Murli du jour du vendredi 21 août 2026

21-08-2026 praatahmurli om shanti "baapdaada"' madhuban

“meethe bachche - baap meethe se meethi saccharin hai isliye aur sab baaten chhod us baap ko yaad karo to meethi saccharin ban jaayenge''

prashn:- tum baap dvaara shreemat lekar apne andar kaun se sanskaar bhar rahe ho?

uttar:- bhavishya mein bigar vajeer saare vishwa par raajya karne ke। tum yahaan aaye hi ho bhavishya raajdhaani chalaane ki shreemat lene। baap tumhein aisi shreemat de dete jo aadhaakalpa tak koi ki raay lene ki darkaar nahin। raay unhein leni padti jinki buddhi kamjor ho।

geet:- tumheen ho maata…

om shanti। meethe-meethe roohaani bachchon ne geet suna। yeh kisne kaha ki meethe-meethe roohaani bachche? zaroor roohaani baap hi kah sakte hain। meethe-meethe roohaani bachche abhi sammukh baithe hain aur bahut hi pyaar se baap samjha rahe hain। abhi tum jaante ho sivaae roohaani baap ke sarva ko sukh shanti dene vaala va sarva ko duhkhon se liberate karne vaala duniya bhar mein aur koi nahin hai isliye duhkh mein baap ko yaad karte rehte hain। tum bachche sammukh baithe ho। jaante ho baba hamko sukhdhaam ka laayak bana rahe hain। sada sukhdhaam ka maalik banaane vaale baap ke sammukh aaye hain। abhi samajhte hain sammukh sunne aur door rahkar sunne mein bahut farka hai। madhuban mein sammukh aate ho, madhuban mashhoor hai। madhuban, vrindaavan mein unhonne shreekrishna ka chitra dikhaaya hai। parantu shreekrishna to hai nahin। yahaan to niraakaar baap tum bachchon se milte hain। tumhein svayan ko ghadi-ghadi aatma nishchay karna hai। main aatma baap se varsa le rahi hoon। saare kalpa mein yeh ek hi samay aata hai। yeh kalpa ka suhaavna sangamayug hai। inka naam rakha hai - purushottam। yahi sangamayug hai, jismen sab manushya maatra uttam bante hain। abhi to sabhi manushyamaatra ki aatma tamopradhaan hai jo phir satopradhaan banti hai। satopradhaan hai to manushya uttam hote hain। tamopradhaan hone se manushya bhi kanishta bante hain। to aatmaon ko baap baith sammukh samjhaate hain। saara part aatma hi bajaati hai, na ki shareer। aatma aur shareer jab donon ka mel hota hai to part bajta hai। tumhaari buddhi mein aa gaya hai ki ham aatma asul mein niraakaari duniya va shantidham mein rahne vaali hain, yeh kisko bhi pata nahin hai। na khud samajhte, na samjha sakte hain। tumhaari buddhi ka taala ab khula hai, tum samajhte ho barobar aatmaayen paramdham mein rehti hain। woh hai incorporeal world। yeh hai corporeal world। yahaan ham sab aatmaayen actors part-dhaari hain। pahle-pahle ham part bajaane aate hain। phir nambarvaar aate jaate hain। sabhi actors ikatthe nahin aa jaate। bhinna-bhinna prakaar ke actors aate jaate hain। sab ikatthe tab hote hain jab naatak poora hota hai। abhi tumko pahchaan mili hai, aatma asul shantidham ki rahvaasi hai - yahaan aati hai part bajaane। baap saara samay part bajaane nahin aate। ham hi part bajaate-bajaate tamopradhaan ban jaate hain। abhi tum bachchon ko sammukh sunne se bada maja aata hai। itna maja murli padhne se nahin aata। yahaan sammukh ho na। to pahle satayugi aadi sanaatan devi-devta dharma vaale hi aate hain। tum jaante ho ki bhaarat god goddess ka sthaan tha, abhi nahin hai। chitra dekhte ho to the zaroor। pahle-pahle ham devi-devta the, apne part ko to yaad karenge ki bhool jaayenge? baap kehte hain - tumne yeh part bajaaya hai, yeh drama hai। nai duniya so phir puraani hoti hai। pahle-pahle oopar se jo aatmaayen aati hain woh golden ej mein aati hain। yeh sab baaten abhi tumhaari buddhi mein hain। satayug aadi mein tum hi aaye the part bajaane। tum vishwa ke maalik mahaaraaja-mahaaraani the। tumhaari raajdhaani thi। abhi to raajdhaani hai nahin। ab tum seekh rahe ho ham raajaai kaise chalaayenge, vahaan vajeer hote nahin। raay dene vaale ki darkaar nahin। woh to shreemat dvaara shreshtha te shreshtha ban jaate hain phir unko doosre koi se raay lene ki darkaar nahin rehti। agar koi se raay len to samjha jaayega inki buddhi kamjor hai। abhi jo shreemat milti hai woh satayug mein bhi kaayam rehti hai। ab tumhaari aatma fresh ho rahi hai। abhi tum bachchon ko dehi-abhimaani banna hai। shantidham se aakar yahaan tum talkie bane ho। talkie hone bigar karma ho na sake। yeh badi samajhne ki baaten hain। jaise baap mein saara gyaan hai, vaise tumhaari aatma mein bhi ab gyaan hai। aatma kehti hai ham ek shareer chhod, sanskaar anusaar phir doosra leta hoon। punarjanma bhi zaroor hota hai। aatma ko jo bhi part mila hai, woh bajaati rehti hai aur sanskaaron anusaar doosra janma leti rehti hai। aatma ki din pratidin purity ki degree kam hoti jaati hai। patit akshar dvaapar ke baad kaam mein laate hain phir bhi thoda sa pharka zaroor pad jaata hai। tum naya makaan banaao, ek maas ke baad kuchh pharka zaroor padega।

