Murli du jour du jeudi 1 octobre 2026

01-10-2026 praatahmurli om shanti "baapdaada"' madhuban

“meethe bachche - maaya se daro mat, bhal kitna bhi bhulaane ki koshish kare lekin thako nahin, amritvele uth yaad mein rahne ka poora-poora purushaartha karo''

prashn:- purushaartha mein aage number kaun se bachche lete hain?

uttar:- jo baap par poora-poora bali chadhte hain arthaat kurbaan jaate hain, sabse aage vahi jaate। baap par bachche kurbaan jaate aur bachchon par baap kurbaan jaate। tum apna kakhpan, puraana tan-man-dhan baap ko dete aur baap tumhein vishwa ki baadshaahi deta isliye use gareeb nivaaz kaha jaata hai। gareeb bhaarat ko hi daan dene baap aaye hain।

geet:- nayanheen ko raah dikhaao…

om shanti। meethe-meethe ati meethe, aise kahenge na! behad ka baap aur behad ka pyaar hai। kehte hain meethe sikeeldhe bachchon ne geet suna। raah ek baap hi dikhaate hain। bhakti maarga mein raah batlaane vaala koi hai nahin। vahaan hi thokren khaate rehte hain। abhi bhal raah mili hai phir bhi maaya baap ke saath buddhiyog lagne nahin deti hai। samajhte bhi hain ek baap ko yaad karne se hamaare sab duhkh door ho jaayenge, phikraat ki koi baat nahin rahegi, phir bhi bhool jaate hain। baap kehte hain - apne ko aatma samajh mujh patit-paavan baap ko yaad karo। baap gyaan ka saagar hai na। vahi geeta gyaan daata hai। svarga ki baadshaahi athva sadgati dete hain। shreekrishna ko gyaan ka saagar nahin kah sakte। saagar ek hi hota hai। is dharti ke chaaron taraph saagar hi saagar hai। saara saagar ek hi hai। phir unko baanta gaya hai। tum vishwa ke maalik bante ho to saara saagar, dharni ke maalik tum bante ho। aise koi kah na sake, yeh hamaara tukda hai। hamaari had ke andar na aao। yahaan to saagar mein bhi tukde-tukde kar diye hain। tum samajhte ho saara vishwa hi bhaarat tha, jiske tum maalik the। geet bhi hai baba aapse ham vishwa ki baadshaahi lete hain jo koi chheen na sake। yahaan dekho paani ke oopar bhi ladaai hai। ek do ko paani dene ke liye laakhon roopaya dena padta hai। tum bachchon ko saare vishwa ki raajaai kalpa pahle misal mil rahi hai। baap ne gyaan ka teesra netra diya hai। gyaan daata hai hi parampita paramatma। is samay aakar gyaan dete hain। satayug mein lakshmi-naaraayan ke paas yeh gyaan nahin hoga। haan, aise kahenge aage janma mein gyaan lekar yeh bane hain। tum hi the। tum kehte ho baba aap vahi ho। aapne hamko vishwa ka maalik banaaya tha। baap kehte hain - meri mat koi lambi chaudi nahin hai। woh padhaai kitni lambi chaudi hoti hai। yeh to bahut sahaj hai। rachta aur rachna ke aadi-madhya-ant ko tum jaankar auron ko bataate rehte ho। kaise 84 ka chakra lagaaya hai। abhi vaapis jaana hai baap ke paas। yeh bhi baap ne batlaaya hai - maaya ke toofaan bahut aayenge, inse daro mat। subah ko uthkar baithenge, buddhi aur-aur khyaalaaton mein chali jaayegi। do minute bhi yaad nahin rahegi। baap kehte hain thakna nahin hai। achha ek minute yaad rahi phir kal baithna, parson baithna। andar mein yeh pakka zaroor karo ki humein yaad karna hai। agar koi vikaar mein jaata hoga phir to bahut toofaan aayenge। pavitrata hi mukhya hai। aaj yeh duniya patit veshyaalay hai। kal paavan shivaalay hoga। jaante ho yeh puraana shareer hai। baap ko yaad karte rahenge to koi bhi samay shareer chhoot jaae to svarga mein chalne laayak ban jaayenge। baap se kuchh na kuchh gyaan to suna hai na। aise bhi hain jo yahaan se bhaaganti ho gaye hain phir bhi aakar apna varsa le rahe hain। yeh bhi samjhaaya hai ant mati so gati hogi। samjho koi shareer chhodte hain, sanskaar gyaan ke le jaate hain to chhotepan mein hi is taraph unko kheench hogi। bhal organs chhote hain, bol nahin sakte parantu kheench lenge। chhotepan se hi sanskaar achhe honge। sukhdaai banenge। aatma ko hi baap sikhlaate hain na। jaise baap military vaalon ka misaal samjhaate hain। sanskaar le jaate hain to ladaai mein phir bharti ho jaate hain। jaise shaastra padhne vaale sanskaar le jaate hain to chhotepan mein hi shaastra kantha ho jaate hain। unki mahima bhi nikalti hai। to yahaan se jo jaate hain to chhotepan mein mahima nikalti hai। aatma hi gyaan dhaaran karti hai na। baaki raha hua hisaab-kitaab chuktu karna padta hai। svarga mein to aayenge na। baap ke paas aakar maalekam salaam karenge। praja to dher banegi। baap se to varsa lenge। pichhaadi mein kaha hai na - aho prabhu teri leela...

