Avyakt murli for Friday 3 October 1969

>

03-10-69om shanti avyakt baapdaada madhuban

sampoorn - samarpan ki nishaaniyaan

kisko dekhte ho? kaun,kisko dekh rahe ho? (do teen ne apna-apna vichaar sunaaya) aaj baapdaada apne poorn parvaanon ko dekh rahe hain। kyonki kahaan tak parvaane bane hain vo dekhne aaye hain। vaise to parvaane shama ke paas jaate hain lakin yahaan to shama bhi parvaanon se milti hai। aapko maaloom hai jo sampoorn parvaane hote hain unke lakshan kya hain aur parakh kya hai? (har ek ne sunaaya) aap sabne sunaaya vo yathaartha hai। mukhya saar to yahi nikla ki jo parvaane honge vo ek to shama ke snehi honge,sameep honge aur sarva sambandh, us ek ke saath hi honge। to sarva sambandh,snehi,sameep aur saahas। jo sampoorn parvaane hote hain unmein yeh chaaron hi baaten dekhne mein aati hain। to aap sabko yahaan bhatti mein kislie bulaaya hai? jo yeh chaar baaten sunaai hain vo chaaron hi baaten apne sampoorn percentage mein dhaaran karni hain। ek percent bhi kam na hona chaahiye। kai bachche kehte ham hain to sahi lekin itne percent। to jinmen percent ki kami ho gai to unko sampoorn parvaana nahi kahenge। vo parvaana doosri quality ka kaha jaayega,jo ki chakra hi kaatne vaale hote hain। ek hote hain sheeghra ek hi baar shama par phida hone vaale,doosre hote hain - soch samajh kar kadam uthaane vaale। to jo soch samajh kar kadam uthaate rahenge unko kahenge pheri pahanne vaale। chakra kaatne vaale। to doosri quality vaale parvaane kai prakaar ke sankalpon, vighnon aur karmon mein hi chakra kaatte rehte hain। to aaj paandav sena ko bhatti mein bulaaya hai। kahin par bhi koi phaiktari hoti hai to jo badhiya phaiktari hoti hai uski chhaap lagti hai। agar us phaiktari ki chhaap nahin hoti hai to vo cheej itni nahin chalti hai। is reeti aap bhi jo bhatti mein aaye ho to yahaan bhi chhaap lagaane ke liye aaye ho। tred mark hota hai na। aap phir kaunsi chhaap lagvaane liye aaye ho?sampoorn surrender ya sampoorn samarpan ka chhaap agar nahin laga to maaloom hai ki kya hoga?jaise chhaapa na lagi cheej ki value kam hoti jaati hai। usi reeti se aap aatmaon ki bhi svarga mein value kam ho jaayegi। to apni raajdhaani mein sameep aane liye yeh chhaapa lagaana hi padega। maataaon ko to nashtomoha ka mantra mila। aur paandav sena ko sampoorn samarpan ka। paandavon ka hi gaayan hai ki gal kar khatma ho gae। pahaadon par nahin lekin oonchi sthiti mein gal kar apne ko nichaai se bilkul oopar jo avyakt sthiti hai, usmein gal gaye। arthaat us avyakt sthiti mein sampoornata ko praapta hue। yeh paandavon ka yaadgaar bhi hai। us yaadgaar ki yaad dilaane aur practical mein laane liye bhatti mili hai।

