मंगलवार 24 अक्टूबर 2023 की दैनिक मुरली

24-10-2023 praatahmurli om shanti "baapdaada"' madhuban

“meethe bachche - tumhein bada vichitra ustaad mila hai, tum uski shreemat par chalo to double sirtaaj devta ban jaayenge''

prashn:- padhaai mein kabhi bhi thakaavat na aaye uska sahaj purushaartha kya hai?

uttar:- padhaai ke beech mein jo kabhi ninda-stuti, maan-apmaan hota hai, usmein sthiti samaan rahe, use ek khel samjho to kabhi thakaavat nahin aayegi। sabse jaasti ninda to shreekrishna ki hui hai, kitne kalank lagaaye hain, phir aise shreekrishna ko poojte bhi hain। to yeh gaali milna koi nai baat nahin hai isliye padhaai mein thakna nahin hai, jab tak baap padha rahe hain, padhte rehna hai।

geet:- banvaari re jeene ka sahaara tera naam…

om shanti। yeh kisne kaha? kisne farmaaya aur kisko? yeh to tum bachche hi jaante ho, jinko hi gop-gopiyaan kaha jaata hai। to unhonne apne baap gopeevallabh ko yaad kiya। aisa baap sivaae parampita paramatma ke koi ho nahin sakta। to yaad unko karte hain, jo hokar jaate hain। unka phir baad mein gaayan hota hai। misaal - jaise Christ aaya, Christian dharma sthaapan karke kahaan chala nahin gaya, unko paalna to zaroor karni hai, punarjanma mein aana hai। parantu jo dharma sthaapan karke gaye hain unka varsha-varsha birth de manaate hain। bhakti maarga mein unko yaad kiya jaata hai। vaise hi aajkal dashahre ka bhi utsav manaate hain। manaana hota hai to zaroor shubh hi hoga। koi achha karke jaate hain to unka utsav manaaya jaata hai। deepmaala ka bhi utsav manaaya jaata hai। shreekrishna jayanti manaai jaati hai। jo hokar jaate hain unka phir utsav manaate hain। ab bhaaratvaasiyon ko to yeh pata hai nahin ki yeh raakhi utsav aadi kyon manaate hain। kya hua tha? Christ-buddha aadi ko jaante hain ki yeh dharma sthaapan karne aaye the। is samay sabhi aasuri sampradaay hain। tum ho eeshvareey sampradaay। ab baap raam aakar daivi shreshthaachaari bana rahe hain athva aise kahen ki parampita aakar svarga ka udghaatan kar rahe hain athva foundation daal rahe hain। opening ceremony bhi kah sakte hain। bhaarat mein shreshthaachaari mahaaraaja-mahaaraani hokar gaye hain, satayugi devi-devtaayen double sirtaaj the। pavitrata ka taaj bhi tha aur ratnajdit taaj bhi tha। vikaari raajaaon ko sirf ratnajdit taaj hota hai। double taaj vaalon ki single taaj vaale pooja karte hain। parantu kab hokar gaye, kaise raajya paaya yeh kisko pata nahin hai। lakshmi-naaraayan itne shreshtha double sirtaaj devi-devta the, unhon ko aisa shreshtha banaane vaala kaun, yeh baap baith samjhaate hain। abhi dashahra manaate hain, tum jaante ho zaroor kuchh hua hai jis kaaran dashahra manaate hain, raavan ko jalaate hain, parantu woh jalne ki cheez hai nahin। abhi unka raajya poora hota hai। jab tak raamraajya sthaapan ho jaae tab tak yeh bhrashtaachaari raajya chalna hai। raavan raajya khatma ho raamraajya sthaapan hua tha, uski ceremony manaate rehte hain। raavan ko jalaate hain, isse siddha karte hain barobar bhrashtaachaari aasuri raajya hai। bhrashtaachaar ki bhi grades rehti hain। bhrashtaachaar dvaapar se shuru hota hai। pahle do kala bhrashtaachaar rehta hai phir 4 kala, phir 8 kala, 10 kala, badhte-badhte 16 kala bhrashtaachaar ho gaya hai। abhi phir 16 kala bhrashtaachaar ko badlaae 16 kala shreshthaachaari banaana ek baap ka hi kaam hai।

