Murli du jour du dimanche 4 octobre 2026

04-10-26 praatahmurli om shanti' 'avyakt-baapdaada'' revise 31-12-11 madhuban

naye varsha mein teevra purushaarthi bhav ke vardaan dvaara apne chehre se pharishta roop dikhaao, light might swaroop jvaalaamukhi yog se vyartha ko jalaao, duhkhi ashaanta aatmaon ko shaktiyon ka daan do

aaj brahman parivaar ke rachta apne chaaron or ke parivaar ko dekh rahe hain। hai chhota sa parivaar, chhota sa sansaar hai lekin bahut pyaara hai kyonki koton mein se koi hai। kyon pyaare hain? kyonki baap ko pahchaana hai। baap se varse ke adhikaari bane hain। to jaise baap pyaare hain vaise yeh brahman parivaar bhi pyaara hai। baapdaada ne janmate hi har bachche ke mastak mein bhaagya ke sitaare ko chamkaaya hai isliye yeh chhota sa sansaar ati pyaara hai। aap sabhi bhi apna itna svamaan jaante ho na! baapdaada bhi ek-ek bachche ko dekh khush hote hain aur kya geet gaate hain? vaah bachche vaah!

aaj to sabhi is shreshtha din par baap se milne aaye hain। aaj ka din hai sangam ka din। vidaai bhi hai aur badhaai bhi hai। vaise bhi sangam ka mahatva hai। jahaan bhi saagar aur nadi ka sangam hota hai uska bahut mahatva hota hai। to aaj ke din ka bhi mahatva bahut gaayan yogya hai। puraana varsha samaapta aur naya varsha aarambha hona hai। aaj ke din sabhi ke dil mein aage aane vaale varsha ke liye kitna umang hai! har ek ne apne-apne dil mein plan banaaya hai - kya chhodna hai aur kya banna hai! donon hi plan banaaya hai? banaaya hai? jisne aane vaale varsha ke liye apne aage badhne ka, teevra purushaartha ka plan banaaya hai, woh haath uthaana। banaaya hai! mubaarak ho, kyonki sab jaante hain ki baapdaada har bachche ke liye kya chaahta hai। baapdaada har bachche ke liye yahi shubh bhaavna rakhte hain ki har bachcha baap samaan sampanna aur sampoorn ban jaaye। ab to samay bhi saath de raha hai। to har ek ne apne man mein apne prati naya plan banaaya hai na! kuchh chhodna hai aur kuchh aage badhna hai। to chhodna kya hai? baapdaada ne dekha ki puraane sansaar aur sambandh mein chhodne mein sabka purushaartha par attention bhi hai। ek baat jo chhodne bhi chaahte hain lekin ab tak baapdaada ne dekha ki puraane sanskaar usko chhodne mein thodi mehnat lagti hai। to baapdaada yahi chaahte hain ki is naye varsha mein har ek bachcha apne nizi sanskaar ka sanskaar kar le। aap sab bhi isi sankalp ko poora karne chaahte hain na! kyonki puraana sanskaar jisko aap log kehte ho meri nature hai, bhaav nahin hai lekin nature hai। to nature is janma ke brahman ki nahin hai lekin puraani hai। to us puraane sanskaar va nature ko aaj ke din chhodne ka sankalp kar sakte hain? har ek apne ko to jaante hain, to aaj varsha ki vidaai ke saath-saath us puraane sanskaar ko chhodne ka dridh sankalp kar sakte ho? kar sakte ho? chaahte bhi hain, aisa nahin hai ki chaahte nahin hain lekin phir bhi baar-baar purushaartha mein teevrata laane mein vahi sanskaar bhinna-bhinna roop se vighna daalte hain। to baapdaada yahi chaahte hain ki varsha ko vidaai dene ke saath aaj ke din usko bhi vidaai de do। iske liye taiyaar hain? jo taiyaar hain woh haath uthaao। iske liye kya karenge? apne liye koi plan bhi socha hai? iske liye sabse achhi baat hai dridh sankalp। sankalp hai, hona chaahiye lekin sankalp mein teevrata chaahiye। jaise brahman banne ke saath-saath yeh pratigya ki ki koi bhi ashuddha bhojan sveekaar nahin karna hai। to baapdaada ne dekha ismen dridh sankalp dvaara majority paas hain। jaise tan ke liye ashuddha bhojan ka sankalp kiya aur practical kar rahe ho, aise hi man ke liye yeh dridh sankalp karna hai ki kabhi bhi kisi ke prati bhi, kisi bhi circumstance pramaan koi bhi vyartha sankalp na kar sada har aatma ke prati shubh bhaavna, shubh kaamna rakhni hi hai। man ka bhojan hai sankalp, to jaise tan ke liye dridh sankalp majority ne kiya hai, aise hi kya man ke liye vyartha sankalp, ashuddha bhaavna mita nahin sakte? har aatma ke prati dil ka sneh aur sahayog apne man mein nahin rakh sakte hain?

