Murli du jour du dimanche 12 juillet 2026

12-07-26 praatahmurli om shanti ''avyakt-baapdaada'' revise 31-12-10 madhuban

puraane varsha ko vidaai dene ke saath puraane sanskaaron ko vidaai de nirvighna rahne ka dridh sankalp lo aur merciful, master daata ban mansa seva dvaara duhkhi ashaanta aatmaon ko sahaara do

aaj baapdaada chaaron or ke bachchon ko naya varsha aur nai duniya ki mubaarak dene, sookshm vatan se sthool vatan mein mubaarak dene aaye hain। sabhi bachche bhi sneh aur pyaar se apne madhuban ghar mein pahunch gaye hain। duniya vaale to sirf new varsha manaate hain, jo ek din ka hota hai। aap log nai duniya ka sangam par sada manaate rehte ho। aapke saamne nai duniya naynon mein sada samaai hui hai। yaad karo aur pahunch jaao। aankhon mein samaai hui hai na! anubhav hota hai ki abhi-abhi sangam par hain, aaj sangam par hain aur kal apne raajya mein gaye ki gaye! aise naynon mein spashta dikhaai deti hai। duniya vaale to ek do ko ek din ki mubaarak dete hain lekin aapko baapdaada ne gift mein golden world di hai, jo kaaphi samay chalne vaali hai। aisi naynon mein samaai hui hai jo ek second mein pahunch sakte ho। sabke saamne apni golden duniya naynon mein samaai hui hai। ek second mein pahunch sakte ho na! aaj sangam mein hain kal raajya adhikaari ban raajya karenge।

abhi samay anusaar jaante ho ki aap poorvajon ke bhakta log duhkhi aur ashaanta hone ke kaaran, aap poorvaj aatmaon ko kitna pukaar rahe hain। aavaaj sunne aata hai, kaise duhkh ashaanti se pukaar rahe hain? humein shanti de do, sukh de do, khushi de do। aavaaj sunne aata hai? do, do… to abhi aap aatmaon ko merciful, kalyaankaari daata ke bachche roop mein aatmaon ko mansa seva dvaara dene ka kaarya karna hai। baapdaada ko to bada taras padta hai in duhkhi, ashaanta aatmaon par। aapko bhi taras padta hai na! (khaansi aai) (aaj brahma baap ki khaansi aa gai hai) to aapko bhi aatmaon ke oopar taras pad raha hai na! abhi is varsha mein, kyonki aaj ke din varsha naya aa bhi raha hai aur puraana varsha jaane vaala bhi hai। to jaane vaale varsha mein aapne kya plan banaaya hai? varsha to jaayega lekin aap sab apne liye varsha ke saath kya vidaai denge? jaise varsha vidaai lega vaise aap apni jeevan mein kya vidaai denge? aur naya kya bharenge? sada ke liye vidaai denge va thode samay ke liye? kyonki baapdaada ne ishaara diya hai ki ab tak jo puraane sanskaar rahe hue hain un sanskaaron ko man mein dekhkar, jaankar samaapta karna hi hai। baapdaada ko yeh puraane sanskaar purushaartha mein vighna roop dikhaai dete hain। bachche ek taraph kehte hain baba hi mera sansaar hai phir puraane sanskaar kahaan se aaye? sansaar hi baap hai to yeh puraane sanskaar jo purushaartha mein vighna daalte hain, yeh khatma hona chaahiye na! amritvele jab sab roohrihaan karte hain to baap ne dekha sab apna potaamel dete hain to ab tak puraane sanskaar hi purushaartha ko dheela karte hain।

