Avyakt murli for Saturday 3 April 1982

>

03-04-82 om shanti avyakt baapdaada madhuban

“sarvapratham tyaag hai - deh-bhaan ka tyaag”

sada sahayogi, tyaagi bachchon prati baapdaada bole-

‘‘baapdaada apne tyaagmoorta bachchon ko dekh rahe hain। har ek brahman aatma tyaag swaroop hai, lekin jaise bhaagya ka sunaaya na ki ek baap ke bachche hote, ek jaisa bhaagya ka varsa milte,sambhaalne aur badhaane ke aadhaar par number ban jaate hain। aise tyaagmoorta to sabhi bane hain ismen bhi nambarvaar hain। tyaag kiya aur brahman bane। lekin tyaag ki paribhaasha badi guhya hai। kahne mein to sabhi ek baat kehte ki tan-man-dhan, sambandh sab ka tyaag kar liya। lekin tan ka tyaag arthaat deh ke bhaan ka tyaag। to deh ke bhaan ka tyaag ho gaya hai va ho raha hai? tyaag ka arth hai kisi bhi cheej ko va baat ko chhod diya, apnepan se kinaara kar liya, apna adhikaar samaapta hua। jiske prati tyaag kiya woh vastu uski ho gai। jis baat ka tyaag kiya uska phir sankalp bhi nahin kar sakte - kyonki tyaag ki hui baat, sankalp dvaara pratigya ki hui baat phir se vaapis nahin le sakte ho। jaise had ke sannyaasi apne ghar ka,sambandh ka tyaag karke jaate hain aur agar phir vaapis aa jaaen to usko kya kaha jaayega! niyam pramaan vaapis nahin aa sakte। aise aap brahman behad ke sannyaasi va tyaagi ho। aap tyaag moortiyon ne apne is puraane ghar arthaat puraane shareer,puraane deh ka bhaan tyaag kiya, sankalp kiya ki buddhi dvaara phir se kab is puraane ghar mein aakarshit nahin honge। sankalp dvaara bhi phir se vaapis nahin aayenge। pahla-pahla yeh tyaag kiya। isliye to kehte ho - deh sahit deh ke sambandh ka tyaag। deh ke bhaan ka tyaag। to tyaag kie hue puraane ghar mein phir se vaapis to nahin aate jaate ho! vaayda kya kiya hai? tan bhi tera kaha va sirf man tera kaha? pahla shabd ‘‘tan''aata hai। jaise tan-man-dhan kehte ho, deh aur deh ke sambandh kehte ho। to pahla tyaag kya hua? is puraane deh ke bhaan se vismriti arthaat kinaara। yeh pahla kadam hai tyaag ka। jaise ghar mein ghar ki saamagri (saamaan) hoti hai, aise is deh roopi ghar mein bhinna-bhinna karmendriyaan hi saamagri hain। to ghar ka tyaag arthaat sarva ka tyaag। ghar ko chhoda lekin koi ek cheej mein mamta rah gai to usko tyaag kahenge?aise koi bhi karmendriy agar apne taraph aakarshit karti hai to kya usko sampoorn tyaag kahenge?isi prakaar apni checking karo। aise albele nahin banna ki aur to sab chhod diya baaki koi ek karmendriy vichlit hoti hai woh bhi samay par theek ho jaayegi। lekin koi ek karmendriy ki aakarshan bhi ek baap ka banne nahin degi। ekras sthiti mein sthit hone nahin degi। number one mein jaane nahin degi। agar koi heerejvaahar,mahal-maadiya chhod de aur sirf koi mitti ke phoote hue bartan mein bhi moh rah jaae to kya hoga?jaise heera apni taraph aakarshit karta vaise heere se bhi jyaada woh phoota hua bartan usko apni taraph baar-baar aakarshit karega। na chaahte bhi buddhi baar-baar vahaan bhatakti rahegi। aise agar koi bhi karmendriy ki aakarshan rahi hui hai to shreshtha pad paane se baar-baar neeche le aayegi। to puraane ghar aur puraani saamagri sabka tyaag chaahiye। aise nahin samjho yeh to bahut thoda hai, lekin yeh thoda bhi bahut kuchh ganvaane vaala hai, sampoorn tyaag chaahiye। is puraani deh ko baapdaada dvaara mili hui ‘amaanat'samjho। seva arth kaarya mein lagaana hai। yeh meri deh nahin lekin seva arth amaanat hai। jaise mehmaan ban deh mein rah rahe hain। thode samay ke liye baapdaada ne kaarya ke liye aapko yeh tan diya hai। to aap kya ban gaye? mehmaan! mere-pan ka tyaag aur mehmaan samajh mahaan kaarya mein lagaao। mehmaan ko kya yaad rehta hai? asli ghar yaad rehta hai ya usi mein hi phans jaate ho! to aap sabka yeh shareer roopi ghar bhi, yeh phaarishta swaroop hai, phir devta swaroop hai। usko yaad karo। is puraane shareer mein aise hi nivaas karo jaise baapdaada puraane shareer ka aadhaar lete hain lekin shareer mein phans nahin jaate hain। karma ke liye aadhaar liya aur phir apne pharishte swaroop mein sthit ho jaao। apne niraakaari swaroop mein sthit ho jaao। nyaarepan ki oopar ki oonchi sthiti se neeche saakaar karmendriyon dvaara karma karne liye aao,isko kaha jaata hai - ‘mehmaan arthaat mahaan'। aise rehte ho? tyaag ka pahla kadam poora kiya hai?

