Avyakt murli for Thursday 7 December 1978

>

07-12-78om shanti avyakt baapdaadaamdhuban

baap samaan sampoorn banne ke chinha

sada sarva par upkaar karne vaale baap-daada bachchon ke prati bole :-

sada apne smriti ki samarthi se apne teenon sthaan aur teenon sthiti, niraakaari,aakaari aur saakaari teenon sthiti mein sahaj hi sthit ho sakte ho?jaise aadi sthiti saakaar swaroop mein sahaj hi sthit rehte ho aise anaadi niraakaari sthiti itni hi sahaj anubhav hoti hai? abhi-abhi anaadi, abhi- abhi aadi smriti ki samarthi dvaara donon sthiti mein samaanta anubhav ho - aise anubhav karte ho? jaise saakaar swaroop apna anubhav hota hai, sthit hona natural anubhav karte ho - aise apne anaadi niraakaari swaroop mein,jo sada ek avinaashi hai us sada ek avinaashi swaroop mein sthit hona bhi natural ho। sankalp kiya aur sthit hua - isi ko kaha jaata hai baap samaan sampoorn avastha,karmaateet antim stage। to apne aap se poochho - antim stage ke kitna sameep pahunche ho ? jitna sampoorn avastha ke nazdeek honge arthaat baap ke nazdeek honge usi anusaar bhavishya praalabdha mein bhi raaj adhikaari honge। saathsaath aadi bhakta jeevan mein bhi sameep sambandh mein honge। poojya athva pujaari donon jeevan mein saakaar baap ke sameep honge arthaat aadi aatma ke saare kalpa mein sambandh va samparka mein rahenge। hero paartadhaari aatma ke saath-saath aap aatmaon ka bhi bhinna naam roop se vishesh part hoga। ab ke sampoorn sthiti ke nazdeek se arthaat baap-daada ki sameepta ke aadhaar se saare kalpa ki sameepta ka aadhaar hai isliye jitna chaaho utna apni kalpa ki praalabdha banaao। sameepta ka aadhaar shreshthata hai। shreshthata ka aadhaar apne marjeeva jeevan mein vishesh do baaton ki chaiking karo- ek sada par upkaari rahe hain। doosra aadi se ab tak sada baal brahmachaari rahe hain। marjeeva jeevan ke aadikaal se arthaat baalkaal se ab tak sada brahmachaari rahe hain! brahmachaari jeevan arthaat brahma samaan pavitra jeevan। jisko brahmachaari kaho ya brahmaachaari kaho - aadi se ant tak akhanda rahe hain। agar baar-baar khandit rahe hain, to baal brahmachaari va sada brahmaachaari nahin kahla sakte। kisi bhi prakaar ki pavitrata arthaat svachchhata khandan hui hai to param poojyaneey nahin ban sakte hain। baap samaan na hone kaaran sameep sambandh mein nahin aa sakte। isliye shreshthata ka aadhaar, sameepta ka aadhaar baal brahmachaari arthaat sada brahmaachaari,jisko hi follow father bhi kehte hain। to apne ko chaik karo - akhanda hain! akhanda rahne vaale ko sarva praaptiyaan bhi akhanda anubhav hoti hain। khandit purushaarthi ko praaptiyaan bhi alpakaal anubhav hoti hain। apna register chaik karo sada saaph raha hai ? kisi bhi prakaar ke daag se register ko kharaab to nahin kiya। sada brahmachaari arthaat sankalp mein bhi kisi prakaar ki apvitrata vritti ko chanchal nahin banaaye। pahli haar vritti ki chanchalta, phir drishti aur kriti ki chanchalta hoti hai। vritti ki chanchalta register ko daagi bana deti hai - isliye vritti se bhi sada brahmachaari।

aaj baap-daada bachchon ke is register ko dekh rahe the ki kitne bachche sada brahmachaari hain aur kitne brahmachaari hain। baal brahmachaari ka mahattva hota hai, baal brahmachaari vartamaan samay bhi poojya hai arthaat shreshtha hain। baap-daada bhi aise bachchon ko poojya bachchon ke roop mein dekhte hain। vishwa ke aage bhi abhi ant mein poojya ke roop mein pratyaksha honge। baap ke aage poojya prasiddha hone vaale sada sameep sambandh mein rehte hain। aise apna register dekhna। doosri baat - paraupkaari iska bhi vistaar bahut guhya hai। iska vistaar svayan sochna। vishwa ke prati aur brahman parivaar ke prati donon sambandh mein sada upkaari bane hain va kab svaupkaari va kab paraupkaari। vaastav mein paraupkaar svaupkaar hai। isi reeti se is baat mein bhi apna register chaik karna phir baap-daada bhi sunaayenge। samjha। achha ।

sada apne anaadi aur aadi swaroop mein sahaj sthit hone vaale, sada svachchha aur spashta rahne vaale poojya aatmaayen, saare kalpa mein sameep sambandh mein aane vaali aatmaayen, sada brahmachaari bachchon ko baap-daada ka yaad pyaar aur namaste। omshaanti।

