Avyakt murli for Thursday 8 October 1981

>

08-10-81om shanti avyakt baapdaada madhuban

"brahma baap ki ek shubh aasha"

vijayi ratna brahman kul-bhooshan bachchon ke prati baapdaada bole-

''aaj baapdaada vijayi ratnon ko dekh rahe hain। aaj bhakta log vijay-dashmi mana rahe hain। bhakton ka hai jalaana aur tum bachchon ka hai milan manaana। jalaane ke baad milan manaana hota hai। bhakti maarga mein bhi raavan ko jalaane ke baad arthaat vijay praapta karne ke baad kaun sa milan dikhaate hain?bhakti ke baaton ko to achhi tarah se jaante ho। raavan samaapta hone ke baad kaun si stage ho jaati hai? uski nishaani kya hai? ‘‘bharat milaap''। yeh hai brotherhood ki sthiti। bhaai-bhaai ki drishti ki nishaani hai - seva aur sneh। sneh ki nishaani deepmaala dikhaai hai। seva ki saphalta ka aadhaar brotherhood dikhaaya hai। iske bina deepmaala nahin mana sakte। deepmaala ke sivaae raaj-tilak nahin kar sakte। to aaj ka yaadgaar vijay dashmi manaai hai। iska aadhaar pahle ashtami manaate hain। bina ashtami ke vijay nahin। to kahaan tak pahunche ho? ashtami manaai hai? sabhi nau durga ban gaye hain? ashta shakti aur ek shaktivaan। sarva shaktivaan baap ke saath ashta shakti swaroop,aise nau durga bane hain? durga arthaat durgun samaapta kar sarvagun sampanna। tab hi dashahra mana sakte ho। to baapdaada dekhne aaye hain ki bachchon ne dashahra manaaya hai? har ek apne aapko achhi tarah se jaante ho aur maante bhi ho ki dashahra manaaya hai ya ashtami manaai hai! avinaashi teeli lagaai hai ya alpa samay ki teeli lagaai hai?raavan ko jalaaya hai ya raavan ke sarva vansh ko jalaaya hai? raavan ko samaapta kiya hai va raavanraajya ko samaapta kiya hai?

aaj vatan mein brahma baap ki rooh-rihaan chal rahi thi- kis samay? (class ke samay) baapdaada bhi bachchon ki rooh-rihaan sunte hain। sabhi majority bachchon ko jab yeh prashn poochha jaata hai ki dashahra manaaya hai, to na ‘na' mein haath uthaate na ‘haan' mein haath uthaate hain। agar likhte bhi hain to javaab dene mein bhi bade chatur hain। jhooth bhi nahin bolte,lekin spashta bhi nahin likhte। teen-chaar javaab sabko aaten hain aur unheen javaab mein koi na koi javaab dete hain। to brahma baap ki rooh-rihaan chal raheen thi। brahma baap to ghar ke get ka udghaatan karne ke liye bachchon ko aahvaan kar rahe hain। lekin sabke aaj ke prashn ke uttar kaagaj par nahin, man ke sankalp dvaara to baap ke aage spashta hi hain। class ke samay bachchi (daadi) prashn poochh raheen thi aur baapdaada sabke uttar dekh rahe the। uttar ka saar to suna hi diya। sunaane ki bhi aavashyakta nahin hai, aap jyaada jaante ho। uttar dekhte hue brahma baap ne kya kiya?badi achhi baat ki। brahma baap ke visheshta sampanna sanskaar ko jaante ho? visheshta ke sanskaar ka hi part bajaaya, ab woh kya hoga?us baat ka sambandh brahma baap ke aadikaal ki praveshta ke jeevan se sambandhit hai। jab result dekhi to ek second ke liye brahma baap bade soch mein pad gaye aur bole- aaj ek baat jamaari poorn karni padegi, kaun si? brahma baap ne bola, ‘‘aaj humein chaabi de do।''kaun-si? sabke buddhiyon ko parivarttan karne ki, sampanna banaane ki। jaise aadi mein bhi chaabi ka nasha tha, khazaana hai, chaabi hai bas kholna hai। aise brahma baap ne bhi aaj sampanna banaane ki chaabi ki baap se maangani ki। us samay ke drishya ko saakaar mein anubhav karne vaale jaan sakte hain ki brahma aur baap ki kaisi rooh-roohaan chalti thi। ab brahma ko chaabi de sakte hain? aur brahma ko baap na kar sakte hain? bachche bhi na to ‘na'karte hain na‘haan' karte hain।

