Avyakt murli for Wednesday 8 October 1975 - 1

>

08-10-75 om shanti avyakt baapdaadaamdhuban

master gyaan-swaroop banne ki prerna

vishwa roopi behad drama mein mukhya athva vishesh paartadhaari banaane vaale tatha agyaanaandhakaar mitaane vaale gyaan-soorya shiv baba bole -

svayan ko baapdaada ka shrringaar, brahman kul ka shrringaar, vishwa ka shrringaar,apne ghar ka shrringaar samajhte ho? bachchon ko baap ke sir ka taaj, gale ka haar maana jaata hai। isliye baapdaada ke shrringaar ho? apne ghar paramdham va shantidham mein bhi sarva chamakte hue sitaaron ke samaan aatmaon ke beech vishesh chamakte hue ghar ke shrringaar,saakaar srishti arthaat vishwa ke andar vishwa drama ke andar hero paartadhaari,vishesh part bajaane vaali vishesh aatmaayen ho,arthaat vishwa ke shrringaar ho। aise apne ko shreshtha shrringaar samajhte hue chalte ho? aaj baapdaada apne shrringaar ko dekh rahe the,kya dekha?sabhi ko chamakti hui maniyon ke roop mein dekha। roop sabka chamakti hui maniyon ka tha, lekin nambarvaar zaroor hote hi hain। aaj teen roop ke shrringaar mein maniyon ko dekha।

pahla shrringaar sir ke taaj mein mastak beech chamakti hui maniyon ko dekha। roop sabka chamakti hui maniyon ka tha। ab in teenon prakaar ki maniyon mein apni-apni visheshta dekhi। pahle number ki maniyaan arthaat taaj mein chamakti hui maniyon ki visheshta yeh thi-yeh sab maniyaan baap samaan, master gyaan-soorya samaan chamak rahi theen। jaise soorya ki kirnen vishwa ko prakaashmay banaati hain, chaaron kone ke andhakaar ko door karti hain aise master gyaan-soorya swaroop maniyaan har-ek apne sarva shaktiyon roopi kirnen chaaron or phailaane vaali dekheen। har-ek ki har shakti roopi kirnen behad vishwa tak pahunch rahi theen - had tak nahin,ek tak nahin,alpa aatmaon tak nahin, lekin vishwa tak। saathsaath baap samaan sarva gunon ke master-saagar। iski nishaani har mani ke andar sarva rang samaae hue the। ek mein sarva rangon ki jhalak thi। aise master gunon ke saagar, apne sarva rangon ki rangat se chamakte hue taaj ki shreshtha shobha theen। taaj ke andar mastak beech latakti hui woh maniyaan baapdaada ke vishesh shrringaar roop mein dikhaai deen।

in vishesh maniyon ka mastak ke beech latakte hue ka bhi rahasya hai। yeh vishesh maniyaan sada saakaar roop mein mastak beech chamakti hui mani arthaat aatma swaroop mein sada sthit rehti hain। saakaar srishti mein rehte hue buddhi sada baap ki yaad, ghar ki yaad, raajdhaani ki yaad aur eeshvareey seva ki yaad mein latki hui rehti hain। isliye inhon ka sthaan bhi uchcha sthiti ki nishaani mastak beech latakte hue dikhaai di aur aisi aatmaayen sada oonchi smriti, oonchi vritti, oonchi drishti aur oonchi pravritti mein rehti hain। isliye inhen ooncha sthaan arthaat sir ka taaj praapta hua hai। sabse ooncha shrringaar taaj hota hai। taaj oonchaai ka bhi symbol hai, saath-saath maalikpan ka bhi symbol hai aur sarva praaptiyon ka bhi symbol hai,adhikaareepan ka bhi symbol hai। aise mastak maniyon va taaj-nasheen maniyon ki visheshta suni?aisi vishesh maniyaan bahut thodi dikhaai di। yeh thi first number ki maniyaan va first number ka shrringaar।

