बुधवार 19 दिसंबर 1979 की अव्यक्त मुरली

>

19-12-79om shanti avyakt baapdaadaamdhuban

sahaj yaad ka saadhan - svayan ko khudaai khidmatgaar samjho

baap-daada aaj apne sahayogi va sahajyogi bachchon ko, jinka naam hi hai - khudaai khidmatgaar, aise bachchon ko dekh sada harshit hote hain। khudaai khidmatgaar arthaat jo khuda va baap ne khidmat arthaat seva di hai usi seva mein sada tatpar rahne vaale। bachchon ko yeh bhi vishesh nasha hona chaahiye ki ham sabhi ko khuda ne jo khidmat di hai,ham usi seva mein lage hue hain। kaarya karte hue, jisne kaarya diya hai,usko kabhi bhoola nahin jaata। chaahe sthool karttavya bhi karne ho lekin yeh karmana seva bhi khudaai khidmat hai। direct baap direction diye hain to karmana seva mein bhi yeh smriti rahe ki baap ke direction ke anusaar kar rahe hain to kabhi bhi baap ko bhool nahin sakenge। jaise koi vishesh aatma se koi vishesh kaarya milta hai - jaise aaj kal ka president agar kisi ko kahe ki tumhein yeh kaarya karna hai to woh vyakti us kaarya ko karte hue president ko kabhi nahin bhoolega। sahaj aur svatah hi uski yaad rahegi। na chaahte hue bhi saamne vahi aata rahega। aise aap sab ko yeh kaarya oonche-se-oonche baap ne diya kaarya karte hue dene vaale ko bhool kaise sakenge? to sahaj yaad ka saadhan hai - sada svayan ko khudaai khidmatgaar samjho।

patte-patte ko bhagwan hilaata hai - is gaayan ka rahasya

bhakti maarga mein bina samajh ke bhi kahaavat hai aur unki maanyata bhi hai agar patta bhi hil raha hai us patte ko hilaane vaala bhi baap hai। lekin is rahasya ko aap jaante ho ki un patton ko baap nahin hilaata lekin drama anusaar yeh sab chal raha hai। yeh gaayan koi sthool patton se nahin lagta, lekin kalpa vriksha ke aap sab pahle patte ho। sangamayugi aap sab golden aged patte jo baap dvaara lohe se paaras ban gaye ho, in chaitanya patte ko is samay direct baap chala rahe hain। baap ki direction hai ki sankalp bhi jo baap ka ho,woh aapka sankalp ho। har sankalp baap-samaan,har bol baapasmaan, har karma baap-samaan ho arthaat isi shreemat ke aadhaar par aap sabhi ka sankalp chalta hai। to is samay aap sabh patton ko shreemat ke aadhaar par har samay baap chala rahe hain। patte-patte ko hila raha hai arthaat chala raha hai। agar shreemat ke sivaae sankalp bhi karte ho to woh vyartha sankalp ho jaata hai to yeh jo kahaavat hai,woh bhakti ke samay ki nahin lekin sangam samay ka gaayan hai। to aap sabhi patte baap ki shreemat par hi hil rahe ho arthaat chal rahe ho na। aise hi chal rahe ho na? chalaane ka kaam bhi baap ka, phir bhi itna mushkil kyon lagta hai?bojh saara baap ne le liya phir bhi sada udte kyon nahin ho? halki cheez to sada oopar udti hai। itne halke jo har sankalp bhi baap chalaayenge to chalaana hai। jaise chalaayenge vaise chalenge yeh sabhi ka vaayda hai aur baap ki guarantee hai ki chalaayenge। to buddhi ko kya order diya hua hai?buddhi ko baap ne kya kaarya diya hai - usko jaante ho na?buddhi ke baithne ka sthaan baap ke paas mein hai। karttavya vishwa seva ka hai। to jo vaayda kiya hai jahaan bithaayenge jaise chalaayenge vaise chalenge। shareer se ya buddhi se? tan ke saath man bhi diya hai ya sirf tan diya hai? tan aur buddhi se jahaan bithaayen,jaise chalaayen, jo karaayen, jo khilaayen, wahin karenge - yeh vaayda kiya hua hai na? to buddhi ka bhojan hai - shuddh sankalp। jo khilaaen vahi khaayenge - yeh vaayda hai to phir vyartha sankalp ka bhojan kyon karte ho? jaise mukh dvaara tamoguni bhojan, ashuddha bhojan nahin kha sakte ho, aise hi buddhi dvaara vyartha sankalp va vikalpa ka ashuddha bhojan kaise kha sakte ho? jo khilaayenge,woh khaayenge phir to yeh wrong ho jaata hai। kehna aur karna samaan karne vaale ho na?to man buddhi ke liye sada yeh bhi vaayda yaad rakho to sahaj yogi ban jaavenge। baap ne kaha aur kiya। apna bojh apne oopar na rakho। kaise karoon, kaise chaloon, is bojh se halke hokar ke oonchi sthiti par ja nahin sakte ho। isliye shreemat se sankalp tak bhi chalte chalo to mehnat se bach jaaoge।