to aaj ke din varsha ko vidaai dete hue in sanskaaron ko bhi vidaai de sakte ho? de sakte ho? haath uthaao। dena padega। haath uthaana to bahut sahaj hai lekin man ka haath uthaana hai। utha rahe hain। puraane sanskaaron ko sada ke liye vidaai denge isliye haath utha rahe ho। phir se uthaao। achha। majority bachchon ne haath uthaakar baapdaada ko khush kar diya। baapdaada ko yahi khushi hai ki himmat vaale bachche hain। jahaan himmat hai vahaan baapdaada ka sada sahayog hai। to abhi jab haath uthaaya hai to baap ka har chhota bada sthaan sada ke liye nirvighna ho gaya na! kyonki baapdaada ke paas jo result aati hai uska kaaran puraane sanskaar hote hain। to aaj sanskaar sankalp se samaapta kiya arthaat nirvighna bhav ka vardaan liya। liya? vardaan liya? himmat ka phal to milta hai na! aur baapdaada ka vardaan mila hua hai ki ek kadam bachchon ke himmat ka aur anek kadam baap ki madad ke hain hi hain। to yeh sankalp aaj se yaad rakhna hamne puraane sanskaar de diye। agar maano aapke paas vaapas aayen to kya karenge? kya karenge? vaapas di hui cheez apne paas nahin rakhi jaati hai kyonki de di arthaat meri nahin। to jab meri nahin to apne paas kaise rakh sakte? baap ko diya, to baap ko hi denge na। pakka hai na, de diya na! pakka? abhi do-do haath uthaao। pakka। peechhe vaale bhi utha rahe hain।

baapdaada ko yahi khushi hai ki kaliyug mein rehte bhi jo baap dvaara praapti hui hai uska anubhav ab sangam par karenge। duniya ke liye kaliyug hai lekin aapke liye sangamayug arthaat sarva praaptiyon ka yug hai। parmaatma praaptiyaan, sarva shaktiyaan, sarva gun, sarva gyaan ka khajaana jo praapta hai uska practical anubhav karenge। to aaj ke din jinhonne bhi haath uthaaya hai un sabhi bachchon ko chaahe yahaan sammukh baithe hain, chaahe door baithe desh videsh mein sun rahe hain, un sabhi bachchon ko bahut dil se baapdaada kya de rahe hain? mubaarak to de rahe hain lekin mubaarak ke saath sabhi ke mastak ke oopar haath rakh rahe hain। aap bhi aur baapdaada bhi man hi man mein dance kar rahe hain “vaah bachche vaah!'' abhi aap bhi man mein dance kar rahe ho na! bolo, haan ji।

abhi dekhna teachers। jo bhi teachers hain woh haath uthaao। foreign ki teachers bhi hain na! baapdaada ko to har ek bachche ka yeh dridh sankalp sun khushi hai ki bachchon ne jo lakshya rakha hai - baap samaan sampanna aur sampoorn banne ka, usmein yeh nirvighna rahne ka dridh sankalp sampanna samay ko bhi sameep laayega। baapdaada ko yeh bhi khushi hai ki sabhi bachchon ne jo sankalp kiya hai woh sampanna karenge aur jo duniya vaale duhkhi hain, ashaanta hain unki mansa seva kar unhon ko bhi kuchh na kuchh sahaara dete rahenge kyonki baapdaada ko bachchon ka pukaarna, chillaana sahan nahin hota। hai to aapka bhi parivaar na! to bahut badh raha hai duhkh ashaanti, to ab merciful bano। yeh sankalp bhi saath mein karo ki chalte phirte aur vishesh amritvele aatmaon ki mansa seva bhi avashya karenge, yeh sankalp le sakte ho? jaise yeh sankalp liya ki sada ke liye puraane sanskaaron ko samaapta karenge, sada ke liye liya hai na! thode samay ke liye to nahin! to jaise sanskaar ko samaapta kar baap samaan banenge aise daata ke bachche ban master daata swaroop se mansa seva bhi karni hai। iske liye taiyaar ho? mansa seva karne ke liye taiyaar ho? haath uthaao, mansa seva bhi karenge? saare din mein jo bhi time mile, usmein mansa seva zaroor karna kyonki aap bachchon ko hi sukhmay sansaar laana hai। baap ne aap bachchon ko isi seva ke liye right-hand banaaya hai। haath se diya jaata hai na। to aap baap ke right hand hain। to baapdaada aap right hand arthaat haathon dvaara sabhi ko yeh seva dilaane chaahta ki kuchh na kuchh dete raho। woh chilla rahe hain do-do aur aap duhkhiyon ko sukh de, pareshaan ko kuchh shakti de karke punya ka kaam karo। abhi aap bachche jinhonne apne aapko jaana, baap ko jaana, varse ke adhikaari bane to doosron ko bhi banaao kyonki abhi sabhi mukti chaahte hain। sabhi ko mukti mein bhej aap baap ke vardaan se raajya adhikaari banenge isliye baap yahi har bachche ko sankalp de rahe hain - nirvighna bhav, sevaadhaari bhav। jo bachche baap ke ban gaye hain un bachchon ko sangamayugi brahman jeevan ka maza anubhav ho raha hai aur hota hi rahega। to chaahe naye aaye hain, chaahe puraane bhi hain lekin jo apne ko samajhte hain baap ke varse ke adhikaari hain, ateendriy sukh mein jhoolte rehte hain aur aage bhi jo sankalp kiya hai, sanskaar par vijayi banne ka sankalp liya hai, woh sabhi aatmaayen koton mein koi bane hain, ya koi mein bhi koi bane hain? bachchi ne kaha hai na, janak ne 108 ki maala, 16 hajaar ki maala ka khaas milan karo। to aap jo samajhte hain ki ham 16 hajaar ya 108 is maala mein aane hi vaale hain, woh haath uthaao।