baap samjhaate hain is samay raavanraajya hai, raamraajya shreshtha raajya tha। abhi woh bhrashta ban gaye hain। shreshthaachaari bhaarat ko svarga kaha jaata hai। vahi raajya ab bhrashtaachaari ho gaya hai। ab baap kehte hain - main aaya hoon bhrashtaachaari raajya ko shreshthaachaari raajya banaane liye। yaadav kul bhi hai, kaurav kul bhi hai। yaadav kul mein bhi anek dharma hain। jo shreshthaachaari daivi dharma ke the woh dharma bhrashta, karma bhrashta ban pade hain। phir baap shreshtha karma sikhlaate hain। bhakti maarga mein utsav manaate aaye hain। zaroor bhagwan aaya tha, 5 hazaar varsha ki baat hai। baap ne aakar bhrashtaachaari ko shreshthaachaari banaaya tha। saari duniya ko shreshthaachaari banaana baap ka hi kaam hai, phir unki paalna karne liye tumko oopar se bhej dete hain। tumne jo daivi dharma ki sthaapna ki hai, uski phir jaakar paalna karo। aise koi kehte nahin, automatically yeh drama anusaar hota hai। tum shreshthaachaari ban jaayenge phir srishti bhi satopradhaan shreshthaachaari ban jaayegi। abhi to 5 tatva bhi tamopradhaan hain। kitni uthal-paathal hoti rehti hai। manushya kitne duhkhi hote hain। karodon ka nuksaan ho jaata hai। satayug mein yeh koi bhi upadrav nahin hote। upadrav hote hain narka mein। upadrav bhi pahle do kala vaale the, abhi 16 kala vaale ban gaye hain। yeh sab detail mein samjhaane ki baaten hain aur hain bahut sahaj, parantu samajhte nahin, na samjha sakte hain। to yeh raavan ko jalaana dvaapar se shuru hota hai। aise thode hi kahenge 5 hazaar varsha hue। bhakti maarga shuru hota hai to yeh upadrav bhi shuru hote hain। ab phir raavan raajya ka vinaash, raamraajya ki sthaapna kaise hoti hai so tum jaante ho। manushya nahin jaante raavan kya hai। baap kehte hain lanka to koi thi nahin। satayug mein lanka hoti nahin। bahut thode manushya hote hain। jamuna ka kantha hai। ajmer mein vaikuntha ka model bhi dikhaate hain parantu samajhte nahin। sone ke mahal aadi banaane mein vahaan koi der nahin lagti hai। machinery par jhat galaakar tiles banaate hain।

tum bachche jaante ho yeh jo science hai, jisse vinaash hota hai, vahi phir tumko vahaan kaam mein aayegi। abhi yeh aeroplane aadi badi khushi ke liye banaate hain, unse hi vinaash karenge। to yeh aeroplane sukh ke liye bhi hai to duhkh ke liye bhi hai। alpakaal liye sukh hai। 100 varsha ke andar yeh sab cheejen nikli hain। to 100 varsha ke andar itna sab hua hai। to tum vichaar karo jab vinaash hoga phir nai duniya mein kitne thode samay mein sab cheeze ban jaayengi। vahaan to jhat sone ke mahal ban jaate hain। bhaarat mein sone chaandi ke kitne mahal jadit se jade hue bante hain। vahaan darbaar badi banti hai। raaje rajvaade aapas mein milte honge। usko paandav sabha nahin kahenge। usko kahenge lakshmi-naaraayan ke raajdhaani ki sabha। prince-princess sab aakar baithte hain। British government thi to prince-princess mahaaraajaaon ki badi sabha lagti thi। sab raajaai taaj lagaakar baithte the। nepaal mein baba jaate the to vahaan raana family ki sabha lagti thi। bade taaj vaale raane baithte the। unko mahaaraaja-mahaaraani kehte hain, phir unmein bhi nambarvaar hote hain। raaniyaan nahin baithti hain। woh pardensheen hoti hain। bade bhabhke se baithte hain। ham kehte the yeh to paandav raajya hai। woh apne ko kehte bhi sooryavanshi hain। yahaan the parantu single taaj vaale। unse pahle double sirtaaj the। shreekrishna ke liye anek baaten likh di hain - phalaani ko bhagaaya, yeh kiya। parantu aisi baat to hai nahin।

