Avyakt murli for Thursday 6 February 1969

>

06-02-69 om shanti avyakt baapdaada madhuban

"mahima sunna chhodo – mahaan banon"

sabhi yaad ki yaatra mein baithe ho? padhaai ka saar to samajh mein aa gaya। us saar ko jeevan mein laakar ke duniya ko woh raaj sunaana hai। rachayita aur rachna ki knowledge ko to samajh gaye ho। suna to bahut hai lekin ab jo suna hai woh swaroop banke sabhi ko dikhaana hai। kaise dikhaayenge?aapki har chalan se baap aur daada ke charitra najar aave। aapki aankhon mein us hi baap ko dekhen। aapki vaani se unheen ki knowledge ko sunen। har chalan mein, har charitra samaaya hua hona chaahiye। sirf baap ke charitra nahin lekin baap ke charitra dekh bachche bhi charitravaan ban jaayen। aapke chitra mein usi alaukik chitra ko dekhen। aap ke vyakta roop mein avyakt moorta najar aave। aisa purooshaartha karke, jo baapdaada ne mehnat ki hai uska phal swaroop dikhaana hai। jaise agyaan kaal mein bhi koi-koi bachchon mein jaise ki baap hi najar aata hai। unke bol-chaal se anubhav hota hai jaise ki baap hai। isi reeti se jo ananya bachche hain un ek ek bachche dvaara baap ke gun pratyaksha hone chaahiye aur honge। kaise honge? uska mukhya prayatna kya hai? mukhya baat yahi hai jo saakaar roop se bhi sunaaya hai ki yaad ki yaatra, avyakt sthiti mein sthit hokar har karma karna hai। ab to bachchon ko bahut saamna karna hai। lekin samartha saath hai isliye koi mushkil nahin hai। sirf ek baat sabhi ko dhyaan mein rakhni hai ki saamna karne ke liye beech mein rookaavat bhi aayegi। saamna karne mein rookaavat kaun si aayegi? maaloom hai? (deh abhimaan) deh abhimaan to ek mool baat hai lekin saamna karne ke liye beech mein kaamna vighna daalegi। kaun si kaamna?mera naam ho,main aisa hoon,mere se raay kyon nahin li,mera moolya kyon nahin rakha? yeh anek prakaar ki kaamnaayen saamna karne mein vighna roop mein aayegi। yeh yaad rakhna hai hamko koi kaamna nahin karni hai। saamna karna hai। agar koi kaamna ki to saamna nahin kar sakenge, aur avyakt sthiti mein mahaan banne ke liye ek baat jo kehte rehte hain - woh dhaaran kar li to bahut jaldi aur sahaj avyakt sthiti mein sthit ho jaayenge। woh kaun-si baat?ham abhi mehmaan hai। kyonki aap sabhi ko bhi via sookshm vatan hokar ghar chalna hai। ham mehmaan hain aisa samajhne se mahaan sthiti mein sthit ho jaayenge। mehmaan ke bajaae jara bhi ek shabd mein antar kar liya to giraavat bhi aa jaayegi। woh kaun sa shabd?mehmaan samajhna hai lekin mahima mein nahin aana hai। agar mahima mein aa gaye to mehmaan nahin banenge। mehmaan samjhenge to mahaan banenge। hai jara sa antar। mehmaan aur mahima। lekin jara sa antar bhi avastha ko bahut neeche oopar kar deta hai।

tum sabhi ko gyaan kaunsa dete ho? trimoorti ka। jaise trimoorti ka gyaan auron ko dete ho vaise apne paas bhi teen baaton ka gyaan rakhna hai। teen baaten chhodo aur teen baaten dhaaran karo। ab yeh teen baaten chhodenge tab hi swaroop mein sthit honge। service mein saphalta bhi hogi। bataao kaun si teen baaten chhodni hai? jo service mein vighna daalti hai, woh chhodni hai। ek to-kabhi bhi koi bahaana nahin dena। doosra kabhi bhi kisse service ke liye kahlaana nahin। teesra - service karte kabhi murjhaana nahin। bahaana,kahlaana aur murjhaana yeh teen baaten chhodni hai। aur phir kaunsi teen baaten dhaaran karni hain? tyaag,tapasva aur seva। yeh teen baaten dhaarna mein chaahiye। tapasva arthaat yaad ki yaatra aur service ke bina bhi jeevan nahin ban sakti। in donon baaton ki saphalta tyaag ke bina nahin ho sakti। isliye teen baaten chhodni hai aur teen baaten dhaaran karni hai। agar in teenon baaton ki dhaarna hui to kya ban jaayenge?jo aapka gaayan hai na vahi swaroop ban jaayenge। yahaan aabu mein bhi aapka gaayan hai kis roop mein aur kaun sa roop yaadgaar ka hai? tapasya ke saath-saath aur bhi koi mukhya roop ka yaadgaar hai? jinhonne delvaada mandir dhyaan se dekha hoga unhein yaad hoga। jaise tapasvi hain,to trinetri bhi hain। tapasva ke saath-saath yaad trimoorti ki hai। to jaisa yaadgaar hai trinetri ka, aisa banna hai। teesra netra kaun sa hai? gyaan ka। gyaan ka teesra netra hi yaadgaar ke roop mein dikhaaya hai। tapasvi aur trinetri। teesra netra kaayam hoga tab hi tapasvi ban sakenge। agar gyaan ka netra gaayab ho jaata hai to tapasya bhi nahin rah sakti। isliye ab trimoorti shabd ko bhi yaad karke dhaarna mein chalenge to woh ban jaayenge। jo shaktiyon ka gaayan hai,jo prabhaav hai woh dekhne mein aayega। abhi gupta hai। abhi tak shaktiyaan gupta kyon hain? kyonki abhi tak apne svamaan, apni service aur apni shreshthataayen apne se hi gupta hain। apne se hi gupta hone kaaran srishti se bhi gupta hain। jab apne mein pratyakshata aayegi tab srishti mein bhi pratyakshata hogi।

