Murli du jour du mercredi 30 septembre 2026

30-09-2026 praatahmurli om shanti "baapdaada"' madhuban

“meethe bachche - is deh-bhaan se mar jaao arthaat is puraani patit deh se preet tod ek baap se sachchi preet jodo''

prashn:- sangam par tum bachchon ki natural beauty kaun si hai?

uttar:- gyaan ke jevron se sada saje sajaaye rehna - yahi tumhaari natural beauty hai। jo gyaan ke jevron se saje hue rehte hain unka chehra khushi mein phool ki tarah khila rehta hai। agar khushi nahin rehti to zaroor koi deh-abhimaan ki aadat hai, jisse hi sab vikaar utpanna hote hain।

geet:- mahphil mein jal uthi shama…

om shanti। is geet ka arth kitna vichitra hai। preet bani hai kiske liye? (marne ke liye) kisse bani hai? bhagwan se kyonki is duniya se markar unke paas jaana hai। aisi kab kiske saath preet hui hai kya? jo yeh khyaal mein aaye ki mar jaayenge। phir koi preet rakhenge? geet ka arth kitna wonderful hai। shama se parvaane preet rakh pheri pahan jal marte hain। tumko bhi baap ke paas aate-aate yeh shareer chhodna hai arthaat baap ko yaad karte-karte shareer chhodna hai। yeh to jaise bada dushman ho gaya, jiske saath ham preet rakhen aur mar jaaen isliye manushya darte hain। daan-punya, teertha yaatra aadi karte hain, bhagwan ke paas jaane ke liye। shareer chhodte hain to manushya kehte hain bhagwan ko yaad karo। bhagwan kitna naami-graami hai। woh aate hain to saari puraani duniya ko khatma kar dete hain। tum bachche jaante ho - ham is university mein aate hi hain - puraani duniya se nai duniya mein jaane ke liye। puraani duniya ko patit duniya hell kaha jaata hai। baap nai duniya mein jaane ka raasta bataate hain sirf mujhe yaad karo, main hoon heavenly god father। us father se tumko dhan, milkiyat, makaan aadi milega। bachchiyon ko varsa milna nahin hai। unko doosre ghar bhej dete hain। goya woh vaaris nahin thahri। yeh to baap hai sab aatmaon ka baap, inke paas sabko aana hai, marna hai। koi samay zaroor baap aate hain, sabko ghar le jaate hain kyonki nai duniya mein bahut thode manushya hote hain। puraani duniya mein to bahut hain, nai duniya mein manushya bhi thode aur sukh bhi bahut hota hai। puraani duniya mein bahut manushya hain to duhkh bhi bahut hai isliye pukaarte rehte hain। baapu gaandhi jisko bhaarat ka pita samajhte the, woh bhi kehte the he patit-paavan aao। sirf unko jaante nahin the। samajhte bhi hain patit-paavan parampita paramatma hai। vahi world ka liberator hai। raam seeta ko to saari duniya nahin maanegi na। yeh bhool hai। saari duniya parampita paramatma ko liberator guide maanti hai। liberate karte hain duhkhon se। achha duhkh dene vaala kaun? baap to duhkh de na sake kyonki woh patit-paavan hai। paavan duniya sukhdhaam mein le jaane vaala hai। tum ho us roohaani baap ke roohaani bachche। jaise baap vaise bachche। laukik baap ke hain jismaani bachche।

abhi tum bachchon ko samajhna hai ki ham aatma hain, parampita paramatma hamko varsa dene aaye hain। ham student hain, yeh bhoolna nahin chaahiye। bachchon ki buddhi mein rehta hai shivbaaba madhuban mein murli bajaate hain। woh kaath ki murli to yahaan nahin hai। shreekrishna ka dance karna, murli bajaana woh bhakti maarga ka hai। tum shreekrishna ke liye murli nahin kah sakte। murli shivbaaba bajaate hain। tumhaare paas achhe-achhe geet banaane vaale aayenge। geet aksar karke purush hi banaate hain। tumko koi bhakti maarga ke geet aadi nahin gaane hain। tumhein to ek shivbaaba ko hi yaad karna hai। baap kehte hain - mujh alpha ko yaad karo। shiv ko kehte hain bindi। vyaapaari log bindi likhenge to kahenge shiv। ek bindi likhen 10 ho jaayega phir bindi likho to 100... tumko bhi shivbaaba ko yaad karna hai। jitna shiv ko yaad karte ho to aadhaakalpa ke liye bahut saahookaar ban jaate ho। vahaan gareeb hote hi nahin। sab sukhi rehte hain। duhkh ka naam nahin। baap ki yaad se vikarma vinaash ho jaayenge। tum bahut dhanvaan banenge। isko kaha jaata hai sachche baap dvaara sachchi kamaai। yahi saath chalegi। manushya sabhi khaali haath jaate hain। tumko bhartu haath jaana hai। baap ko yaad karna hai aur pavitra banna hai। baap ne samjhaaya hai - purity hogi to pees, prosperity milegi। tum aatma pahle pavitra thi phir apvitra banti ho। sannyaasiyon ko bhi semi pavitra kahenge। tumhaara hai full sannyaas। tum jaante ho woh kitna sukh paate hain। thoda sukh hai phir to duhkh hi hai। woh sab hai bhakti maarga। bhakti maarga mein hanumaan ki pooja karo to uska deedaar ho jaata hai। chandika devi ka kitna mela lagta hai। unka chitra bhi hoga, jinka dhyaan karenge woh to zaroor saamne aayega hi। parantu usse kya milega? anek prakaar ke mele lagte hain kyonki aamadni to hoti hai na। yeh sab unhon ka dhandha hai। kehte hain dhandhe sabmen dhoor, bigar dhandhe nar se naaraayan banaane ke। yeh dhandha koi virla kare।