baapdaada hansi ki baat yeh sunte hain ki vartamaan samay koi bhi apne ko kam nahin samajhte। agar kisi ko bhi kaha jaae ki do mein se ek chhota, ek bada ban jaae to kya karte hain?apne ko kam samajhte hain? kyon, kya ke shastra lekar ulta shakti swaroop dikhaate hain। yeh bhi alankaar koi kam nahin hain। jaise sarva shaktiyon ke alankaar hain vaise maaya va raavan ki bhujaayen bhi koi kam nahin hain। shaktiyon ko bhujaaen dhaari dikhaaya hai। ashta bhujaadhaari, 16 bhujaadhaari bhi dikhaate hain lekin raavan ke sir jyaada dikhaate hain। yeh kyon? kyonki raavan maaya ki shakti pahle dimaag ko hi halchal mein laati hai। jis samay koi bhi maaya aati hai to second mein uske kitne roop hote hain?kyon,kya,aise, vaise,jaise kitne question ke sir paida ho jaate hain। ek kaatte hain to doosra paida ho jaata hai। ek hi samay mein 10 baaten buddhi mein phauran aa jaati hain। to ek baat ko 10sir lag gaye na! in baaton ka to anubhav hai na? phir ek-ek sir apna roop dikhaata hai। yahi 10sheesh ke shastradhaari ban jaate hain।

