Murli du jour du mercredi 14 octobre 2026

14-10-2026 praatahmurli om shanti "baapdaada"' madhuban

“meethe bachche - baap ko yaad karne ki bhinna-bhinna yuktiyaan racho, purushaartha kar chart rakho, thako nahin, toofaanon mein adol raho''

prashn:- bachchon ko apna kaun sa anubhav aapas mein ek do ko sunaana chaahiye?

uttar:- ham baap ko kitna samay aur kaise yaad karte hain! bhojan ke samay baap ki yaad rehti hai ya anek prakaar ke vichaar aa jaate hain! baba kehte bachche try karke dekho। bhojan par baap ke sivaae doosra kuchh yaad to nahin aata hai! phir aapas mein ek do ko anubhav sunaao। 2- koi bhi dardanaak scene dekhte hamaari sthiti kaisi rahi! iska bhi anubhav sunaana chaahiye।

geet:- laakh jamaane vaale…

om shanti। meethe-meethe bachche ab behad baap ko kaise bhoolenge, jisse behad ka varsa milta hai। jisko aadha-kalpa se yaad karte the। yeh to samjhaaya hai ki manushya ko kabhi bhagwan nahin kaha jaata। to ab jabki behad ka baap mila hai, uski yaad mein hi karaamat hai। jitna patit-paavan baap ko yaad karenge, utna paavan bante jaayenge। tum apne ko ab paavan kah nahin sakte ho, jab tak ant ho। jab sampoorn paavan ban jaayenge to yeh shareer chhod jaae sampoorn pavitra shareer lenge। jab satayug mein naya shareer mile tab sampoorn kahenge। phir raavan ka khaatma ho jaata hai। satayug mein raavan ki effigy nahin banaai jaati hai। to tum bachche jab baithte ho, chalte-phirte ho to buddhi mein yeh yaad rahe। ab hamne 84 ka chakra poora kiya hai phir naya chakra shuru hota hai। woh hai hi nai pavitra duniya, naya bhaarat nai dehli। bachche jaante hain pahle jamuna ka kantha hai, jahaan par paristaan banna hai। bachchon ko bahut achhi reeti samjhaaya jaata hai, pahle-pahle to baap ko yaad karo। bhagwan baap padhaate hain। vahi baap teacher guru hai, yeh bhala yaad rakho। baba ne yeh bhi samjhaaya tha ki tum baajoli khelte ho। varnon ka chitra bhi bahut zaroori hai। sabse oopar hai shivbaaba phir choti brahman। yeh samjhaane ke liye baba kehte hain। achha yeh buddhi mein rakho ki ham 84 janmon ki baajoli khelte hain। ab sangam hai, baap jaasti samay nahin rehte hain। phir bhi 100 varsha to lagte hain। uthal paathal poori ho phir raajya shuru ho jaata hai। mahaabhaarat ladaai to vahi hai, jismen anek dharma vinaash, ek aadi sanaatan devi-devta dharma ki sthaapna ho rahi hai। tumhaari kalaabaaji to wonderful hai। tumko pata hai phakeer log kalaabaaji khelte, teerthon par jaate hain। manushyon ki shraddha to rehti hai na। to unhon ko kuchh na kuchh de dete hain। paravrish unhon ki hoti rehti hai kyonki aise manushya apne saath kya uthaayenge। baba to in sab baaton ka anubhvi hai। baba ne anubhvi rath liya hai। guru bhi kiye। dekha bhi bahut kuchh। teertha bhi kiye hain। ab baba kehte hain baajoli to yaad kar sakte ho। ham abhi brahman hain phir devta, kshatriy banenge। yeh hai saari bhaarat ki baat। baap ne aise samjhaaya hai aur dharma to jaise by-plot hain। baap ne tumko hi tumhaare 84 janmon ki kahaani bataai hai। sensible jo hain woh hisaab se samajh sakte hain। islaami aayenge to average kitne janma lenge। accurate hisaab ki to darkaar nahin। in baaton mein to koi phikraat ki baat nahin। sabse jaasti phikar yeh rehti hai ki ham baba ko yaad karte rahen। bas ek hi phikar hai, ek ko yaad karne ka। ghadi-ghadi maaya aur phikraat mein daal deti hai, ismen maaya phikar mein bahut daalti hai। bachchon ko yaad karna hi chaahiye। ab hamko ghar jaana hai। sweet hom kisko yaad nahin aayega। pukaarte bhi hain shanti deva। bhagwan ko kehte hain - hamko shanti do।

