Avyakt murli for Sunday 24 April 1983

>

24-04-83 om shanti avyakt baapdaada madhuban

roohaani personality

kumaaron ki bhatti mein praan avyakt baapdaada ke uchchaare hue madhur mahaavaakya:-

aaj baapdaada vishwa ki sarva aatmaon prati pratyaksha jeevan ka pramaan dene vaale bachchon se milne aaye hain। kumaar so brahmaakumaar, tapasvi kumaar, raajarishi kumaar, sarva tyaag se bhaagya praapta karne vaale kumaar aisi shreshtha aatmaon ka aaj vishesh sangathan hai। kumaar jeevan shaktishaali jeevan gaai jaati hai। lekin brahmaakumaar double shaktishaali kumaar hai। ek to shaareerik shakti doosri aatmik shakti। saadhaaran kumaar shaareerik shakti va vinaashi occupation ki shakti vaale hain। brahmaakumaar avinaashi oonche te oonche master sarvashaktivaan ke occupation ke shaktishaali hain। aatma pavitrata ki shakti se jo chaahe woh kar sakti hai। brahmaakumaaron ka sangathan vishwa parivartak sangathan hai। sabhi apne ko aise shaktishaali samajhte ho? apne ko pavitrata ka janma-siddha adhikaar praapta kiya hua adhikaari aatma samajhte ho? brahmaakumaar ka arth hi hai -‘pavitra kumaar’। brahma baap ne divya janma dete ‘‘pavitra bhav, yogi bhav’’yahi vardaan diya। brahma baap ne janmate hi badi maa ke roop mein pavitrata ke pyaar se paalna ki। maa ke roop se sada pavitra bano,yogi bano,shreshtha bano baap samaan bano,vishesh aatma bano, sarvagun moortta bano,gyaan moortta bano,sukh shanti swaroop bano,har roj yeh lori di। baap ke yaad ki godi mein paalan kiya। sada khushiyon ke jhoole mein jhulaaya। aise maat pita ke shreshtha bachche - brahmaakumaar va kumaari hain। aisa smriti ka samartha nasha rehta hai! brahmaakumaar ke vishesh jeevan ke mahatva ko sada yaad rakhte ho? sirf naamdhaari brahmaakumaar to nahin? apne aapko shreshtha jeevandhaari brahmaakumaar samajhte ho? sada yeh yaad rehta hai ki vishwa ki vishaal stage par part bajaane vaale vishesh paartadhaari hain। va sirf ghar mein va sevaakendra par va daphtar mein part bajaane vaale hain! har karma karte vishwa ki aatmaayen humein dekh rahi hain yeh smriti mein rehta hai?vishwa ki aatmaayen jis najar se aap sabko dekhti hain yahi vishesh paartadhaari arthaat hero paartadhaari hain, usi pramaan har karma karte rehte ho? va yeh yaad rehta ki saadhaaran roop se aapas mein bol rahe hain,chal rahe hain!

brahmaakumaar ka arth hi hai sada purity ki personality aur royalty mein rehna। yahi purity ki personality vishwa ki aatmaon ko purity ki taraph aakarshit karegi। aur yahi purity ki royalty dharmaraajpuri ki raayalti dene se chhudaayegi। raayalti ke donon hi arth hote hain। isi raayalti ke anusaar bhavishya royal family mein aa sakenge। to check karo aisi royalty aur personality jeevan mein apnaai hai? youth group personality ko jyaada banaati hai na! to apni roohaani personality avinaashi personality apnaai hai? jo bhi dekhe harek brahmaakumaar aur kumaari se yeh personality anubhav kare। shareer ki personality woh to aatmaon ko dehbhaan mein laati hai aur purity ki personality dehi abhimaani banaae baap ke sameep laati hai। to vishesh kumaar group ko ab kya seva karni hai?ek to apne jeevan parivartan dvaara aatmaon ki seva, apne jeevan ke dvaara aatmaon ko jeeydaan dena। sva-parivartan dvaara auron ko parivartan karna। anubhav karaao ki brahmaakumaar arthaat vritti, drishti,kritti aur vaani parivartan। saath-saath purity ki personality,roohaani raayalti ka anubhav karaao। aate hi, milte hi is personality ki or aakarshit hon। sada baap ka parichay dene vaale va baap ka saakshaatkaar karaane vaale roohaani darpan ban jaao। jis chitra aur charitra se sarva ko baap hi dikhaai de। kisne banaaya?banaane vaala sada dikhaai de। jab bhi koi wonderful vastu ko dekhte hain va wonderful parivartan dekhte hain to sabke man se,mukh se yahi aavaaz nikalta hai ki kisne banaai va yeh parivartan kaise hua। kis dvaara hua। yeh to jaante ho na। itna bada parivartan jo kaudi se heera ban jaae to sabke man mein banaane vaala svatah hi yaad aayega। kumaar group bhaagdaud bahut karta hai। seva mein bhi bahut bhaag daud karte ho na। lekin seva ke kshetra mein bhaag daud karte ‘balance’rakhte ho?sva seva aur sarva ki seva donon ka balance sada rehta hai। balance nahin hoga to seva ki bhaag daud mein maaya bhi buddhi ki bhaag daud kara deti hai।