naye naye bhi utha rahe hain। mubaarak ho। nishchaybuddhi vijayi hote hain। baapdaada bhi jaante hain ki jo nishchaybuddhi hain woh aage ja sakte hain, jaayenge। achha। jo pahli baari aaye hain woh haath uthaao। sabhi ki taraph se baapdaada aap logon ko mubaarak de rahe hain। nishchay jo kiya hai na, isko amritvele sada revise karte rehna। achha। baapdaada ko bachchon ko dekh khushi hoti hai ki samay toolate ke pahle apne varse ke adhikaari ban gaye। iseelie yahaan aaye hue sarva parivaar ki taraph se va apne-apne centre par rahne vaale sabhi bachchon ki taraph se bhi baapdaada aap sabko mubaarak de rahe hain। abhi aap ek kamaal karna, himmat hai? bolen, himmat hai? aap log pahle se hi nirvighna rehna। nishchay aur nashe mein number one jaana। baapdaada ko khushi hoti hai ki puraane to puraane hain lekin naye thode samay mein kamaal dikhaayenge। achha।

abhi baapdaada chaahe naye hain, chaahe puraane hain, sabhi ko ek second ka kaarya dete hain। sabhi abhi-abhi ek second mein apne aapko aur sabhi sankalpon se door kar ek second mein apne ko bindu roop mein sthit kar sakte ho, karenge? ek second mein main bindu hoon, koi sankalp nahin bindu hoon। (drill karaai) jisne second mein apne ko bindu sthiti mein sthit kiya woh haath uthaao। second mein lagaaya। achha। abhi yeh practice 15 din, saare din mein har ghante mein ek second mein bindu lagaao, yeh practice har ek karna aur vahaan vaataavran mein rahkar, apne kaarya mein rehte check karna ki ek second mein bindu roop mein saphalta mili? kyonki yahaan to vaayumandal bhi hai lekin apne-apne sthaan mein rehte second mein bindu swaroop mein sthit ho sakte hain, yeh abhyaas karna kyonki baapdaada ne bata diya hai, jitna aage chalte jaayenge utna yeh ek second mein bindu sthiti mein sthit hone ki aavashyakta padegi isliye apne aapko hi check karna aur apne-apne sthaan mein report teacher ko likh-kar dena। phir teachers dvaara chaahe yahaan hain ya nahin bhi hain, sabhi classes ke liye yeh homework hai, iski result baapdaada ke paas aayegi to dekh lenge, isse pata padega ki aap 108 ya 16 hajaar ki maala, uske adhikaari hain। second mein roz ki dincharya mein kitna saphal hue, usse pata padega ki aap kis yogya hain! kyonki abhi haath uthvaayenge, kaun apne ko samajhte hain practical dhaarna mein ki main 108 ya 16 hajaar ki maala mein aayenge, to sab utha denge, isliye aap sirf result likhna usse samajh jaayenge kyonki daadiyaan maano naam deti hain to koi samjhenge ham bhi aa sakte hain na, to is report se pata pad jaayega।

