Murli du jour du mercredi 22 juillet 2026

22-07-2026 praatahmurli om shanti "baapdaada"' madhuban

“meethe bachche - ab tumhein nai duniya mein chalna hai, yeh duhkh ke din poore ho rahe hain, isliye puraani beeti hui baaton ko bhool jaao''

prashn:- tum karmayogi bachchon ko kaun sa abhyaas nirantar karna chaahiye?

uttar:- abhi-abhi shareer nirvaah arth deh mein aaye aur abhi-abhi dehi-abhimaani। deh ki smriti bigar karma to ho nahin sakta isliye abhyaas karna hai ki karma kiya, deh-abhimaani banen phir dehi-abhimaani ban jaao, aisa abhyaas tum bachchon ke sivaae duniya mein koi kar nahin sakta।

geet:- jaag sajniyaan jaag…

om shanti। roohaani baap kehte hain - meethe-meethe roohon ne athva bachchon ne yeh geet suna। isko kaha jaata hai gyaan ka geet। yeh geet to bahut achha hai। tum aatmaayen ab jaag gai ho। drama ke raaz ko bhi abhi tum jaan gaye ho। bhakti maarga ka to kautuk dekh liya hai na - jo kuchh beeta woh tumhaari buddhi mein hai। tum apne beete hue 84 janmon ki history ko jaante ho। baap ne 84 janmon ki kahaani sunaai hai। yeh hai nai duniya ke liye nai baaten। baap dvaara tum nai baaten sunte ho। baap bachchon ko dheeraj dete hain। bachche ab nai duniya mein chalna hai to puraani baaton ko bhool jaao। yeh ved shaastra jo bhi bhakti maarga ki saamagri hai, yeh sab khatma honi hai। vahaan bhakti maarga ka chinha bhi nahin rehta। vahaan to bhakti ka phal mil jaata hai। bhakton ko baap aakar phal dete hain। bachchon ne jaana baap kaise aakar bhakti ka phal dete hain, jisne sabse jaasti bhakti ki hai, unko zaroor jaasti phal milega। gyaan ka purushaartha bhi woh jaasti karega। tum jaante ho ham aatmaon ne jaasti bhakti ki hai। zaroor gyaan mein bhi woh teekhe jaayenge tab in lakshmi-naaraayan jaisa oonch pad paayenge। ab gyaan aur yog ke liye tumhaara purushaartha hai। dehi-abhimaani ho rehna hai phir dehdhaari bhi hona hai। karma karte hue baap ko yaad karna hai। deh bigar to ham karma kar na saken। yeh to theek hai - baba ko yaad karna hai, parantu apne ko aatma samjhen, deh ko bhula dene se kaam nahin hoga, karma to karna hi hai। baap ki yaad mein bahut maja hai। uthte-baithte, chalte-phirte baap ko yaad karo parantu phir bhi pet ko bhojan to chaahiye। dehi-abhimaani ho rehna hai। dehi-abhimaani is samay tum bachchon ke sivaae koi bhi nahin। bhal apne ko aatma bhi samjhen parantu paramatma ka parichay nahin। bhal samjhen ham aatma avinaashi hain, yeh shareer vinaashi hai parantu yeh samajhne se vikarma vinaash nahin honge। kehte bhi hain punya aatma, patit aatma। main aatma hoon, mera yeh shareer hai। yeh to common baat hai। mool baat baap samjhaate hain ki mujhe yaad karo। shareer nirvaah arth deh-abhimaan mein to aana hai। deh ko khilaana bhi hai, deh bigar to kuchh kar nahin sakte। har janma mein apna shareer nirvaah karte aate ho, karma karte hue bhi apne maashuk ko yaad rakhna hai। us maashook ka kisi ko poora pata nahin hai। us maashook athva baap se hamko varsa milna hai aur unki yaad se vikarma vinaash honge, yeh koi nahin samjhaate hain।