abhi tum samajhte ho - aho baba aapki leela drama plan anusaar aisi hai। baba aapka act sabhi manushya maatra se nyaara hai। jo baap ki achhi service karte hain unko phir inaam bhi bada achha milta hai। vijay maala mein piroye jaate hain। yeh hai roohaani gyaan, jo baap rooh, roohon ko dete hain। manushya to sab shareeron ko hi yaad karenge, kahenge shivaananda, gangeshvaraanand... aadi yeh gyaan dete hain। yahaan to kahenge niraakaar shivbaaba gyaan dete hain। main oonch te oonch hoon। mujh aatma ka naam hai shiv। shiv parmaatmaae namah kehte hain। phir brahma vishnu shankar ko kahenge devtaae namah, yeh bhi rachna hai, unse koi varsa nahin mil sakta। tum aapas mein bhaai-bhaai ho। bhaai ko yaad karne se varsa nahin milega। yeh (brahma daada) bhi tumhaara bhaai hai, student hai na। padh rahe hain, isse varsa nahin milega। yeh khud hi varsa pa rahe hain shivbaaba se। pahle yeh sunte hain। baap ko kehta hoon baba ham to aapka pahla-pahla bachcha hoon। aap se ham kalpa-kalpa varsa lete hain। kalpa-kalpa aapka rath banta hoon। shiv ka rath brahma। brahma dvaara vishnupuri ki sthaapna। tum brahman bhi madadgaar ho phir tum maalik banenge। abhi tum jaante ho ham 5 hajaar varsha pahle muaaphik baap dvaara raajya bhaagya lete hain, jinhonne kalpa pahle raajya bhaagya liya hai, vahi aayenge। har ek ke purushaartha se pata lag jaata hai - kaun mahaaraaja-mahaaraani banenge, kaun praja banenge। pichhaadi mein tumko sab saakshaatkaar hoga। saara purushaartha par madaar hai। kurbaan bhi hona hota hai। baap kehte hain - main gareeb nivaaj hoon। tum gareeb hi mujh par kurbaan hote ho। daan hamesha gareebon ko hi diya jaata hai। samjho koi college banvaate hain, woh koi gareebon ko daan nahin hota। woh koi eeshvar arth hota nahin hai, parantu daan to karte hain na। college kholte hain to unka phal milta hai। doosre janma mein achha padhenge। yeh aasheervaad milti hai। bhaarat mein hi sabse jaasti daan-punya hota hai। is samay to bahut daan hota hai। tum baap ko daan karte ho। baap tumko daan karte hain। tumse kakhpan le tumko vishwa ki baadshaahi dete hain। is samay tum tan-man-dhan sab baap ko daan mein dete ho। ve log to marte hain to will karke jaate hain। phalaane aashram ko dena ya yeh aaryasmaaj le leve। vaastav mein daan gareebon ko dena hota hai, jo bhookhe hote hain। abhi bhaarat gareeb hai na। svarga mein bhaarat kitna saahookaar hota hai। tum jaante ho vahaan jitna anaaj dhan aadi tumhaare paas hota hai utna aur koi ke paas nahin ho sakta। vahaan to kuchh bhi paisa nahin lagega। mutthi chaaval daan karte hain, to return mein 21 janmon ke liye mahal mil jaate hain। jaageer bhi milegi। abhi tatva bhi tamopradhaan hone kaaran duhkh dete hain, vahaan tatva satopradhaan hote hain। tum jaante ho - satayug mein kaun-kaun aayenge। phir dvaapar mein phalaane-phalaane aayenge। kaliyug ke ant mein chhoti-chhoti taaliyaan math panth aadi nikalte rehte hain na। abhi tumhaari buddhi mein jhaad, drama aadi ki knowledge hai। baap ke part ko bhi jaante ho। mahaabhaarat ladaai mein dikhaate hain - 5 paandav bache। achha phir kya hua? zaroor jo raajayog seekhe vahi jaakar raajya karenge na। aage tum bhi kuchh jaante thode hi the। baba bhi geeta aadi padhte the। naaraayan ki bhakti karte the। geeta ke saath bhi bahut pyaar tha। train mein jaate the to bhi geeta padhte the। ab dekhte hain kuchh bhi samjha nahin, dibbi mein thikri। bhaktimaarga mein jo kuchh karte aaye parantu uddhaar to hua nahin। duniya mein to kitna jhagda hai। yahaan bhi to sab pavitra ban na saken, isliye jhagda padta hai। baap sharan lete bhi hain phir kehte hain beemaari uthlegi zaroor। bachche aadi yaad padenge, ismen nashtomoha hona pade। samajhna hai ham mar gaye। baap ke bane goya is duniya se mare। phir shareer ka bhaan nahin rehta। baap kehte hain - deh sahit jo bhi sambandh hain, unko bhool jaana hai। is duniya mein jo kuchh dekhte ho woh jaise kuchh bhi hai nahin। yeh puraana shareer bhi chhodna hai। hamko jaana hai ghar। ghar jaakar phir aakar naya sundar shareer lenge। abhi shyaam hain phir sundar banenge। bhaarat abhi shyaam hai, phir sundar banega। abhi bhaarat hai kaanton ka jangal। sab ek do ko kaatte rehte hain। koi baat par bigad padte hain to gaali dete hain, lad padte hain। tum bachchon ko ghar mein bhi bahut meetha banna hai। nahin to manushya kahenge isne to 5 vikaar daan diye hain phir krodh kyon karte। shaayad krodh daan nahin diya hai। baap kehte hain - bachche jholi mein 5 vikaar daan mein de do to tumhaara grahan chhoot jaae। chandrama ko grahan lagta hai na। tum bhi ab sampoorn bante ho to baap kehte hain yeh vikaar daan mein de do। tumko svarga ki baadshaahi milti hai। aatma ko baap se varsa milta hai। aatma kehti hai is puraani duniya mein baaki thoda time hai। kaam utaar dena hai। khyaalaat koi bhi utaar dene chaahiye। baba jaante hain anek prakaar ke khyaalaat aayenge। dhandhe ke khyaalaat aayenge। bhakti maarga mein bhakti karte samay graahak, dhandhaadhori yaad padta hai to phir apne ko chutki se kaatte hain। ham naaraayan ki yaad mein baitha hoon phir yeh baaten yaad kyon aai! to yahaan bhi aise hota hai। jab is roohaani service mein achhi reeti lag jaate hain to phir samjhaaya jaata hai - achha chhodo dhandhedhori ko। baba ki service mein lag jaao। kehte hain chhodo to chhoote । deh-abhimaan chhodte jaao। sirf baap ko yaad karo to bandar se mandir laayak ban jaayenge। bhramri ka, kachhuon ka bhi sab misaal baap dete hain jo phir bhakti maarga mein vo log drishtaanta dete hain। abhi tum jaante ho keede kaun hain। tum ho braahmaniyaan। tum bhoon-bhoon karti ho। yeh drishtaanta abhi ka hai। woh bata na saken। tyohaar aadi sab is samay ke hain। satayug treta mein koi tyohaar hota nahin। yeh sab hai bhakti maarga ke।