to aaj baapdaada is puraane varsha ke saath is vritti va drishti ko har bachche se vidaai chaahte hain। yeh dridh sankalp kar sakte ho? kar sakte hain? bolo, maataayen, teachers, sab bhaai bhi chaahte hain na। haan haath uthaao। kal se kisi bhi aatma ke prati agar koi bhi vyartha hai, vyartha bhaavna va vyartha bhaav, uska aaj samaapti samaaroh manaane chaahte hain। bolo, teachers sab taiyaar hain? teacher do do haath uthaao। uthaao। achha। jinhonne nahin uthaaya, woh uthaao। jinhonne nahin uthaaya woh thoda sa uthke khade ho jaao। achha hain! jo purushaartha karenge lekin dridh sankalp nahin karenge, aise hain? jo uthe hain woh lakshya aur purushaartha karenge to haath uthaao kyonki samay ka attention rakh yeh socho ki sabhi ko is sangam samay mein bhavishya bahut samay ki saphalta praapta karni hai। 21 janma ka varsa lena hai। to kahaan yeh ek janma aur kahaan 21 janma! to is ek janma mein bhi kaaphi samay apna purushaartha teevra karna pade tabhi bahut samay ki jo praapti karni hai, woh kar sakenge। baap se pyaar hai na to saath rehna hai na! najdeek rehna hai na! brahma baap ke saathi banke raajya adhikaari banna hai na! to ab bhi itna samay baap samaan to banna pade। brahma baap ka ek-ek bachche se kitna pyaar hai, woh to jaante hi ho। har ek kehta hai - baba ka jitna mere se pyaar hai utna kisse nahin hai, mere se pyaar hai। to yeh pyaar, baap daada donon ka pyaar is janma mein hi anubhav kar rahe ho। aur jisse pyaar hota hai uski baat kabhi bhi taali nahin jaati hai। to brahma baap se sabka pyaar hai, kitna pyaar hai? bahut pyaar hai। chaahe dikha nahin sakte hain lekin baap jaante hain ki pyaar sabhi bachchon ka hai, nambarvaar hai lekin pyaar hai, ismen baapdaada bhi sabhi bachchon ko certificate dete hain ki pyaar hai। pyaar to hai lekin baap ne dekha ki kabhi-kabhi natkhat ho jaate hain, to baap us samay kya karta? baap dekh-dekh vishesh shakti deta rehta kyonki baap yahi chaahte hain ki har bachcha raaja bachcha hai, duniya mein jo laadla bachcha hota hai usko raaja bachcha kehte hain। hota raaja nahin lekin kehte hain raaja bachcha, lekin aap sabhi baapdaada ke ab bhi raaja bachcha ho aur bhavishya mein bhi raaja bachcha ho। abhi svamaan hai, svaraajya hai। abhi aatma ka raajya sarva karmendriyon ke oopar hai। to svaraajyadhaari abhi ho aur vishwa raajyadhaari bhavishya mein ho। to raaja bachche ho na! hain to kaandh hilaao।