abhi shivraatri ka jo parva aa raha hai unko aur bhi dhoomdhaam se manaana hai। bade umang aur hullaas se parichay dena hai। kyonki baap ke parichay mein bachchon ka parichay bhi aa jaata he। bachche baap ka parichay denge to baap phir avyakt mein bachchon ka parichay, bachchon ka saakshaatkaar aatmaon ko karaate rahenge। to is shivraatri par kuchh naveenta karke dikhaana hai। kya naveenta karenge? ab tak jo bhaashan kiye hain woh yatha yog yathaashakti to karte rehte ho lekin ab khaas shakti roop se bhaashan karne hain। shakti roop ka bhaashan kya hota hai? lalkaar karna। kya lalkaar karenge?aur hi jor-shor se samay ki pahchaan do। aur unhon ko baar-baar sunaao ki yeh baap ka kartavya ab jaasti samay nahin hai। kuchh to haath se ganva diya lekin jo kuchh thoda samay raha hai, unko bhi ganva na do। aise force se samay ki pahchaan do। jaise aajkal science vaale aise-aise bombs bana rahe hain jo apne sthaan par baithe hue bhi jahaan bam lagaana hoga vahaan ka nishaana door baithe bhi kar sakte hain। to science ki shakti se to shreshtha silence hai। jaise woh science ke gole banaate hain - vaise ab shaktiyon ko silence ki shakti se gole phenkane hain। shuru-shuru mein shaktiyon ki lalkaar hi chalti thi। abhi shuru jaise lalkaar nahin hai। abhi vistaar mein pad gaye hain। vistaar mein padne se lalkaar ka roop gupta ho gaya hai। abhi phir se beejroop avastha mein sthit hokar lalkaar karo। us lalkaar se kaeeyon mein beej pad sakta hai। lekin beejroop sthiti mein sthiti rahenge to anek aatmaon mein samay ki pahchaan aur baap ki pahchaan ka beej padega। agar beejroop sthiti mein sthit na rahe sirf vistaar mein chale gaye to kya hoga?jyaada vistaar se bhi value nahin rahegi। vyartha ho jaayega। isliye beejroop sthiti mein sthit ho beejroop ki yaad mein sthit ho phir beej daalo। phir dekhna yeh beej ka phal kitna achha aur sahaj nikalta hai। abhi tak mehnat jaasti ki hai pratyakshaphal kam hai। abhi mehnat kam karo pratyakshaphal jyaada dikhaao। sneh to sabhi ka hai hi lekin sneh ka swaroop bhi kuchh dikhaana hai। yoon to sadaiv is sthiti mein rehna chaahiye lekin khaas shivraatri tak harek bachche ko aisa samajhna chaahiye jaise shuru mein aap bachchon ki bhatti ke programme chalte the, isi reeti se harek ko samajhna chaahiye shivraatri tak hamko yaad ki yaatra ki bhatti mein hi rehna hai। bilkul avyakt sthiti mein sthit rahne ka,apni checking karne ka dhyaan rakho। phir is avyakt sthiti ka kitna prabhaav nikalta hai। mushkil nahin hai। bahut sahaj hai। kaarobaar mein aate hue bhi bhatti chal sakti hai। yeh to aantarik sthiti hai। aantarik sthiti ka prabhaav jaasti padta hai।

sabhi amritvele mulaakaat karte ho? abhi tak aisa vaayumandal nahin pahuncha hai। ab tak madhuban vaalon ne bhi sneh ka saboot nahin diya hai। chaaron or se bahut kam bachche hain jinhonne sneh ka saboot diya hai। baap ka bachchon se kitna sneh tha। sneh ka saboot practical mein kitna samay diya। kya diya tha? yaad hai? khaas apni tabiyat ko bhi na dekhkar kya saboot diya tha? apni shaareerik sthiti ko na dekhte bhi kitna samay khaas search light dete the। kitna samay sneh ka saboot diya। aap kehte the shareer par effect aata hai lekin baba ne apne shareer ko dekha? yeh sneh ka saboot tha। ab bachchon ko bhi return mein sneh ka saboot dena hai। jo karma karke dikhaaya vahi karna hai। amritvele jaise saakaar roop mein karke dikhaaya vaise hi bachchon ko karna chaahiye। nahin to ab tak yahi result dekhi hai, is baat mein apne dil ko khush kar lete hain। uthe aur baithe। lekin woh roohaab, shakti swaroop ki smriti nahin rehti। shakti roop ke badle kya mix ho gaya hai? susti। to susti mix hone se mulaakaat karte hain lekin line clear nahin hoti hai isliye mulaakaat se jo anubhav hona chaahiye woh nahin kar paate hain। mix-char hai। yahaan shuru karenge to madhuban-vaasiyon ko dekh sab karenge। madhuban nivaasi jo khaas snehi hain unko khaas saikreephaaij (balidaan) karna hai। sneh mein hamesha sacrifice kiya jaata hai।

achha - om shanti।