lekin itna avashya hai ki brahma baap ko bachchon ko sada sampanna dekhne ki bahut-bahut ichchha hai। banne hain, yeh nahin ab ban jaaen। jab bhi bachchon ki baaten chalti hain to brahma ki soorat deepmaala ke samaan ban jaati, aisa teevra umang aur master saagar ke samaan oonchi lahar paida hoti jo usi umang ki oonchi lahar mein sabko sampanna banaae deepmaala jaga den। brahma ko ek bol janma se hi nahin achha lagta woh kaun sa? apne kaarya mein bhi woh achha nahin lagta, woh kaun sa? apne kaarya mein bhi woh achha nahin laga, na bachchon ke। ‘‘kab kar lenge'' - yeh shabd achha nahin laga। har baat mein ab kiya aur karaaya। seva ke plan mein dekho, sva ke parivarttan mein dekho, abhi-abhi jaao, abhi-abhi karo, train ka time thoda hai to bhi jaao,train let ho jaayegi। to kya sanskaar raha?abhi-abhi,kab nahin lekin ab। to jaise vishesh bhaasha ‘‘abhi-abhi''ki suni aise hi aaj bhi vatan mein, abhi-abhi hona chaahiye,yahi bhaasha chal rahi thi। ek aur hansi ki baat sunaate hain,woh kya hogi? brahma baap svayan sampanna hone ke kaaran yeh dekh nahin sakte ki bachche ‘‘kab-kab''kyon karte hain? isliye baar-baar baap ko kehte - yeh kyon nahin badalte, yeh aise kyon karte hain? ab tak yeh kyon kehte hain? aashcharya lagta hai। drama ki baat alag rahi, yeh ramneek hansi ki baat hai। aise nahin drama ko nahin jaante hain lekin dekh-dekh kar sneh ke kaaran baap se hansate hain। baap se hansi karna to chhutti hai na! baap bhi muskuraate hain। to ab brahma baap kya chaahte hain, yeh to jaan liya na?ab mukta ban,muktidhaam ke get ko kholne ke liye baap ke saathi bano - yeh hai brahma baap ki bachchon ke prati shubh aasha। pahle yeh deevaali manaao,baap ke shubh aasha ka deepak jagaao। isi ek deepak se deepmaala svatah hi jag jaayegi। samjha? achha-

phir bharat milaap ka rahasya sunaayenge। achha- aise baapdaada ke shreshtha sankalp ko saakaar mein laane vaale, avinaashi dridh sankalp ki teeli lagaae avinaashi vijayi banne vaale, saakaar baap ke samaan sada ‘‘ab'' ki bhaasha karma mein laane vaale, kabhi ko samaapta kar sabhi ko saakaar baap ki moortta,soorat mein dikhaane vaale, aise vijayi ratnon ko baapdaada ka yaadapyaar aur namaste।

kumaariyon se :- ‘‘kumaariyaan to hain hi udta panchhi। kyonki kumaariyaan arthaat sada halki। kumaari arthaat koi bojh nahin। halki cheez oopar jaayegi na! sada oopar jaane vaale maana oonchi stage par jaane vaali। to aisi ho? kahaan tak pahunchi ho?jo baap ki shreemat hai usi pramaan,usi lakeer ke andar sada rahne vaale sada oopar udte rehte hain। to lakeer ke andar rahne vaali kaun hui?sachchi seeta। to sabhi sachchi seetaaen ho na? pakka?lakeer ke baahar paanv nikaala to raavan aa jaayega। raavan intajaar mein rehta hai-ki kahaan koi paanv nikaale aur main bhagaaoon! to kumaari arthaat sachchi seeta। yahaan se baahar jaakar badal na jaana। kyonki madhuban mein vaayumandal ke vardaan ka prabhaav rehta,yahaan extra lift hoti hai,vahaan mehnat se chalna padega। kumaariyon ko dekhkar baapdaada ko hajaar guna khushi hoti hai kyonki kasaaeeyon se bach gai। to khushi hogi na! achha-abhi pakka vaada karke jaana।''

paandavon se :- ‘‘sabhi paandav shakti swaroop ho na?shakti aur paandav kambaaeenda ho?sarvashaktivaan ke aage shakti ban jaate aur part bajaane me paandav। sarvashaktivaan ko shakti ban kar yaad nahin karenge to maja nahin aayega। aatma seeta hai aur woh raam hai। to is part mein bhi bahut maja hai। yahi part sabse wonderful hai sangam ka, jo paandav shaktiyaan ban jaati aur shaktiyaan bhaai ban jaati। isse siddha hota hai ki dehbhaan bhool gaye। aatma mein donon hi sanskaar hain,kabhi mel ka kabhi phimel ka part to bajaaya hai na! sangam par maja hai, aashik ban maashuk ko yaad karna। shakti bankar sarvashaktivaan ko yaad karna। seeta bankar raam ko yaad karna।''

maataao se :- ‘‘shakti sena sada shastradhaari hai na? shakti ka shrangaar hi hai shastra। jo sada shastradhaari hai vahi sada mahaadaani,vardaani hain। sab shastra kaayam rehte hain?kabhi-kabhi nahin, sada। shaktiyon ki tapasya ne sarvashaktivaan ko laaya। abhi shaktiyon ko sarvashaktivaan ko pratyaksha karna hai। har kadam me vardaan dete jaao, shubh bhaavna se sabko vardaan dena hai।

sukh ke saagar ke bachche sada sukh-swaroop ho na? sada milan mele ki khushi mein jhulte rehte ho na! khaate,peete,chalte ashok arthaat sankalp maatra mein bhi shok va duhkh ki lahar na aaye। sada sukh-swaroop। duhkh ko talaak dene vaale। kyonki duhkh ki duniya me aadha kalpa rahe,ab to sukh ki baari hai। sukh ka saagar mila to duhkh kaahe ka? sada sukhi - yahi vardaan baap se sada ke liye mil gaya। achha''