tum bachche abhi nai baaten sunte ho। tum jaante ho abhi humein ghar jaane ka raasta mila hai। apne ghar jaakar phir raajdhaani mein aayenge। baba naya makaan banaate hain to zaroor dil hogi na ki usmein jaakar baithen। ab tumko raasta mila hai, jisko aur koi nahin jaante। kitne bhi yagya tap aadi karte, maatha phodte rehte hain, sadgati ko pa nahin sakte। is duniya se us duniya mein ja nahin sakte। yeh bhi samajhna chaahiye। shaastron mein laakhon varsha likh diya hai isliye manushyon ki buddhi kaam nahin karti hai। tum achhi reeti samajh sakte ho - kal ki baat hai। bhaarat to svarga tha, ham aadi sanaatan devi-devta dharma vaale the। devi-devta dharma bahut sukh dene vaala hai। bhaarat jaisa sukh koi bhi pa nahin sakta। svarga mein to aur koi dharma vaala ja na sake। tumhaare jaisa sukh aur koi ko ho na sake। kitna bhi prayatna karen! dhan kharcha karen phir bhi svarga mein jo sukh hai woh mil na sake। kisko health hogi to wealth nahin hogi। kisko wealth hogi to health nahin hogi। yeh hai hi duhkh ki duniya, to ab baap kehte hain he aatmaayen jaago... tumko ab gyaan ka teesra netra mila hai। kitni jaagriti aai hai। tum saari duniya ki history-geography jaante ho। baap jaani-jaananhaar hai na। iska matlab yeh nahin ki sabke dilon ko jaanta hai। yeh kaun hai, kitna samjhaate hain। yeh kahaan tak pavitra rehte hain, kahaan tak baba ko yaad karte hain। main har ek ka yeh khyaal kyon baith karoon... ham to raasta bataate hain ki tum aatmaon ko apne parampita paramatma ko yaad karna hai। is srishti chakra ko buddhi mein rakhna hai। dehi-abhimaani to zaroor banna hai। deh-abhimaani banne ke kaaran tumhaari yeh durgati hui hai। ab tumko baap ko yaad karna hai। grihastha vyavhaar mein rehte kamal phool samaan banna hai। svadarshan chakradhaari bhi tum ho, devtaaon ko to shankh aadi nahin hai। yeh gyaan shankh aadi tum braahmanon ko hai। sikkha log shankh bajaate hain, bahut bada aavaaz karte hain। tum bhi yeh gyaan baith dete ho to badi sabha mein laaud-speaker lagaate ho। tumko yahaan laaud speaker lagaane ki darkaar nahin। teacher padhaayenge to laaud-speaker lagaayenge kya? yahaan to sirf shivbaaba ko yaad karna hai to vikarma vinaash honge। main sarvashaktimaan hoon na। tum laaud-speaker lagaate ho ki aavaaj door-door tak sunne mein aaye। woh bhi aage chal kaam mein aayega। tumko sunaana yeh hai ki maut saamne hai। abhi sabko vaapis jaana hai। mahaabhaarat ladaai bhi saamne khadi hai। geeta mein bhi likha hua hai ki mahaabhaarat ladaai lagi, vinaash hua। achha phir kya hua? paandav bhi gal mare। baap samjhaate hain - pahle agar vinaash ho jaae phir to bhaarat khanda bhi khaali ho jaae। bhaarat to avinaashi khanda hai, khaali to hota nahin। tum jaante ho pralay to hoti nahin। baba avinaashi hai to unka birth place bhi avinaashi hai। bachchon ko khushi rahni chaahiye - baba sarva ka sadgati daata, sukh-shanti karta hai। jo bhi aate hain, kehte hain shanti chaahiye। aatma ko itni shanti kyon yaad aati hai! shantidham aatmaon ka ghar hai na। ghar kisko yaad nahin rahega? vilaayat mein koi marta hai to chaahte hain inko apni janma bhoomi mein le jaayen। yeh agar sabko pata hota ki bhaarat sarva ke sadgati daata, duhkh se mukti dilaane vaale shivbaaba ka birth place hai to unka bahut maan hota। ek hi shiv ke oopar aakar phool chadhaaye। ab to kitnon ke oopar phool chadhaate rehte hain। jo sabko sukh-shanti dene vaala hai, unka naam nishaan hi gum kar diya hai। jo baap ko achhi reeti jaante hain vahi varsa lene ka purushaartha karte hain। mera naam hi hai duhkh harta sukh karta। duhkh se liberate karke kya karenge! tum jaante ho shantidham mein shant rehte hain, sukhdhaam mein sukh hai। shantidham ki jagah alag, sukhdhaam ki jagah alag, yeh to hai hi duhkhadhaam। sabko is samay duhkh hi duhkh hai। abhi tum jaante ho ham aise sukh mein jaate hain, jahaan 21 janma koi prakaar ka duhkh nahin rahega। naam hi hai - sukhdhaam। kitna meetha naam hai। baap kehte hain - tumko koi takleeph nahin dete hain। sirf baap ko aur varse ko yaad karna hai। apne ko aatma samajhna hai। yeh gyaan tumko baba sikhla rahe hain। satayug mein aatma ka gyaan hai, ham aatma yeh shareer chhod doosra janma lenge, isko aatma-abhimaani kaha jaata hai। yeh hai roohaani knowledge, jo aur koi de na sake। rooh ko roohaani baap aakar knowledge dete hain। har 5 hajaar varsha baad dete hain। manushya to bilkul hi ghor andhiyaare mein hain। ab tumko roshni mili hai, tum agyaan neend se jaage ho। sabhi sajniyon ka saajan hai - ek baap। baap kehte hain - main tumhaara baap bhi hoon, saajan bhi hoon, gurooon ka guru bhi hoon। supreme teacher hoon। sarva gurooon ka sadgati daata ek hi satguru hai। kehte hain bachche main sarva ki sadgati karta hoon। gati ke baad sadgati hoti hai।