balance se kamaal hoti hai। balance rakhne vaale ka parinaam seva mein bhi kamaal hogi। nahin to baaharmukhta ke kaaran kamaal ke bajaae apne va doosron ke bhaav svabhaav ki dhamaal mein aa jaate ho। to sada sarva ki seva ke saath-saath pahle sva seva aavashyak hai। yeh balance sada sva mein aur seva mein unnati ko praapta karaata rahega। kumaar to bahut kamaal kar sakte hain। kumaar jeevan ke parivartan ka prabhaav jitna duniya par padega utna badon ka nahin। kumaar group government ko bhi apne parivartan dvaara prabhu parichay de sakte ho। government ko bhi jaga sakte ho। lekin woh pariksha lenge। aise hi nahin maanenge। to aise kumaar taiyaar hai! gupta si.aai.D. aapke paper lenge ki kahaan tak vikaaron par vijayi banen hain। aap sabke naam government mein bheje? 500kumaar bhi koi kam thode hi hain। sabne lejar mein apna naam aur address bhara hai na। to aapki list bhejen?sabhi soch rahe hain pata nahin kaun se si.aai.D. aayenge! jaan boojh kar krodh dilaayenge। paper to practical lenge na। practical paper dene liye taiyaar ho? baapdaada ke paas sabka haan aur na film ki reeti se bhar jaata hai। yeh lakshya rakho ki aisa roohaani aatmik shaktishaali youth group banaaven jo vishwa ko challenge kare ki ham roohaani youth group vishwa shanti ki sthaapna ke kaarya mein sada sahayogi hain। aur isi sahayog dvaara vishwa parivartan karke dikhaayenge। samjha kya karna hai। aisa pakka group ho। aise nahin aaj challenge kare aur kal svayan hi change ho jaaen। to aisa sangathan taiyaar karo। majority naye-naye kumaar hain। lekin last so fast jaakar dikhaao। balance ki kamaal se vishwa ko kamaal dikhaao। achha –

aise sada sva parivartan dvaara sarva ka parivartan karne vaale, apne janma-siddha vardaan va adhikaar, ‘yogi bhav, pavitra bhav’ ko sada jeevan mein anubhav karaane vaale,sada purity ki personality dvaara anya aatmaon ko baap taraph aakarshit karaane vaale, avinaashi occupation ke nashe mein rahne vaale,maat pita ki shreshtha paalna ka parivartan dvaara return dene vaale aise roohaani raayalti vaali vishesh aatmaon ko baap daada ka yaadapyaar aaur namaste।

party ke saath

(1) sada apne ko double light arthaat sarva bandhanon se mukta halke samajhte ho?halke-pan ki nishaani kya hai? halka sada udta rahega। bojh neeche le aata hai। sada svayan ko baap ke havaale karne vaale sada halke rahenge। apni jimmevaari baap ko de do arthaat apna bojh baap ko de do to svayan halke ho jaayenge। buddhi se surrender ho jaao। agar buddhi se surrender honge to aur koi baat buddhi mein nahin aayegi। bas sab kuchh baap ka hai,sab kuchh baap mein hai to aur kuchh raha hi nahin। jab raha hi nahin to buddhi kahaan jaayegi koi puraani gali,puraane raaste rah to nahin gaye hain! bas ek baap, ek hi yaad ka raasta, isi raaste se manzil par pahuncho।

(2) sada khushi ke jhoole mein jhoolne vaale ho na। kitna badhiya jhoola baapdaada se praapta hua hai। yeh jhoola kabhi toot to nahin jaata?yaad aur seva ki donon rassiyaan tight hain to jhoola sada hi ekras rehta hai। nahin to ek rassi dheeli,ek tight to jhoola hilta rahega। jhoola hilega to jhoolne vaala girega। agar donon rassiyaan majboot hain to jhoolne mein manoranjan hoga। agar gire to manoranjan ke bajaae duhkh ho jaayega। to yaad aur seva donon rassiyaan samaan rahen, phir dekho brahman jeevan ka kitna aananda anubhav karte ho। sarvashakti- vaan baap ka saath hai,khushiyon ka jhoola hai aur chaahiye hi kya!