Murli du jour du vendredi 28 août 2026

28-08-2026 praatahmurli om shanti "baapdaada"' madhuban

“meethe bachche - tum drama ke gupta raaz ko jaante ho ki yeh sangamayug hi chadhti kala ka yug hai, satayug se lekar kalaayen kam hoti jaati hain''

prashn:- sabse uttam seva kaun si hai aur woh seva kaun karta hai?

uttar:- bhaarat ko svarga banaana, rank ko raav banaana, patit ko paavan banaana - yeh hai sabse uttam seva। aisi seva ek baap ke sivaae aur koi bhi nahin kar sakta। baap ne aisi mahaan seva ki hai tab to bachche unki ijjat karte hain, sabse pahle somnaath ka mandir banaakar unki pooja karte hain।

geet:- aakhir woh din aaya aaj…

om shanti। meethe-meethe roohaani bachchon ne yeh geet suna। jaise aatma gupta hai aur shareer pratyaksha hai, aatma in aankhon se dekhne mein nahin aati hai, incognito hai। hai zaroor parantu is shareer se dhaki hui hai, isliye kaha jaata hai aatma gupta hai। aatma khud kehti hai main niraakaar hoon, yahaan saakaar mein aakar gupta bani hoon। aatmaon ki niraakaari duniya hai। vahaan to gupta ki baat nahin। parampita paramatma bhi vahaan rehte hain, unko kaha jaata hai - supreme। oonch te oonch aatma। pare te pare rahne vaala hai parampita paramatma। baap kehte hain - jaise tum gupta ho, mujhe bhi gupta aana pade। main garbhajel mein nahin aata hoon। mera naam ek hi shiv chala aata hai। main ismen aata hoon to mera naam nahin badalta। inki aatma ka jo shareer hai, unka naam badalta hai। mujhe to shiv hi kehte hain, sabhi aatmaon ka baap। to tum aatmaayen is shareer mein gupta ho। is shareer dvaara karma karti ho। main bhi gupta hoon। tum bachchon ko yeh gyaan ab mil raha hai ki main aatma is shareer se dhaki hui hoon। aatma hai - incognito। shareer hai cognito। main bhi ashareeri hoon। baap incognito is shareer dvaara sunaate hain। tum bhi incognito ho, shareer dvaara sunte ho। tum jaante ho baba aaya hua hai। baap aate hain bhaarat ko phir se gareeb se saahookaar banaane। tum kahenge hamaara bhaarat gareeb hai। sab jaante hain parantu unko koi pata hi nahin ki hamaara bhaarat saahookaar kab tha, kaise tha। tum bachchon ko bahut nasha hai - hamaara bhaarat to bahut saahookaar tha। duhkh ki baat nahin thi। satayug mein doosra koi dharma nahin tha। ek hi devi-devta dharma tha, yeh kisko pata nahin। yeh jo world ki history-geography hai, yeh koi nahin jaante hain। abhi tum achhi reeti samajhte ho hamaara bhaarat bahut saahookaar tha। abhi bahut gareeb hai। ab phir baap aaye hain saahookaar banaane। bhaarat satayug mein bahut saahookaar tha, jabki devi-devtaaon ka raajya tha phir raajya kahaan chala gaya। yeh koi nahin jaante hain। rishi-muni aadi bhi kehte ham rachta aur rachna ko nahin jaante hain। baap kehte hain - satayug mein in devi-devtaaon ko rachta-rachna ka gyaan nahin tha। aadi-madhya-ant ko nahin jaante। agar unhon ko yeh gyaan ho ki ham seedhi utarte rasaatal mein jaayenge to baadshaahi ka sukh bhi na rahe। chinta lag jaae।

abhi tumko chinta lagi hui hai ki ham tamopradhaan se satopradhaan kaise banen। ham aatmaayen jo niraakaari duniya mein rehti thi vahaan se phir kaise sukhdhaam mein aai - yeh bhi gyaan hai। ham abhi chadhti kala mein hain। yeh 84 janmon ki seedhi hai, iske beech mein kya hota hai, yeh bhi tum jaante ho। satayug mein sab to nahin aayenge। drama anusaar har ek actor nambarvaar apne-apne samay par aakar part bajaayenge।

abhi tum bachche jaante ho gareeb nivaaz kisko kaha jaata hai, duniya nahin jaanti। geet mein bhi suna - aakhir woh din aaya aaj... yeh sab hai bhakti। bhagwan kab aakar ham bhakton ko is bhakti maarga se chhudaae sadgati mein le jaate hain, yeh bhi samjha hai। raamraajya, raavanraajya kis cheez ka naam hai, yeh bhi koi manushya nahin jaante। abhi tum bachche samajhte ho - baba phir se aa gaya hai is shareer mein। shiv jayanti bhi manaate hain to shiv zaroor aate hain। aise bhi nahin kehte main shreekrishna ke tan mein aata hoon, nahin। baap kehte hain - shreekrishna ki aatma ne 84 janma liye hain। jo pahle number mein tha woh ab ant mein hai, tatatvam। main to aata hi hoon saadhaaran tan mein। tumko aakar batlaata hoon, tum kaise 84 janma bhogte ho। is samay devta dharma ka to ek bhi apne ko samajhte nahin hain kyonki satayug ko bahut door le gaye hain। kalpa ki aayu laakhon varsha likh di hai। vaastav mein drama ki history to bahut chhoti hai। ismen koi dharma ki 500 varsha ki, koi ki 2500 varsha ki history hai। tumhaari history hai - 5 hajaar varsha ki। devta dharma vaale hi svarga mein aayenge aur dharma to aate hi baad mein hain। devta dharma vaale hi aur dharmon mein convert ho gaye hain। drama anusaar phir bhi aise hi convert ho jaayenge। phir apne-apne dharma mein lautkar aayenge।

