Avyakt murli for Thursday 26 June 1969

Brahma KumarisBrahma Kumaris> 26-06-69om shanti avyakt baapdaada madhuban

“shiksha dene ka svarup – apne svarup se shiksha dena”

baap kisko dekh rahe hain?bachchon ko dekh rahe hain?aaj murli mein kya suna tha । aap sabhi kisko yaad karte ho? (baap, teacher, saduguru ko) to baapdaada bhi sirf bachchon ko nahin lekin teenon sambandhon se teenon roop se dekhte hain । bachche to sabhi hain lekin teacher roop mein kya dekhte hain?nambarvaar student ko dekhte hain । aur guru roop se kisko dekhte hain? maaloom hai nambarvaar follow karne vaalon ko । jinhonne follow kiya hai aur jinhon ko abhi karna hai, donon ko dekhte hain । mukhya follow kaun-sa hai? guru roop se jo shiksha dete hain । usmein mukhya follow kisko karna hai ?guru roop se mukhya follow kya hai? (yaad ki yaatra) yaad ki yaatra to ek saadhan hai । lekin woh bhi kis liye karaate hain? doosron ki sadgati karne pahle apne ko kya follow karna padega? yaad ki yaatra bhi kisliye sikhaai jaati hai । guru roop se mukhya follow yahi karna hai ashareeri, niraakaari,nyaara banna । yaad ki yaatra bhi isliye karte hain ki saakaar mein rehte niraakaar aur nyaare ashareeri ho rahen । jab ashareeri banenge tab to guru ke saath ja sakenge । mukhya roop se to yahi follow kar rahe ho aur karna hai । teacher roop ka part abhi chal raha hai ya poora ho chuka hai? revise course teacher kara rahe hain ya apne aap kar rahe ho? (unki madad hai) padhaai padhaate nahin hain lekin madad hai । revise course ke liye school se chhutti li jaati hai, ghar mein jisko homework kaha jaata hai । lekin teacher ka connection rehta hai । saath nahin rehta । sirf connection rehta hai । connection tab tak hai jab tak final paper ho । revise course ke liye teacher har vakta saath nahin rehta hai । to abhi teacher door se hi dekh-rekh kar rahe hain । kahaan bhi koi mushkilaat ho to poochh sakte ho । lekin jaise padhaai ke samay saath rehte the vaise ab saath nahin । abhi oopar se baith achhi reeti dekh rahe hain ki revise course mein kaun-kaun kitne shakti se,kitni mehnat se umang-utsaah se course ko poora kar rahe hain । oopar se baith drishya kitna achha dekhne ka rehta hai । jaise aap log yahaan oopar (sadli par) baith dekhte ho aur neeche baith dekhne mein pharka hota hai na । inse bhi oopar koi baith dekhe to kitna pharka hoga । buddhibal se mahsoos kar sakte ho । kya anubhav hota hai? aaj anubhav sunaate hain । anubhav sunne aur sunaane ki to parampara se reet hai to vatan mein rehte kya anubhav karte hain । vatan mein hote bhi teacher ka connection hone kaaran dekhte hain, koi-koi bahut alaukikpan se padhaai ko revise kar rahe hain, koi samay ganva rahe hain koi samay saphal kar rahe hain । jab dekhte hain samay ko ganva rahe hain to maaloom kya hota hai? taras to aata hai lekin taras ke saath-saath jo sambandh hai,woh sambandh bhi khaichta hai । phir dil hoti hai ki abhi-abhi baba se chhutti lekar saakaar roop mein unhon ka dhyaan khinchavaaye । lekin saakaar roop ka part to poora hi hua isliye door se hi sakaash dete hain ।