abhi tum samajhte ho baba hamko varsa dete hain। baap kehte hain - ham aaye hain tum bachchon ko varsa dene। jitna jo purushaartha karenge utna pad paayenge। baap ke paas koi pharka nahin hai। baap jaante hain ham aatmaon ko padhaate hain। aatma har ek apne liye purushaartha karti hai। mel female ki drishti yahaan nahin rehti। tum sab bachche behad baap se varsa le rahe ho। sabhi aatmaayen brothers hain jinko baap padhaate hain, varsa dete hain। baap hi roohaani bachchon se baat karte hain ki he laadle meethe sikeeldhe bachchon tum bahut samay part bajaate-bajaate ab phir aakar mile ho - apna varsa lene। yeh bhi drama mein noondh hai। shuru se lekar part noondha hua hai। tum actors part bajaate act karte rehte ho। aatma avinaashi hai, ismen avinaashi part bhara hua hai। shareer to badalta rehta hai। baaki aatma sirf pure se impure banti hai। satayug mein hai paavan। isko kaha jaata hai patit duniya। abhi sukhdhaam sthaapan hota hai। baaki sab aatmaayen muktidhaam mein rahengi। abhi yeh behad ka naatak aakar poora hua hai। sabhi aatmaayen machchharon misal jaayengi। is samay koi bhi aatma aaye to patit duniya mein unki kya value hogi। vaastav mein value unki hai jo pahle-pahle nai duniya mein aate hain। nai duniya thi woh phir puraani bani hai। nai duniya mein devtaayen the, vahaan duhkh ka naam nahin tha। yahaan to athaah duhkh hain। baap aakar duhkh ki puraani duniya se liberate karte hain। yeh puraani duniya badalni zaroor hai। jaise din ke baad raat, raat ke baad din hota hai। tum samajhte ho barobar ham satayug ke maalik banenge, to ham kyon na aatma nishchay kar aur baap ko yaad karen। kuchh to mehnat karni hogi। raajaai paana koi sahaj thode hi hai, baap ko yaad karna hai। yeh maaya ka wonder hai jo ghadi-ghadi tumko bhula deti hai। iske liye upaay rachna chaahiye। aise nahin mera banne se yaad jam jaayegi। baaki purushaartha kya karenge। nahin, jab tak jeena hai purushaartha karna hai। gyaan amrit peete rehna hai। yeh bhi samajhte ho hamaara yeh antim janma hai। is shareer ka bhaan chhod dehi-abhimaani banna hai। grihastha vyavhaar mein bhi rehna hai, purushaartha zaroor karna hai। sirf apne ko aatma nishchay kar baap ko yaad karo। tvamev maata cha pita... yeh sab hai bhakti maarga ki mahima। tumko sirf ek alpha ko yaad karna hai। ek hi main saccharin hoon, tum bhi aur sab baaten chhod bahut meethi saccharin ho jaao। abhi tumhaari aatma tamopradhaan bani hai, unko satopradhaan banaane liye yaad ki yaatra mein raho। sabko yahi bataao baap se sukh ka varsa lo। sukh hota hi hai satayug mein। sukhdhaam sthaapan karne vaala baap hai, baap ko yaad karna hai bahut sahaj, parantu maaya ka opposition bahut hai isliye koshish kar mujhe yaad karo to khaad nikal jaayegi। second mein jeevanmukti gaaya jaata hai।