milaavat se bhaareepan

kai bachchon ki mehnat ke bhinna-bhinan pose baap-daada dekhte rehte hain। saare din mein anek bachchon ke anek pose dekhte hain। automatic camera hai। science vaalon ne sab vatan se hi to kaapi ki hai। kabhi vatan mein aakar dekhna kya-kya cheejen vahaan hai। jo chaahiye, woh haajir milegi। aap sab kahenge ki mangaao। baap poochhte hain vatan ko dekhna chaahte ho ya rehna chaahte ho। (trial karenge) shak hai kya jo trial karenge?aap sabko bulaane ke liye hi brahma baap rooke hue hain। to kyon nahin sampanna ban jaate ho। bahut sahaj hi sampanna ban sakte ho, lekin dvaapar se mix karne ke sanskaar bahut rahe hain। pahle pooja mein mix kiya, devtaaon ko bandar ka munh laga diya। shaastron mein mix kiya jo baap ki jeevan-kahaani mein bachche ki jeevan-kahaani mix ki। aise hi grihasthi mein pavitra pravritti ke bajaae apvitrata mix kar di। abhi bhi shreemat mein man mat mix kar dete ho। isliye mix hone ke kaaran, jaise real sona halka hota hai aur jab usmein mix karte hain to bhaari ho jaata hai aise hi shreemat arthaat shreshtha mat banaati hain। manmat mix hone se bhaari ho jaate ho। isliye chalne mein mehnat lagti hai। atah shreemat mein mix nahin karo। sada halke rahne se vatan ki sabhi scene-scenery yahaan rehte hue bhi dekh sakenge। aise anubhav karenge jaise is duniya ki koi bhi scene spashta dikhaai deti hai। sirf sankalp shakti arthaat man aur buddhi sada manmat se khaali rakho। man ko chalaane ki aadat bahut hai na। ekaagra karte ho phir bhi chal padta hai। phir mehnat karte ho । chalaane se bachne ka saadhan hai jaise aajkal agar koi control mein nahin aata, bahut tang karta hai,bahut uchhalta hai, ya paagal ho jaata hai to unko aisa injection laga dete hain jo woh shant ho jaata hai। to aise agar sankalp shakti aapke control mein nahin aati to ashareeri bhav ka injection laga do। baap ke paas baith jaao। to sankalp shakti vyartha nahin uchhlegi baithna bhi nahin aata hai kya?sirf baithne ka hi kaam diya hai, aur kuchh nahin। abhi to samajh rahe hain ki bahut sahaj hai। buddhi ka lagaam dekar ke phir le lete ho is liye man vyartha ki mehnat mein daal deta hai। vyartha mehnat se chhoot jaao। baap ko bachchon ki mehnat dekh taras to padega na।