shakti arthaat sahayogi। abhimaan ke sir vaali shakti nahin lekin sada sarva bhujaadhaari arthaat sarva paristhiti mein‘sahayogi'। raavan ke 10sir vaali aatmaayen har chhoti-si paristhiti mein bhi kabhi sahayogi nahin banegi। kyon,kya, kaise ke sir dvaara apna ulta abhimaan pratyaksha karti rahengi। kyon ka question hal karengi to phir kaise ka sir ooncha ho jaayega arthaat ek baat ko suljhaayengi to phir dusri baat shuru kar dengi। doosri baat ko theek karengi to teesra sir paida ho jaayega। baar-baar kahenge yeh baat theek hai lekin yeh kyon? woh kyon? isko kaha jaata hai ki ek baat ke 10 sheesh lagaane vaali shakti। sahayogi kabhi nahin banenge, sada har baat mein opposition karenge। to opposition karne vaale raavan sampradaay ho gaye na। chaahe brahman ban gaye lekin us samay ke liye aasuri shakti ka prabhaav hota hai, vasheebhoot hote hain। aur shakti swaroop har paristhiti mein, har kaarya mein sada sahayogi ban auron ko bhi sahayogi banaayenge। chaahe svayan ko sahan bhi karna pade,tyaag bhi karna pade lekin sada sahayogi honge। sahayog ki nishaani bhujaayen hain,isliye kabhi bhi koi sangathit kaarya hota hai to kya shabd bolte ho? apni-apni anguli do, to yeh sahayog dena hua na। anguli bhi bhuja mein hai na। to bhujaayen sahayog ki hi nishaani dikhaai hain। to samjha shakti ki bhujaayen aur raavan ke sir। to apne ko dekho ki sada ke sahayogi moorta bane hain?tyaag moorta banne ka pahla kadam follow father ke samaan kiya hai? brahma baap ko dekha,suna - sankalp mein,mukh mein sadaiv kya raha?yeh baap ka rath hai। to aapka rath kiska hai? kya sirf brahma ne rath diya va aap logon ne bhi rath diya?brahma ka praveshta ka part alag hai lekin aap sabne bhi tan tera kaha - na ki tan mera। aap sabka bhi vaayda hai jaise chalaao, jahaan bithaao… yeh vaayda hai na? va aankh ko main chalaaoonga baaki ko baap chalaayen?kuchh manmat par chalenge, kuchh shreemat par chalenge। aisa vaayda to nahin hai na? to koi bhi karmendriy ke vasheebhoot hona yeh shreemat hai va manmat hai?to samjha,tyaag ki paribhaasha kitni guhya hai! isliye number ban gaye hain। abhi to sirf deh ke tyaag ki baat sunaai hai। aage aur bahut hain। abhi to tyaag ki seedhiyaan bhi bahut hain,yeh pahli seedhi ki baat kar rahe hain। tyaag mushkil to nahin lagta?sabko chhodna padega। agar puraane ke badle naya mil jaae to mushkil hai kya! abhi-abhi milta hai। bhavishya milna to koi badi baat nahin lekin abhi-abhi puraana bhaan chhodo, pharishta swaroop lo। jab puraani duniya ke deh ka bhaan chhod dete ho to kya ban jaate ho? double light। abhi hi bante ho। parantu agar na yahaan ke na vahaan ke rehte ho to mushkil lagta hai। na poora chhodte ho,na poora lete ho to adhamre ho jaate ho,isliye baar-baar lamba shvaans uthaate ho। koi bhi baat mushkil hoti to lamba shvaans uthta hai। marne mein jo maja hai - lekin poora maro to। lene mein kehte ho poora lenge aur chhodne mein mitti ke bartan bhi nahin chhodenge। isliye mushkil ho jaata hai। vaise to agar koi mitti ka bartan rakhta hai to baapdaada rakhne bhi den,baap ko kya parvaah hai! bhal rakho। lekin svayan hi pareshaan hote ho। isliye baapdaada kehte hain chhodo। agar koi bhi puraani cheej rakhte ho to result kya hoti hai?baar-baar buddhi bhi unhon ki hi bhatakti hai। pharishta ban nahin sakte। isliye baapdaada to aur bhi hajaaron mitti ke bartan de sakte hain - kitna ikatthe kar lo। lekin jahaan kichda hoga vahaan kya paida honge? machchhar! aur machchhar kisko kaatenge? to baapdaada bachchon ke kalyaan ke liye hi kehte hain - puraana chhod do। adhamre nahin bano। marna hai to poora maro, nahin to bhale hi jinda raho। mushkil hai nahin lekin mushkil bana dete ho। kabhi-kabhi mushkil ho jaata hai। jab raavan ki sir lag jaate hain to mushkil hota hai। jab bhujaadhaari shakti ban jaate ho to sahaj ho jaata hai। sirf ek kadam sahayog dena aur padam-kadmon ka sahayog milna ho jaata। lekin pahle jo ek kadam dena padta hai usmein ghabra jaate ho। milna bhool jaata hai, dena yaad aa jaata hai। isliye mushkil anubhav hota hai। achha –

aise sada sahayog moorta, sada tyaag dvaara shreshtha bhaagya anubhav karne vaale, kadam-kadam mein follow father karne vaale, sada apne ko mehmaan arthaat mahaan aatma samajhne vaale,aise behad ke sannyaas karne vaale shreshtha aatmaon ko baapdaada ka yaadapyaar aur namaste''

