Murli du jour du lundi 7 septembre 2026

07-09-2026 praatahmurli om shanti "baapdaada"' madhuban

“meethe bachche - tum yahaan shreekrishna jaisa prince banne ki padhaai padhte ho, tumhein padhaane vaala svayan bhagwan hai''

prashn:- baba jab bhagvaanuvaach shabd bolte hain to kai bachche bhi moonjh jaate hain - kyon?

uttar:- kyonki bhagwan to gupta hai। woh samajhte hain shaayad is daada ne bhagvaanuvaach bola hai। parantu niraakaar bhagwan ko bolne ke liye zaroor mukh chaahiye na। baba kehte yeh wonderful samajhne ki baat hai ki main kaise inmen pravesh kar tumhein padhaata hoon।

om shanti। bhagvaanuvaach। bhagwan kya kehte hain? yeh bhagvaanuvaach kisne kaha? dekhne mein to koi aata nahin। manushya ko bhagwan nahin kaha jaata। koi samjhenge ki bolne vaale hi kehte hain - bhagvaanuvaach। lekin niraakaar bhagwan bol rahe hain, yeh sirf tum hi jaante ho। yeh kaun baitha hai! bhagwan kahaan hain! yeh nai baat hai na isliye manushya moonjh jaate hain। lekin bhagvaanuvaach hai zaroor। kehte hain ki main bachchon ko raajayog sikha raha hoon। nar se naaraayan athva krishna, naari ko lakshmi athva raadhe banaane liye yog aur gyaan sikhaata hoon, inse aur kya chaahiye। tumko ham raajaaon ka raaja, prince ka prince banaata hoon। prince-princess bhi to mandir mein jaate honge na। vikaari prince, nirvikaari prince shreekrishna ko naman karte hain। to main tumko prince ka bhi prince banaata hoon। shreekrishna jaise svarga ka prince bano। knowledge padhne se hi to banenge na। doctor va barrister kahenge na student ko, ki main tumko doctor va barrister banaata hoon। parantu padhenge tab to banenge। baba kehte bachche, achhi reeti samajhte ho ki raajayog sikhlaane vaala ek hi bhagwan hai, na ki shreekrishna। raadhe-krishna to alag-alag raajaai ke bachche hain। unhon ki aapas mein sagaai hoti hai, shaadi ke baad naam badalta hai isliye chitra mein bhi lakshmi-naaraayan ke neeche raadhe-krishna ko dikhaaya hai।