baap ka bankar sab kuchh deh sahit baap ko de dena kyonki tum jaante ho hamko naya shareer chaahiye। baap kehte hain - tum krishnapuri ja sakte ho parantu jab aatma tamopradhaan se satopradhaan banen। krishnapuri mein aise nahin kahenge ki hamko paavan banaao। yahaan sab manushya maatra pukaarte hain - he liberator aao। is paap aatmaon ki duniya se liberate karo। abhi tum jaante ho baap aaya hai hamko apne saath le jaane। vahaan jaana to achha hai na। manushya shanti chaahte hain। ab shanti kehte kisko hain - yeh nahin jaante। karma bigar to koi rah nahin sakte। shanti to hai shantidham mein। phir yeh shareer lekar karma to karna hi hai। satayug mein karma karte hue shant rehte hain, ashaanti mein manushya ko duhkh hota hai isliye kehte hain shanti kaise mile। abhi tum bachche jaante ho shantidham hamaara ghar hai। satayug mein shanti sukh sab kuchh hai। ab woh chaahiye ya sirf shanti chaahiye। yahaan to duhkh hai isliye patit-paavan baap ko bhi yahaan pukaarte hain। bhakti karte hi hain bhagwan se milne ke liye। bhakti bhi pahle avyabhichaari phir vyabhichaari hoti hai। vyabhichaari bhakti mein dekho kya-kya karte hain। seedhi mein dekho kitna achha dikhaaya hai। parantu pahle-pahle to siddha karna chaahiye bhagwan kaun hai। shreekrishna ko aisa kisne banaaya! aage janma mein yeh kaun tha! samjhaane ki badi yukti chaahiye। jo achhi service karte hain, unki dil bhi gavaahi deti hai। university mein jo achhi reeti padhenge woh zaroor teekhe jaayenge। nambarvaar to hote hi hain। koi dullhead bhi hote hain। shivbaaba ko aatma kehti hai meri buddhi ka taala kholo। baap kehte hain - buddhi ka taala kholne ke liye hi to aaya hoon। parantu tumhaare karma hi aise hain jo taala khulta hi nahin। phir baba kya karenge। bahut paap kiye hue hain, ab baba unko kya karenge! teacher ko kahenge, ham kam padhte hain। teacher kya karenge? teacher to koi kripa nahin karenge। karke extra time rakhenge। woh to tumko mana nahin hai। pradarshani khaali padi hai, baithkar practice karo। bhakti maarga mein to koi kahenge maala phero। koi kahenge yeh mantra yaad karo। yahaan to baap apna parichay dete hain। baap ko hi yaad karna hai, jisse varsa milta hai। satayug mein to paarlaukik baap ka varsa mil jaata hai phir yaad karne ki darkaar hi nahin rehti। 21 janmon ke liye varsa mil jaata hai, to baap se achhi reeti se varsa lena chaahiye na। ismen bhi baap kehte hain, vikaar mein kabhi nahin jaana। thodi bhi vikaar ki taste baithi to phir vriddhi ho jaayegi। cigarette aadi ki ek baar taste karte hain to sang ka rang jhat lag jaata hai phir us aadat ko chhodna mushkil ho jaata hai। bahaana kitne karte hain। aadat koi nahin daalni chaahiye। chhi-chhi aadten mitaani hain। baap kehte hain - jeete ji deh ka bhaan chhodo, mujhe yaad karo। devtaaon ko bhog hamesha pavitra hi lagaaya jaata hai to tum bhi pavitra khaao।