baapdaada poochhte hain ki sada second mein jo roop anubhav karne chaaho woh kar sakte ho? second mein? 5 swaroop jo sunaaye the, woh bhi jab chaaho tab second mein woh swaroop ban sakte ho? yeh practice karke apne aapko maaloom pade ki main jo chaahoon us sthiti mein second mein rah sakta hoon, ya time lagta hai! baaki baapdaada khush hai ki haath uthaane mein, majority haath uthaate hain। abhi yeh haath uthaaya hai lekin abhyaas karte-karte yeh aisa ho jaayega jaise abhi dvaapar kaliyug ke abhyaas mein deh abhimaan mein aana natural ho gaya hai, aise jis swaroop mein bhi sthit hone chaaho woh aisa hi easy ho jaae kyonki samay aisa aane vaala hai jismen aapko is abhyaas ki aavashyakta padegi। to yeh abhyaas har ek apne-apne kaarya mein hote karte raho aur result apni nimitta teachers ko dete raho। to is varsha ki samaapti mein yeh practice karte rehna। apne aapehi karo, apna teacher bhi aap bano lekin result dikhaane ke liye apna chart dete rahenge to attention jaayega। aisa anubhav karo jaise haath ko jahaan chaaho thahre, thahra sakte ho na! aise man ko jis sthiti mein rahaane chaaho us sthiti mein rahe। mahaamantra bhi yaadgaar mein manamnaabhav hai। man ki drill ismen saphalta kitni hai, woh apna aap hi anubhav karo।

baapdaada yahi chaahte hain ki ek-ek bachcha abhi sangamayug ka sukh, sangamayug ki praaptiyaan, har praapti ke anubhvi banen। apne aapko check karna, har praapti, har shakti, har gyaan ke raaz ko, yog ki har vidhi ko, dhaarna mein bhi har dhaarna mein anubhvi bana hoon? apni saari checking karte raho aur aage se aage badhaate raho। to aaj baapdaada checking aur praapti isko check karne ke liye kah rahe hain। koi bhi praapti mein kam ho gaye to draamaanusaar pareekshaayen bhi samay anusaar vahi aayengi isliye sab subject mein sampanna aur sampoorn ki checking karo aur change karo।

aaj ke din baapdaada aap sabke saadhaaran swaroop mein bhi aapke bhavishya ka roop, praaptiyon ka roop dekh rahe hain। achha। sabhi taraph ke sikeeldhe, baapdaada ke diltakhtansheen, baapdaada ke pharmaanvardaar, aagyaakaari, teevra purushaarthi bachchon ko baapdaada ka bahut-bahut dil ka pyaar aur baapdaada ki mubaarak ho, mubaarak ho, mubaarak ho। baapdaada ko bhi bachchon ko dekh khushi hoti hai vaah, vaah, vaah! mere bachche vaah!

saara hi saal nirvighna aur khushmijaaz rehna। apni chalan aur chehre se sabko khushi aur muskaraahat sikhaana। sada udna aur udaana। chalna nahin udna। udti kala sarva ko priy hai। to udte udte sandesh dena। sab aapko dekhkarke khushi ke jhoole mein jhoolne lage। happy happy happy new year। achha - om shanti।

vardaan:- eeshvareey bhaagya mein light ka crown praapta karne vaale sarva praapti swaroop bhav

duniya mein bhaagya ki nishaani raajaai hoti hai aur raajaai ki nishaani taaj hota hai। aise eeshvareey bhaagya ki nishaani light ka crown hai। aur is crown ki praapti ka aadhaar hai purity। sampoorn pavitra aatmaayen light ke taajdhaari hone ke saath-saath sarva praaptiyon se bhi sampanna hoti hain। agar koi bhi praapti ki kami hai to light ka crown spashta dikhaai nahin dega।

slogan:- apni roohaani sthiti mein sthit rahne vaale hi mansa mahaadaani hain।

ye avyakt ishaare - jvaalaasvaroop sthiti mein rah shaktishaali yaad ka anubhav karo

abhi achha-achha kehte hain, lekin achha banna hai yeh prarena nahin mil rahi hai। uska ek hi saadhan hai - sangathit roop mein jvaala swaroop bano। ek ek chaitanya light house bano। sevaadhaari ho, snehi ho, ek bal ek bharose vaale ho, yeh to sab theek hai, lekin master sarvashaktivaan ki stage, stage par aa jaae to sab aapke aage parvaane ke samaan chakra lagaane lagenge।