Murli du jour du mardi 14 juillet 2026

14-07-2026 praatahmurli om shanti "baapdaada"' madhuban

“meethe bachche - yaad ki yaatra mein kabhi thakna nahin, deh-abhimaan ke toofaan thakaate hain, dehi-abhimaani bano to thak door ho jaayega''

prashn:- kaun sa sanskaar 21 janmon ki shreshtha takdeer ko bigaadne vaala hai?

uttar:- agar kisi mein roothne ka sanskaar hai। baap se va padhaai se rooth jaate hain to 21 janmon ki takdeer bigad jaati hai isliye baba kehte - meethe bachche - deh-abhimaan ke vash kabhi bhi yeh ulta nasha nahin chadhna chaahiye ki mainne itnon ko samjhaaya, itni madad ki। dekho, baba kitni badi authority phir bhi kitna nirhankaari hai isliye si father।

geet:- raat ke raahi thak mat jaana…

om shanti। meethe-meethe sikeeldhe bachchon ne geet suna aur jo yogayukta serviceable bachche hain, woh iska arth jhat samajh lete hain। ham raat ke raahi arthaat braahmanon ki ab raat poori hui hai। bhakti maarga ko raat kaha jaata hai। aadhaakalpa raat ka poora hota hai। had ka bhi din aur raat hai। yeh phir braahmanon ka aadhaakalpa din aur aadhaakalpa raat hoti hai। is samay jabki baap aate hain to andhiyaara hai। prabhaat hone ka pahla poor hai, savera ho raha hai। bachche jaante hain ab baap kehte hain, meethe-meethe bachche yaad ki yaatra mein thak nahin jaana। jaise jismaani yaatra hoti hai। aage paidal jaate the। bahut dheere-dheere, beech-beech mein manzil bani rehti hai। maaloom rehta hai, hamko phalaani-phalaani manzil par thaharna hai। aage bahut shraddha se paidal jaate the, usmein badi mehnat hai। ab yeh to bahut sahaj hai। isko kaha jaata hai sahaj yaad va yog। sirf baap ko yaad karna hai, thakne ka matlab hi hai deh-abhimaani banna। haan ismen koi shakya nahin, maaya ke vighna padenge। parantu ismen thak nahin jaana hai। thak jaane se deh-abhimaan aa jaata hai। baap kehte hain - bachche shareer nirvaah ke liye kaam to karna hai, uske liye chhutti hai। 8 ghanta shareer nirvaah, 8 ghanta aaraam, baaki 8 ghanta ismen do। abhi to poora 8 ghanta koi dete nahin। ant mein 8 ghanta tak rahenge। chart ko badhaate raho। yahaan jab aakar baithte ho to yaad dilaai jaati hai, jisko tum neshtha kehte ho। baba ki yaad mein aakar baithte ho। iska matlab yeh nahin ki sirf yahaan aakar yaad mein baithna hai। aise bahut hain - samajhte hain 5-10 minute yog karke uthen। parantu baap to kehte hain dhandhaadhori karte, kahaan aate jaate ho to bhi tum yog mein raho। kahaan ganga snaan aadi karne jaate hain to raam-raam japte hain na। yahaan tumko kuchh simarna nahin hai, sirf baap ko yaad karna hai। yeh baap bachchon se hi baat kar rahe hain। tumhaara kalyaan hi hai yaad ki yaatra mein, ismen thakna nahin hai। ismen toofaan bahut aayenge। toofaan koi mitti aadi ke nahin। maaya ke toofaan aane se buddhi ka yog toot jaata hai। phir deh-abhimaan mein aane se dhandhaadhori bachche yaad aa jaate hain। baap kehte hain - ab to yeh dhandhaadhori aadi sab khalaas ho jaane hain। tumhaare bachche vaaris banne hi nahin hain। sab khatma ho jaane hain। abhi to vaaris behad ke baap ke khade hain। had ka varsa murdaabaad hona hai। saahookaar log samajhte hain ab bachcha bada hoga, shaadi karega phir yeh hoga। baap kehte hain - abhi itna time nahin hai isliye duniya se bilkul moh hata do। yeh to kabristaan hai। dhandhaadhori bachchon aadi ke chintan mein marenge to muphta apni barbaadi kar denge। shivbaaba ko yaad karenge to aabaadi bahut hogi। deh-abhimaan mein aane se barbaadi hoti hai। dehi-abhimaani banne mein aabaadi hoti hai। jitna yaad karenge utna bhavishya 21 janma varsa paayenge। yaad nahin karenge to bahut ghaata pad jaayega। woh phir kalpa-kalpaantar ke liye ho jaayega। itni badi ghaate ki baat hai। khyaal karna chaahiye - ham poora varsa kaise paayen। dhan ki bhi bahut laalach nahin rakhni chaahiye। tu mach mein nahin jaana chaahiye। koi devaala maarte hain to bahut phikraat ho jaati hai। shivbaaba ko bilkul bhool jaate hain। phir dosh rakhte ki gyaan mein aaye hain tab devaala maara hai, beemaar ho pade hain। yeh kabhi nahin samajhna chaahiye। beemaari aadi hoti hai, yeh to karmabhog hai। achha hai vikarma vinaash ho jaayenge। dharmaraaz ke dande khaane se to beemaari achhi hai na। karmabhog chuktu karna hai। yeh to mahaarogi shareer hai। kitni sambhaal ki jaati hai। chalte-chalte khade ho jaate hain। heartfail ho jaate hain। aisi puraani duniya ko to buddhi se ekdam bhool jaana chaahiye। bachche dekhte hain baap naya ghar bana rahe hain to puraane se ekdam dil hat jaati hai। kehte hain baba jaldi se makaan banaao। puraane makaan mein takleeph bahut hai। tum bhi jaante ho - yeh puraani duniya to bahut gandi hai। tumhaara yeh hai behad ka sannyaas। woh sannyaas karte hain gharbaar ka। usko had ka sannyaas kaha jaata hai। tum sannyaas karte ho - vikaaron ka।

