Murli de Mamma - gyan-sitar-20

२४.८.५९

avastha achhi banaani hai to jo sunte ho use auron ko sunaao

abhi ham puraane se naye ban rahe hain। nai cheej sukh dene vaali hoti hai aur puraani cheej duhkh dene vaali hoti hai। ham bhi jab naye the to bahut sukhi the। ab phir ham sukh ki taraph ja rahe hain। iske liye hamko parampita paramatma gyaan aur yogbal ke saanche mein dhaal rahe hain। bhal aatma ka svarup to vahi hai lekin sanskaaron mein parivartan aa jaata hai। ab ham aatmaon ko paramatma kaale se gora bana rahe hain। to shareer bhi aise hi banenge। aatma hai to anaadi lekin pure bana rahe hain। isliye unko rachayita bhi kah sakte hain। sabhi aatmaon ko mukti-jeevanmukti dene vaale woh hain। isliye kyon na kahen ki woh rachayita hai। isliye unko aatmaon ka pita bhi kehte hain । kaise ham aatmaon ko naya janma dete hain ? jaise puraane jevar se naya banaate hain to bhatthi mein daal khaad nikaal saaph karte hain। vaise bhi ham mahsoos karte hain - jaise gyaan-yog ki bhatthi mein pade hain, ५ vikaaron ki khaad nikalti ja rahi hai। yeh sab baaten apne anubhav ki hain। apne aage to spashta hai ki hamko kya banna hai। ५ vikaaron ka ansh bhi nahin rehta hai। apne original sanskaar to pure hain। yeh to maaya ke sanskaar hain। khel hi aise bana hai jo aadha kalpa eeshvar ke pure sanskaar hamaare mein rehte hain, aadha kalpa maaya ke vikaari sanskaar rehte hain।

ab phir humein pure banna hai jisse sarvada sukh-shanti milegi। iske liye hi anek yuktiyaan mil rahi hain। jitna mansa-vaacha-karmana is alaukik service mein tatpar honge utna apna purushaartha bhi tej hoga। yeh bhi yukti hai। auron ko samjhaayenge to apne ko bhi dekhenge ki mere mein koi kami to nahi hai। jaise koi aur ko kahenge beedi mat piyo, to khud kaise piyenge ? isliye baba pharmaan karte hain - "jo sunte ho woh auron ko sunaao to tumhaari avastha bhi achhi hogi ।" paripoorna to yahaan hi banna aur banaana hai। aise nahin, doosre janma mein banenge। vahaan to hai hi praalabdha। abhi baap padhaane ke liye saamne hai to kyon na sampoorn banen, jo phir vahaan sajaayen khaani na paden। jab woh baap-guru-teacher bane hain, to phir sajaayen khaane unke paas kyon jaaven ? isliye kehte hain – apne vikarma mere saamne rakhenge to aadhi saja to abhi hi kshama kar denge। vahaan to poori saja khaani padegi। to iske liye yeh purushaartha hai। baaki koi kahe hamne sab samajh liye hain, yeh drama hai, chakra aise phirta hai। lekin nahin, iski ghadi-ghadi smriti chaahiye। nahin to २-३ roj padhne se thande pad jaate hain । isliye jitna buddhi usmein rahegi utna sadaiv khushi ki avastha rahegi। maarga bhi buddhiyog ka hai। yahaan haath-paanv ki ladaai nahin hai, sab andar ki baat hai। andar hi achhe sanskaar dhaaran karne hain।

har ek ko apni padhaai ka show dikhaana hai। kehte hain na bandhan se chhudaao । lekin serviceable bhi ho na। vahaan se bhi chhodo aur serviceable bhi na ho to kya karenge ? maaya buddhi ko bhatkaati rahegi। is service ke laayak honge to woh service aapehi chhoot jaayegi। is service par tatpar ho jaayenge to karmabandhan ka khel khatma ho jaayega। aise to nahin hona chaahiye - khud pakadkar baithe aur kehta rahe bandhan se chhudaao। yeh to hai buddhiyog ki baat । chhodkar chhootne ki baat to nahin hai। buddhi ko karmaateet banaana hai। baaki pravritti ko bhi siddha karna hai। jo kuchh ham chhodte hain athva badli karte hain -- woh hai impurified karmabandhan । unhein chhod pure sambandh lena hai। karma-sanyaasi to nahin hain। yeh to sab buddhi ki saphaai hai। iske liye yeh yuktiyaan hain। yeh to guarantee hai ki vijay avashya honi hai। yeh to beech mein vighna padte hain। yeh sambandhiyon ke bandhan na paden to bandhan tooten kaise ? apna to sabmen phaayda hai। sachche paatshaah se agar sachcha pyaar hai to in vighnon ki parvaah nahin rehti । yeh koi manushya se to pyaar nahin। direct sarva samartha se yog lagaate hain। vahi ab vinaash, sthaapna ka kaarya kar rahe hain। is baat ko siddha hone mein ab deri nahin । practical drishya hi siddha kara denge । tab tak apne nishchay aur himmat se kaam lena hai।