har karma kala ke roop mein hota hai unke har karma ka va gunon ka gaayan hota hai। 16 kala sampanna arthaat har chalan sampoorn kala ke roop mein dikhaai de - yahi sampoorn stage ki nishaani hai। jaise saakaar ke bolne, chalne ...sabhi mein visheshta dekhi, to yeh kala hui। uthne baithne ki kala, dekhne ki kala, chalne ki kala thi। sabhi mein nyaaraapan aur visheshta thi। to aise follow father kar 16 kala sampanna bano।

slogan:- powerful woh hai jo phauran parakhkar phainsala kar de।

ye avyakt ishaare - jvaalaasvaroop sthiti mein rah shaktishaali yaad ka anubhav karo

aap bachchon ka yog jab jvaala swaroop shaktishaali hoga tab pavitrata ki agni second mein vishwa ke kichde ko bhasma kar sakegi। pavitrata ki yeh shakti mahaan shakti hai। ant mein jab aap sampoorn pavitra ho jaayenge tab aapke shreshtha sankalp ke lagan ki agni se yeh sab kichda bhasma ho jaayega।