baap kehte hain - deh sahit deh ke jo bhi tumhaare sambandh hain, sabko tod maamekam yaad karo। yeh duniya jo in aankhon se dekhte ho, inko bhool jaao। abhi tumhaari buddhi jaanti hai, ham svarga ki raajdhaani ke liye purushaartha kar rahe hain। gyaan ka teesra netra mila hai। yeh sab kabristaan ho jaana hai, isse pyaar nahin rakhna hai। aajkal manushyon ke paas paise bahut hain to vikaar bhi tej ho gaye hain। kaam vikaar kitna tej hai। kaam bigar rah nahin sakte। 4-5 varsha pavitra rah phir likhte hain baba aaj inko bhoot laga, kaala munh kar diya। kitna dhakka khaaya। ekdam 5 maar (manzil) se gire। pahle-pahle hai deh-abhimaan। oopar se gira thak purja-purja ho gaya। khalaas, hadgud bilkul hi toot jaate hain। phir purushaartha karne mein time lagta hai। yeh hai sabse badi chot isliye baba kehte hain kaam mahaashatru hai। vikaar ko hi patitapna kaha jaata hai। kehte hain baba hamko patit se paavan banaao। bhaarat mein hi sampoorn nirvikaari the na। bhaarat hi nirvikaari tha। ab bhaarat vikaari hai। sampoorn nirvikaari, sooryavanshi ko kahenge। bhal raamchandra ke raajya mein bhi vikaar ki baat nahin rehti। parantu kala to kam ho jaati hai। 1250 varsha kam ho gaye to woh duniya ki taakat to kam hui na isliye unko satopradhaan phir sato kaha jaata hai। tum chaahte ho ham mama baba ko follow kar sooryavanshi mahaaraaja mahaaraani banen, ismen takleeph va kharche aadi ki to baat hi nahin hai, ismen mukh se kuchh bolna bhi nahin hai। sirf yaad karna hai, isko hi sahaj yog kaha jaata hai, ismen badi mehnat chaahiye। baba ke aage to sab mahaarthi hain, ismen yog poora chaahiye tab kuchh teer lage। yogbal hai na। yog ki bahut kami hai। vighna bhi yog mein bahut padte hain।

