Murli du jour du samedi 3 octobre 2026

03-10-2026 praatahmurli om shanti "baapdaada"' madhuban

“meethe bachche - is puraani duniya ka ab ant hai, isliye sangamayug par tumhein bhavishya raajaai ke laayak banna hai''

prashn:- bachchon mein kaun sa shauk ho to gaddi nasheen ban sakte hain?

uttar:- all-round service karne ka shauk ho to gaddeensheen ban sakte hain, jo all-round service kar bahuton ko sukh dete hain unhein uska ujoora bhi milta hai। bachchon ko hamesha har service mein haazir rehna chaahiye। aisa hoshiyaar bano jo maa-baap ka show karo। mama baba kehte ho to un jaisa bankar dikhaao।

geet:- is paap ki duniya se…

om shanti। sirf meethe-meethe brahmaakumaar kumaariyaan hi yeh jaante hain ki paap ki duniya aur punya ki duniya kisko kaha jaata hai। patit duniya kisko, paavan duniya kisko kaha jaata hai। bhal manushya kehte hain ki he patit duniya ko paavan banaane vaale aao, parantu jaante nahin hain। yeh bhi aatma hi kehti hai he patit-paavan… sab manushya maatra bulaate rehte hain। parantu yeh kisko pata nahin hai ki paavan duniya kisko kaha jaata hai। woh kab aur kaise sthaapan hogi। abhi tum knowledgeful baap ke bane ho, isliye knowledgeful gyaan saagar baap ko sirf tum hi jaante ho। aur koi bilkul nahin jaante ki paavan duniya phir patit kaise banti hain। patit duniya phir paavan kaise banti hai। patit duniya mein kaun rehte hain aur paavan duniya mein kaun rehte hain। yeh sab baaten tum abhi jaante ho। paavan duniya satayug ko kaha jaata hai। zaroor paavan duniya bhaarat mein bhi to ek hi aadi sanaatan devi-devta dharma ka raajya tha, isliye bhaarat sabse praacheen desh gaaya jaata hai। abhi tum samajhte ho hamko phir se paavan duniya mein jaane ke liye patit-paavan baap yuktiyaan bata rahe hain। baap kehte hain - ek second mein yukti bataata hoon। baap aate hi hain nai duniya ka raajya bhaagya dene। yeh hai behad ke baap se behad ka varsa। baap hi aakar raajayog sikhaate hain। ham raajayog seekh rahe hain। baap kehte hain - tum hi satopradhaan the phir satopradhaan banna hai। aadi sanaatan devi-devta dharma tha, na ki hindu। devi-devta dharma bhaarat ka hi pahle-pahle tha। phir zaroor punarjanma lete aaye honge। jaise Christian log bhi punarjanma le vriddhi ko paate hain। bauddhiyon ka dharma sthaapan karne vaala buddha, woh ho gaya dharma sthaapak। ek buddha se kitne dher bauddhi nikle। Christ ek tha। abhi dekho kitne Christian ho gaye hain। sab dharmon ka aise-aise chalta aaya hai। vaise jab aadi sanaatan devi-devta dharma tha to yeh aur koi the nahin। auron ka to jaante hain। Christian dharma Christ, islaam dharma ibraaham ne sthaapan kiya। achha jo satayug mein aadi sanaatan devi-devta dharma tha woh kisne sthaapan kiya? satayug mein devi-devtaaon ki raajdhaani chali hai na। to zaroor koi ne raajya sthaapan kiya hai। satayug mein devi-devta dharma tha, woh abhi baap sthaapan karte hain isliye baap ko aana hi padta hai sangamayug par। abhi sab manushya maatra patit duniya mein baithe hain। puraani duniya mein karodon manushya hain। nai duniya mein to itne manushya ho na saken। vahaan ek dharma tha। islaami, bauddhi, Christian aadi koi nahin the। woh devta dharma ab praayah lop hai। woh kaise bhagwan ne sthaapan kiya tha, yeh koi nahin jaante। devta dharma naam hi bhool gaye hain, hindu dharma kah dete hain।