saaheb, beebi aur gulaam

baap kehte hain har bachcha baap ke saath takhta par aaraam se baith jaao। takhtansheen hokar apni sthool shaktiyon aur sookshm ko arthaat karmaindriyon ko aur man, buddhi sanskaar sookshm in shaktiyon ko bhi order sen chalaao। takhtansheen honge to order chala sakenge। takhta se neeche utar order karte ho isliye karmendriyaan bhi maanti nahin hain। aajkal kaanton ki kursi ki bhi halchal kar rahe hain। aapko to takhtansheen ki offer hai। phir bhi neeche kyon aa jaate ho। neeche aana arthaat servant banna। kiska servant? apne hi anek karmendriyon ke servant ke bhi servant ho jaate hain। iseelie mehnat karte ho। eeshvareey servant bano,eeshvareey sevaadhaari bano। servant ke bhi servant nahin bano। eeshvareey seva takhta par baithe hue bhi kar sakte ho। neeche aane ki jaroorat nahin। baap apne saath bithaana chaahte hain lekin karte kya ho? sangamayugi saaheb aur beebi banne ki bajaae gulaam ban jaate ho। to sachche saahib ki sachchi beebeeyaan bano। gulaam nahin bano। jo sada sabki nazar se bachi hui pardaaposh mein rehti, un par kisi ki nazar nahin padti। to maaya se pardaaposh aur saaheb ke saath baith jaao। to sabhi gulaam aapki seva mein haazar rahenge। samjha - kya karna hai? aaj mehnat se kinaara kar do। sada sahajyogi takhtansheen baap ke saath-saath baith jaao।

abhi gujraat aur Indore aaya hai na। to pardeposh ho jaao arthaat indoor ho jaao। Indore vaale to sada ‘in-dor’rehte hain na। baahar to nahin aate hain na। harek zone apna-apna vistaar achha hi kar rahe hain। gujraat ne haal to full kar diya hai abhi gujraat vaale ko full karo aur jaldi phir vatan mein aaraam se baithenge। ab to samay ke pramaan brahma baap bachchon ka aahvaan kar rahe hain। gujraat vaale kya karenge? gujraat vaale bade aavaaz vaale mike yahaan laao sthool vaale mike nahin, chaitanya mike। aise powerful mike ke set laao jo pratyakshata ka aavaaz bulanda karen। achha, Indore zone kya laavega! Indore zone aise powerful T.vi. set laao jis dvaara vishwa ko vinaash kaal spashta dikhaai de aur bhavishya ujval dikhaai de। samjha, kya karna hai? aise-aise vyaktiyon ko taiyaar karo - jinke anubhav ki T.vi. dvaara duniya ko vinaash aur sthaapna ka saakshaatkaar ho jaae। to donon hi zone aise set taiyaar karke aana। aise khudaai khidmatgaar, sada mehnat se mukta, sada yuktiyukta sankalp aur karma karne vaale, sada baap ki shreemat pramaan har sankalp aur karma karne vaale, sada kahne aur karne ko samaan karne vaale, aise sada baap ke saathi bachchon ko baap-daada ki yaad, pyaar aur namaste।

maheen purushaarthi bhav

(avyakt baapdaada ke madhur mahaavaakya vishesh teachers prati)

teachers ka vishesh purushaartheer kis baat ka hona chaahiye? serviceable bachchon ka maheen purooshaartha kya hai? maheen purooshaartha hai - sankalp ki bhi chainkig। sankalp mein yaad aur seva ka balance raha! har sankalp powerful raha। serviceable bachchon ke sankalp kabhi bhi vyartha nahin hone chaahiye kyonki aap vishwa kalyaankaari ho, vishwa ki stage par act karne vaale ho। aapko saari vishwa copy karti hai। agar aapka ek sankalp bhi vyartha hua to sabhi usko copy karne vaale hain। apne prati nahin kiya lekin anekon ke prati nimitta ban gae। jaise aapko seva ke lift ki gift milti hai, anekon ki seva ka share mil jaata hai। vaise hi agar koi aisa kaarya karte ho to anekon ko vyartha sikhaane ke nimitta bhi ban jaate ho। isliye ab vyartha ka khaata samaapta। jaise aajkal science ke saadhnon dvaara man ki ekaagrata ko chaik karte hain na। london va anya sthaanon par kiya na - ye hain science ke saadhan। lekin aapko har kadam mein apni chaiking ke saadhan saath-saath rakhne chaahiye। jaise woh chaiking ke auzaar saath mein rakhte hain aur chaik karte samay oopar daalte hain। serviceable bachchon ko har samay chaiking ka saadhan saath rakhna chaahiye। to teachers banna koi chhoti-si baat nahin hai,naam hi nahin hai lekin naam ke saath kaam bhi hai।