ab dekho shreekrishna jayanti thi। shreekrishna ki moorti mitti ki banaai, unki pooja ki phir jaakar lake mein dubo diya। abhi tum samajhte ho yeh kya karte hain। yeh hai andhashraddha। tum kisko samjhaayenge, woh samjhenge nahin। koi ko beemaari aadi hui to kahenge dekho tumne shreekrishna ki pooja chhod di hai isliye yeh haal hua hai। aise bahut hi aashcharyavat sunanti, kathanti bhaaganti ho jaate hain isliye braahmanon ki maala ban nahin sakti। oonch te oonch yeh brahman kul bhooshan hain। parantu unki maala ban nahin sakti। tumhaari buddhi mein hai yeh shivbaaba ki maala hai phir ham jaakar satayug mein nambarvaar vishnu ki maala ke daane banenge। tumhaara ek-ek akshar aisa hai jo koi samajh na sake। baap padhaate rehte hain। vriddhi ko paate rehte hain। pradarshani mein kitne aate hain। kehte bhi hain ham aakar samjhenge phir gaye ghar mein aur khalaas। vahaan ki vahaan rahi। kehte hain prabhu se milne ke liye raah bahut achhi bataate hain। parantu ham us par chalen, varsa leven yeh buddhi mein nahin aata। bahut achhi seva kar rahi hain brahmaakumaariyaan। bas, are tum bhi samjho na। jismaani seva karte rehte ho। ab yeh roohaani seva karo। society ki seva to sabhi manushya karte rehte hain। muphta mein to koi seva nahin karte। nahin to khaayenge kahaan se। abhi tum bachche bahut achhi seva karte ho। tumko bhaarat ke liye bahut taras rehta hai। hamaara bhaarat kya tha phir raavan ne kis gati mein laaya hai। ab ham baap ki shreemat par chal varsa zaroor lenge।

