Murli du jour du mercredi 12 août 2026

12-08-2026 praatahmurli om shanti "baapdaada"' madhuban

“meethe bachche - yaad mein rahne se achhi dasha baithti hai, abhi tumhaare par brihaspati ki dasha hai isliye tumhaari chadhti kala hai''

prashn:- yadi yog par poora attention nahin hai to uski result kya hoti? nirantar yaad mein rahne ki yuktiyaan kya hain?

uttar:- agar yog par poora attention nahin hai to chalte-chalte maaya ki praveshta ho jaati hai, gir padte hain। 2- deh abhimaani ban anek bhoolen karte rehte hain। maaya ulte karma karaati rehti hai। patit bana deti hai। nirantar yaad mein rahne ke liye mukh mein muhalra daal do, krodh nahin karo, deh sahit sab kuchh bhool, main aatma, paramatma ka bachcha hoon - yeh abhyaas karo। yogbal se kya-kya praaptiyaan hoti hain unhein smriti mein rakho।

geet:- om namo shivaay…

om shanti। meethe-meethe roohaani bachchon ne apne roohaani baap shivbaaba ki mahima suni। jab paap badhte hain arthaat manushya paap aatmaayen ban jaate hain tab hi patit-paavan baap aate hain, aakarke patiton ko paavan banaate hain। us behad ke baap ki hi mahima hai, usko vrikshapti bhi kaha jaata hai। is samay behad ke baap dvaara behad ki dasha, brihaspati ki tum par baithi hui hai। khaas aur aam do akshar hote hain na। inka bhi arth yahaan hi siddha hota hai। brihaspati ki dasha se khaas bhaarat jeevanmukta ban jaata hai arthaat apna svaraajya pad paate hain kyonki sachcha baap jo hai, jisko truth kehte hain, woh aakar hamko nar se naaraayan banaate hain। baaki jo hain woh nambarvaar apne-apne dharma ke section mein jaakar baithenge aur aayenge bhi nambarvaar। kaliyug ant tak aate rehte hain। har ek aatma ko apne-apne dharma mein apna-apna part mila hua hai। raajaai mein raaja se lekar praja tak sabko apna-apna part mila hua hai। naatak hai bhi raaja se lekar praja tak। sabko apna-apna part bajaana hota hai। ab bachche jaante hain hamaare oopar abhi brihaspati ki dasha baithi hai। aise nahin ek hi din baithti hai। nahin, tumhaari brihaspati ki dasha chal rahi hai। abhi tumhaari chadhti kala hai। jitna yaad karenge utna chadhti kala hogi। yaad bhoolne se maaya ke vighna aate hain। yaad se dasha achhi baithti hai। achhi reeti yaad nahin karenge to zaroor girenge hi। phir unse kuchh na kuchh bhoolen hogi। baba ne samjhaaya hai drama anusaar sab dharma vaale jo bhi hain ek do ke pichhaadi part bajaane ke liye aate hain। bachche jaante hain svarga ki dasha arthaat jeevanmukti ki dasha ab hamaare oopar baithi hai। yeh drama ka chakra kaise phirta hai isko bhi detail mein samajhna hai। yeh srishti drama ka chakra khaas bhaarat par bana hua hai। baap bhi bhaarat mein hi aate hain। gaaya hua hai aashcharyavat sunanti, kathanti, bhaaganti... chalte-chalte maaya ki praveshta hone ke kaaran gir jaate hain। poora attention nahin dete hain yog par, phir baap aakar sanjeevni booti dete hain arthaat surjeet karne vaali booti dete hain। hanumaan bhi tum ho। baap ne samjhaaya hai is samay raavan ko bhagaane ke liye yeh booti sungha deta hoon।