jo utsav past ho jaate hain woh phir manaate aate hain। yeh bhi utsav manaate hain। jabki raavan raajya ko khalaas kar raamraajya ki sthaapna ki, yeh to varsha-varsha manaate hain। to siddha hota hai aasuri raavan raajya 5 hajaar varsha pahle bhi tha। baap aaya tha, aakar raavan raajya ka vinaash karaaya tha। vahi mahaabhaarat ladaai khadi hai। baaki raavan koi cheez nahin hai। raavan ki stri madodri dikhaate hain। unko phir 10 sheesh nahin dikhaate hain। raavan ko 10 sheesh dikhaate hain। vishnu ko 4 bhuja dikhaate hain। do lakshmi ki, do naaraayan ki। vaise raavan ko 10 sheesh dikhaate hain - 5 vikaar unke, 5 vikaar madodri ke। vishnu chaturbhuj bhi arth sahit dikhaaya hai। pooja bhi mahaalakshmi ki karte hain। mahaalakshmi ko kabhi do bhuja vaala nahin dikhaayenge। deepmaala mein lakshmi ka aahvaan karte hain। kyon, naaraayan ne koi gunaah kiya kya? lakshmi ko bhi dhan to naaraayan hi deta hoga na। half partner honge। to naaraayan ne kya gunaah kiya? vaastav mein dhan koi lakshmi se nahin milta, dhan to jagdamba se milta hai। tum jaante ho jagat amba so hi phir lakshmi banti hai। to unhonne alag-alag kar diya hai। jagat amba se har cheez maangate hain। koi bhi duhkh hoga, bachcha mar jaayega to jagat amba ko kahenge raksha karo, bachcha do, yeh beemaari door karo। bahut kaamnaayen rakhte hain। lakshmi ke paas ek hi kaamna rakhkar jaate hain - dhan ki। bas। jagat amba sabhi kaamnaayen poori karne vaali hai। dhanvaan to yeh banaati hai। is samay tumhaari sab kaamnaayen poori hoti hain। koi dhan nahin dete hain, sirf padhaate hain - jisse tum kya se kya ban jaate ho aur phir lakshmi banti ho to dhanvaan ban jaati ho। taakat is samay tumhaare mein hai jo tum sab kaamnaayen poori kar sakti ho। jagat amba daan deti hai, lakshmi daan thode hi degi। vahaan daan dete nahin। bhookh hoti hi nahin। kangaal koi hote nahin। satayug mein raavan hota nahin। yahaan raavan ko jalaate hain। dashahre ke baad phir deepmaala manaate hain, khushiyaan manaate hain kyonki raavan raajya vinaash ho raamraajya sthaapan hoga to khushiyaan hongi। ghar-ghar mein roshni ho jaati hai। tumhaari aatma mein roshni aa jaati hai। jo cheez sangam par hai woh satayug mein nahin hogi। tum trikaaldarshi ho, vahaan to tum praalabdha bhogte ho। yeh knowledge saari bhool jaate ho। sangam par hai hi sthaapna aur vinaash। sthaapna ho gai phir bas। in sab utsavon aadi ka tumko hi gyaan hai। agyaani manushya to kuchh bhi nahin samajhte। bade bakhere bana dete hain, hai kuchh bhi nahin। tum practical mein dekh rahe ho satayug mein yeh baaten nahin hoti hain। naarad ki bhi baat shaastron mein hai। tumse bhi poochha jaata hai - tum kehte ho baba ham lakshmi ko varenge athva naaraayan ko varenge। to baap kehte hain apne mein dekho koi vikaar to nahin hai। agar krodh aadi hoga to kaise var sakenge? haan, abhi