ab baap achhi reeti samjhaate hain ki yeh brahma bhi number one bhagat tha। pichhaadi mein naaraayan ki pooja karte the। shreekrishna ki bhakti ki va shreenaaraayan ki bhakti ki, ek hi baat hai। krishna hi bada hokar naaraayan banta hai। ab tumko nar se naaraayan banne ke liye raajayog sikhla rahe hain। ab tumhaare 84 janma poore hue। ab inki aatma bhi padh rahi hai phir bhavishya mein shreekrishna banti hai। baap kehte hain - bachchon tum gyaan-chita par baith gore bante ho phir kaam-chita par baith saanvare ban gaye ho। yeh hai kansapuri, main tumko krishna puri le jaane ke liye aaya hoon। shreekrishna hi sarvagun sampanna, 16 kala sampoorn hai… yahaan koi mein sarvagun hain nahin। main aaya hoon bachchon ko sampoorn nirvikaari banaane। banna hai yogbal se। baahubal hai - hinsak ladaai, jo teer-kamaan se hoti thi। phir bandookon, talvaaron se hui। ab to hoti hai bombs se। khud kehte hain ham aise bombs banaate hain jo ghar baithe sab khatma ho jaayenge। phir military kya karegi! baap kehte hain - meethe-meethe bachchon yeh paathshaala hai। main tumko prince shreekrishna jaisa banaata hoon। jo first prince satayug ka tha, woh ab 84 janma lekar kaliyug mein beggar bana hai। bhaarat mein hi unka raajya tha। phir punarjanma lena pade na। shreekrishna ko bhagwan kehte to bhagwan phir punarjanma mein kaise aayega? bhagwan to niraakaar hai। woh hai hi ek rachayita। baaki sab hain rachna, tab to kehte hain ki ham aatmaayen sab bhaai-bhaai hain। baap samjhaate hain ki tum brahmaakumaar-kumaari aapas mein bhaai-behen thahre। to phir criminal assault kaise ho। tum varsa ek baap se lete ho, bhavishya ke liye। agar pavitra nahin rahenge to shantidham, sukhdhaam mein kaise jaayenge। pukaarte bhi hain ham patit ban gaye hain, paavan banaane aao। to baap kehte hain mujhe yaad karo। yeh tumhaara antim janma hai। tum sab aatmaayen ab vaapis vaanaprastha mein ja sakti ho isliye vaanaprasthi ho। aisa koi guru raasta bata na sake। yeh gyaan hai hi ek baap ke paas। vahi patit-paavan niraakaar hai। baap kehte hain ki mujhe yaad karo, thode time ke liye, mainne is tan ka loan liya hai। shareer bigar aatma kaise bol sakegi! bhagvaanuvaach hai ki main boodhe saadhaaran tan mein pravesh kar tum bachchon ko padhaata hoon। main garbha mein nahin aata hoon। garbha mein aane vaale ko to punarjanma mein aana pade। main ek hi baar aata hoon। prakriti ka aadhaar mujhe zaroor chaahiye। main ismen baith tumko padhaata hoon। yeh to pahle apna javaahraat ka dhandha karta tha। koi guru ne nahin sikhaaya, achaanak hi baap ne pravesh kiya। karnakraavanhaar hone kaaran isse kartavya karaate rehte hain। yeh bhi seekhta jaata hai। tum bhi saath mein seekhte jaate ho। bolte hain tumko, parantu sunta pahle main hoon। padhaane tum bachchon ko aata hoon parantu inki aatma bhi padhti rehti hai। bachchon ko raajayog sikhlaane aaya hoon। aisa kabhi koi padhaate nahin hain। yeh hai paavan banne ki baat। yeh sangamayug hai hi purushottam banne ka। purushottam shreekrishna tha। svayanvar ke baad unki degree kuchh kam ho jaati hai isliye shreekrishna ki mahima bahut hai। naam hi hai shreekrishna-puri, inko kaha jaata hai kansapuri। baaki kahaani banaai hai - shreekrishna aur kans ki।

bachchon ko samjhaaya hai ki paripakva avastha hone se bhakti aapehi chhoot jaayegi। tum kabhi koi ko aisa nahin kehna ki bhakti na karo। unko gyaan dena hai। baap tumko gyaan de svarga ka prince banaane aaye hain। shreekrishna bhi svarga ka maalik tha, ab nahin hai। phir se woh bhi raajayog dvaara ban rahe hain। tumko bhi purushaartha kar baap ko yaad karna hai। heaven ki sthaapna karne vaala hai - heavenly god father। vahi aakar nai srishti rachte hain। woh karega tab jab kaliyug poora hoga। satayug-treta mein nahin aate। kehte hain main kalpa-kalpa sangamayuge aata hoon। unhonne kalpa akshar nikaal sirf yuge-yuge likh diya hai। to bhi 4 yug hain। paanchava hai yeh sangamayug। achha phir to 5 avtaar maanon। parantu itne kachchha-machchha parshuraam avtaar hote hain kya! yeh sabhi hain shaastron ki baaten। dharma ka naam aur bhaarat ka naam hi badli kar diya hai। hindu dharma aur hindustaan kah dete hain। bhaarat naam kyon badalna chaahiye! yada yadaahi dharmasya... bhaarat। usmein bhi bhaarat ka akshar aata hai। baap samjhaate hain ki tumne koi ek janma thode hi bhakti ki hai। dvaapar se ki hai। bhakti bhi pahle avyabhichaari thi, sirf shiv ki bhakti karte the। jis shivbaaba ne hi bhaarat ko svarga banaaya tha aur ab phir svarga ka maalik banaane aaye hain। to patit shareer mein baith bataate hain ki main aata hi hoon, patit shareer mein, patit duniya mein patiton ko paavan banaane। bhakti maarga mein to phir bhi mere liye bada bhaari mandir banaate hain। kitni clear baat hai। inmen baba ki praveshta hui aur geeta aadi padhna chhod diya। bhakti chhoot gai। anaayaas hi to chhoda। tumko koi ne kaha nahin ki bhakti nahin karo।