ab baap samjha rahe hain main aata hi tab hoon jab puraani duniya ko badalna hai। abhi is puraani duniya ki end hai। yeh sirf tum brahman hi jaante ho। is mahaabhaari ladaai se hi puraani duniya ki end hui thi। geeta mein dikhaate hain sab khatma ho gaye। koi nahin raha। 5 paandav bache woh bhi pahaadon par gal mare। parantu aisa koi hota nahin hai। yeh to baap sthaapan karte hain। pralay athva jalmai to hoti nahin। baba ko pukaarte hain he patit-paavan aao, hamaare duhkh haro sukh do kyonki abhi raavan raajya hai। raamraajya chaahte hain to zaroor raavan raajya hai na। baap samjhaate hain abhi raam-raajya ki sthaapna, raavan raajya ka vinaash ho jaata hai। main jo yukti sikhlaata hoon, jo seekhte hain vahi jaakar nai duniya mein raajya karte hain। yeh gyaan vahaan kuchh bhi rahega nahin। ab tumhaari buddhi mein saari knowledge hai। jinki buddhi mein hai woh auron ko samjhaate hain। nambarvaar to hain na। serviceable bachchon ki buddhi mein saara gyaan tapakta rehta hai। zaroor satayug mein pahle-pahle devi-devta dharma vaale the। yeh bhi tum jaante ho। baap pahle-pahle braahmanon ko hi rachte hain prajaapita brahma dvaara। yeh gyaan yagya hai na to zaroor brahman sampradaay hi chaahiye। brahman sampradaay zaroor sangam par hi hogi। aasuri sampradaay hai kaliyug mein, daivi sampradaay hai satayug mein। to zaroor sangam par hi sthaapna hogi daivi sampradaay ki। jab baajoli khelte hain to paanv aur choti milte hain। tum brahman ho phir yaad aata hai। viraat roop ka chitra bhi zaroori hai, iski samjhaani badi achhi hai। kehte bhi hain baba ham aapke 6 maas ke bachche hain। 4 din ke bachche hain। koi kehte hain ham ek din ka bachcha hoon arthaat aaj hi baba ka bana hoon। mukh vanshaavli bana hoon। jo jeete ji baap ke bante hain to kehte hain baba ham aapke hain। chhota bachcha to kah na sake। yeh gyaan hai badon ke liye। kehte hain baba ham aapka chhota bachcha hoon। chhote bachchon ko chitron par samjhaana sahaj hai। din-pratidin samjhaani vistaar ko paati rehti hai। yeh chitron ki yukti drama plan anusaar 5 hajaar varsha pahle muaaphik nikli hai। ismen yeh koi prashn nahin utha sakta ki shuru mein kyon nahin nikli, abhi kyon? drama anusaar jo yukti jab nikalni hogi tab niklegi। school mein padhaai ke nambarvaar darje hote hain। aise thode hi hai pahle se hi bada imtahaan paas kar lenge। pahle sirf alpha be padhaaya jaata hai na। yeh to baap ka bachcha banne se hi baap svarga ki baadshaahi dete hain। baap ko baap kahne baad phir nishchay tootta thode hi hai। yahaan to baba-baba kehte nishchay toot jaata hai। tum jaante ho yeh to behad ka baap hai। tum behad ke baap se behad ka varsa le rahe ho to unki shreemat par chalna hai। baap kehte hain - aur sabhi baaten chhod mujhe yaad karo aur varse ko yaad karo। chalte-phirte yeh yaad rahne se khushi bhi rahegi। parantu yeh yaad thaharti kyon nahin hain। tumhaari to guarantee hai - baba ham aapke banenge to hamaara aur koi se mamatva nahin rahega। ham aapki mat par hi chaloonga। baap bhi kehte hain shreemat par na chalne se bhoolen hoti rahengi। shreemat par chalne se khushi ka paara chadhega। aatma ko ateendriy sukh milta hai to kitni khushi hoti hai। aatma jaanti hai parampita paramatma ne hamko raajya bhaagya diya tha, jo 84 janma lete-lete ganva diya hai phir baap de rahe hain। to apaar khushi honi chaahiye na। andar ki khushi bhi dikhaai padti hai na। is lakshmi-naaraayan ke chehre se dikhaai padta hai na। bhal agyaan kaal mein koi-koi bahut achhe khushi mein hote hain। baatcheet karne mein bhi achhe hote hain।

