Murli du jour du vendredi 3 juillet 2026

03-07-2026 praatahmurli om shanti "baapdaada"' madhuban

“meethe bachche - tum is drama ke aadi-madhya-ant ko jaante ho, tumhein baap dvaara gyaan ka teesra netra mila hai isliye tum ho aastik''

prashn:- baap ka kaun sa title dharma sthaapkon ko nahin de sakte hain?

uttar:- baba hai satguru। kisi bhi dharma sthaapak ko guru nahin kah sakte kyonki guru woh jo duhkh se chhudaaye, sukh mein le jaaye। dharma sthaapan karne vaalon ke peechhe to unke dharma ki aatmaayen oopar se neeche aati hain, woh kisi ko le nahin jaate। baap jab aate hain to sabhi aatmaon ko ghar le jaate hain isliye woh sabhi ke satguru hain।

geet:- is paap ki duniya se…

om shanti। meethe-meethe roohaani bachchon ne geet ki line suni। yeh hai paap ki duniya। bachche jaante bhi hain, yeh paap aatmaon ki duniya hai। kitna bura akshar hai। parantu manushya yeh samajh nahin sakte ki sachmuch yeh paap aatmaon ki duniya hai। zaroor koi punya aatmaon ki duniya bhi thi, usko kaha jaata hai svarga। paap aatmaon ki duniya ko kaha jaata hai narka। bhaarat mein hi svarga aur narka ki charcha bahut hai। manushya marte hain to kehte hain svargavaasi hua, to isse siddha hota hai narkavaasi the। patit duniya se paavan duniya mein gaya। parantu manushyon ko kuchh bhi pata nahin hai, jo aata hai so bol dete hain। yathaartha arth kuchh bhi nahin samajhte hain।

baap aakar tum bachchon ko tasalli dete hain ki ab thoda dheeraj dharo। tum paapon ke bojh se bahut bhaari ho pade ho। ab tumko punya aatma banaae aisi duniya mein le jaate hain, jisko svarga kaha jaata hai। vahaan na koi paap hoga, na koi duhkh hoga। bachchon ko dheeraz mila hua hai। aaj yahaan hain kal apne shantidham, sukhdhaam mein jaayenge। jaise beemaar manushya thoda theek hone par hota hai to doctor dheeraj dete hain - jaldi se tum bahut achha ho jaayenge। ab yeh to hai behad ka dheeraz। behad ka baap kehte hain - tum to bahut duhkhi patit ho gaye ho। ab ham tum bachchon ko aastik banaate hain। phir rachna ka bhi parichay dete hain। rishi aadi to kehte aaye hain ki ham rachayita aur rachna ko nahin jaante hain। ab usko kaun jaante hain। kab aur kis dvaara jaan sakte hain, yeh kisko pata nahin hai। drama ke aadi-madhya-ant ko koi jaante hi nahin। baap kehte hain - main sangam-yug par aakar drama anusaar tum bachchon ko pahle-pahle aastik banaata hoon phir tumko rachna ke aadi-madhya-ant ka raaz sunaata hoon arthaat tumhaara gyaan ka teesra netra kholta hoon। tumko roshni mil gai hai। aankhon ki roshni chali jaati hai to manushya andhe ho jaate hain। is samay manushyon ko gyaan ka teesra netra nahin hai। manushya hokar us baap aur rachna ke aadi-madhya-ant ko nahin jaante to unko buddhiheen kaha jaata hai। geet mein bhi hai - ek hain andhe ki aulaad andhe। doosre hain sajje। dikhaate hain - mahaabhaarat ladaai lagi thi aur ek aadi sanaatan devi-devta dharma ki sthaapna hui thi। baap ne aatmaon ko aakar raajayog sikhaaya tha - satayugi svaraajya dene ke liye। aatmaayen kehti hain main raaja hoon, main barrister hoon। tumhaari aatma ab jaanti hai - ham vishwa ka svaraajya pa rahe hain - vishwa ke rachayita baap dvaara। woh kiska rachayita hai? nai duniya ka। baap nai srishti rachte hain। creator bhi hai to unmein saara gyaan bhi hai। saare world ki history koi ek bhi nahin jaante hain। kisko gyaan ka teesra netra nahin hai। sivaae baap ke koi teesra netra de nahin sakta। world ki history, geography, mool vatan, sookshm vatan, sthoolavtan... yeh sab tum jaante ho। mool vatan hai aatmaon ki srishti। sannyaasi kehte hain ham brahm mein leen ho jaayenge va jyoti jyot samaayenge। aisa hai nahin। tum jaante ho brahm tatva mein jaakar nivaas karenge। woh shantidham ghar hai। woh kah dete hain brahm hi bhagwan hai, kitna farka hai। brahm to tatva hai। jaise aakaash tatva hai, vaise brahm bhi tatva hai। jahaan ham aatmaayen aur parampita paramatma nivaas karte hain, unko sweet hom kaha jaata hai। woh hai aatmaon ka ghar। bachchon ko maaloom pada hai, brahm mahtatva mein koi aatmaayen leen nahin hoti hain aur aatma kabhi vinaash ko praapta nahin hoti। aatma avinaashi hai। yeh drama bhi bana banaaya avinaashi hai। is drama ke kitne actors hain। abhi hai sangamayug, jabki sabhi actors haazir hain। naatak poora hota hai to sab actors, creator aadi sab aakar haazir hote hain। is samay yeh behad ka drama bhi poora hota hai phir repeat hona hai। un had ke naatkon mein change ho sakti hai। drama puraana ho jaata hai। yeh to behad ka drama anaadi avinaashi hai। baap trikaaldarshi, trinetri banaate hain। devtaayen koi trikaaldarshi nahin hote hain। na shoodra varna vaale trikaaldarshi hote hain। trikaaldarshi to sirf tum brahman varna vaale ho। jab tak brahman na banen tab tak teesra netra gyaan ka mil na sake। tum jhaad ke aadi-madhya-ant ko, sabhi dharmo ko bhi jaante ho। tum bhi master knowledgeful ho jaate ho। baap bachchon ko aapasmaan banaayenge na। gyaan ka saagar to ek hi baap hai, jo sabhi aatmaon ka baap hai। sabhi bachchon ko aastik banaae trikaaldarshi banaate hain।