ab tum bachchon ko baba samjhaate hain ki phir se main tumko krishnapuri ka maalik banaata hoon। shreekrishna ki phir 8 dynasty chalti hain। pahle kahenge prince oph satayug phir banta hai king oph satayug। 8 peedhi unki chalti hain। us samay to doosri raajaai hoti nahin। ab baba kehte hain tum bachche bhi satayug ke prince bano। bhakti mein koi sukh nahin hai। gyaan se tum svarga ke maalik bante ho। koi ka baap mar jaata hai to unse poochha jaaye tumhaara baap kahaan gaya! kahenge svargavaasi hua। samajhte hain aatma aur shareer donon gaye। lekin shareer to yahaan hi chhod gaye, baaki gai aatma। iska matlab pahle narka mein tha। aatma shareer chhod svarga mein gai phir ismen rone ki kya darkaar hai? svarga ab yahaan hai kya? parantu samajhte nahin hain। kah dete sab eeshvar ka hukm hai। sukh duhkh sab eeshvar deta hai, sab eeshvar ke roop hain। parantu baap kehte hain ki main bachchon ko duhkh kaise de sakta hoon। baap se bachche kab duhkh maangate hain kya? baap to bachchon ko laayak banaakar property de jaate hain। baaki duhkh to har ek ko karmon ke anusaar hi milta hai। baap kehte hain ki abhi bachche aadi kuchh nahin maango। abhi yeh property aadi sab khatma hone vaali hai। phir tumhaare bachchon ko kya milega! itna samay hi nahin hai jo tumhaari property ka bachcha maalik ban sake। bachcha bada ho tab to maalik banen, parantu itna time hi nahin hai। vinaash saamne khada hai। manushya to kehte hain ki kaliyug mein ajun 40 hajaar varsha pade hain। yeh brahmaakumaar-kumaariyaan to vinaash-vinaash karte rehte hain। kahaani hai na - sher aaya, sher aaya... aakhir to aaya aur kha gaya। sab samajhte hain ki thoda-thoda kaal aayega। yeh to hota hi rehta hai lekin tum kehte ho ki mahaakaal aaya hua hai। shivbaaba kaalon ka kaal aaya hua hai, jo sabhi aatmaon ko vaapis le jaayega। to shareer to zaroor chhodna pade isliye baba kehte hain - yog se pavitra bano। aatmaon ko pavitra banaae phir vaapis le jaayenge। agar pavitra nahin banenge to bahut sajaayen ant mein khaani padengi aur oonch pad bhi pa nahin sakenge। shreekrishna number one paas with honour hai, unko scholarship milti hai। 21 janma raajya paate hain। kitna sahaj samjhaate hain। buddhi mein baithta bhi hai phir gum ho jaata hai। kisko bhi bhakti chhudaani nahin hai। baap aaye hain - bhakton ko bhakti ka phal dene। kehte hain main kalpa pahle misal phir usi saadhaaran tan mein aaya hoon। kalpa-kalpa aakar tumko padhaata hoon। yeh hai oonch se oonch padhaai।

