Murli du jour du samedi 24 octobre 2026

24-10-2026 praatahmurli om shanti "baapdaada"' madhuban

“meethe bachche - maat-pita ko follow kar takhtansheen bano, ismen koi takleeph nahin, sirf baap ko yaad karo aur pavitra bano''

prashn:- gareeb-nivaaz baap apne bachchon ka bhaagya banaane ke liye kaun si raay dete hain?

uttar:- bachche, shivbaaba ko tumhaara kuchh nahin chaahiye। tum bhal khaao, piyo, padho - refresh hokar chale jaao lekin chaaval mutthi ka bhi gaayan hai। 21 janmon ke liye saahookaar banna hai to gareeb ka ek paisa bhi saahookaar ke 100 roopaye ke baraabar hai isliye baap jab direct aate hain to apna sab kuchh saphal kar lo।

geet:- tumhi ho maata pita tumheen ho…

om shanti। geet ka arth to bachchon ne samjha। woh bhal pukaarte hain parantu samajhte nahin hain। tum jaante ho woh hamaara baap hai। vaastav mein sirf woh tumhaara baap nahin lekin sabka baap hai। yeh bhi samajhne ka hai। jo bhi sabhi aatmaayen hain un sabhi ka baap paramatma zaroor hai। baba-baba kahne se varsa zaroor yaad aata hai। baap ko yaad karne se hi vikarma vinaash honge। baap bachchon ko kehte hain tumhaari aatma patit bani hui hai, ab unko paavan banaana hai। sabhi ka baba hai to bachche zaroor nirvikaari hone chaahiye। koi samay sab nirvikaari the। baap khud samjhaate hain jab shri lakshmi-naaraayan ka raajya tha tab sab nirvikaari the। itni sab jo manushya aatmaayen dekhte ho woh bhi nirvikaari hongi kyonki shareer to vinaash ho jaayega baaki aatmaayen jaakar niraakaari duniya mein rehti hain। vahaan vikaar ka to naam-nishaan nahin। shareer hi nahin hai। vahaan se hi sab aatmaayen aati hain - is duniya mein part bajaane। pahle-pahle bhaaratvaasi aate hain। bhaarat mein pahle-pahle in lakshmi-naaraayan ka raajya tha to aur sab dharma vaale niraakaari duniya mein the। is samay sab saakaari duniya mein hain। abhi baap tum bachchon ko nirvikaari banaate hain, nirvikaari devi-devta banaane ke liye। jab tum devi-devta ban jaate ho tab tumhaare liye zaroor nai duniya chaahiye। puraani duniya khatma honi chaahiye। shaastron mein mahaabhaarat ladaai bhi dikhaai hui hai। dikhaate hain baaki 5 paandav rahe woh bhi pahaad par gal gaye। koi nahin bacha। achha itni sab aatmaayen kahaan gai? aatma to vinaash ko paati nahin। to kahenge niraakaari, nirvikaari duniya mein gai। baap vikaari duniya se niraakaari, nirvikaari duniya mein le jaate hain। tum jaante ho baap se to zaroor varsa milna chaahiye। abhi duhkh badh gaya hai। is samay hamko sukh-shanti donon chaahiye। bhagwan se sab maangate hain - he bhagwan hamko sukh do, shanti do। har ek manushya purushaartha karta hi hai dhan ke liye। paisa hai to sukh hai। tumko behad ka baap to bahut paisa dete hain। tum satayug mein kitne dhanvaan the। heere javaahron ke mahal the। tum bachche jaante ho ham behad ke baap se behad svarga ka varsa lene aaye hain। saari duniya to nahin aayegi। baap bhaarat mein hi aate hain। bhaaratvaasi hi is samay narkavaasi hain phir svargavaasi baap banaate hain। bhakti mein duhkh ke kaaran baap ko janma-janmaantar yaad kiya hai। he parampita paramatma, he kalyaankaari duhkh harta, sukh karta baba, unko yaad karte hain to zaroor woh aata bhi hoga। aise hi muphta mein thode hi yaad karte hain। samajhte hain bhagwan baap aakar bhakton ko phal dega। so to sabhi ko dega na। baba to sabka hai na।