ab tum bachchon ko sabko yeh kehna hai ki shivbaaba aaya hai, unko yaad karo। jo aastik bante hain woh baap ko achhi reeti pyaar karte hain। tumhaare oopar baap ka bhi pyaar hai। tumko svarga ka varsa dete hain। gaaya hua hai ki vinaash kaale vipreet buddhi vinshanti aur vinaash kaale preet buddhi vijayanti। geeta mein koi-koi akshar sachche hain। shreemad bhagvat geeta hai sarvottam shaastra। aadi sanaatan devi-devta dharma ka shaastra। yeh bhi samjhaaya hai mukhya dharma shaastra hain hi 4 aur jo dharma vaale hain, woh aate hi hain sirf apne dharma ki sthaapna karne। raajaai aadi ki baat nahin। unko guru bhi nahin kah sakte। guru ka to kaam hi hai - vaapas le jaana। ibraahim, buddha, Christ aadi to aate hain phir unke pichhaadi unki vanshaavli bhi aati hai। guru woh jo duhkh se chhudaaye aur sukh mein le jaaye। woh to sirf dharma sthaapan karne aate hain। yahaan to bahuton ko guru kah dete hain। brahma, vishnu, shankar ko bhi guru nahin kah sakte। ek shivbaaba hi sarva ka sadgati daata hai। pukaarte bhi ek raam ko hain। shivbaaba ko bhi raam kehte hain। bahut bhaashaayen hain, to naam bhi bahut rakh diye hain। asul naam hai shiv। unko somnaath bhi kehte hain। somras pilaaya arthaat gyaan dhan diya। baaki paani aadi ki to baat hi nahin। tumko sammukh knowledgeful, blissful bana rahe hain। baap to gyaan ka saagar hai। tum bachchon ko gyaan nadiyaan banaate hain। saagar ek hota hai। ek saagar se anek nadiyaan nikalti hain। abhi tum ho sangam par। is samay yeh saari dharti raavan ka sthaan hai। sirf ek lanka nahin thi, saari dharti par raavan ka raajya hai। raamraajya mein bahut thode manushya honge। yeh sirf abhi tumhaari buddhi mein hai। baba ne samjhaaya hai - main 3 dharmo ki sthaapna karta hoon - brahman, devta, kshatriy। phir vaishya, shoodra varna mein aur sabhi aakar apna-apna dharma sthaapan karte hain। anek dharmo ka vinaash bhi karaate hain। bhaarat mein trimoorti ka chitra bhi banaate hain। parantu usmein shiv ka chitra gum kar diya hai। shiv se hi siddha hota hai ki parampita paramatma shiv brahma dvaara sthaapna, vishnu dvaara paalna karaate hain, unko karnakraavanhaar kaha jaata hai। khud bhi karma karte hain, tum bachchon ko bhi sikhlaate hain। karma-akarma-vikarma ki gati bhi samjhaate hain। raavan raajya mein tum jo karma karte ho woh vikarma ban jaata hai। satayug mein jo karma karte ho woh akarma ho jaata hai। yahaan vikarma hi hota hai kyonki raavan ka raajya hai। satayug mein 5 vikaar hote hi nahin। ek-ek baat samajhne ki hai aur second mein samjhaai jaati hai। om ka arth vo log to bahut vistaar se samjhaate hain। baap kehte hain - om maana aham aatma aur yeh mera shareer। kitna sahaj hai। aur tum samajhte ho ham sukhdhaam mein ja rahe hain। shreekrishna ke mandir ko sukhdhaam kehte hain। hai bhi krishnapuri। maataayen, krishnapuri mein jaane ke liye bahut mehnat karti hain। tum abhi bhakti nahin karte ho। tumko gyaan mila hai aur koi manushya maatra mein yeh gyaan nahin hai। main tumko paavan banaakar jaata hoon phir patit kaun banaate hain? yeh koi bata na sake। sab mel athva female bhaktiyaan hain, seetaayen hain। sabki sadgati karne vaala baap hai। sab raavan ki jel mein hain। yeh hai hi duhkhadhaam। baap tumko sukhdhaam ka maalik banaate hain। aise baap ko 5 hajaar varsha baad sirf tum dekhte ho। lakshmi-naaraayan ki aatma ko ab knowledge hai। ham chhotepan mein yeh (krishna) hain phir bade banenge, aise shareer chhodenge। phir doosra lenge aur koi ko yeh knowledge nahin hai।