ab doosre number ka shrringaar baapdaada ke gale ka haar unhon ki visheshta kya thi aur aadhaar kya tha? woh sab maniyaan bhi apni chamak chaaron or phaila rahi theen। lekin pharka kya tha? pahle number ki maniyon ki shakti ki kirnen chaaron or samaan phaili hui theen। lekin gale ke haar ki maniyon ki kirnen sarva samaan nahin theen। koi chhoti,koi badi theen। koi kirnen behad tak, koi had tak theen arthaat baap ke sameep theen। lekin baap samaan nahin theen। sarva gunon ke rang samaaye hue the - lekin sarva rang spashta nahin the। baapdaada ke oopar sneh aur sahayog ke aadhaar par balihaar the, isliye gale ke haar the। aisi aatmaon ka aadhaar sada kantha dvaara arthaat mukh dvaara, gale ki aavaaj dvaara baap ki mahima, baap ka parichay dekar baap ko sameep laana - arthaat vaacha ke subject mein full paas the parantu mansa ki subject mein full paas nahin lekin vaacha ki subject mein full paas। sada smriti swaroop nahin lekin sada smriti dilaane swaroop। is aadhaar se baap ke sameep, baap ke gale ka haar bante hain। yeh sankhya jyaada thi। maala mein to jyaada hote hain na? to gale ki maala ki maniyaan, taaj ki maniyon se bahut jyaada theen।

teesra shrringaar tha baanhon ka kangan। unhon ki visheshta aur aadhaar kya tha? baanhai sada sahayog ki va madadgaar banne ki nishaani gaayi jaati hain। baanhon ka haar athva kangan baat ek hi hai। kangan ko baanhon ka haar kahenge na?inhon ki visheshta kya dekhi? kirnon va chamak behad mein nahin, lekin had mein theen। sarva gunon ke rang nahin, lekin koi- koi gun roopi rang chamakta hua dikhaai de raha tha। inhon ki visheshta har seva ke kaarya mein sada sahayogi, karmana ki subject mein full paas। seva-arth tan-man-dhan se sada ever ready । baap ke sneh roopi baanhon mein sada samaaye hue aur baapdaada ka haath sada apne oopar anubhav karne vaale the। sada saath rahne vaale nahin lekin apne oopar haath anubhav karne vaale - yeh sankhya bhi jyaada thi। yeh thi sahayogi aatmaayen,woh samaan aatmaayen aur woh sameep aatmaayen। samjha teen prakaar ka shrringaar। to aaj teen roop ke shrringaar roop mein sarva bachchon ko dekha। ab apne aapko dekho ki main kaun hoon? yeh tha aaj ka samaachaar। sookshm vatan ka samaachaar sunne ki roochi hoti hai na? achha।

aise nambarvaar sarva shrringaar ki maniyon ko, baapdaada ke sada smriti mein rahne vaali samartha aatmaon ko aur sada sarva ke shubh-chintak bachchon ko baapdaada ka yaad-pyaar aur namaste।

is murli ka saaraansh

1. pahla shrringaar sir ke taaj mein mastak beech chamakti hui maniyaan,ve vishesh aatmaayen hain jo baap samaan master gyaan-soorya samaan chamakti hain। unki sarva shaktiyaan roopi kirnen apne andar sarva gun roopi rangon ko samaaye hue chaaron or behad vishwa tak pahunchti hain। aisi aatmaayen sada aatmik swaroop mein sthit hote hue oonchi smriti, oonchi vritti, oonchi drishti aur oonchi pravritti mein rehti hain।

2. doosre number ka shrringaar baapdaada ke gale ke haar ki maniyaan, ve sameep aatmaayen hain jinki chamak chaaron or phailti to hain,parantu unki shakti roopi kirnen samaan nahin hain,sarva gunon ka rang spashta nahin hai। vaacha ke subject mein full paas,parantu mansa ki subject mein full paas nahin hain।