tum jaante ho ham sukhdhaam mein jaayenge। baaki sab shantidham mein jaayenge। jab sukhdhaam mein hain to sukh-shanti saari srishti par rehta hai। baap ka to bachchon par lav rehta hai na। aur phir bachchon ka bhi maa-baap par pyaar rehta hai। yeh bhi gaate hain tum maat-pita... jismaani maat-pita hote hue bhi gaate hain tum maat-pita.... tumhaari kripa se sukh ghanere। laukik maa-baap ke liye to aise nahin gaate hain। bhal woh bhi bachchon ko sambhaalte hain, mehnat karte hain, varsa dete hain। sagaai karaate hain। phir bhi sukh ghanere paarlaukik maat-pita hi dete hain। abhi tum ho eeshvareey dharma ke bachche। woh sab hain aasuri dharma ke bachche। satayug mein kabhi koi dharma ke bachche nahin karte hain। vahaan to sukh hi sukh hai। duhkh ka naam-nishaan nahin। baap kehte hain - main aaya hoon 21 peedhi ke liye tumko svarga ke sukh ghanere dene।

abhi tum jaante ho behad ke baap se ham svarga ke ghanere sukh pa rahe hain। yeh duhkh ke sab bandhan khalaas ho jaayenge। satayug mein hai sukh ka sambandh। kaliyug mein hai duhkh ka bandhan। baap sukh ke sambandh mein le jaate hain। unko kaha hi jaata hai - duhkh harta sukh karta। baap aakar bachchon ki seva karte hain। baap kehte hain - ham obedient servant hain। tumne mujhe aadhaakalpa yaad kiya hai, he baba aakar hamko sukh ghanere do। ab main aaya hoon dene to phir shreemat par chalna hai। yeh mrityulok sab khatma ho jaane vaala hai। amarlok sthaapan hota hai। amarpuri mein jaane ke liye amarnaath baba se tum amraktha sunte ho। vahaan to koi marte nahin। mukh se kabhi aise nahin kahenge phalaana mar gaya। aatma kehti hai ham yeh jadajdeebhoot shareer chhodkar naya leta hoon। woh to achha hua na। vahaan koi beemaari aadi hoti nahin। mrityulok ka naam nahin। main aaya hoon tumko amarpuri ka maalik banaane। vahaan jab tum raajya karenge to mrityulok ka kuchh bhi yaad nahin padega। neeche utarte-utarte ham kya banenge, woh bhi maaloom nahin rehta। nahin to sukh hi ud jaae। yahaan to tumko saara chakra buddhi mein rakhna hai। barobar svarga tha, ab narka hai tab to baap ko bulaate hain। tum aatmaayen shantidham ki rahne vaali ho। yahaan aakar part bajaati ho। yahaan se tum sanskaar le jaayenge ghar। phir vahaan se aakar naya shareer dhaaran kar raajya karenge। abhi tumko niraakaari, aakaari aur saakaari duniya ka samaachaar sunaate hain। satayug mein thode hi yeh pata padega। vahaan to sirf raajya karenge। drama ko abhi tum jaante ho। tumhaari aatma jaanti hai satayug ke liye ham purushaartha kar rahe hain। svarga mein chalne laayak zaroor banenge। apna bhi kalyaan aur doosron ka bhi kalyaan karenge। phir unhon ki aasheervaad tumhaare sir par aati rahegi। tumhaara plan dekho kaisa hai। is samay sabhi ka apna-apna plan hai। baap ka bhi plan hai। vo log dam aadi banaate hain to bijli aadi par kitne karodon roopaye kharcha karte hain। baap samjhaate hain ab woh sab hain aasuri plan। hamaara hai eeshvareey plan। ab kiska plan vijay ko paayega? woh to aapas mein hi lad padenge। sabhi ka plan mitti mein mil jaayega। vo koi svarga ki sthaapna to nahin karte hain। vo jo kuchh karte hain duhkh ke liye। baap ka to plan hai svarga banaane ka। narkavaasi manushya narka mein hi rahne ke liye plan banaate hain। baba ka plan svarga banaane ka chal raha hai। to tumko kitni na khushi honi chaahiye। gaate bhi ho tumhari kripa te sukh ghanere। woh to purushaartha kar lena hai na। baap kehte hain jo chaahiye so lo। chaahe vishwa ke maalik raaja raani bano, chaahe phir daas-daasi bano। jitna purushaartha karenge। baap sirf kehte hain ek to pavitra bano aur har ek ko baap ka parichay dete raho। alpha ko yaad karo to be baadshaahi tumhaari। baap ko yaad karne mein hi maaya bahut vighna daalti hai। buddhiyog tod deti hai। baap kehte hain, jitna mujhe yaad karenge to paap bhi bhasma honge aur oonch pad bhi paayenge isliye bhaarat ka praacheen yog mashhoor hai। baap ko liberator bhi kehte hain। 21 janma ke liye baap tumhein duhkh se liberate karte hain। bhaaratvaasi sukhdhaam mein honge, baaki sab shantidham mein honge। niraakaari duniya aur saakaari duniya ka plan dikhaane se jhat samajh jaayenge aur dharma vaale svarga mein aa na saken। svarga mein to hain hi devi-devtaayen। yeh drama ki knowledge baap ke sivaae koi samjha na sake। bachche aate hi hain baap se varsa lene। sukh ghanere to hain hi satayug mein। baad mein raavan raajya hota hai। usmein hote hain duhkh ghanere। abhi tum samajhte ho baba hamko sachchi-sachchi katha sunaakar amarlok mein jaane laayak banaate hain। abhi aise karma karte ho tab to 21 janmon ke liye dhanvaan bante ho। kehte bhi hain, dhanvaan bhav, putravaan bhav.... vahaan ek bachcha, ek bachchi tumko zaroor honge। aayushvaan bhav, tumhaari aayu bhi 150 varsha hogi। akaale mrityu kabhi hota nahin। yeh baap hi samjhaate hain। tum aadhaakalpa hamko pukaarte aaye ho। sannyaasi aise kahenge kya? woh kya jaanen! baap kitna pyaar se baith samjhaate hain। bachche, yeh ek janma agar paavan banenge to 21 janma paavan duniya ke maalik banenge। pavitrata mein to sukh hai na। tum pavitra daivi dharma vaale the। ab apvitra ban duhkh mein aaye ho। svarga mein nirvikaari the, abhi vikaari banne se narka mein duhkhi hue ho। baap to purushaartha karaayenge na। svarga ke mahaaraaja-mahaaraani bano। tumhaare baba mama bante hain na to tum bhi purushaartha karo, ismen moonjhane ki koi baat hi nahin। baap to kisko paanv padne bhi nahin dete।