ab tum bachche yeh to jaante ho yeh puraani duniya khatma ho jaani hai। yeh bhi tumhaari buddhi mein hai aur manushya to ghor andhiyaare mein hain। shanti satayug mein hi hoti hai। ek dharma, ek bhaasha, rasam-rivaaj bhi ek hi hai। vahaan hai hi shanti ka raajya। advait ki baat hi nahin। vahaan to ek hi raajaai hoti hai aur satopradhaan hain। raavanraajya hai nahin jo ladaai ho। to tum bachchon ko khushi ka paara chadhna chaahiye। shaastron mein jo gaayan hai ateendriy sukh gop-gopiyon se poochho। gop-gopiyaan to tum ho na। tum sammukh mein baithe ho। tumhaare paas bhi nambarvaar hain jinko yaad rehta hai ki baba hamaara baba bhi hai, teacher bhi hai, guru bhi hai। yeh to wonder hai na। life tak saath dete hain। god mein liya aur padhaai shuru kar dete। to yeh yaad rahne se bhi khushi bahut rahegi। parantu maaya phir yeh bhi bhula deti hai। manushyon ko yeh bhi samjhaana hota hai, manushya poochhte hain baaki thoda samay kehte ho, kya proof hai? bolo, dekho ismen likha hua hai bhagvaanuvaach। yagya bhi racha hua hai। yeh hai gyaan yagya। ab shreekrishna to yagya rach na saken।

bachchon ko yeh bhi buddhi mein rehna chaahiye ki ham brahman is behad yagya ke hain। baba ne hamko nimitta banaaya hai। jab tum achhi reeti gyaan aur yog ki dhaarna karte ho, aatma sampoorn ban jaati hai tab is bhambhor ko aag lagegi। manushyon ko hi pata hota hai na ki yeh behad ka karmakshetra hai, jahaan sabhi aakar khel karte hain। bani banaai ban rahi... baap kehte hain bachche chinta unki ki jaae jo anhoni ho। ho gaya so drama mein tha phir unka chintan kaahe ka karen। ham drama ko dekhte hain। drama mein jab koi aisa dardanaak scene hota hai to manushya dekhkar rote hain। ab woh to hua jhootha drama। yeh to sachcha drama hai। sach-sach karte hain। parantu tumko koi duhkh ke aansu nahin aane chaahiye। saakshi hokar tumko dekhna hai। jaante ho yeh drama hai, ismen rone ki kya darkaar hai। past is past। kab vichaar bhi nahin karna chaahiye। tum aage badhte baap ko yaad karte raho aur sabko raasta bataate raho। baba to raay dete rehte hain। trimoorti ke chitra tumhaare paas bahut hain। clear likha hua hai woh shivbaaba yeh varsa। tum bachchon ko yeh chitra dekhne se bahut khushi honi chaahiye। baba se hamko vishnupuri ka varsa milta hai। puraani duniya to khatma honi hai। bas yeh chitra saamne rakh do, ismen kharcha to kuchh bhi nahin hai। jhaad bhi bahut achha hai। roz savere uthkar vichaar saagar manthan karo। apna teacher aapehi bankar padho। buddhi to sabko hai। chitra apne ghar mein rakh do। har ek chitra mein first class gyaan hai। kehte hain vinaash hoga to tumhaari baap ke saath preet hai na। kehte bhi hain satguru mila dalaal ke roop mein... to tumhein kitni achhi-achhi baaten samajhne-samjhaane ke liye mili hain। phir bhi maaya ka pomp bahut hai। 100 varsha pahle yeh bijli, gas aadi thode hi thi। aage viceroy aadi 4 ghode ki, 8 ghode ki gaadi mein aate the। aage saahookaar log gaadi mein chadhte the। ab to vimaan aadi nikal pade hain। aage yeh kuchh nahin tha। 100 varsha ke andar yeh kya ho gaya hai। manushya samajhte hain ki yahi svarga hai। ab tum bachche jaante ho svarga to svarga hai। yeh sab paai paise ki cheejen hain, inko artificial pomp kaha jaata hai। ab tum bachchon ko yahi ek phurna chaahiye ki ham baap ko yaad karen, jismen hi maaya vighna daalti hai। baba apna misaal bhi batlaate hain। bhojan khaata hoon, bahut koshish karta hoon - yaad mein rah khaaoon phir bhi bhool jaata hoon। to samajhta hoon bachchon ko to mehnat bahut hoti hogi। achha bachche tum try karke dekho। baba ki yaad mein rahkar dikhaao। dekho saara samay yaad thahar sakti hai। anubhav sunaana chaahiye। baba saara samay yaad thahar nahin sakti hai। bahut kisam-kisam ki baaten yaad aa jaati hain। baba khud apna anubhav bataate hain। baba ne jismen pravesh kiya yeh bhi purushaarthi hai, in par to bade jhanjhat hain। bada kahlaana, bada duhkh paana। kitne samaachaar aate hain। vikaaron ke kaaran kitna maarte hain। ghar se nikaal dete hain। bachchiyaan kehti hain main eeshvar ki sharan mein aai hoon। kitne vighna padte hain। koi ke paas shanti nahin hai। tum bachchon ko khaatiri hai। abhi purushaartha kar shreemat par chal shanti mein rehte ho। is baba ne yahaan bhi kai aise ghar dekhe hain jahaan aapas mein mel-milaap mein bahut rehte hain। sabhi badon ki aagya mein chalte hain। kehte hain hamaare paas to jaise svarga laga pada hai।