teachers se mulaakaat

teachers ko vishesh lift hai kyonki teachers ka kaam hi hai sarva aatmaon ko maarga darshan karaana। to din raat ek hi lagan mein rahne vaale, ek ki hi yaad aur ek hi kaarya - isse ek ras sthiti sahaj hi ban jaati hai। ek ki lagan mein rahne se sahaj manzil ka anubhav hota hai। ek hi ek hai to sahaj maarga ho gaya na। second mein switch on kiya aur manzil par pahunche। socha aur swaroop hua yeh hai lift। teachers ko apne bhaagya ko dekh sada baap ke gun gaane chaahiye। vaah baba aur vaah drama yahi geet sada chalta rahe। isi khushi mein chaahe tan ka bandhan ho chaahe man ka ho lekin kuchh nahin lagega। sada busy rahne se kisi bhi prakaar se maaya ka vaar,vaar nahin kar sakta। maaya ki haar hogi vaar nahin ho sakta।

1. sameep aatmaon ke liye purooshaartha bhi ek manoranjan ka saadhan -

brahma baap ki jo pahli visheshta hai nashtomoha jiske aadhaar par hi sada smriti swaroop bane, to aise follow father karte ho ? isi visheshta se sameep aatma ban jaayenge। svayan se va sarva se nashtomoha - isliye sameep aatmaon ko sahaj hi sarva praaptiyaan hoti hain। purooshaartha bhi ek khel anubhav hota hai, mushkil nahin। purooshaartha karna bhi ek manoranjan hai। vaise koi hisaab karo aur manoranjan reeti se hisaab karo to pharka pad jaata hai na - to sameep aatma ko purooshaartha manoranjan anubhav hota। sameep aatma ki mukhya nishaani - aadi se ant tak mushkil ka anubhav na ho।

2. saphalta ka aadhaar saakshi aur saatheepan ka anubhav – sada apne ko baap ke saathi samajhkar chalte ho। agar saatheepan ka anubhav hoga to saaksheepan ka anubhav hoga। kyonki baap ka saath hone ke kaaran jaise baap saakshi ho part bajaate hain vaise aap bhi saathi hone ke kaaran saakshi ho part bajaayenge। to donon hi anubhav,anubhav karte ho, akele nahin lekin sada sarvashaktivaan ka saath hai। jahaan saath vahaan saphalta to svatah hi hui padi hai। vaise bhi bhakti maarga mein yahi pukaar dete hain - ki thode samay ke saath ka anubhav kara do,jhalak dikha do lekin ab kya hua ? sarva sambandh se saathi ho gaye। jhalak va darshan alpakaal ke liye hota hai lekin sambandh sadaakaal ka hota hai, to ab baap ke sameep sambandh mein aa gaye ki abhi tak bhi jigyaasu ho। jigyaasa tab tak hoti jab tak praapti nahin। ab jigyaasu nahin adhikaari ho, har second ka saath hai, har second mein sambandh ke kaaran sameep hain। jeevan mein saathi ki talaash karte hain aur saathi ke aadhaar par hi apna jeevan bitaate hain, ab kaun sa saathi banaaya hai ? avinaashi saathi। aur koi bhi saathi samay par va sada nahin pahunch sakta lekin baap-daada sada aur second mein pahunch sakte। yeh janma-janma ka saath hai, bhavishya mein bhi baap ka to saath rahega na। shiv baap saakshi ho jaayenge aur brahma baap saathi ho jaayenge। abhi donon saathi hain। aise anubhav karne vaale sada khush rehte hain, jo paana tha woh pa liya to khushi hogi na - pa liya hai baaki hai baap samaan svayan ko banaana, ismen nambarvaar hain।

shakti sena ko baap-daada vishesh chadhti kala ka sahayog dete hain? kyonki shaktiyon ko,maataaon ko sabne neeche giraaya ab baap aakar ke ooncha chadhaate hain। apne se bhi aage shaktiyon ko rakhte hain to shaktiyon ko vishesh khushi honi chaahiye - shakti ka chehra sada chamakta hua dikhaai de, kyonki baap ne vishesh aage rakha hai। vaise bhi koi alpakaal ki praapti hoti hai to woh chamak chehre par dikhaai deti hai, yeh kitni praapti hai ! maataayen kabhi roti to nahin hain, kabhi aankhon mein aansu bharte hain? ab naynon mein roohaaniyat aa gai jahaan roohaaniyat hogi vahaan par aansu nahin honge। paandav aankhon se rote hain ya man se? jab sukh ke saagar mein samaane vaale ho to rona kahaan se aaya। rona arthaat duhkh ki nishaani, sukh ke saagar mein samaaye hue ro kaise sakte ?kabhi bhi duhkh ki lahar svapna mein bhi na aaye। svapna bhi sukh swaroop ho kyonki sukh ka saagar apne sameep sambandh mein aa gaye, to sada sukh mein,khushi mein raho kabhi rona nahin। satayug mein aapki praja royegi kya? to hovanhaar raaja kyon rote। shaktiyaan to ek sample hain agar sample rone vaala hoga to aur sauda kaise karenge - isliye kabhi nahin rona, na aankhon se rona na man se - samjha।

achha - omshaanti