baap tumko sab satya baaten bataate hain। satya hai hi ek baap jo aakar tumko satya naaraayan ki katha sunaae satayug ki sthaapna karte hain। inko kaha hi jaata hai truth, satya batlaane vaala। tumko kehte hain tum shaastron ko maante ho? bolo - haan, ham shaastron ko kyon nahi maante hain। jaante hain yeh sab bhakti maarga ke shaastra hain। yeh to ham maante hain। gyaan aur bhakti do cheez hain। jab gyaan milta hai phir bhakti ki kya darkaar hai। bhakti maana utarti kala। gyaan maana chadhti kala। is samay bhakti chal rahi hai। abhi hamko gyaan mila hai jisse sadgati hoti hai। bhakton ki raksha karne vaala ek hi bhagwan hai। raksha dushman se ki jaati hai na। baap kehte hain - main aakar tumhaari raavan se raksha karta hoon। dekhte ho na - raavan se kaise raksha hoti hai। is raavan par jeet paani hai। baap samjhaate hain - meethe bachche is raavan ne tumko tamopradhaan banaaya hai। satayug ko kaha jaata hai satopradhaan, svarga। phir kala kam hoti jaati hai। ant mein jab bilkul hi deh-abhimaan mein aa jaate hain to patit ban jaate hain। naya makaan banta hai। maas ke baad athva 6 maas ke baad kuchh na kuchh kala kam ho jaati hai। har varsha makaan ko pochhi lagaate hain। kala to kam hoti jaati hai na। nai se puraani, puraani se phir nai yeh shuru se lekar har cheez ka hota aaya hai। samjha jaata hai yeh makaan 100, 150 varsha tak chalega। baap samjhaate hain satayug kaha jaata hai nai duniya se। phir treta 25 pratishat kam kahenge kyonki thoda puraana ho jaata hai। woh hai chandravanshi। unki nishaani dete hain kshatriy kyonki nai duniya ke laayak nahin banen isliye kam position ho gaya। sab chaahte hain krishnapuri mein jaayen। aise thode hi kabhi kehte - raampuri jaayen। sab krishnapuri ke liye kehte hain। gaate bhi hain na - chalo vrindaavan bhajo raadhe-govinda... vrindaavan ki baat hai। ayodhya ke liye nahin kahenge। shreekrishna ke oopar sabka bahut pyaar rehta hai। shreekrishna ko bahut pyaar se yaad karte hain। shreekrishna ko dekhte hain to kehte hain in jaisa pati mile, in jaisa bachcha mile, in jaisa bhaai mile। sensible bachche athva bachchiyaan jo hote hain woh shreekrishna ki moorti saamne rakhte hain ki in jaisa bachcha mile। shreekrishna ke pyaar mein bahut rehte hain na। sab chaahte hain krishnapuri। abhi to hai kansapuri, raavan ki puri। krishnapuri ka bahut mahatva hai। shreekrishna ko sab yaad karte hain। tab baap kehte hain tum itna samay yaad karte aaye ho। ab krishnapuri mein jaane ka purushaartha karo, inke gharaane mein to jaao। sooryavanshi 8 gharaane hain to itna purushaartha karo jo raajaai mein aakar raajkumaar se jhoolo। yeh samajh ki baat hai na।