baap samjhaate hain bachche, tum to vishwa ke maalik the। tum abhi samajhte ho baba svarga ki sthaapna karne vaala hai to ham kyon nahin svarga mein honge। baap se ham varsa zaroor lenge। to isse siddha hota hai ki yeh hamaare dharma ka hai, jo nahin hoga woh aayenge hi nahin। kahenge paraaye dharma mein kyon jaayen। tum bachche jaante ho satayug nai duniya mein devtaaon ko bahut sukh the। sone ke mahal the। somnaath ke mandir mein kitna sona tha। aisa koi doosra mandir hota hi nahin। usmein bahut heere javaahraat the। bauddha aadi ke koi heere javaahron ke mahal nahin honge। tum bachchon ko jis baap ne itna ooncha banaaya hai unki tumne kitni ijjat rakhi hai। jo achha karma karke jaate hain unki ijjat rakhi jaati hai। abhi tum jaante ho sabse achhe karma patit-paavan baap hi karke jaate hain। tumhaari aatma kehti hai sabse uttam se uttam seva behad ka baap aakar karte hain। hamko rank se raav, beggar se prince bana dete hain। jo bhaarat ko svarga banaate hain unki bhi ijjat koi nahin rakhte। tum jaante ho oonch te oonch mandir gaaya hua hai somnaath ka, jisko loot le gaye। lakshmi-naaraayan ke mandir ko kabhi koi ne loota nahin hai। somnaath ke mandir ko loota hai। bhakti maarga mein yeh bahut dhanvaan hote hain। raajaaon mein bhi nambarvaar hote hain na। jo oonch martabe vaale hote hain unki chhote martabe vaale ijjat karte hain। darbaar mein bhi nambarvaar baithte hain। baba to anubhvi hai na। yahaan ki darbaar hai, patit raajaaon ki। paavan raajaaon ki darbaar kaisi hogi। jabki unhon ke paas itna dhan hoga to unhon ka ghar bhi itna hi achha hoga। abhi tum jaante ho baba hamko padha rahe hain, svarga ki sthaapna kara rahe hain। ham mahaaraaja-mahaaraani svarga ke bante hain phir ham girte hain, phir ham pahle-pahle shivbaaba ke pujaari banenge। jisne svarga ka maalik banaaya, unki ham pooja karenge। woh hamko bahut saahookaar banaate hain। abhi bhaarat kitna gareeb hai। aage itna gareeb nahin tha। bahut khushi mein rehte the। jo jameen 500 roopaye mein li thi, woh aaj 5 hajaar mein bhi nahin milti hai। vahaan to dharni ka moolya hota nahin, jisko jitna chaahiye le leve। dher ki dher jameen padi hogi। meethi nadiyon par tumhaare mahal honge na। manushya bahut thode honge, prakriti daasi hogi, phal phool bahut achhe milte rehte hain। abhi tum kitni mehnat karte ho। lekin sookha pad jaata hai to anna nahin milta hai। to geet sunne se tumhaare romaanch khade ho jaane chaahiye। baap ko gareeb-nivaaz kehte ho। ab arth samjha na। kisko saahookaar banaate hain? zaroor yahaan jo aayenge unko saahookaar banaayenge na। tum bachche jaante ho hamko paavan se patit banne mein 5 hajaar varsha lage hain। abhi phir phat se baba patit se paavan banaate hain। oonch te oonch banaate hain। ek second mein jeevanmukti mil jaati hai। kehte hain baba ham aapke hain। baap kehte hain - bachche tum vishwa ke maalik ho। bachcha paida hua aur vaaris bana। kitni khushi hoti hai। lekin bachchi ko dekh chehra hi utar jaata hai। yahaan to sabhi aatmaayen bachche hain। ham svarga ke maalik ban gaye, abhi pata pada hai ki ham 5 hajaar varsha pahle svarga ke maalik the। baba ne aisa banaaya tha। shiv jayanti bhi manaate hain - parantu yeh nahin jaante ki woh kab aaya tha। lakshmi-naaraayan ka raajya kab tha, kuchh nahin jaante। vaastav mein bhaarat ki aabaadi sabse badi honi chaahiye। bhaarat ki jameen bhi sabse badi honi chaahiye। laakhon varsha ho phir to bahut jameen chaahiye। saari duniya ki bhi jameen poori na ho। laakhon varsha mein kitne manushya paida ho jaate। anginat manushya ho jaaen। itne to hain nahin। yeh sab baaten baap baith samjhaate hain। manushya sunte hain to kehte hain yeh baaten to kab nahin suni, na koi shaastron se padhi, yeh to wonderful baaten hain।