baap samjhaate hain hamne tumko sone heere ke mahal diye। svarga ka maalik banaaya। phir aadhaakalpa tum bhakti maarga mein maatha ghisaate aaye, paisa bhi dete aaye। woh sone heere ke mahal sab kahaan gaye? tum svarga se utarte-utarte narka mein aakar pade ho। ab tumko phir svarga mein le jaata hoon। tumko koi takleeph nahin deta hoon। sirf mujhe yaad karo aur pavitra bano। bhal ek paisa bhi na do। khaao, piyo, padho, refresh ho chale jaao। baba to sirf padhaate hain। padhaai ka paisa kuchh nahin lete hain। kehte hain baba ham denge zaroor, nahin to vahaan mahal aadi kaise milenge। bhakti maarga mein bhi tum eeshvar arth daan gareebon ko dete the, phal bhi eeshvar dega। gareeb thode hi dega। parantu woh milta hai ek janma liye। ab to baba aap direct aaye ho। ham yeh thode paise dete hain, aap hamko 21 janma ke liye svarga mein dena। baap sabko saahookaar bana dete hain। paise dete ho to tumhaare hi rahne ke liye makaan aadi banaate hain। nahin to yeh sab kaise banenge। bachche hi yeh makaan aadi banaate hain na। shivbaaba kehte hain mujhe to inmen rahne ka nahin hai। shivbaaba to niraakaar daata hai na। tum dete ho tumko 21 janmon ke liye phal dete hain। main to tumhaare svarga mein hi nahin aaoonga। mujhe narka mein aana padta hai, tumko narka se nikaalne ke liye। tumhaare guru log to aur hi duban mein phansa dete hain। woh koi sadgati nahin dete। ab baap aaye hai pavitra duniya mein le chalne phir aise baap ko yaad kyon nahin karte। baap kehte hain - kuchh bhi paisa na do sirf mujhe yaad karo to paap naash honge aur mere paas aa jaayenge। yeh makaan aadi tum bachchon ne apne liye hi banvaaye hain। yahaan chaaval mutthi ka gaayan hai na। gareeb apni himmat anusaar jitna dete hain utna unka bhi banta hai। jitna saahookaar ka pad utna gareeb ka। donon ka ek ho jaata hai। gareeb ke paas hai hi 100 roopaya unse ek roopaya de, saahookaar ko bahut hai to woh 100 de, donon ka ek hi phal hoga, isliye baap ko gareeb-nivaaz kaha jaata hai। sabse gareeb hai bhaarat। unko hi main aakar saahookaar banaata hoon। gareeb ko hi daan diya jaata hai na। kitna clear kar baba samjhaate hain। bachche ab maut saamne khada hai, ab jaldi-jaldi karo। yaad ki raphtaar badhaao। most sweet baba ko jitna yaad karenge utna varsa milega। tum bahut dhanvaan banenge। baap tumko aisa nahin kehte hain ki maatha teko। mele malaakhde mein jaao। nahin। ghar mein baithe baap aur varse ko yaad karo। bas। baap hai bindi। unko parampita paramatma kaha jaata hai। supreme soul, sabse oonch te oonch hai। baap kehte hain main bhi bindi hoon, tum bhi bindi ho। sirf bhakti maarga ke liye mera bada roop banaakar rakha hai। nahin to bindi ki pooja kaise karen। unko kehte bhi hain shivbaaba। kisne kaha? abhi tum kehte ho ki shivbaaba humein varsa de rahe hain। wonder hai na। 84 ka chakra phirta rehta hai। anek baar tumne varsa liya hai aur lete hi rahenge। kitna achhi reeti baap baith samjhaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maut saamne khada hai isliye ab yaad ki raphtaar ko badhaana hai। satayugi duniya mein oonch pad paane ka poora purushaartha karna hai।

