Murli de Mamma - 102

> >

mama murli madhuban

sandesh - mohini behen - 23-06-65

om shanti ।

aap sab ka yaad pyaar lekar jab vatan mein pahunchi to kya dekha- mama baba aur kuchh ananya bhaai bahnen jaise koi meeting kar rahe the lekin kya kar rahe the, woh mujhe sunaai nahin deta tha lekin aisa lagta tha ki jaise koi gahri baat kar rahe hon। ek sekand to khadi rahi, phir baba ki nazar mere par padi। baba ne bulaaya ki aao bachchi aap bhi is mahphil mein aao, to main bhi usmein shaamil hui । meethi mama ki meethi drishti jaise itni pyaar bhari, shakti bhari, ek sekend to main usmein kho gai । us sangathan mein deedi bhi thi to bhaau bhi tha, chandramni daadi bhi thi to brijendra daadi bhi thi, matlab aath das daadiyaan thi । bhaai the, pushpashaanta bhi thi, jagdeesh bhaai bhi tha । to main sabke chehre dekhne lagi jaise nain mulaakaat bhi karti hoon aur poochh bhi rahi hoon aankhon se hi baat ho rahi hai । to mainne deedi se poochha ki deedi kya baat kar rahi thi, abhi woh baat band ho gai hai to deedi ne muskuraate hue kaha ki baba se poochho । to mainne baba ki aur dekha to baba ne kaha ki ye mere raayabhaadur, raaysaahab bachche aaj mama ke saath baithe hain to bhavishya ka plan bana rahe the । haan, to mainne kaha bhavishya ka plan kya bana rahe the, to bola ab mainne ishaara de diya, ab inse hi poochho kya bana rahe the, tab tak main chakkar laga kar aata hoon। to baba to uth kar chala gaya, chatur sujaan to hai । phir mainne mama se poochha ki mama aaj aap itni saari sakhiyon ke saath mein mili ho, baba ne ishaara diya to kya plan bana rahi thi to mama mujhse poochhti hai ki achha ek baat aap sunaaie, mainne kaha kya mama, bola aap sampoorn bani ho? main hairaan ho gai ki mere se hi mama poochh rahi hai ki sampoorn bani ho, to mainne kaha mama drama plan anusaar, samay ke anusaar to main kahoongi is anusaar to main sampoorn hoon ki mera shareer chhoot jaae to ye main samjhoongi to mummy kehti hai ki yukti se javaab de rahi ho to mainne kaha ki mama jab ekdam sampoorn ho jaaenge to main to phir karmaateet ban gai phir to yahaan rahoongi nahin na, lekin samay ke anusaar itna ham kahenge ki haan mama abhi samay anusaar sampoorn hoon, to deedi kehti hai mama inko saara sunaao na, to mama to bahut gambheer hai na, itni jaldi kahaan sunaane vaali, to mama ne un sab ki aur dekha, mama ne jaise jagdeesh bhaai ki aur dekha ki aap sunaaen, lekin jagdeesh bhaai bhi chupchaap baithe rahe kuchh sunaae hi nahin, to mainne deedi ko kaha deedi aap sunaao na ya chandramni daadi aap sunaao to chandramni daadi kehti koi bolta hi nahin hai । mainne kaha aap bolo, aap sunaao to chandramni daadi ne kaha ki hamaari meeting ho rahi thi, aapas mein raay kar rahe the ki duniya ke andar halchal to bahut hai lekin ekmat nahin hai । koi kehta hai haan taiyaar hai, koi kehta hai ki abhi thoda ruko lekin halchal chaaron taraph hai । lekin jab tak ekmat nahin hote hain na, tab tak to koi kaarya sampanna nahin hota hai, kabhi purushaartha mein to dekhenge bahut bahut bahut achhe hain aur kabhi dekhenge to jaise kar lenge, ho jaaega, jaise doosre log kehte hain na, baahar vaale ki kar lenge, dekh lenge, aisi kabhi-kabhi aap bhi kehna shuru kar dete ho ki samay par ho jaaega, kar lenge to baba ne kaha ki abhi aap sab bachche bhi ekmat nahin hue ho, ekras nahin bane ho । koi kehta hai baba ham ready hain, koi kehta hai baba thoda thahro । to mainne kaha baba yeh advance