baap ne samjhaaya hai - har ek ki aatma ko vaapis jaana hai। aatma hi satopradhaan, sato-rajo-tamo banti hai। koi-koi ka bahut thoda part hai। aaye aur gaye। jaise machchharon muaaphik janme aur mare। aise to baap se varsa nahin lete hain। baap se varsa liya jaata hai pavitrata, sukh-shanti ka। baap tum aatmaon ko samjhaate hain, baap to hai niraakaar। woh bhi is mukh se aakar samjhaate hain। shivbaaba ke mandir bhi bahut oonch-oonch banaate hain। kitna door-door jaate hain, teerthon par mele par। oopar mein koi gyaan amrit peene ka rakha hai kya! kitna kharcha karte hain। government ko bhi unhon ke liye kitne prabandha aadi rakhne padte hain। takleeph hoti hai। yahaan teertho par chhote bachchon ko kaise le jaayenge। bachchon aadi ko koi na koi ko sambhaalne liye de jaate hain। saath mein nahin le jaate hain। do teen maas yaatra karte hain। yahaan tum aate ho, tumko baithkar sunna hai, padhna hai। chhote bachche to nahin sunenge। yahaan tum aaye hi ho - yog aur gyaan seekhne। baap baith gyaan sunaate hain to koi aavaaj aadi nahin hona chaahiye। nahin to attention jaata hai। shanti se baithkar attention dekar sunna hai। yog to bahut sahaj hai। kuchh bhi kaam karte raho, buddhi ka yog vahaan laga rahe। baba ki yaad rahne se kamaai bahut jabardasta hoti hai। tum jaante ho ham ever healthy banenge। apne saath baaten karni hoti hai। baba ki yaad mein rahkar bhojan bhi apne haath se banaana hai। haathon se kaam bhi karo, baaki yaad karo apne baap ko। tumhaara bhi kalyaan hoga aur yaad mein rahne se cheez bhi achhi banegi। tumko vishwa ki baadshaahi milti hai। tum yahaan aate hi ho - lakshmi-naaraayan banne। sab kehte hain ham sooryavanshi banenge।

tum jaante ho hamaare mama-baba is samay brahma-sarasvati hain। doosre janma mein lakshmi-naaraayan banenge। bhavishya mein koi kya banenge, aise kiske janma ka pata nahin hai। nehru kya jaakar bana, kya pata। achha kuchh daan kiya hoga to yahaan achhe kul mein janma lenge। abhi tumko poora pata padta hai। abhi inka naam hai - aadi dev brahma, aadi devi sarasvati। vahi phir svarga ke maalik banenge। achha inke bachche bhi saath hain। woh bhi kahenge ham svarga ke maalik banenge। yeh to pakka hai। sookshm vatan mein bhi tum dekhte ho - deviyon ke mandir mein bhi bahut mele lagte hain। abhi jagdamba to hai ek। unke features bhi ek hi hone chaahiye। mama ko bhi tum dekhte ho। tum bachchon ke features hain phir naam rakh diye hain, kanya-kumaari, adhar-kumaari। tum jaante ho yeh ham hi bante hain। ham sab hain brahmaakumaar-kumaari। yugal bhi kehte hain ham brahmaakumaar-kumaari hain, ek baap ke bachche hain। tumhaara hi yaadgaar hai। barobar tum baith yeh knowledge dete ho, arth sahit yeh delvaada mandir hai। parantu yeh tum hi samjha sakte ho। tum jaante ho ham sthaapna kar rahe hain, raajayog se shreemat par bhaarat ko svarga bana rahe hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan aur yog par poora-poora attention dena hai। sunne samay bahut shant, ekaagrachit hokar baithna hai। karmayogi bhi banna hai।

2) baap ne jo ghar ka raasta bataaya hai, woh sabko bataana hai। svadarshan chakradhaari banne ke saath-saath gyaan shankh bhi bajaana hai।

vardaan:- mahaan aur mehmaan - in do smritiyon dvaara sarva aakarshanon se mukta banne vaale upraam va saakshi bhav

upraam va saaksheepan ki avastha banaane ke liye do baaten dhyaan par rahen - ek to main aatma mahaan aatma hoon, doosra main aatma ab is puraani srishti mein va is puraane shareer mein mehmaan hoon। is smriti mein rahne se svatah aur sahaj hi sarva kamjoriyaan va lagaav ki aakarshan samaapta ho jaayegi। mahaan samajhne se jo saadhaaran karma va sankalp sanskaaron ke vash chalte hain, woh parivartit ho jaayenge। mahaan aur mehmaan samajhkar chalne se mahima yogya bhi ban jaayenge।

slogan:- sarva ki shubh bhaavna aur sahayog ki boond se bada kaarya bhi sahaj ho jaata hai।

ye avyakt ishaare - jvaalaasvaroop sthiti mein rah shaktishaali yaad ka anubhav karo

powerful man ki nishaani hai - second mein jahaan chaahe vahaan pahunch jaae। man ko jab udna aa gaya, practice ho gai to second mein jahaan chaahe vahaan pahunch sakta hai। abhi-abhi saakaar vatan mein, abhi-abhi paramdham mein, second ki raphtaar hai - ab isi abhyaas ko badhaao to yaad shaktishaali ban jaayegi।