behad ka baap meethe-meethe bachchon ko baith samjhaate hain - bachche baap se va padhaai se kabhi roothna nahin। roothenge to 21 janma takdeer se roothenge। bade achhe-achhe bachche bhi rooth padte hain। nasha chadh jaata hai deh-abhimaan ka। mainne itnon ko samjhaaya hai। deh-ahankaar aane se gir padte hain। ismen ahankaar nahin aana chaahiye। shivbaaba ko koi ahankaar hai? kitna niranhakaari hai, aur hai kitni badi authority। kehte bhi hain main saadhaaran tan mein, saadhaaran ghar mein aata hoon। saahookaar ke ghar mein thode hi aata hoon। to ab bachchon ko jaagna hai। baba yuktiyaan to badi achhi batlaate rehte hain। tum bachchon ki hi deri hai। drama anusaar ajun avasthaayen jor nahin bhari hain। aage chal jor bharengi। ham government ko itla karte hain ki itne-itne varshon mein svarga ki sthaapna ho jaayegi। yeh akhbaar aadi mein manushya padhenge to aakar tumse poochhenge। thode varsha ke andar sthaapna hogi to vinaash bhi zaroor hoga। dher aayenge। yeh property aadi thode samay ke liye hai। is property ko tum koi property thode hi samajhte ho। tum jaante ho yeh to thode roz ke liye hai। yeh makaan aadi rahne ke liye banaaye hain kyonki madhuban mein bahut bachche aate hain refresh hone ke liye। head office madhuban hai। aaj tum kya karte ho, kal kya karenge। yahaan tapasya karte ho phir dehli vrindaavan aadi mein jaakar raajya karenge। hamaara yaadgaar kaise khada hai, yeh achhi reeti dikhaana hai। jo kaam ham abhi kar rahe hain - 5 hajaar varsha pahle bhi kiya tha। pahle-pahle shivbaaba ke mandir banaate hain। baaki delvaada mandir aadi to baad mein bane hain। buddhi se kaam lena hota hai। delvaada mandir ka bhi hisaab nikaala jaae to nikal sakta hai। poora hamaara yaadgaar hai। tum jaante ho yeh sthaapna ka yaadgaar hai।