party kya kehti hai, mama se poonchho baba kehte hain, mama se poochha ye log kya kehte hain to mama ne kaha inse poonchho kya kehte hain, to mainne phir poochha to brijendra daadi kehti ham to ready hain । humein to jab baba ishaara de to ham to sab pratyaksha hone vaale hain, sab ready hain । der hai to aap logon ki der hai । aap log haan karo to hamaari to haan hai hi । to ekdam jaise sab shant ho gae to mama kehti ab bataao javaab do । mainne kaha mama ab to samay hi kuchh karega । har ek ke andar umang utsaah to bahut hai, purushaartha bhi kar rahe hain bhattiyaan bhi kar rahe hain, sva parivartan ka bhi lakshya rakha hai, ham kar to rahe hain lekin baaki samay par sab ho jaaega । to mama kehti achha samay ka intajaar kar rahe ho । mainne kaha samay ka intajaar nahin kar rahe hain lekin itna sab hua hai to baaki bhi samay par sab ho jaaega, taiyaar ho jaaenge । to mama ne kaha ki aapke purushaartha ke anusaar jab duniya mein halchal hoti hai to aap apna purushaarthi teevra kar dete ho aur duniya ki jab halchal nahin dikhaai deti to aap bhi apna purushaartha halka kar dete ho । abhi aap duniya ki halchal ke aadhaar par purushaartha karte ho, lekin jab aap apna purushaartha karenge na, tab duniya mein halchal hogi aur aisi halchal hogi jo phir usko rokna mushkil ho jaaega । chaaron taraph se gheraav to daal diya gaya hai, chaaron taraph gheraav hai, lekin ishaare ki deri hai । ham sab taiyaar hain lekin aap ki taraph se ishaara aave to yeh kaarya shuru ho jaae । to mainne kaha baba hamaari taraph se to aap hi ishaara doge na, ham kaise denge । to kaha woh bhi samay aa jaaega lekin aisa samay aane vaala hai mama ne kaha, ki aisa samay aane vaala hai jismen bachchon ko bahut hi achal adol rehna hai, saamna karne ki shakti dhaaran karna hai kyonki chaaron taraph se prakriti bhi, maaya bhi har prakaar se gheraav daalegi । us samay aapko apni sampoorn mein stage saamna karna hai aur us samay hi yeh advance party pratyaksha hogi aap logon ke saamne aur jay jaykaar hogi । udhar haahaakaar sunenge idhar jay jaykaar sunenge । yeh scene jo hai, woh bahut jaldi saamne aane vaala hai । abhi thoda sa time aap sabko diya hua hai ki us thode se time mein aap jvaala roop, shakti roop ban stage par aao । abhi bachpan ki baaten poori hui, abhi jvaala roop, shakti roop ban ke stage par aane ka samay hai, abhi ye naaj nakhre albela nahin chalega isliye apne svamaan mein abhi sab ko sthir hona hai aur jis din aisa hua, shuru hua woh din mirua maut malooka shikaar । aap sab bachche achhi tarah se dekhenge aur yeh jo practice ki hui hai ashareeri banna woh usi samay kaam mein aaega ki ashareeri ban jaaenge aur khel dekhenge aur jab woh khel poora ho jaaega phir shareer mein aa jaaenge । to yeh ashareeri banna aur shareer mein aana yeh vahi kar sakenge aur dekh sakenge jo shakti roop, vikraal roop, jvaala roop honge । to isliye baba bachchon ko hi ishaara deta hai ki apne svamaan mein, shakti roop mein sthir ho jaao । to mainne kaha mama aaj itne saare log aae hain, aap koi na koi ishaara do ki kaise shakti roop banen, kaise is mein sthit hoven, to sab bahne kahne lagi ki haan haan mama kuchh kahe, kuchh kahe, kuchh kahe, to mama ne kaha ki baba se hi ishaara lo, to baba kehta hai (tab tak baba aa gaya tha) to baba kehta hai ki mama aaj aapka vishesh yaadgaar din hai na, aap ishaara do । to mama muskuraai aur baba ki aagya ka paalan karne mein to mama number one, haan