abhi tum bachchon ki buddhi mein saare chakra ki knowledge hai। yeh bahut janmon ke ant mein ab patit aatma hai, jo satopradhaan tha so ab tamopradhaan hai, phir satopradhaan banna hai। tum aatmaon ko ab shiksha mil rahi hai - aatma shareer dvaara sunti hai to shareer jhoolta hai kyonki aatma sunti hai na। barobar ham aatma ne 84 janma liye hain, 84 maa baap zaroor mile honge। yeh bhi hisaab hai na। buddhi mein aata hai 84 janma lete hain phir aur kamti janma vaale bhi honge। minimum, maximum ka hisaab hoga na। baap baith samjhaate hain shaastron mein kya-kya likh diya hai। tumhaare liye to phir bhi 84 janma kehte hain, mere liye to anginat, beshumaar janma kah diya hai। kan-kan mein bas jidhar dekhta hoon, tu hi tu.... krishna hi krishna hai। mathura vrindaavan mein kehte hain - shreekrishna sarvavyaapi hai। raadhe panth vaale phir kahenge raadhe hi raadhe। kahenge ham raadha-svaami hain। krishna svaami aur hain। woh raadhe ko maante hain, jidhar dekhta hoon raadhe hi raadhe। tum bhi raadhe ham bhi raadhe।

ab baap baith samjhaate hain barobar main gareeb nivaaz hoon na। bhaarat hi sabse saahookaar tha। abhi sabse gareeb bana hai isliye mujhe bhaarat mein hi aana pade। yeh bana banaaya drama hai, ismen jara bhi farka nahin ho sakta hai। yeh huge drama hai। drama jo shoot hua woh hoobhu repeat hoga। drama ka bhi pata hona chaahiye। drama maana drama। woh hota hai had ka drama, yeh hai behad ka drama। iske aadi-madhya-ant ko koi nahin jaante। to gareeb nivaaz niraakaar bhagwan ko hi maanenge, shreekrishna ko nahin maanenge। shreekrishna to dhanvaan satayug ka prince banta hai। bhagwan ko to apna shareer hai nahin, woh aakar tum bachchon ko dhanvaan banaate hain। tumko raajayog ki shiksha dete hain। woh bhi padhaai se barrister aadi bante hain phir kamaai karte hain। baap bhi tumko abhi padhaate hain। tum bhavishya mein nar se naaraayan bante ho। tumhaara janma to hoga na। aise to nahin svarga koi samudra se nikal aayega। shreekrishna ne bhi janma liya na। kansapuri aadi to us samay thi nahin। shreekrishna ka kitna naam gaaya jaata hai। unke baap ka naam hi nahin, unka baap kahaan hai। zaroor raaja ka bachcha hoga na। vahaan bade raaja ke ghar mein janma hota hai। parantu woh patit raaja hone ke kaaran unka naam thode hi hoga। shreekrishna jab hai tab thode patit bhi rehte hain। jab woh bilkul khalaas ho jaate hain tab woh gaddi par baithte hain, apna raajya le lete hain tab hi unka sanvat shuru hota hai। lakshmi-naaraayan se sanvat shuru hota hai। tum poora hisaab likhte ho। inka raajya itna samay phir inka itna samay to manushya samjhenge yeh to kalpa ki aayu badi ho hi nahin sakti। 5 hajaar varsha ka poora hisaab hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) rachayita aur rachna ka gyaan buddhi mein rakh satopradhaan banne ka purushaartha karna hai। bas ek hi chinta rakhni hai ki humein satopradhaan zaroor banna hai।

2) is behad ke drama ko buddhi mein rakh apaar khushi mein rehna hai, baap samaan ijjat paane ke liye patiton ko paavan banaane ki seva karni hai।

vardaan:- adhikaareepan ki smriti dvaara sarva shaktiyon ka anubhav karne vaale praapti swaroop bhav

yadi buddhi ka sambandh sada ek baap se laga hua rahe to sarva shaktiyon ka varsa adhikaar ke roop mein praapta hota hai। jo adhikaari samajhkar har karma karte hain unhein kahne va sankalp mein bhi maangane ki aavashyakta nahin rehti। yeh adhikaari pan ki smriti hi sarva shaktiyon ke praapti ka anubhav karaati hai। to nasha rahe ki sarva shaktiyaan hamaara janma-siddha adhikaar hain। adhikaari ban karke chalo to adheenta samaapta ho jaayegi।

slogan:- svayan ke saath-saath prakriti ko bhi paavan banaana hai to sampoorn lagaav mukta bano।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

agar pavitrata ka niyam pakka hai to lagaav mukta, eershya aur krodh se bhi mukta bano। chidchidaapan bhi na ho। yeh bhi lagaav nahin rakho ki yeh hona hi chaahiye। svaartha ya eershya ke vash koi baat kahenge aur woh poori nahin hogi to krodh paida hoga isliye pavitrata ke pillar ko pakka karo to yeh pillar light house ka kaam karega।