manushya srishti mein sabse oonch position kiska hai? yoon to sabse oonch hai shiv paramatma jisko sab father kahkar pukaarte hain। parantu unke occupation ko jaante nahin। jab baap aaye tab aakar apna parichay de। abhi tum bachche jaante ho hamko baba se vaikuntha ki raajaai milti hai। khushi honi chaahiye na। ham nar se naaraayan bante hain। koi bhal haath utha lete hain parantu kuchh bhi samajhte nahin। jinko nishchay rehta hai to unko yeh khushi rehti hai ki ab hamne 84 janma poore kiye। ab ham baba ki mat par chal vishwa ke maalik bante hain। is padhaai ka nasha kitna hona chaahiye। president, governor aadi ko nasha to hai na। bade-bade aadmi aate hain unse milne। bigar position ko jaanen kab koi se mil na sake। baba bhi kab milte nahin hain। baba ki position ko sirf tum bachche hi jaante ho so bhi nambarvaar purushaartha anusaar jaante ho। bhal brahmaakumaar kahlaate hain parantu buddhi mein yeh nahin rehta ki ham shivbaaba ki santaan hain। unse ham svarga ka varsa le rahe hain। na baap ko, na varse ko yaad kar sakte hain। yaad rahe to andar ki khushi bhi rahe na।

jaise kanya ki shaadi karaate hain to unko gupta daan diya jaata hai। peti banda kar chaabi haath mein de dete hain। baap bhi tumko vishwa ke baadshaahi ki chaabi haath mein de dete hain। tum naye satayugi vishwa ka udghaatan karte ho। svarga mein bhi tum jaayenge। baba tumko laayak banaate hain। bhagat to svarga mein jaane laayak ban na saken। jab tak baba gyaan na de, pavitra na banen isliye naarad ka misaal hai। bhal bhagat to achhe-achhe bahut hain parantu aatma to patit hai na। janma-janmaantar woh patit bante aaye hain, jab tak baap na mile tab tak svarga mein ja na sake। tumko baap ne brahma dvaara adopt kiya hai, jo tum jaakar nai duniya mein raajya karenge। doosre koi raajaai sthaapan karte hi nahin hain। na kisko maaloom hai। baap hi sangamayug par aakar bhavishya 21 janmon ki raajaai sthaapan kar rahe hain। is baap ko koi bhi jaante nahin।