ji ka paath । to mama ne kaha ki aise samay baba ki chhatrachhaaya chaahiye । jo chhatrachhaaya mein rahega na, vo safe rahega aur jo chhatrachhaaya se baahar rahega to safety nahin rahegi । to mainne kaha mama chhatrachhaaya kya, to mama ne ek scene dikhlaaya । vo scene kya dikhlaaya, ki jaise raajaaon mahaaraajaaon ke peechhe chhatra dikhaate hain na to aise chhatra lekin woh doosri tarah ka tha light ka aur uske oopar shiv baba aur shiv baba jaise chaaron aur ghoom raha hai aur chaaron taraph apni light jo hai na, woh phenk raha hai aur yeh jo chhatri ke chaaron aur hote hain na to vo bhinna-bhinna colour ke the aur us bhinna-bhinna colour ke oopar likha hua tha shanti, prem, shakti aise ek-ek shakti aur ek-ek gun jaise likha hua tha aur usi anusaar uski light thi aur jab uske neeche anubhav kiya to aisa laga ki jaise sab shaktiyaan jaise hamaare andar ho aur ekdam sheetalta, shanti jaise uska anubhav kiya । aisa laga jaise baba ki chhatrachhaaya mein ham baithe hue hon safe, koi aavaaj nahin hai, koi bhay nahin hai, koi kuchh nahin hai । to kaha ki dekho hamaare oopar baba baitha hua hai aur baba sab ko search light de raha hai । aur yeh jo baba ne shaktiyaan di hui hain, naitik gun die hue hain moolya die hue hain iski dhaarna aur paalna ham karte hain na, usmein tumhaari safety hai । to jab bhi aisa samay koi aata hai to us chhatrachhaaya mein baith jaao to safe rahenge । to safety ka saadhan hai yeh chhatrachhaaya । to baba kehte hain hamesha baap ki chhatrachhaaya mein raho, to aaj mama bhi aapko yeh chhatrachhaaya de rahi hai, jo hamaare baba ne ham bachchon ko yeh ishaara diya hai । to baap ki chhatrachhaaya mein rahne se sada safe rahenge, to sada safety ka saadhan hai baba ki chhatrachhaaya । to yeh ek scene mama ne dikhaaya । sab ne usko dekha aur kaha ki ye saugaat meri aap lekar jaana aur sabhi ko dena । kehna ki yeh chhatrachhaaya sada apne saath rakhen aur samay par isko use karen to aap sada hi safe bhi rahenge aur aage badh bhi sakenge aur baba ki sada madad ka bhi anubhav karenge । to us samay mama jis samay suna rahi thi, to sabhi itni shanti se chupchaap aise jaise pinadrop silence thi na aise । to baba ne kaha suna, mama ne sabko saugaat di । dekho mama bachchi ki visheshta ki baba ne kaha aur haan ji kaha । ye haan ji ka paath pakka karne vaale bachchon ke aage prakriti bhi, bhagwan bhi ji hajoor karta hai । to aise kaha baba ne aur kaha ki aap sab aaj se yeh paath pakka karna ki koi bhi direction milta hai to haan ji । haan ji kahne se ek to aapmen dhaarna bhi ho jaaegi, baap ki madad bhi milegi aur woh pakka bhi ho jaaega । phir mainne kaha baba aaj to bahut bhog aaya hai, saare thaal ke thaal baba ke aage, sab bahnon ke aage emerge ho gae to hamne kaha daadi ne bahut bahut bahut pyaar se yeh bhog bheja hai to sab dekhne lage itne bade thaal yahaan to chhoti si thaali thi na, vahaan to bahut bahut bada thaal tha, kahen kitne prakaar ka hai kitne prakaar ka hai sab poochhte hain maine kaha chhappan prakaar ka hai, bole chhappan prakaar ka hai? mama aapke liye daadi ne chhappan prakaar ka bhog bheja hai to mama muskuraai aur jaise aise baithi rahi muskura ke, aur sab dekhne lage ki kya kya aaya hai kya kya aaya hai lekin mama jaise shanti se aise baithi rahi to deedi kehti hai mama dekho na kya kya hai kya aaya hai, mama kehti hai aap dekho phir hamko bataana kya aaya hai । phir saara dekha to baba ne kaha ke dekho