abhi baba tumko aise svarga mein le jaate hain। jahaan sab prakaar ke sukh hain। devtaaon ka 36 prakaar ka bhojan gaaya hua hai। ab tum svarga ka varsa baap se lete ho। vahaan to kitne svaadishta vaibhav khaate rahenge aur pavitra honge। ab tum us duniya ke maalik bante ho। raaja-raani, praja mein farka hoga na। aage raajaayen log bahut bhabhke mein rehte the। yeh to thahre patit aur raavan ke raajya mein, to vichaar karo satayug mein kya hoga। saamne chitra lakshmi-naaraayan ke rakhe hain। shreekrishna ke liye jhoothi baaten likh badnaami kar di hai। jhooth maana jhooth, sach ki ratti nahin। ab tum samajhte ho ham svarga ke maalik the phir 84 janma le bilkul shoodra buddhi ban gaye hain। kya haal ho gaya hai। ab phir purushaartha kar kya bante ho! baba poochhte bhi hain na ki tum kya banenge? to sab haath uthaate hain sooryavanshi banenge। ham to maat-pita ko poora follow karenge। kam purushaartha thode hi karenge। saari mehnat yaad aur aap samaan banaane par hai isliye baap kehte hain jitna ho sake service karna seekho। hai bahut sahaj। yeh shivbaaba, yeh vishnupuri, lakshmi-naaraayan ka raajya hoga। yeh to bahut anubhvi hai। seedhi par tum samjha sakte ho।

tum bachchon ko yeh jhaad, chakra dekhne se hi buddhi mein saara gyaan aa jaana chaahiye। yeh jo lakshmi-naaraayan hain inhon ki raajdhaani kahaan chali gai! kisne ladaai ki! jisse haraaya। ab to woh raajya hai nahin। in eeshvareey baaton ko kuchh nahin jaante hain। tum bachchon ko yeh bhi saakshaatkaar hua hai। kaise guphaaon, khaaniyon se jaakar sone, heere aadi le aate hain। yeh science tumhaare sukh ke liye hogi। yahaan hai duhkh ke liye, vahaan aeroplane bhi phulaprooph honge। bachchon ne shuru-shuru mein yeh sab kuchh saakshaatkaar kiya hua hai। pichhaadi mein bhi tum bahut saakshaatkaar karenge। yeh bhi tumne saakshaatkaar kiya hai। chor lootne aate hain, phir tumhaari shakti ka roop dekh bhaag jaate hain। woh sab baaten pichhaadi ki hain। chor lootne to aayenge, tum baap ki yaad mein khade honge to woh ekdam bhaag jaayenge।