2) apna aur doosron ka kalyaan kar aasheervaad leni hai। pavitra duniya mein chalne ke liye pavitra zaroor banna hai।

vardaan:- connection aur relation dvaara mansa shakti ke pratyaksha pramaan dekhne vaale sookshm sevaadhaari bhav

jaise vaani ki shakti va karma ki shakti ka pratyaksha pramaan dikhaai deta hai vaise sabse powerful silence shakti ka pratyaksha pramaan dekhne ke liye baapdaada ke saath nirantar clear connection aur relation ho, ise hi yogbal kaha jaata hai। aisi yogbal vaali aatmaayen sthool mein door rahne vaali aatma ko sammukh ka anubhav kara sakti hain। aatmaon ka aahvaan kar unhein parivartan kar sakti hain। yahi sookshm seva hai, iske liye ekaagrata ki shakti ko badhaao।

slogan:- apne sarva khajaanon ko saphal karne vaale hi mahaadaani aatma hain।

ye avyakt ishaare - paropkaar ki bhaavna se sampanna ban apkaari par bhi upkaar karo

koi dehdhaari drishti se aapke saamne aaye to aap ek second mein unki drishti ko aatmik drishti mein parivartit kar lo। koi giraane ki vritti se va apne sangadosh mein laane ki drishti se saamne aaye to aap unko sada shreshtha sang ke aadhaar se, sangadosh se nikaal shreshtha sang lagaane vaale bana do। aisi parivartan karne ki yukti aane se kabhi bhi vighna se haar nahin khaayenge। samparka mein aane vaale aapki is sookshm shreshtha seva par balihaar jaayenge।