to baapdaada aaj amritvele chaaron or, chaahe videsh chaahe desh, chaaron or chakra lagaane gaye। to kya dekha? yog mein amritvele baithte majority hain lekin sneh mein baithte hain, baapdaada se baaten bhi karte hain, aatmik smriti mein bhi baithte, baap-daada se shakti bhi lete hain lekin abhi baapdaada aane vaale naye varsha mein naveenta chaahte hain kyonki abhi samay din pratidin naazuk aana hi hai। to aise samay par abhi jvaalaamukhi yog chaahiye। woh jvaalaamukhi yog ki aavashyakta abhi aavashyak hai। jvaalaamukhi yog arthaat light might swaroop shaktishaali, kyonki samay pramaan abhi duhkh, ashaanti, halchal badhni hi hai isliye apne duhkhi, pareshaan aatmaon ko vishesh jvaalaamukhi yog dvaara shaktiyaan dene ki aavashyakta padegi। duhkh ashaanti ke return mein kuchh na kuchh shakti, shanti apne mansa seva dvaara deni padegi। jo aapne is samay ki topic rakhi hai ek parivaar, uske pramaan jab ek parivaar hai, to ashaanta aatmaon ko kuchh to anchali denge iseelie baapdaada agla varsha jo aaya ki aaya uske liye vishesh attention khinchava rahe hain ki abhi jvaalaamukhi yog ki aavashyakta hai। jvaalaamukhi yog dvaara hi jo bhi sanskaar rahe hue hain woh bhi bhasma hone hain।

abhi aapki advance party ke saathi aap sabse yeh chaahte hain ki abhi samaapti ke samay ko saamne laao। ab return journey yaad rakho। aapki deedi yaad dila rahi hai ki mujhe sada yeh yaad rehta tha “ab ghar jaana hai'', ab ghar jaana hai। aapki daadi yahi yaad dila rahi hai ki jaise mujhe yaad raha abhi sampanna banna hai, sampoorn banna hai, dhun lagi rahi। to aaj vishesh amritvele vatan mein baapdaada se milan manaate kah rahe the ki abhi hamaare taraph se, jo bhi daadiyaan gai hain sab milke kah rahi thi ab jvaalaamukhi yog ki bahut aavashyakta hai, chaahe auron ko shakti dene ke liye, chaahe apne brahman parivaar ko sampanna banaane ke liye। abhi samay ko sameep laane vaale aap nimitta ho isliye aane vaale varsha mein kya karenge? vishesh kya karenge? ek do ke snehi sahayogi ban har ek centre, sevaasthaan jvaalaamukhi yog ka vibration aur karma mein ek do ke snehi sahayogi ban, har ek ke prati attention rakhte jo bhi kami hai usmein sahayog do। mansa dvaara anya aatmaon ki seva karo aur apne sahayog dvaara brahman saathiyon ki vishesh seva karo, tabhi ham logon ki dil ki aash poori hogi।

to aaj vatan mein advance party agle saal ke liye aap sabko yaad bhi de rahi thi aur apne dil ki aashaayen bhi bata rahi thi। to bolo, baapdaada ka sankalp to suna hi lekin saath mein apne daadiyon ki bhi agle varsha ke liye shubh bhaavnaayen bhi suni na! baapdaada to sabhi bachchon ko chaahe koi kamjor hai, chaahe teevra purushaarthi hai sabko teen mubaarak de rahe hain - ek nav jeevan ki mubaarak, doosri nav varsha ki mubaarak aur teesri nav duniya mein saathi ban chalne ki mubaarak।

baapdaada ne yeh bhi kaha ki sabhi apne andar apne liye samay nishchit karo ki kab tak apne ko baap samaan banaayenge। apne andar apne liye nishchit karo। to nishchit karna aata hai na? baapdaada to aaj har bachche ko dekh yahi vardaan de rahe hain agle varsha mein har bachcha teevra purushaarthi bhav। amritvele jab yaad mein baithte ho aur jab uthne ka samay hota hai us samay baapdaada ka yeh vardaan apne dil mein yaad rakhna teevra purushaarthi bhav। jaise baapdaada ne do baaten pahle hi attention mein dilaai hain kyonki sangam ka samay achaanak samaapta hona hai। to ek samay, doosra sankalp, donon par har ghadi attention। baapdaada ki yeh bhi har bachche ke prati shubh bhaavna hai ki har bachcha is varsha mein kya banen? kya banenge? jo bhi aapke chehre mein dekhe aapke chehre se pharishta roop dikhaai de। phalaani hoon, phalaana hoon nahin। pharishta anubhav mein aave, iske liye jvaalaamukhi yog, koi vyartha nahin। light aur might swaroop yog se vyartha ko jalaao। samartha pharishta nazar aaye, jisko bhi dekhen, kyonki baap ke sikeeldhe bachche to ho। baap ne aapko khaas kahaan-kahaan se chun karke apna banaaya hai। to lakshya rakho main brahman so pharishta hoon। to amritvele apni dincharya mein yeh yaad rakhna main brahman so pharishta hoon। chalte phirte pharishta roop, pharishta swaroop to achha lagta hai na! brahma baap pharishta bana, follow father।