ab baap kehte hain bachche khoob purushaartha karo। mukhya baat hai pavitrata ki। ek janma pavitra banna hai। maut to saamne khada hai। kudarti aapdaayen bahut kadi aayengi, jismen sab khatma ho jaaen। shivbaaba in dvaara samjhaate hain, inki aatma bhi sunti hai। yeh baba sab batlaate hain। shivbaaba ko to anubhav nahin hai। bachchon ko anubhav hota hai। maaya ke toofaan kaise aate hain। pahle number mein yeh hai, to inko sab anubhav hoga। to ismen darna nahin hai, adol rehna hai। baap ki yaad mein rahne se hi shakti milti hai। koi bachche chart likhte hain phir chalte-chalte banda kar dete hain। baba samajh jaate hai thak gaya hai। paarlaukik baap jisse itna bada varsa milta hai aise baap ko kabhi patra bhi nahin likhte hain। yaad hi nahin karte! aise baap ko to kitna yaad karna chaahiye। shivbaaba ham aapko bahut yaad karte hain। baba aapki yaad bigar ham bhala kaise rah sakte hain! jis baap se vishwa ki baadshaahi milti hai, aise baap ko kaise bhoolenge। ek card likha woh bhi to yaad kiya na। laukik baap bhi bachchon ko chitthi likhte hain - noore ratna.... stri, pati ko kaise chitthi likhti hai! yahaan to donon sambandh hain। yeh bhi yaad karne ki yukti hai। kitna meetha baba hai! hamse kya maangate hain? kuchh bhi nahin। woh to daata hai, dene vaala hai na। yeh lene vaala nahin। kehte hain sweet children main aaya hoon, bhaarat ko khushboodaar bageecha banaakar jaata hoon। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sooryavanshi banne ke liye maat-pita ko poora-poora follow karna hai। yaad mein rahne ki aur aap samaan banaane ki mehnat karni hai।

2) purushaartha kar shreemat par chal shant rehna hai। badon ki aagya maanni hai।

vardaan:- ek bal ek bharose ke aadhaar par manzil ko sameep anubhav karne vaale himmatvaan bhav

oonchi manzil par pahunchne se pahle aandhi toofaan lagte hi hain, steamer ko paar jaane ke liye beech bhanvar se cross karna hi padta hai isliye jaldi mein ghabraao mat, thako va rooko mat। saathi ko saath rakho to har mushkil sahaj ho jaayegi, himmatvaan ban baap ki madad ke paatra bano। ek bal ek bharosa - is paath ko sada pakka rakho to beech bhanvar se sahaj nikal aayenge aur manzil sameep anubhav hogi।

slogan:- vishwa kalyaankaari woh hai jo prakriti sahit har aatma ke prati shubh bhaavna rakhte hain।

ye avyakt ishaare - paropkaar ki bhaavna se sampanna ban apkaari par bhi upkaar karo

har aatma ke prati raham ki bhaavna, sada sahayog ki bhaavna, himmat badhaane ki bhaavna ho। har paristhiti mein, har kaarya mein, har sahayogi sangathan mein nihsvaartha pan ho, tab kahenge par upkaar ki bhaavna। jaise brahma baap ne sva ke prati kuchh bhi sveekaar nahin kiya। na mahima sveekaar ki, na vastu sveekaar ki, na rahne ka sthaan sveekaar kiya। sthool aur sookshm sada “pahle bachche'', isko kehte hain par-upkaari, ismen follow father kar samaan bano।