baba jaise saakaar roop mein laal jhandi dikhaate the na । vaise hi vatan mein bhi । lekin dekhne mein aata hai ki avyakti ras ko,avyakti madad ko bahut thode le paate hain । jo bhi raasta tay karte vighna aate hain un vighnon ko paar karne ke liye mukhya kaun si shakti chaahiye? (sahanshakti) sahanshakti se pahle kaun si shakti chaahiye? vighna daalne vaali kaun si cheej hai? (maaya) sunaaya tha ki vighnon ka saamna karne ke liye pahle chaahiye parakhne ki shakti । phir chaahiye nirnay karne ki shakti । jab nirnay karenge yeh maaya hai va aythaartha hai । phaayda hai va nuksaan?alpakaal ki praapti hai va sadaakaal ki praapti hai । jab nirnay karenge to nirnay ke baad hi sahanshakti ko dhaaran kar sakenge । pahle parakhna aur nirnay karna hai । jiski nirnayshakti tej hoti hai woh kab haar nahin kha sakta । haar se bachne ke liye apne nirnayshakti aur parakhne ki shakti ko badhaana hai । nirnayshakti badhaane ke liye purushaartha kaun sa karna hai?yaad ki yaatra to aap jhat kah dete ho - lekin yaad ki yaatra ko bhi bal dene vaala kaun sa gyaan arthaat samajh hai?woh bhi spashta buddhi mein hona chaahiye । total to rakha hai lekin total mein kahaan-kahaan phir tota(vighna) pad jaata hai । school mein kai bachche ek do ko dekh - total to nikaal dete hain lekin jab master poochhta total kaise kiya hai?to moonjh jaate hain । to aap total yaad ki yaatra kah dete ho lekin woh total kis tareeke se hoga woh bhi jaanna hai । to nirnayshakti ko badhaane liye mukhya kis baat ki aavashyakta hai (vichaar saagar manthan) vichaar saagar manthan karte-karte saagar mein hi doob jaayen to? kai aise baithte hain vichaar saagar manthan karne lekin koi-koi lahar aisi aati hai jo saath le jaati hai । jaise koi bhi sthool shaareerik taakat kam hoti hai to taakat ki khuraak di jaati hai । vaise hi nirnayshakti ko badhaane liye mukhya khuraak yahi hai jo pahle bhi sunaaya । ashareeri, niraakaari aur karma mein nyaare । niraakaari va ashareeri avastha to hui buddhi tak lekin karma se nyaara bhi rahe aur niraale bhi rahe jo har karma ko dekhkar ke log bhi samjhen ki yeh to niraala hai । yeh laukik nahin alaukik hai । to nirnayshakti ko badhaane ke liye yeh bahut aavashyak hai । jitna baaton ko dhaaran karenge utna hi apne vighnon ko bhi mita sakenge । aur jo srishti par aane vaale vighna hain, unhon se bach sakenge । shiksha to bahut milti hai lekin ab kya karna hai? shiksha swaroop banna hai । shiksha aur aapka svadharma alag nahin hona chaahiye । aapka swaroop hi shiksha hona chaahiye । swaroop se shiksha di jaati hai । kai baaton mein vaani se nahin shiksha di jaati hai । lekin apne swaroop se shiksha di jaati he । to ab shiksha swaroop bankar ke apne swaroop se shiksha deni hai । shiksha to bahut mili । course to poora hua na । ek prashn poochha tha ki ab jo baapdaada anya tan mein aate hai to jaise saakaar roop mein murli chalaate the vaise hi kyon nahin chalaate? kya vaise hi murli nahin chala sakte hain? kyon bhaasha badli, kyon tareeka badla aise prashn bahuton ko uthta hai । jabki tum bhaashan kar sakte ho to baapdaada ka koi bhi tan dvaara murli chalaana mushkil hai?lekin kyon nahin chalaate hain? (do chaar ne apne vichaar sunaaye) jis tan dvaara padhaane ka part tha woh padhaai ka course to poora hua, ab phir padhaai-padhaane liye nahin aate । woh course tha usi tan dvaara part poora ho chuka hai । abhi to aate hain milne ke liye,bahlaane ke liye । aur mukhya baaten kaun si hain?jaise ashareeri, karmaateet ban kar ke kya kiya? ek second mein panchhi ban ud gaya । saakaar shareer se ek second mein ude na । to ab padhaai poori hui । baaki ek kaarya raha hua hai । saath le jaane ka । isliye ab sirf milne, avyakt shikshaaon se bahlaane aur udaane liye aate hain । padhaai ke points padhaai ka roop ab nahin chal sakta hai । abhi course revise ho raha hai । lekin kitne samay mein revise karenge? kitne tak course poora hua hai? abhi yeh sabhi ko nirnay karna hai ki kahaan tak revise course hua hai । kitna samay ab chaahiye? saakaar tan ke har karma,har sthiti se apne ko bhent karna unko dekhte,yeh lakshya rakhte apne ko dekho phir pata padega ki kahaan tak hai । lakshya to bata diya ki kaise apne ko parakhna,phir uttar dena ।

doosra prashn yeh dete hain । homework to tumhaara chal hi raha hai । usmein vishesh dhyaan khinchavaate hain yeh jo part bhaavi pramaan hua hai us saakaar roop ko avyakt kyon banaaya?inke bhi kai guhya rahasya hain । iski gahraai mein jaana, saagar ke lahron mein nahaane nahin lag jaana । lekin saagar ke tale mein jaana । phir jo ratna mile woh le aana । yeh sochna inka guhya rahasya drama mein kya noondha hua hai । oopar koi guhya rahasya hai । bina rahasya ke to koi bhi chalan ho hi nahin sakti ।

achha-abhi time ho gaya hai ।