sarva khazaanon ki economy ka budget banaao।

savisaebul bachchon ka vyartha kabhi nahin chalna chaahiye। agar aap hi yeh kahen ki vyartha sankalp aate hain to aur kya karenge? aur to vikalpa mein chale jaayenge। aise to harek attention rakhta hi hai lekin ab maheen attention chaahiye। sankalp se bhi seva ho। agar sankalp shakti ko seva mein busy kar dete ho to vyartha automatically khatma ho jaayega। jaise aajkal ke youth group ko koi-na-koi kaarya mein busy karne ki koshish karte hain jisse yuva shakti nuksaankaarak kaarya mein na chali jaae। kahin baarish ka paani vyartha jaata hai to baandh banaakar vyartha bhi saphal kar dete hain। aise sankalp shakti jo vyartha chali jaati hai usko seva mein busy rakhenge to vyartha ke bajaae samartha ho jaayega। sankalp, bol,karma va gyaan ki shaktiyaan kuchh bhi vyartha na jaani chaahiye। to aise har sankalp, karma,bol aur sarva shaktiyon ki economy karne vaale ho na?vaise bhi laukik reeti se agar economy vaala ghar na ho to theek reeti se chal nahin sakta। aise hi agar nimitta bane hue bachche economy vaale nahin hain to centre theek nahin chalta, woh hui had ki pravritti yeh hai behad ki। to chaik karna chaahiye extra kharcha kya-kya kiya - sankalp mein, bol mein, shaktiyon mein। phir usko change karna chaahiye। maheen purooshaartha hai sarva khazaanon ki economy ka budget banaana aur usi ke anusaar chalna। budget banaana to aata hai na? jaise sthool khazaane ka potaamel banaate ho, aise yeh sookshm potaamel banaao। nimitta bane ho, tyaag kiya hai uska yeh pratyakshaphal hai jo centre mil gaya, jigyaasu mil gaye, abhi aur aage badho। jitna kiya hai utna mila hai। abhi phir pooja aur bhakta aapke charnon par jhuken। abhi yeh pratyaksha phal dikhaao। baap-samaan title bhi mil gaya, prakriti bhi yathaashakti daasi hoti rehti hai abhi isse bhi aage chalo। yeh pratyakshaphal praapta zaroor hota hai lekin ise sveekaar nahin karna। ab sankalp se bhi sevaadhaari bano। vaacha seva to saat din ke course vaale bhi karte hain। karmana seva bhi sab karte hain lekin aapki visheshta hai mansa seva। is visheshta ko apna kar vishesh number le lo। sabhi santut to rah rahe ho aur santushta rehna bhi hai। jahaan direction mile usi anusaar chalna। yeh bhi anekon ko paath sikhaane ke nimitta ban jaate ho। practical paath sikhaane vaali ho, mukh se nahin। jump to achha lagaaya hai abhi kya karna hai? jump ke baad ki stage hai udne ki।

abhi vyakta mein rehte avyakt mein udte raho। udna seekho। jump ke baad udne ki stage hai। jump to second mein laga diya। abhi ka purooshaartha hi hai udne ka। sada avyakt vatan mein videhi sthiti mein udte raho। ashareeri stage par udte raho। jump ke baad bhi to stage hai na abhi us stage par chalo।

‘‘avyakt baapdaada ki personal mulaakaat’’ (Indore aur gujraat zone)

1. baap dvaara ki gai mahima ka sumiran karne se samartha stage ka anubhav - sada apne bhaagya ki mahima ke geet gaate rehte ho?jaise sthool saadhaaran geet bhi gaate hain to kitna khushi mein aa jaate hain। bhaktimaarga mein keertan karte hain to bhi kitna khush hote hain। to aap sabhi bhi baap dvaara ki gai mahima ke geet sada gaate raho। pahle ham kya the aur baap ne kya bana diya,usi ka sumiran karte sada harshit raho। isi sumiran mein samarthi samaai hui hai। kyonki baap ne samartha banaaya hai na। jo svapna mein banna na tha, woh saakaar swaroop mein anubhav kar rahe ho iseelie baap-daada sabhi bachchon ko lucky sitaare kehte hain। to lucky sitaare ho na?