party ke saath-avyakt baapdaada ki mulaakaat-

1. paristhiti roopi pahaad ko svasthiti se jump dekar paar karo:- apne ko sada samartha aatmaayen samajhte ho! samartha aatma arthaat sada maaya ko chelenja kar vijay praapta karne vaale। sada samartha baap ke sang mein rahne vaale। jaise baap sarvashaktivaan hai vaise ham bhi master sarvashaktivaan hain। sarva shaktiyaan shastra hain, alankaar hain, aise alankaardhaari aatma samajhte ho? jo sada samartha hain ve kabhi paristhitiyon mein dagmag nahin honge। paristhiti se svasthiti shreshtha hai। svasthiti dvaara kaisi bhi paristhiti ko paar kar sakte ho। jaise vimaan dvaara udte hue kitne pahaad,kitne samudra paar kar lete hain, kyonki oonchaai par udte hain। to oonchi sthiti se second mein paar kar lenge। aise lagega jaise pahaad ko va samudra ko bhi jump de diya। mehnat ka anubhav nahin hoga।

2. rob ko tyaag, roohaab ko dhaaran karne vaale sachche sevaadhaari bano:- sabhi kumaar sada roohaaniyat mein rehte ho? rob mein to nahin aate? youth ko rob jaldi aa jaata hai। yeh samajhte hain ham sab kuchh jaante hain, sab kar sakte hain। javaani ka josh rehta hai। lekin roohaani youth arthaat sada roohaab mein rahne vaale। sada namrachitta। kyonki jitna namrachitta honge utna nirmaan karenge। jahaan nirmaan honge vahaan rob nahin hoga, roohaaniyat hogi। jaise baap kitna namrachitta bankar aate hain, aise follow father। agar jara bhi seva mein rob aata to woh seva samaapta ho jaati hai।

3. bharpoor aatmaon ke chehre dvaara seva:- sabhi saagar ke sameep rahne vaale sada saagar ke khajaanon ko apne mein bharte jaate ho। saagar ke tale mein kitne khajaane hote hain। to saagar ke kanthe par rahne vaale,sameep rahne vaale - sarva khajaanon ke maalik ho gaye। vaise bhi jab kisi ko koi khajaana praapta hota hai to khushi mein aa jaate hain। achaanak koi ko thoda dhan mil jaata hai to nasha chadh jaata hai। aap bachchon ko aisa dhan mila hai jo kabhi bhi koi chheen nahin sakta,loot nahin sakta। 21peedhi sada dhanvaan rahenge। sarva khajaanon ki chaabi hai ‘‘baba''। baba bola aur khajaana khula। to chaabi bhi mil gai, khajaana bhi mil gaya। sada maalaamaal ho gaye। aise bharpoor maalaamaal aatmaon ke chehre par khushi ki jhalak hoti hai। unki khushi ko dekh sab kahenge - pata nahin inko kya mil gaya hai, jaanne ki ichchha rakhenge। to unki seva svatah ho jaayegi।

4. maayaajeet banne ke liye svamaan ki seat par raho:- sada svayan ko svamaan ki seat par baitha hua anubhav karte ho?punya aatma hain, oonche te oonchi brahman aatma hain, shreshtha aatma hain, mahaan aatma hain, aise apne ko shreshtha svamaan ki seat par anubhav karte ho? kahaan bhi baithna hota hai to seat chaahiye na! to sangam par baap ne shreshtha svamaan ki seat di hai, usi par sthit raho।

smriti mein rehna hi seat va aasan hai। to sada smriti rahe ki main har kadam mein punya karne vaali punya aatma hoon। mahaan sankalp, mahaan bol, mahaan karma karne vaali mahaan aatma hoon। kabhi bhi apne ko saadhaaran nahin samjho। kiske ban gaye aur kya ban gaye?isi smriti ke aasan par sada sthit raho। is aasan par viraajmaan honge to kabhi bhi maaya nahin aa sakti। himmat nahin rakh sakti। aatma ka aasan svamaan ka aasan hai, us par baithne vaale sahaj hi maayaajeet ho jaate hain।