to is varsha ka vardaan jo diya teevra purushaarthi, saadhaaran purushaartha nahin, saadhaaran purushaartha hai to raajya ke saathi nahin banenge। aur baap yahi chaahta hai ki jitne bhi baapdaada ki murli adhyayan karne vaale godly student hain, woh sabke sab kya banenge? pharishta। sab bojh utar jaayega। koi bhi sanskaar ka bojh samaapta ho jaayega। to is varsha ka homework kya raha? pharishta swaroop mein rehna hai, isko hi kaha jaata hai teevra purushaartha। abhi har ek centre, har saptaah, har student ki result dekhe ki teevra purushaarthi rahe? agar koi bhi baat aai, uske liye sahayogi ban karke, sneh se unko himmat de aur apne centre ko, student ko teevra purushaarthi banaaye, har saptaah result dekhe kyonki samay halchal ka hona hi hai।

to aaj ke sangam din par vidaai aur badhaai ke din par chaaron or ke, jahaan bhi jo baithe hain bachche, baapdaada dekh rahe hain, kaise sabhi science ke saadhnon dvaara dekh bhi rahe hain aur dekh-dekh kitne khush ho rahe hain। to chaaron or ke bachchon ko baapdaada vishesh vardaan de rahe hain “sada santushtamni bhav''। santushta rehna, santushta karna। achha।

abhi daadiyaan mil karke koi naya plan banaao। (daadi jaanki ne kaha - baba January maas ka bahut mahatva hai। January maas mein agar sabhi milkar purushaartha karen, aisi seva ka koi plan ban jaae, jo sabke dil se jigar se nikle ki mera baba, aisi meri bhaavna hai।)

baapdaada naye varsha mein naveenta chaahte hain, vahi sanskaar nahin chaahte hain। ek-ek bachcha baap samaan dikhaai de। follow brahma baap। circumstance, baaten sab kuchh baap ke aage aai lekin pharishta ban gaye। to pharishta banna hi hai, yeh dridh sankalp har ek apne aapse kare kyonki apne aapse karenge to attention rahega। mujhe banna hai bas। aur aapke banne se natural vibration phailega। to abhi kya lakshya rakha? pharishta banna hi hai, bolo। pakka hai na! achha। sabhi ko bahut bahut baapdaada ke dil ka pyaar aur mubaarak ho।

vardaan:- sarva khaate aur rishte ek baap se rakhne vaale double light pharishta bhav

double light pharishta banne ke liye deh ke bhaan se bhi pare raho kyonki deh bhaan mitti hai, yadi iska bhi bojh hai to bhaareepan hai। pharishta arthaat apni deh ke saath bhi rishta nahin। baap ka diya hua tan bhi baap ko de diya। apni vastu doosre ko de di to apna rishta khatma hua। sab hisaab-kitaab, sab len-den baap se baaki sab pichhle khaate aur rishte khatma - aise sampoorn beggar hi double light pharishte hain।

slogan:- apni visheshtaaon ko prayog mein laao to har kadam mein pragti ka anubhav karenge।

ye avyakt ishaare - paropkaar ki bhaavna se sampanna ban apkaari par bhi upkaar karo

kisi bhi aatma se kuchh le karke dene ki ichchha na ho, sankalp mein bhi yeh na aaye ki yeh kare to main karun, yeh badle to main badloon, kuchh woh badle, kuchh main badloon… bhikhaari ko bhi maalaamaal banaane vaala - apkaari ke oopar upkaar karne vaala hi paropkaar ki bhaavna se sampanna hai।