is drama mein har ek ko apna part repeat karna hai। is drama ke andar sabse jaasti hamaara part hai। sukh bhi sabse jaasti hamko milega। baap kehte hain - tumhaara devi-devta dharma bahut sukh dene vaala hai। aur baaki sab shantidham mein chale jaayenge - hisaab-kitaab chuktu kar। jaasti vistaar mein ham kyon jaaen। baap aate hi hain sabko vaapis le jaane। machchharon sadrishya sabko le jaate hain। shareer khatma ho jaayenge। baaki aatma jo avinaashi hai woh hisaab-kitaab chuktu kar chali jaayegi। aise nahin ki aatma aag mein padne se pavitra hogi। aatma ko yaad roopi yog se hi pavitra hona hai। yog ki agni hai yeh। unhonne phir naatak baith banaaye hain - seeta aag se paar hui। aag se koi ek ko thode hi paar hona hai। baap samjhaate hain - tum sab seetaayen is samay patit ho, raavan ke raajya mein ho। ab ek baap ki yaad se tumko paavan banna hai। raam ek hi hai। agni akshar sunne se samajhte hain, aag se paar hui। kahaan yog agni, kahaan woh। aatma paramatma se yog rakhne se patit se paavan hogi। raat-din ka pharka hai। aatmaayen sab seetaayen hain। raavan ki jel mein shok vaatika mein hain। yahaan ka sukh to kaag vishta misal hai। svarga ke sukh to athaah hain। to bachchon ko gyaan ratnon se jholi bharni chaahiye। koi bhi prakaar ka sanshay nahin aana chaahiye। deh-abhimaan aane se phir anek prakaar ke prashn aadi uthte hain। phir baap jo dhandha dete hai woh karte nahin hain। mool baat hai hamko patit se paavan banna hai। doosre koi bhi sankalp uthaane ki darkaar nahin hai। yeh hai patit duniya, woh hai paavan duniya। mukhya baat hai hi paavan banne ki। paavan kaun banaayenge, ye kuchh bhi pata nahin। bolo tum patit ho to bigad padenge। apne ko vikaari koi bhi samajhte nahin, kehte hain grihasthi to sab the - raam-seeta, lakshmi-naaraayan ko bhi to bachche the na। vahaan bhi to bachche paida hote hain, yeh bhool gaye hain ki usko viceless world kaha jaata hai। woh hai shivaalay।

baap tum bachchon ko kitni yuktiyaan bataate rehte hain। yeh to baap, teacher, guru hai, jo sabko sadgati dete hain। woh to ek guru mar gaya to phir bachche ko gaddi denge। ab vo kaise sadgati mein le jaayenge। sarva ka sadgati daata hai hi ek। raavan raajya mein hai durgati, raamraajya mein hai sadgati। baap sabko paavan banaakar le jaate hain phir koi phat se patit nahin bante, nambarvaar utarte hain। satopradhaan se sato rajo tamo... tumhaari buddhi mein 84 ka chakra baitha hai। tum jaise ab light house ho। gyaan se is chakra ko jaan gaye ho ki yeh kaise phirta hai। abhi tum bachchon ko aur sabko raasta bataana hai। tum sab sena ho। tum pilot ho, raasta bataane vaale। sabko bolo - ab shantidham, sukhdhaam ko yaad karo। kaliyug duhkhadhaam ko bhool jaao। ham aapko bahut achha raasta bataate hain, patit-paavan ek hi niraakaar baap hai। unko yaad karne se tum paavan ban jaayenge। tumhaari aatma par jo kat chadhi hui hai woh utarti jaayegi। bhagvaanuvaach manamnaabhav। shiv bhagvaanuvaach - vinaash kaale vipreet buddhi vinshanti aur vinaash kaale parampita-paramatma ke saath preet buddhi vijayanti। tumhaari jitni preet buddhi hogi utna oonch pad paayenge। deh-abhimaan mein aane se itna oonch pad nahin pa sakenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ratnon se apni jholi bharni hai। kisi bhi prakaar ka sanshay nahin uthaana hai। jitna ho sake baap ko yaad karne ka purushaartha kar paavan banna hai। baaki prashnon mein nahin jaana hai।

2) ek baap se sachchi preet rakh baap samaan meethi saccharin banna hai।

vardaan:- sada gyaan soorya ke sammukh rahne vaale antarmukhi, svamaandhaari bhav

jaise soorya ke saamne dekhne se soorya ki kirnen avashya aati hain, aise jo bachche gyaan soorya baap ke sada sammukh rehte hain vo gyaan soorya ke sarva gunon ki kirnen svayan mein anubhav karte hain। unki soorat par antarmukhta ki jhalak aur sangamayug ke va bhavishya ke sarva svamaan ki phalak dikhaai deti hai। iske liye sada smriti mein rahe ki yeh antim ghadi hai। kisi bhi ghadi is tan ka vinaash ho sakta hai isliye sada preet buddhi ban gyaan soorya ke sammukh rah antarmukhta va svamaan ki anubhooti mein rehna hai।

slogan:- sada udti kala mein udna hi jhamelon ke pahaad ko cross karna hai।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

pavitrata hi mahaanta hai, yahi yogi jeevan ka aadhaar hai। jara bhi anshamaatra sankalp mein bhi kisi prakaar ki apvitrata hai to jahaan apvitrata ka ansh hai vahaan pavitra baap ki yaad jo hai, jaisa hai vaise nahin aa sakti isliye mansa mein bhi apvitrata ke ansh ko samaapta kar sampoorn svachchha bano। sada yahi smriti rahe ki main poojya aatma is shareer roopi mandir mein viraajmaan hoon।