abhi tum jaante ho ham hain sangamayugi, baaki sab hain kaliyugi। ham us paar ja rahe hain। jo baap ki yaad mein achhi reeti rahenge woh aise baithe-baithe yaad karte-karte shareer chhod denge। bas phir aatma vaapis aayegi nahin। baithe-baithe baap ki yaad mein gaya। yahaan hathayog aadi ki koi baat nahin। jaise dekhte ho dhyaan mein baithe-baithe chale jaate hain, vaise tum baithe-baithe yeh shareer chhod denge। sookshm vatan jaakar phir baap ke paas chale jaayenge। jo yaad ke yaatra ki bahut mehnat karenge woh aise shareer chhod denge। saakshaatkaar ho jaata hai। jaise shuru mein tumko bahut saakshaatkaar hue vaise pichhaadi mein bhi tum bahut dekhenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) mandir laayak banne ke liye deh-abhimaan chhod dena hai। roohaani seva mein lag jaana hai।

2) ab ghar jaane ka samay hai isliye jo bhi hisaab-kitaab hai, dhandhe dhori ke khyaalaat hain, unhein utaar dena hai। yaad ke yaatra ki mehnat karni hai।

vardaan:- satsang dvaara roohaani rang lagaane vaale sada harshit aur double light bhav

jo bachche baap ko dil ka sachcha saathi bana lete hain unhein sang ka roohaani rang sada laga rehta hai। buddhi dvaara sat baap, sat shikshak aur satguru ka sang karna - yahi satsang hai। jo is satsang mein rehte hain vo sada harshit aur double light rehte hain। unhein kisi bhi prakaar ka bojh anubhav nahin hota। ve aisa anubhav karte jaise bharpoor hain, khushiyon ki khaan mere saath hai, jo bhi baap ka hai woh sab apna ho gaya।

slogan:- apne meethe bol aur umang-utsaah ke sahayog se dilshikasta ko shaktivaan banaao।

ye avyakt ishaare - paropkaar ki bhaavna se sampanna ban apkaari par bhi upkaar karo

paropkaar ki bhaavna se sampanna banne ke liye har aatma ke gunon ko hi dekho। kisi ki kamzori va avgun ko dekhte bhi apni shubh bhaavna se, sahayog ki kaamna se us aatma ko bhi gunvaan banaane ki shakti ka daan do। apne samay ko, sukhon ko, naam, shaan, maan sarva praapti ki ichchha ko kurbaan kar, lene ki ichchha ko chhod dene vaale mahaadaani bano tab kahenge paropkaar ki bhaavna se sampanna।