kumaarka bachchi ko shauk bahut hai, umang bahut hai mama ki sakhi hai na । mama aapki sakhi hai na, to mama to muskuraati jaise aise, to kaha dekho aapki sakhi ne aapke liye kitna variety bheja hai aur sab ek se ek achha aaya hai, to sveekaar karo mama । mama to baithi rahi to chandramni daadi kehti hai na mama aise thodi sveekaar karengi, aap pahle khaaenge peechhe mama khaaengi । to baba kehta aaj to mama ka din hai, aaj pahle mama khaaegi peechhe sab । to mama to dekhti rahi baba ko, na haath hilaae na kuchh kare, phir baba ne kaha achha, bachchi khaaegi to nahin bina baba ko khilaae । to bole achha baba ko aap khilaao na, phir bhi mama baithi baba ko khilaae hi nahin, to hamne kaha baba ko khilaao, to mama kehti aap lekar aai ho aap baba ko khilaao । mainne kaha aaj main nahin khilaaengi, aaj aap hi khilaao baba ko । to baba bola aaj main pahle mama ke haath se khaaoonga । mama ne pyaar se uthaaya aur baba ko pyaar se khilaaya to mainne kaha baba aap bhi mama ko khilaao । baba ne mama ko baba ne mama khilaaya । aise khilaaya to sab bahut khush hue, phir uske baad mein ek-do ko khilaane ka silsila jaari hua । sab ne bahut bahut bahut pyaar se ek ek cheej khilaai bhi khaai bhi । to baba ne kaha ki dekho bachchi aaj aapka din hai na, to sab aapko kitna yaad karte hain to mainne kaha mama aap ko to sab bahut yaad karte hain mama bahut gambheer hai na to kuchh jaldi javaab nahin deti hai na, sirf muskuraati rehti hai, muskuraati rehti hai । to mainne kaha mama kuchh to bolo na, to mama boli baba bolta hai na, baba ka suno । baba ne kaha aaj mama aap ka din hai aap bolo na, baba to bolta hi rehta hai । to mama ne kaha ki dekho hamaari sab ki aaj yahaan meeting hui hai na, usmein ek baat hi nikli hai ki abhi jaise ham log chaaron taraph se gheraav daal rahe hain, aise aap log bhi chaaron taraph se gheraav daalo । usmein kya hoga ek to sab ko sandesh bhi mil jaaega, jo aapka kaam raha hua hai woh bhi ho jaaega aur chaaron taraph aapka naam bhi baala ho jaaega । abhi aapka naam itna baala ho gaya hai, jo khud aane ke liye chaahte hain ki aaen aaen aaen aur aap unko abhi mana karte ho abhi aap na aao, thode aao । to aisa samay aaega ki jab aap mana bhi karenge na, samay hai samay hai na, to bhi log aaenge । ek kadam bhi rakh ke jaaenge to samjhenge mera bhaagya ban gaya hai to isliye apne samay aisa aane vaala hai jaise abhi aap limit deti ho ki thode thode thode aao lekin us samay koi sunega nahin ki thode aao, line lag jaaegi aur thode mein hi apna bhaagya bana kar jaaenge । to aisa samay aane vaala hai jo apna bhaagya banaane ke liye line lagegi aur us samay koi sunega nahin aapki । ye jo gaaya hua hai, yeh teerath hai na, woh teerath pratyaksha hona hai । to iseelie abhi aapki chaaron taraph pratyakshata shuru ho gai hai aur dheere-dheere aur pratyakshata badhne vaali hai, iske liye aap sabko dene ke liye taiyaar rehna hai । koi bhi aatma khaali haath na jaae to uske liye daataapan ki stage mein, vardaataapan ki stage mein aap sab ko taiyaar rehna hai । to isliye aapka jo title hai vardaaneemoorat, vishvakalyaani moorat to yeh aapka part jo hai shuru hone vaala hai । aise kehte mama ne sabko bahut bahut bahut yaad pyaar diya aur baba ne bhi yaad pyaar diya, phir ham neeche aa gae । daadi ko to baba ne bahut bahut bahut yaad pyaar diya aur kaha ki daadi bachchi ko bahut bahut yaad pyaar dena । bachchi to baap ke nainon mein, dil mein samaai hui hai ।