tum meethe-meethe bachchon ko bahut khushi honi chaahiye। yeh sab service badhaane ki yuktiyaan nikaalni hai। raam gayo raavan gayo... jinka bahu parivaar hai। raavan ka dekho kitna bada parivaar hai। raam ka kitna chhota parivaar hai, gaayan right hai। parantu koi samajh nahin sakte hain। baap baith samjhaate hain to bhi nishchay nahin baithta hai। shareer nirvaah arth bhi karma tumko zaroor karna hai। haan jo serviceable bachche hain - paandav, woh to government se paalna le sakte hain। unki saari sambhaal hamko karni pade। avastha bachchon ki aisi honi chaahiye, baba ki yaad mein is duniya ka sab kuchh bhulaana hai। yaad ki yaatra mein jo pakka masta rahega unki avastha bhi bahut majboot hogi। jaise ki shivbaaba ki yaad mein rah tum shareer chhodte ho। sannyaasi brahm ki yaad mein shareer chhodte hain to bhi vaayumandal mein bilkul sannaata ho jaata hai। baba ko anubhav hai। manushya marte hain to ghar mein sannaata ho jaata hai na, ismen bhi aise hota hai। pichhaadi mein jaise ki sab kuchh bhool jaate hain। ab hamko vaapis ghar jaana hai। deh-abhimaan chhootta jaata hai। pichhaadi mein shareer khushi se chhodna chaahiye, harshitmukh। bas। ham kahaan ja rahe hain, aisi avastha jab hogi tab vijay maala mein pirone laayak banenge। tumhaare mein shanti ki current hai। koi bhi aate hain to kehte hain - yahaan shanti bahut hai। yeh hai real shanti। aatma shareer se detach ho jaati hai। tum jaante ho - ham aatma shant swaroop hain। ham apne svadharma mein baith jaate hain। karma ke bina to koi manushya rah nahin sakte। vo log hathayog se kya-kya nahin karte hain। tum ab samajhte ho hamaara svadharma hi shanti hai। yahaan ham aaye hain part bajaane। ab vaapis ghar jaana hai। baap kehte hain - mujhe yaad karo aur ghar ko bhi yaad karo। baap ko yaad karne se varsa milega। baap kehte hain - mujhe bhi ghar mein yaad karo। yahaan to main tempory aata hoon। tumhaari buddhi shantidham mein tikni chaahiye - baba ki yaad mein। ghar ka bhi varsa lena hai na। woh hai aatmaon ka ghar। yeh hai jeev-aatmaon ka ghar। apne ghar ko bhi nahin bhoolo। baap ko bhi nahin bhoolo। baap ko yaad karne se hi pavitra ban ghar chale jaayenge। gyaan ko dhaaran karne se phir raajaai karne aayenge nai duniya mein। jitna ho sake auron ko raasta bataate jaao। always si father। tum jaante ho baap ne kya kiya! sab kuchh maataaon ko de diya। usne hi direction diya ki sab kuchh maataaon ki service mein lagaao। ek ko dekh doosron ne follow kiya। svaaha ho gaye। parantu phir jab tik bhi saken na। drama-anusaar bhatthi bhi banni thi। paakistaan - hindustaan hua। tumhaari bhatthi pahle shuru hi hui paakistaan mein। tumne nadi ko cross kiya - shaastron mein to kya-kya baaten likh di hain। practical mein to ab tum sunte ho na। phir kalpa baad tum hi sunenge। ab baap kehte hain - hear no evil, dhandha aadi bhal karo, parantu hear no evil। baap kehte hain - har baat mein shreemat lo। baba is haalat mein ham kya karen to baba sab bata denge। koi bhi baat poochhni ho to tum baba ke paas aao। tum darte kyon ho। kadam-kadam par poochhna hai। shreemat par chalne se kadam-kadam mein padam hain। tumhaara second by second jo paas hota hai usmein padam hain। to kitni kamaai ho rahi hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vijay maala mein pirone ke liye is shareer se detach hone ka poora-poora purushaartha karna hai। deh-abhimaan ko chhodte jaana hai। is duniya ko buddhi se bhoolna hai।

2) tu mach dhan ki laalach mein nahin jaana hai। baap ki yaad ke sivaae doosra koi chintan na rahe। kabhi bhi baap se va padhaai se roothna nahin hai।

vardaan:- maalikpan ki smriti dvaara highest authority ka anubhav karne vaale combined svaroopdhaari bhav

pahle apne shareer aur aatma ke combined roop ko smriti mein rakho। shareer rachna hai, aatma rachta hai। isse maalikpan svatah smriti mein rahega। maalikpan ki smriti se svayan ko highest authority anubhav karenge। shareer ko chalaane vaale honge। doosra - baap aur bachcha (shivshakti) ke combined swaroop ki smriti se maaya ke vighnon ko authority se paar kar lenge।

slogan:- vistaar ko second mein samaakar gyaan ke saar ka anubhav karo aur karaao।

ye avyakt ishaare - jvaalaasvaroop sthiti mein rah shaktishaali yaad ka anubhav karo

paap kateshvar va paap harni tab ban sakte ho jab yaad jvaala swaroop hogi। isi yaad dvaara anek aatmaon ki nirbalta door hogi, iske liye har second, har shvaans baap aur aap combined hokar raho। koi bhi samay saadhaaran yaad na ho। sneh aur shakti donon roop combined ho।