baap kehte hain - bachche jitna ho sake manamnaabhav raho। yaad mein na rahne se gir padte hain। gyaan kab giraata nahin। yaad mein nahin rehte to gir padte hain। is par hi allaah avaldeen, haatamtaai ke naatak bhi bane hue hain। yaad mein rahne ke liye hi mukh mein muhalra daal dete the। kisko krodh aata hai to bol padte hain isliye kehte hain mukh mein kuchh daal do। baat nahin karen to krodh aayega nahin। baap kehte hain - kabhi bhi koi par krodh nahin karo। parantu in baaton ko poora na samajhkar shaastron mein kuchh na kuchh daal diya hai। baap yathaartha baith samjhaate hain। baap jab aaye tab to aakar samjhaaye। jo hokar jaate hain, unhon ki mahima gaai jaati hain। taigor, jhaansi ki raani hokar gai, unke phir naatak banaate hain। achha shiv bhi hokar gaye hain tab to shiv jayanti manaate hain na। parantu shiv kab aaya, kya aakar kiya, yeh pata nahin। woh to saari srishti ka baap hai। zaroor aakar sabko sadgati di hogi। islaami, bauddhi aadi jo bhi dharma sthaapan karke gaye hain unki jayanti manaate hain। tithi taareekh sabhi ki hai, inka kisko pata nahin। kehte bhi hain Christ se itne varsha pahle bhaarat paradise tha। svaastika jab banaate hain to usmein poore 4 bhaag karte hain। 4 yug hain। aayu kam jaasti ho na sake। jagannaath puri mein chaaval ka handa banaate hain। poore 4 bhaag ho jaate hain। baap kehte hain - yeh bhakti maarga mein agdam-bagdam kar diya hai। ab baap kehte hain deh sahit yeh sab bhool jaao। main aatma hoon, parampita paramatma ka bachcha hoon। yeh abhyaas rakho। baba svarga ka rachayita hai to zaroor hamko svarga mein bheja hoga। narka mein to nahin bhejenge। baap kisko bhi narka mein nahin bhejte hain। pahle-pahle sab sukh bhogte hain। pahle sukh peechhe duhkh। baap to sabka duhkh harta sukh karta hai na। aatma pahle sukh phir duhkh dekhti hai। vivek bhi kehta hai - ham pahle satopradhaan phir sato rajo tamo mein aate hain। manushya bhi samajhte hain - vilaayat vaale sensible hain। vahaan to bombs aise banaate hain jo phat se khalaas ho jaayenge। jaise aajkal murden ko bijli par phat se khatma kar dete hain, aise bombs phenkane se aag lag jaati hai to manushya bhi jhat khatma ho jaayenge। bhambhor ko aag lagni hai। toofaan aise aate jo gaanv ke gaanv khatma ho jaate hain। phir us samay aisa koi prabandha nahin rehta jo bachaav kar saken। vinaash to hona hi hai। puraani duniya khatma honi hai। geeta mein bhi varnan hai। baap ne samjhaaya - yooropvaasi bombs aise chhodenge jo pata bhi nahin padega। tum bachche jaante ho kalpa pahle bhi vinaash hua tha, ab bhi hone vaala hai। tum bhi kalpa pahle muaaphik padh rahe ho। dheere-dheere jhaad vriddhi ko paata rahega। vriddhi hote-hote phir sthaapna ho jaati hai। maaya ke toofaan bahut achhe-achhe phoolon ko bhi gira dete hain। yog mein poora nahin rehte hain to phir maaya vighna daalti hai।