5. sarva sambandh ek ke saath jodkar bandhanmukta arthaat yogayukta bano:- sada svayan ko bandhanmukta aatma anubhav karte ho? svatantra ban gaye ya abhi koi bandhan rah gaya hai? bandhanmukta ki nishaani hai -‘‘sada yogayukta''। yogayukta nahin to zaroor bandhan hai। jab baap ke ban gaye to baap ke sivaae aur kya yaad aayega? sada priy vastu ya badhiya vastu yaad aati hai na। to baap se shreshtha vastu ya vyakti koi hai? jab buddhi mein yeh spashta ho jaata hai ki baap ke sivaae aur koi bhi shreshtha nahin to ‘sahajyogi'ban jaate hain। bandhanmukta bhi sahaj ban jaate hain, mehnat nahin karni padti। sab sambandh baap ke saath jud gaye। mera-mera sab samaapta, isko kaha jaata hai - sarva sambandh ek ke saath।

6. sameep aatmaon ki nishaani hai - samaan:- sada apne ko sameep aatma anubhav karte ho? sameep aatmaon ki nishaani hai - samaan। jo jiske sameep hota hai, us par uske sang ka rang svatah hi chadhta hai। to baap ke sameep arthaat baap ke samaan। jo baap ke gun,woh bachchon ke gun, jo baap ka karttavya woh bachchon ka। jaise baap sada vishwa-kalyaankaari hai aise bachche bhi vishwa-kalyaankaari। to har samay yeh check karo ki jo bhi karma karte hain,jo bhi bol bolte hain woh baap samaan hain। baap se milaate chalo aur kadam uthaate chalo to samaan ban jaayenge। jaise baap sada sampanna hain,sarvashaktivaan hain vaise hi bachche bhi master ban jaayenge। kisi bhi gun aur shakti ki kami nahin rahegi। sampanna hain to achal rahenge। dagmag nahin hoge।

7. seva ki bhaag-daud bhi manoranjan ka saadhan hai:- sabhi apne ko har kadam mein yaad aur seva dvaara padmon ki kamaai jama karne vaale padmaapadma bhaagyavaan samajhte ho? kamaai ka kitna sahaj tareeka mila hai! aaraam se baithe baithe baap ko yaad karo aur kamaai jama karte jaao। mansa dvaara bahut kamaai kar sakte ho, lekin beech-beech mein jo seva ke saadhnon mein bhaag-daud karni padti hai - yeh to ek manoranjan hai। vaise bhi jeevan mein change chaahte hain to yeh change ho jaati hai। vaise kamaai ka saadhan bahut sahaj hai, second mein padma jama ho jaate hain,yaad kiya aur bindi badh gai। to sahaj avinaashi kamaai mein busy raho।

panjaab nivaasi bachchon ko yaad pyaar dete hue baapdaada bole:- panjaab nivaasi sevaadhaari bachchon ko seva ke umang utsaah ke prati sada mubaarak ho। jitni seva utna bahut-bahut meva khaane vaale banenge। panjaab mein vaise hi meva khaane ke aadti hain। to yahaan bhi jitni seva karenge utna meva arthaat pratyakshaphal khaane vaale banenge। yeh to vishesh behad ki seva hai। mela arthaat baap se milan manvaana। mela kar rahe hain arthaat aatmaon ko milan karaane ke nimitta ban rahe hain। behad ki seva, behad ka umang-utsaah hai। isse saphalta bhi behad ki hoti hai। bahut achha umang rakh seva ki hai aur sada aise umang utsaah mein rehte aage badhte rehna। baapdaada jaante hain, bahut achhe puraane paalna liye hue bachche nimitta bane hain। puraane bachchon ka bhaagya to ab tak shaastra bhi ga rahe hain aur chaitanya mein jo naye-naye bachche aate hain woh bhi unka varnan karte hain। to aise padmapti banne ka chance lene vaale sevaadhaari bachchon ko padmaguna yaadapyaar। achha-