abhi tum bachche samajhte ho barobar 5 hajaar varsha pahle bhagwan aaya tha। geeta ka gyaan sunaaya tha, jisse manushya se devta bane the। geeta hai hi aadi sanaatan devi-devta dharma ka shaastra। satayug mein to koi shaastra aadi hote nahin। baap kehte hain - main sangamayug par hi aata hoon। phir se aakar srishti ke aadi-madhya-ant ka gyaan sunaata hoon, vahi devi-devta bante hain phir 84 ka chakra lagaakar jab ant mein aate hain to unhon ko hi aakar phir samjhaata hoon। beech mein kabhi bhi main aata hi nahin hoon। aisa thode hi ki Christ koi beech mein aa jaayega aur jo bhi dharma sthaapan karte hain woh is duniya ke liye। main aata hi hoon sangam par nai duniya sthaapan karne। Christ ki aatma aakar pravesh kar apna dharma sthaapan karti hai। yeh baap to raajaai sthaapan karte hain। yeh kisko pata nahin hai ki yeh lakshmi-naaraayan ki raajaai kab aur kisne sthaapan ki। yeh jo lakshmi-naaraayan ke mandir aadi banaate hain unhon se poochhna chaahiye। tum sabha mein bhi poochh sakte ho। yeh raaz tumhaari buddhi mein hai। baba, brahma dvaara sthaapna karte hain kalpa-kalpa, aur koi jaan na sake। akshar bhi hain, parantu yathaartha reeti kiski buddhi mein baithta nahin hai। koi-koi bachchon par grahchaari bhi baith jaati hai। deh-abhimaan hai pahle number ki grahchaari। baap kehte hain - bachche, dehi-abhimaani bhav। yeh lakshmi-naaraayan ka chitra aur seedhi ka chitra samjhaane ke liye badi achhi cheez hai। bahuton ka isse kalyaan ho sakta hai। parantu drama mein shaayad deri hai isliye vighna padte hain, raajdhaani sthaapan hone mein। baap khud kehte hain bahut vighna padte hain। maaya badi samartha hai। mere bachchon ko jhat naak se, kaan se pakad leti hai। isko kaha jaata hai raahu ki grahchaari। bhaarat mein khaas is samay vikaaron roopi raahu ki poori grahchaari baithi hui hai। tum second mein siddha kar sakte ho ki yahi bhaarat paavan heere jaisa tha। ab vikaari kaudi misal ban pada hai, phir heere jaisa banna hai। kahaani saari bhaarat ki hai। baap aakar heere jaisa banaate hain। phir bhi kitne prakaar ke vighna padte hain। deh-abhimaan ka to bada bhaari vighna pad jaata hai। lakshmi-naaraayan ke chitra par bhi kisko samjhaana bada sahaj hai। bachchon ko service ka bahut shauk hona chaahiye। service bhi bahut kisam ki hai na। bahuton ko sukh dete hain to uska ujoora bhi bahut milta hai, koi all-round haddi service karte hain। khushi rahni chaahiye hamko all-round banna hai। baba ham service mein haazir hain। achhe-achhe bachche roohaani service karne vaale, khaana apne haath se pakaate hain। tumko maaloom hai ki bachche bhi itne hoshiyaar ho jaate hain jo gaddi le lete hain। yahaan to ghar sambhaalne vaali maataayen hain। ab maataaon, kumaariyon ko is service mein khada ho jaana chaahiye। mama jaisi service kar dikhaani chaahiye। show karna chaahiye। baaki sirf mama, mama karne se kya phaayda! un jaisa banna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) deh-abhimaan ki grahchaari hi yagya mein vighna roop banti hai, isliye jitna ho sake dehi-abhimaani banne ka purushaartha karna hai।

2) apni padhaai aur satayugi pad ke position ki khushi va nashe mein rehna hai, shreemat par chalna hai। koi bhi bhool nahin karni hai।

vardaan:- roohaani exercise aur self control dvaara maheenta ka anubhav karne vaale pharishta bhav

buddhi ki maheenta va halkaapan brahman jeevan ki personality hai। maheenta hi mahaanta hai। lekin iske liye roz amritvele ashreereepan ki roohaani exercise karo aur vyartha sankalpon ke bhojan ki parhej rakho। parhej ke liye self control ho। jis samay jo sankalp roopi bhojan sveekaar karna ho us samay vahi karo। vyartha sankalp ka extra bhojan nahin karo tab maheen buddhi ban pharishta swaroop ke lakshya ko praapta kar sakenge।

slogan:- mahaan aatma woh hain jo har second, har kadam shreemat par accurate chalte hain।

ye avyakt ishaare - paropkaar ki bhaavna se sampanna ban apkaari par bhi upkaar karo

vishesh rup se apni mansa arthaat sankalp shakti dvaara, vaani ki shakti dvaara, apne sang ke rang dvaara, sambandh ke sneh dvaara, khushi ke akhut khazaane dvaara akhanda daan karte rehna - yahi hai paropkaar karna। koi bhi aatma samparka mein aaye to khushi ke khazaane se sampanna hokar jaae, aise akhanda daani bano।