abhi tum bachchon ko phool muaaphik harshit rehna chaahiye। kanya ko pati milta hai to mukhda khil jaata hai na। achhe jevar aadi kapde pahanti hai to chamak uthti hai। abhi tum to gyaan ke jevar pahante ho। vahaan svarga mein to natural beauty rehti hai। shreekrishna ka naam hi hai sundar। raaja-raani, prince-princess sab sundar hote hain। vahaan prakriti bhi satopradhaan ho jaati hai। lakshmi-naaraayan jaise natural beauty yahaan koi bana na sake। unko koi in aankhon se dekh thode hi sakte hain। haan saakshaatkaar hota hai parantu saakshaatkaar se koi hoobhu chitra bana thode hi sakenge। haan koi artist ko saakshaatkaar ho jaae aur usi samay baith banaaye। parantu hai mushkil। to tum bachchon ko bahut nasha rehna chaahiye। abhi baba hamko lene liye aaya hai। baba se humein svarga ka varsa milta hai। yeh hamaare 84 janma poore hue। aise-aise khyaal buddhi mein hone se khushi hogi। vikaar ka jara bhi khyaal nahin aana chaahiye। baap kehte hain - kaam mahaashatru hai। dropdi ne bhi isliye pukaara hai na।

baap kehte hain - tum ek mere se hi suno aur yahi shreemat auron ko sunaao। father shows san। san shows father। father kaun? shiv father। shiv aur shaaligraam ka gaayan hai। shivbaaba jo samjhaate hain is par follow karo। follow father। yeh gaayan unka hai, baap kehte hain - meethe bachche follow kar pavitra bano, follow karne se hi tum svarga ke maalik banenge। laukik baap ko follow karne se 63 janma tum seedhi neeche utarte ho। ab paarlaukik baap ko follow kar oopar chadhna hai। baap ke saath jaana hai। baap kehte hain - ek-ek ratna laakhon roopayon ka hai। baap roz samjhaate rehte hain - meethe-meethe bachchon pahle-pahle sabko do baap ka parichay dena hai। laukik baap varsa dete hain patit banne ka। paarlaukik baap varsa dete hain paavan banne ka। kitna farka hai। ab paarlaukik baap kehte hain paavan bano। vikaar mein jaane vaale ko patit kaha jaata hai।

tumhaari mission hai patiton ko paavan banaane ka raasta bataane vaali। paarlaukik baap bhi abhi kehte hain - paavan bano, jabki vinaash saamne khada hai। to ab kya karna chaahiye? zaroor paarlaukik baap ki mat par chalna chaahiye na। pradarshani mein yeh bhi pratigya likhaani chaahiye। paarlaukik baap ko follow karenge? patit banna chhodenge? likho। baap hi guarantee lete hain, tum bhi guarantee le sakte ho। tum patit bante hi kyon ho jo phir pukaarte ho he patit-paavan aao। saari baat hi hai purity par। tum bachchon ko din-pratidin khushi rahni chaahiye। hamko baap svarga ka varsa de rahe hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) koi bhi gandi (chhi-chhi) aadat nahin daalni hai। jeete ji deh ka bhaan chhodna hai। phool muaaphik harshit rehna hai।

2) paarlaukik baap ko follow kar paavan banna hai। unki shreemat par chalne ki pratigya karni aur karaani hai।

vardaan:- nirvikaari va pharishte swaroop ki sthiti ka anubhav karne vaale aatma-abhimaani bhav

jo bachche aatma-abhimaani bante hain woh sahaj hi nirvikaari ban jaate hain। aatma-abhimaani sthiti dvaara mansa mein bhi nirvikaareepan ki stage ka anubhav hota hai। aise nirvikaari, jinhen kisi bhi prakaar ki impyuriti va 5 tatvon ki aakarshan aakarshit nahin karti - vahi pharishta kahlaate hain। iske liye saakaar mein rehte hue apni niraakaari aatma-abhimaani sthiti mein sthit raho।

slogan:- jeevan mein ateendriy sukh ka anubhav karne ke liye vishesh amritvele ekaantapriy bano।

ye avyakt ishaare - ab apne daata swaroop ko pratyaksha karo

brahman aatmaon ke paas gyaan to pahle hi hai lekin unke prati do prakaar se daata bano:- 1- jis aatma ko, jis shakti ki aavashyakta ho, us aatma ko mansa dvaara arthaat shuddh vritti, vibrations dvaara shaktiyon ka daan arthaat sahayog do। 2- karma dvaara sada svayan jeevan mein gun moorta ban, pratyaksha sample ban auron ko sahaj gun dhaaran karne ka sahayog do, isko kaha jaata hai gun daan। daan ka arth hai sahayog dena।