baap kehte hain - tum sab paarvatiyaan ho, shivbaaba tumko amraktha suna rahe hain - amar banaane ke liye, amarlok mein le jaane ke liye। yeh mrityulok hai। tum sab paarvatiyaan amarnaath dvaara amraktha sun rahi ho। tum sach-sach bante ho sirf baap ko yaad karne se tumhaari aatma amar banti hai, jahaan duhkh ki baat nahin hoti। jaise sarpa ek khaal chhod doosri lete hain। yeh sab misaal yahaan ke hain। bhramri ka misaal bhi yahaan ka hai। tum brahman kya karte ho? vikaari keedon ko badal devta banaate ho। manushya ki hi baat hai। bhramri ka to yeh ek drishtaanta hain। tum brahman bachche abhi baap dvaara amar katha sun rahe ho, auron ko baith gyaan ki bhoon-bhoon karte ho, jisse manushya se devta, svarga ki pari ban jaayenge। baaki aise nahin ki maanasrovar mein dubki lagaane se koi pari ban jaayenge। yeh sab hai jhooth। tum jhooth hi sunte aaye ho, ab baap truth sunaate hain। ab baap kehte hain - apne ko aatma samjho। tum samajhte ho niraakaar parampita paramatma is mukh dvaara suna rahe hain। ham in kaanon dvaara sun rahe hain। aatma-abhimaani banna hai, phir paramatma bhi realise karaate hain। main kaun hoon? doosra koi aatma-abhimaani bana na sake। sivaae baap ke aur koi kah na sake ki tum aatma-abhimaani bano। shiv jayanti bhi manaate hain parantu unki jayanti kaise hai, yeh nahin jaante। baap hi khud aakar samjhaate hain - main saadhaaran boodhe tan mein pravesh karta hoon। nahin to brahma aayega kahaan se? patit tan hi chaahiye। sookshmavtanvaasi brahma mein viraajmaan hokar to brahman nahin rachenge। kehte hain main patit shareer, patit duniya mein aata hoon। gaaya hua hai - brahma dvaara sthaapna। phir jiski sthaapna karte hain, jo yeh gyaan paate hain woh devta ban jaate hain। manushya brahma ka chitra dekhkar moonjh jaate hain। kehte hain yeh to daada ka chitra hai। prajaapita brahma to zaroor yahaan hoga। sookshm vatan mein kaise praja rachenge। prajaapita ke bachche hajaaron brahmaakumaar kumaariyaan hain। jhooth thode hi hoga। ham shivbaaba dvaara varsa pa rahe hain। tum bachchon ko samjhaaya hai woh avyakt brahma hai। prajaapita to saakaar mein chaahiye। yeh patit hi to paavan bante hain। tat tvam। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aatma-abhimaani bankar in kaanon dvaara amraktha sunni hai। gyaan ki bhoon-bhoon kar aap samaan banaane ki seva mein rehna hai।

2) baap samaan knowledgeful, blissful banna hai। somras peena aur pilaana hai।

vardaan:- maaya ke vighnon ko khel ke samaan anubhav karne vaale master vishwa-nirmaata bhav

jaise koi bujurga ke aage chhote bachche apne bachpan ke albelepan ke kaaran kuchh bhi bol den, koi aisa kartavya bhi kar len to bujurga log samajhte hain ki yeh nirdosh, anjaan, chhote bachche hain। koi asar nahin hota hai। aise hi jab aap apne ko master vishwa-nirmaata samjhenge to yeh maaya ke vighna bachchon ke khel samaan lagenge। maaya kisi bhi aatma dvaara samasya, vighna va pareeksha paper bankar aa jaae to usmein ghabraayenge nahin lekin unhein nirdosh samjhenge।

slogan:- sneh, shakti aur eeshvareey aakarshan svayan mein bharo to sab sahayogi ban jaayenge।

ye avyakt ishaare - jvaalaasvaroop sthiti mein rah shaktishaali yaad ka anubhav karo

abhi jvaalaamukhi ban aasuri sanskaar, aasuri svabhaav sab-kuchh bhasma karo। jaise deviyon ke yaadgaar mein dikhaate hain ki jvaala se asuron ka sanghaar kiya। asur koi vyakti nahin lekin aasuri shaktiyon ko khatma kiya। yeh abhi aapki jvaalaasvaroop sthiti ka yaadgaar hai। ab aisi yog ki jvaala prajjavlit karo jismen yeh kaliyugi sansaar jalkar bhasma ho jaaye।