baap ka bachcha ban pavitrata ki pratigya kar phir agar vikaar mein girte hain to naam badnaam kar denge। phir dhakka bahut jor se aa jaata hai। baap kehte hain - yeh kaam ki chot kabhi nahin khaana। bachche jaante hain yahaan rakta ki nadiyaan bahni hain। satayug mein doodh ki nadiyaan bahti hain। woh hai nai duniya, yeh hai puraani duniya। kaliyug mein dekho kya hai, nai duniya ke vaibhav to dekho। yahaan to kuchh bhi hai nahin। bachchiyaan saakshaatkaar mein jaakar dekhkar aati hain। sookshm vatan mein shoobeeras piya, yeh kiya woh sab saakshaatkaar hote hain। batlaate hain ham mool vatan mein jaate hain। baba vaikuntha mein bhej dete hain। yeh sab saakshaatkaar aadi ki drama mein noondh hai, inse kuchh milta nahin hai। bahut bachchiyaan sookshm vatan mein jaati thi, shoobeeras aadi peeti thi। aaj hain nahin। achhe-achhe first class bachche gum ho gaye। bahut dhyaan deedaar mein jaane vaalon ne jaakar shaadi ki। wonder lagta hai - maaya kaisi hai। takdeer kaise ulti palat jaati hai। bahuton ne achhe-achhe part bajaaye। bahut madad bhi ki aaeevel mein। to bhi aaj hain nahin। tab baap kehte hain - maaya tum badi jabardasta ho। maaya se tumhaari yuddha chalti hai। isko kaha jaata hai yogbal ki ladaai। yogbal se kya praapti hoti hai - yeh kisko pata nahin hai। sirf bhaarat ka praacheen yog kehte hain। meethe-meethe bachchon ko yog ke liye samjhaaya jaata hai - praacheen raajayog gaaya hua hai। jo bhi philosophar aadi hain yeh spiritual knowledge to koi mein hain nahin। roohaani baap hi gyaan ka saagar hai। unko hi shivaay namah gaate hain। unki hi mahima gaai hai। baap aakar tumko kitna gyaan samjhaate hain। isko gyaan ka teesra netra kaha jaata hai aur koi ki taakat nahin jo apne ko trikaaldarshi kah sake। trikaaldarshi sirf brahman hi hote hain, jin braahmanon dvaara yagya racha hai। rudra gyaan yagya hai na। roodra shiv ko bhi kehte hain। anek naam rakh diye hain। har ek desh mein naam alag-alag bahut hain। sivaae ek baap ke aur kisi ke itne naam hain nahin। babul-naath bhi inko kehte hain। babul unko kaha jaata - jismen kaante hote hain। baba kaanton ko phool banaane vaala hai, isliye unka naam babulnaath rakha hai। baambe mein vahaan bahut mela lagta hai। arth kuchh nahin samajhte। baap baith samjhaate hain unka right naam hai shiv। vyaapaari log bhi bindi ko shiv kah dete hain। ek do ginti jab karte hain, 10 par aayenge to kahenge shiv। baap bhi kehte hain - main bindi hoon star। bahut log aise double tilak bhi dete hain। maata aur pita। gyaan soorya gyaan chandrama ki nishaani hai। woh arth nahin jaante। to baba yog par samjha rahe the। yog kitna mashhoor hai। abhi tum bachche yog akshar chhod do, yaad karo। baap kehte hain - yog akshar se samjhenge nahin, yaad se samjhenge। baap ko bahut yaad karna hai। unko saajan bhi kaha jaata hai। patraani banaate hain na। vishwa ki raajdhaani ka varsa baap dete hain। satayug mein ek baap hota hai। bhakti mein do baap aur gyaan maarga mein abhi tumhein teen baap hai। kitna wonder hai। tum arth sahit jaante ho - satayug mein hain hi sab sukhi isliye paarlaukik baap ko jaante hi nahin। abhi tum teenon baap ko jaante ho। kitni sahaj samajhne ki baaten hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yaad mein rahne ke liye mukh se kuchh bhi bolo nahin। mukh mein muhalra daal do to krodh khatma ho jaayega। koi par bhi krodh nahin karna hai।

2) is duhkhadhaam ko ab aag lagni hai isliye ise bhool nai duniya ko yaad karna hai। baap se jo pavitra rahne ki pratigya ki hai usmein pakka rehna hai।

vardaan:- niraakaari sthiti ke abhyaas dvaara main pan ko samaapta karne vaale nirhankaari bhav

vartamaan samay sabse maheen aur sundar dhaaga - yeh main pan hai। yeh main shabd hi deh-abhimaan se paar le jaane vaala bhi hai to deh-abhimaan mein laane vaala bhi hai। jab main pan ulte roop mein aata hai to baap ka pyaara banaane ke bajaae koi na koi aatma ka, naam-maan-shaan ka pyaara bana deta hai। is bandhan se mukta banne ke liye nirantar niraakaari sthiti mein sthit hokar saakaar mein aao - is abhyaas ko natural nature bana do to nirhankaari ban jaayenge।

slogan:- kisi ki buri va achhi baat sunkar sankalp mein bhi ghrina bhaav aana - yeh bhi parmat hai।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

sankalp va svapna mein bhi jab apvitrata ka anshamaatra na ho tab kahenge sachche brahman, isi dhaarna ke liye hi gaayan hai ‘praan jaaen par dharma na jaae।' aisi himmat, aisa dridh nishchay karne vaale kisi bhi prakaar ki paristhiti mein apne dharma arthaat dhaarna ke prati kuchh bhi tyaag karna pade, sahan karna pade, saamna karna pade, saahas rakhna pade to khushi-khushi se karte hain, peechhe nahin hatte।