tum jaante ho ham satopradhaan the। ab tamopradhaan hain phir bhaarat hi satopradhaan banta hai। aur dharma vaalon ne itna sukh nahin dekha hai to duhkh bhi nahin dekha hai। baahar vaalon ke paas paisa to bahut hai to gareeb desh ko karz dete hain। un bichaaron ko pata nahin hai, yeh to return ho raha hai। bilkul ghor andhiyaare mein kumbhakran ki neend mein soye hue hain। pichhaadi mein haay-haay kar uthenge। phir tum kahenge - tu let kyonki ladaai shuru ho jaayegi। phir kya karenge! bhambhor ko aag lag jaati phir to tu let ho jaata hai isliye baap kehte hain - bachche, ab jaldi-jaldi purushaartha karte jaao। baba koi jaasti takleeph nahin dete hain। baba ko aakar kehte hain ki baba agar ham pooja nahin karte to woh kehte hain ki yeh to naastik ban gaya hai। baba raay dete hain ki saakshi hokar baba ki yaad mein raho। thodi-thodi pooja baahar se kar do। ek hota hai dil se karna, doosra hota hai raazi karne ke liye karna। andar mein tumko shivbaaba ko yaad karna hai। agar koi tang karte hain to pooja kar dikhaao, to woh khush ho jaayenge। yeh koi paap ka kaam nahin hai। baba to bahuton ko kehte hain shaadi aadi par bhale jaao। donon taraph tod nibhaana hai। vahaan bhi sunaate-sunaate koi na koi ko teer lag jaayega। yukti se chalna hai। baap ka pharmaan hai ki ab patit nahin banna hai। pavitra banne se hi tum shreekrishnapuri ke maalik banenge। shivbaaba ko yaad karo to vikarma vinaash honge aur vishwa ke maalik ban jaayenge। bachchon, aisi-aisi yukti se apne mitra-sambandhiyon ko samjhaana hai। woh hai jismaani yaatra, yeh hai roohaani yaatra। yeh roohaani yaatra baap sikhlaate hain। kehte hain ki maamekam yaad karo to patit se paavan ban jaayenge aur sab duhkh door ho jaayenge। koi virla vyaapaari vyaapaar kare arthaat vaikuntha ki baadshaahi leve। shreemat par chalte raho। aise bhi na ho paise aadi kahaan muphta mein jaayen, kuchh phal nahin nikle। gharbaar bhi sambhaalna hai, bachchon ki paalna bhi karni hai। sirf shreemat par chalna hai। raay leni hai ki baba is haalat mein ham kya karen! baba bachchi kehti hain ki ham shaadi karen to baba kehte hain ki shaadi karaani hi padegi kyoki unka hissa hai, unko de do। baap sirf samjhaate hain phir bhi kuchh poochhna ho to poochhkar shreemat par chalo। bachchon ko baap ki aagya par chalna hai, ismen hi kalyaan hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) har karma saakshi hokar shivbaaba ki yaad mein karna hai। laukik, alaukik donon taraph tod nibhaana hai। laukik se yuktiyukta chalna hai।

2) is samay antim janma mein bhi yeh vaanaprastha avastha hai। vaapis ghar jaana hai isliye paavan zaroor banna hai। koi bhi bandhan nahin banaane hain।

vardaan:- pharmaan ki paalna dvaara sarva armaanon ko khatma karne vaale maaya proof bhav

amritvele se lekar raat tak dincharya mein jo bhi pharmaan mile hue hain, usi pramaan apni vritti, drishti, sankalp, smriti, service aur sambandh ko check karo। jo har sankalp har kadam pharmaan ko paalan karte hain unke sab armaan khatma ho jaate hain। agar andar mein purshaartha ka va saphalta ka armaan bhi rah jaata hai to zaroor kahaan na kahaan koi na koi pharmaan paalan nahin ho raha hai। to jab bhi koi uljhan aaye to chaaron or se check karo - isse maayaaprooph svatah ban jaayenge।

slogan:- apni sookshm kamjoriyon ka chintan karke unhein mita dena - yahi svachintan hai।

avyakt ishaare - ab apne daata swaroop ko pratyaksha karo

jaise koi khaali sthaan hota hai to all-round sevaadhaari samay pramaan jagah bhar dete hain। aise agar kisi ke dvaara koi bhi shakti ki kami anubhav ho to bhi apne sahayog se jagah bhar do, jisse doosre ki kami ka bhi anya koi ko anubhav na ho, isko kaha jaata hai - daata ke bachche ban samay pramaan use sahayog ki den dena।