sampoorn samarpan kisko kaha jaata hai? jo sampoorn samarpan arthaat tan-man-dhan aur sambandh, samay sabmen arpan। agar man ko samarpan kar diya to man ko bina shreemat ke use nahin kar sakte। ab bataao dhan ko shreemat se use karna to sahaj hai tan ko bhi use karna sahaj hai। lekin man sivaay shreemat ke ek bhi sankalp utpanna nahin kare - is sthiti ko kaha jaata hai samparna। isliye hi manamnaabhav ka mukhya mantra hai। agar man sampoorn samarpan hai to tan-man-dhan- samay sambandh sheeghra hi us taraph lag jaate hain। to mukhya baat hi hai man ko samarpan karna arthaat vyartha sankalp, vikalpon ko samarpan karna। vo hi parakh hai sampoorn parvaane ki। sampoorn samarpan vaalon ko man mein sivaay unke (baapdaada ke) gun, kartavya aur sambandh ke kuchh aur soojhta hi nahin। ab bataao ki aisa chhaapa lagaaya hua hai? jaise aajkal ke jamaane mein aap log sab daphtaron mein kaam karte ho to kabhi-kabhi daphtar ki jo cheejen hoti hain, vo apne kaam mein laga dete ho। isi reeti jo aapne samarpan kar diya to woh aapki cheej nahin rahi। jisko diya unki hui,to unki cheej ko aap apne kaarya mein use nahin kar sakte ho। lekin sanskaar hone ke kaaran kabhi-kabhi shreemat ke saath manmat, deh abhimaanapne ki mat, shoodrapne ki mat kahin use kar lete ho। isliye hi karmaateet avastha va avyakt sthiti sada ekras nahin rehti hai। kyonki man bhinna-bhinna ras mein hai to sthiti mein bhinna-bhinna hai। ek hi ras mein rahe to ek hi sthiti rahe। baapdaada bachchon ko halka banaate hain aur bachche jaanboojhkar apne par bojh le lete hain। kyonki ६३ janmon se vikarmon ka bojh, lok maryaada ka bojh uthaane ke aadi ban gaye hain। isliye bojh utaar kar bhi phir rakh lete hain। jinki jo aadat hoti hai vo aadat se majboor ho jaate hain na। isliye apni aadten hone kaaran apni jimmedaari phir apne par hi rakh dete hain। ek-ek paandav agar sampoorn samarpan bankar hi nikle to bataao kya hoga? jab paandav taiyaar ho jaavegi to kaurav aur yaadav maidaan mein aa jaayenge aur phir kya hoga?aapka raajya aapko praapta ho jaayega। jab tak yeh vaayda nahin kiya ki jo sochenge,bolenge, jo sunenge,jo karenge so shreemat ke bina kuchh nahin karenge। tab tak is bhatti se laabh nahin le sakte hain। aisa hi umang-utsaah lekar aaye ho na। kuchh bankar hi niklenge,badalkar hi niklenge। yeh sochkar aaye ho na? ghabraahat to nahin hoti hai? jitna-jitna gahraai mein jaayenge utna hi ghabraahat gaayab ho jaayegi। jab tak kisi bhi baat ki gahraai mein nahin jaate hain to ghabraahat aati hai। jaise saagar ke oopar-oopar ki lahron mein ghabraahat hoti hai lekin saagar ke tale mein,gahraai mein kya hota hai?bilkul shant aur shant ke saath praapti bhi hoti hai। isliye jo bhi koi ghabraahat ki baat aaye to gahraai mein chale jaana to ghabraahat gaayab ho jaayegi। ab lakshya aur lakshan kaun se dhaaran karne hain?ismen jo number one honge unka kya karenge?bhavishya mein to raajdhaani lenge hi lekin yahaan bhi saugaat milegi। isliye har ek yahi prayatna kare ki ham to number one mein aayenge, do number vaale ko nahin milega। jo win karenge vo one number paayenge। win karne ki koshish karo to one jaayenge।

achha-aapko bindi lagaani hai va bindi roop hi ho? teeke kitne prakaar ke hote hain? aaj aapko double teeka lagaate hain। sangam par nirogi banne ka aur bhavishya mein raaj-bhaag ka। bindi roop ki smriti rakhne ke liye bindi lagaate ho। bindi lagaate-lagaate bindi ban jaayenge। koi bhi vyartha sankalp aaye to unko bindi laga do to bindi ban jaayenge।