sampoorn to koi bane nahin hai। parantu banna hai, in bhooton ko bhagaana hai tab hi itna martaba pa sakenge। ustaad bhi bada vichitra mila hai। baap to sarvagun sampanna, gyaan ka saagar, aananda ka saagar hai to jo aakar bachche bante hain unko bhi sarvagun sampanna, double sirtaaj devta banaate hain। barobar tum ban rahe ho। devtaaon ko donon taaj rehte hain। tum aaye ho baap se varsa lene। varsa lena hai, padhna hai। points to bahut nikalti rehti hain। agar padhenge nahin to auron ko kaise samjha sakenge? drama hoobhu repeat ho raha hai। yeh knowledge abhi tum samajhte ho phir yeh gum ho jaayegi। yeh jo lanka aadi dikhaate hain, woh bhi hai nahin। raavan ka janma kab hua? likha hua hai dvaapar se devtaayen vaam maarga mein jaate hain to vikaari banna shuru hote hain। bhakti bhi pahle avyabhichaari thi phir vyabhichaari ban jaati hai। abhi to manushya apni pooja karaane lag pade hain। baap kehte hain main aata hi hoon bhrashtaachaari duniya ka vinaash aur shreshthaachaari duniya ki sthaapna karne। zaroor pahle sthaapna karenge phir vinaash karenge। yeh hamaara part kalpa-kalpa ka hai। bhrashtaachaari se shreshthaachaari banaane mein bhi time lagta hai। jab tak baap baith padha rahe hain, padhna hai। kalpa pahle jinhonne jitna padha hai vahi padhenge। bahut bachche chalte-chalte kehte - bas, ham chal nahin sakenge। are, stuti-ninda, maan-apmaan yeh to sab hoga। tum padhaai ko kyon chhodte ho। sabse jaasti ninda to shreekrishna ki hui hai। kitne kalank lagaaye hain। phir aise shreekrishna ko poojte kyon hain? vaastav mein gaali abhi inko (brahma ko) milti hai। saare sindha mein ninda hui phir kar to kuchh bhi nahin sake। yeh bhi sab khel hai। nai baat nahin, kalpa pahle bhi gaali khaai thi, nadi paar ki thi। tum sindha se nikal is paar chale aaye na। shreekrishna to nahin the, yeh daada aata-jaata tha। tum jaante ho abhi ham raajya paate hain phir ganvaate hain। yeh bhi khel hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sarva ki manokaamnaayen poorn karne vaali kaamdhenu (jagdamba) banna hai। daan dete rehna hai।

2) stuti-ninda mein sthiti samaan rakhni hai। yeh sab hote padhaai nahin chhodni hai। ise khel samajh paar karna hai।

vardaan:- apne shakti swaroop dvaara alaukikta ka anubhav karaane vaale jvaala roop bhav

abhi tak baap shama ki aakarshan hai, baap ka kartavya chal raha hai, bachchon ka kartavya gupta hai। lekin jab aap apne shakti swaroop mein sthit honge to samparka mein aane vaali aatmaayen alaukikta ka anubhav karengi। achha-achha kahne vaalon ko achha banne ki prerna tab milegi jab sangathit roop mein aap jvaala swaroop, light house banenge। master sarvashaktimaan ki stage, stage par aa jaae to sabhi aapke aage parvaane samaan chakra lagaane lag jaayen।

slogan:- apni karmendriyon ko yog agni mein tapaane vaale hi sampoorn paavan bante hain।