sitaara kaha hi usko jaata hai jo sada jagamgaata rahe। jo baap dvaara shaktiyaan va gyaan ka khazaana mila hai usmein jagamgaate raho। aise ho? baadlon mein chhipne vaale to nahin ho? sada apni chamak se vishwa ko roshan karne vaale ho na? khushi-khushi se puraani duniya se kinaara kar liya hai। ab puraani duniya ke nivaasi nahin ho, sangam yugi nivaasi ho। to puraani duniya se kinaara ho gaya hai ya karna hai - kya samajhte ho?koi puraane mitra se milne ke liye puraani duniya ki cheezen khareedne to nahin jaate ho। aajkal baardar par khade hue bhi kabhi-kabhi jaanboojh kar dushman ke desh mein chale jaate hain। aap baardar cross kar puraani duniya mein chale to nahin jaate ho? nai duniya saamne khadi hai, puraani duniya ka kinaara kar chuke ho। sankalp se bhi puraani duniya mein nahin jaana। gaye to phans jaayenge। isliye sada apne ko sangamayugi samjho। sangam par baap yaad aayega,varsa yaad aayega।

purooshaartha mein sva ki unnati aur seva ki bhi vriddhi - donon ka balance chaahiye। donon ke plans banaate rehte ho? abhi kya plan banaaya hai? (ujjain mein kumbha mele par aadhyaatmik mela) mele ki dhoomdhaam se taiyaari kar rahe ho। achha hai। lekin usmein yeh vishesh attention rakhna - mele ka vaataavran aisa shaantamay ho jo halchal se ghamsaan ki vritti lekan aane vaale mahsoos karen ki koi bhinna sthaan par aaye hain। chaaron or aavaaz ho aur aapke paas aisa anubhav karen jaise shanti ke kunda mein pahunch gaye। baahar jo duty par ho woh bhi shanti ke vardaani hokar rahen। aapke shanti ke vibrations unko shant kar den। isse saare mele mein yeh aavaaz ho jaayega ki do minute ke liye gaye lekin achhi hi shanti ka anubhav karke aaye। jaise shuru-shuru mein sthaapna ke samay jo aate the, to om ki dhvani se mahsoos karte the ki yeh koi shanti ka sthaan hai। aise is mele mein shanti ka anubhav karen। mele mein jo aate hain unka mood hi kuchh or hota hai। woh mela to hai jaise baazaar, usi roop se ashaanti se aate hain aise ko shanti ka anubhav karaana bahut zaroori hai jisse visheshta lage।

sabhi ko sneh se nimantran zaroor dena - aapka sneh dekh karke sab khush honge। koi kaise bhi bole lekin aap log shanti se, sneh se bolenge to uska bhi prabhaav padega। samay prati samay stage par aaye hue dekh andar se maante hain। abhi sabki okhen thoda neeche hui hain, sir nahin jhuka hai। abhi saando muaaphik aise nahin dekhte hain। aakhir to sab jhukne vaale hain। sabka jhukna arthaat jay-jaykaar hona। phir kraanti ke baad shanti ho jaayegi। abhi jhukne ka pahla pose hua hai,aakhirin paanv tak jhukenge।

2. raham dil baap ke raham dil bachchon ka karttavya hai - sabhi ko thikaana dena :- sabhi ne bhikhaareepan ki jeevan ka bhi anubhav kiya aur ab maalaamaal ban gaye ho। maalaamaal banne vaale bachche kisi ko bhi dekhenge to raham aayega ki is aatma ko thikaana mil jaae। inka bhi kalyaan ho jaae। to jo bhi samparka mein aaye use baap ka parichay zaroor dena। jaise koi ghar mein aata hai to use paani to poochha jaata hai na! agar aise hi chala jaae to bura samajhte hain na! aise hi samparka mein jo aaye to use baap ke parichay ka paani zaroor poochho। thoda sunaaya to paani poochha - saptaah course karaaya to brahma bhojan karaaya। kuchh-na-kuchh dena zaroor। kyonki daata ke bachche ho।